1. Poukisa Babilonyen-yan rémarké Danyèl ?

 DANYÈL té sa roun jennjan lò Babilonyen-yan tchenbé li pou mennen l’ Babilòn, lwen di Jérizalèm. A té roun prizonyé. Mé magré i té jenn, grotchap Babilonyen-yan rémarké li. Yé wè ‘sa yé wéy té pouvé wè’ : yé wè ki so « kò pa té [...] gen pyès défo », ki i té « bèl » é ki i té ka vini di roun fanmi enpòrtan (1 Sam. 16:7). Donk yé bay li roun fòrmasyon pou i té pouvé travay annan palè-a (Dan. 1:3, 4, 6).

2. Kisa Jéova té ka rousanti pou Danyèl ? (Ézéchiel 14:14).

² Si Jéova té kontan Danyèl, a pa paské i té bèl ni paské i té ka fè roun travay èspésyal annan palè-a. I té kontan Danyèl paské sa jennjan-an té chwazi rété fidèl ké li. Anfèt, pitèt Danyèl té gen ven lannen rounso, ouben mwens ki sa, lò Jéova di ki i té jis kou Noé ké Jòb ki té rété fidèl pannan roun patché lannen (Gen. 5:32 ; 6:9, 10 ; Job 42:16, 17 ; li Ézéchiel 14:14). É Jéova kontinyé kontan Danyèl pannan tout so lavi ki té long é ki té bèl toubonnman (Dan. 10:11, 19).

3. Di kisa nou ké palé annan sa artik-a ?

³ Annan sa artik-a, nou ké palé di dé kalité Danyèl té gen ki fè li gen bokou valò pou Jéova. Nou ké wè a kisa sa dé kalité-ya é annan ki sitiasyon Danyèl montré ki i té gen sa kalité-ya. Nou ké wè kisa ki idé li travay sa kalité-ya. É pou fini, nou ké wè kouman nou pouvé imité li. Menm si sa artik-a fèt pou jennjan-yan èspésyalman, nou tout pouvé pran èkzanp asou Danyèl.

4. Rakonté annan ki sitiasyon Danyèl montré ki i té gen kouraj.

⁴ Roun moun ki gen kouraj pouvé pè, mé i pa ka lésé sa anpéché li fè sa ki bon. Danyèl té sa roun jennjan ki té plen ké kouraj. Annou palé di dé bagaj ki rivé li ki ka montré sa. Prémyé-a, a té pitèt dé lannen apré Babilonyen-yan krazé Jérizalèm. Imajiné sa ki rivé : Nabikodonozòr, rwa Babilòn-an, enkyèt pou mouri paské i wè roun bi papa èstati annan roun rèv. I ka ménasé tchwé tout saj péyi-a, Danyèl osi annan, si yé pa ka di li ki rèv i fè é kisa sa rèv-a lé di (Dan. 2:3-5). Danyèl divèt fè vit paské plizyèr moun ka riské mouri. Donk i ka ‘alé wè rwa-a é i ka doumandé li bay li roun ti moso tan pou i di li kisa rèv-a lé di’ (Dan. 2:16). Nou ka wè kouman Danyèl gen kouraj ké lafwa paské Labib-a pa ka di ki i té ja èspliké roun rèv. Mé annou viré asou nou istwè. I ka doumandé so zanmi, Chadrak, Méchak ké Abèd-Négo (a té yé non Babilonyen), « priyè Bondjé-a ki annan syèl-a pou i aji ké mizérikòrd ké yé parapòrta sa sigré-a » (Dan. 2:18). Jéova ka réponn yé lapriyè é gras a li, Danyèl ka rivé èspliké rèv Nabikodonozòr. A konsa, Danyèl ké so zanmi pa mouri !

5. Annan ki ròt sitiasyon Danyèl té divèt gen kouraj ?

⁵ Pita, rounòt kou ankò, Danyèl divèt montré ki i gen kouraj. Nabikodonozòr ka fè rounòt rèv ki ka fè l’ pè toubonnman. Sa maré-a, i ka wè roun bi papa pyébwa. Danyèl ka pran kouraj é i ka èspliké rwa-a sa so rèv lé di ; i ka di li ki i ké vin fou é ki pannan roun tan, i pa ké rwa ankò (Dan. 4:25). Menm si akoz di sa, Nabikodonozòr pouvé krè ki Danyèl kont li épi fè yé tchwé l’, Danyèl ka montré i gen kouraj é i ka di li sa so rèv lé di kanmenm.

6. Kisa ki dèt idé Danyèl gen kouraj ?

⁶ Kisa ki dèt idé Danyèl gen kouraj pannan tout so lavi ? So papa ké so manman divèt bay li roun bon èkzanp. Yé fè sa Bondjé té ka doumandé paran israyélit-ya fè, yé ansényé Danyèl so  Lalwa (Deut. 6:6-9). Danyèl té konnèt pi gran koumannman-yan annan Lalwa-a, kou Dis Koumannman-yan parèkzanp, mé i té konnèt osi plizyèr détay annan l’. Parèkzanp, i té savé ki bagaj roun Israyélit pa té pouvé manjé b (Lév. 11:4-8 ; Dan. 1:8, 11-13). Anplis di sa, Danyèl té konnèt istwè sèrvitèr Bondjé, é i té savé sa ki té rivé yé lò yé pa té obéyi so Lalwa (Dan. 9:10, 11). Pou fini, parapòrta sa i té viv, i té sir ki Jéova ké so zanj ki pwisan té ka idé li (Dan. 2:19-24 ; 10:12, 18, 19).

7. Ki ròt bagaj idé Danyèl gen kouraj ? (gadé zimaj-a osi).

⁷ Danyèl té ka étidyé sa profèt-ya té marké, profèt Jérémi parèkzanp. Afòrs i étidyé, i vin konprann ki i pa té ka rété bokou tan pou Jwif-ya délivré di Babilòn (Dan. 9:2). Paské i wè kouman profési-ya té ka réyalizé, sa fè li fè Jéova ankò plis konfyans. É kou nou byen savé, sa-ya ki pa ka lésé anyen anpéché yé fè Jéova konfyans pouvé gen bokou kouraj (gadé Romains 8:31, 32, 37-39). É sa ki pi enpòrtan ankò, a ki Danyèl té ka priyè so Papa ki annan syèl-a souvan (Dan. 6:10). I té ka konfésé so péché pou li, i té ka di li sa i té gen asou so tchò, é i té ka doumandé li idé li (Dan. 9:4, 5, 19). Danyèl té sa roun moun kou nou menm, donk i pa fèt ké kouraj. I vin gen kouraj paské i étidyé, i priyè é i fè Jéova konfyans.

8. Kisa nou divèt fè pou nou gen plis kouraj ?

⁸ Kisa nou divèt fè pou nou gen plis kouraj ? Nou papa ké nou manman pouvé ankourajé nou pou nou gen kouraj, mé yé pa pouvé fè nou gen kouraj kousidiré a té roun éritaj yé té ka bay nou. To ka anprann gen kouraj menm fason to ka anprann fè roun bagaj to pa janmen fè anvan. Pou to anprann byen fè sa bagaj-a, a pou to byen gadé kouman moun-an ki ka montré to-a ka fè, épi a pou to fè kou li. Menm fason-an, nou ké gen plis kouraj si nou ka byen gadé kouman ròt moun ka montré yé gen kouraj, épi si nou ka swiv yé èkzanp. Donk, kisa èkzanp Danyèl anprann nou ? Nou divèt byen konnèt Paròl Bondjé-a. Nou divèt palé pou Jéova souvan épi di li tousa nou gen ofon nou tchò pou nou fè nou lanmityé ké li vin pi fò. Nou divèt fè li konfyans é nou divèt sir ki i ka idé nou. Konsa, lò i ké gen roun sitiasyon koté nou ké divèt gen kouraj, nou ké gen kouraj.

9. Ki bon rézilta nou ké trapé si nou gen kouraj ?

⁹ Si nou gen kouraj, nou ké trapé bon rézilta. Annou palé di Ben ki ka rété an Almagn. Annan so lékòl, tout moun té ka krè annan évolution-an épi té ka pansé ki zafè kréyasyon-an ki annan Labib-a, pa vré. Roun jou, i vin gen lokazyon palé douvan tout so klas pou di poukisa i ka krè ki i gen roun moun ki kréyé tout bagaj. I pran kouraj é i palé di so krwayans. Kouman so profésèr réyaji ? Ben ka réponn : « Mo profésèr pran tan byen kouté mo. I fè plizyèr fotokopi di sa mo té sèrvi pou mo té palé, épi i bay chak moun annan klas-a roun fotokopi. » É so kanmarad-ya menm ? I ka di : « Roun  patché annan yé kouté sa mo té gen pou di. Yé jis di mo ki yé té ka admiré mo. » Kou èkzanp Ben ka montré l’, souvan lò roun moun gen kouraj, moun-yan ka rèspèkté l’ é so konpòrtman pouvé fè moun ki sensèr vini òbò Jéova. Wi, nou gen patché bon rézon pou nou aji ké kouraj.

10. A kisa ki fidélité-a ?

¹⁰ Labib-a ka palé souvan di « fidélité », ouben « lanmou fidèl » Bondjé ka montré pou so zanmi. Mo ébré Labib-a ka sèrvi pou « fidélité » ouben « lanmou fidèl », a menm mo ébré-a i ka sèrvi pou palé di lanmou sèrvitèr Bondjé-ya gen pou yé konpanyen (2 Sam. 9:6, 7). Pi tan-an ka pasé, pi nou fidélité pou Jéova pouvé vin pi fò. Annou wè kouman fidélité Danyèl vin pi fò.

11. Ki éprèv Danyèl jwenn lò i té ja gen roun bon laj ? (gadé zimaj-a anlè prémyé paj-a).

¹¹ Pannan tout so lavi, Danyèl té gen pou montré ki i té fidèl ké Jéova. Mé a lò i té gen pasé 90 lannen roun bagaj ki té rèd menm rivé li. Mèd ké Pèrs-ya té pran Babiblòn, é a Daryis ki té rwa. Plizyèr fonksyonèr rwa-a fè roun konplo pou tchwé Danyèl paské yé pa té kontan li é yé pa té ka rèspèkté so Bondjé. Donk, yé fè rwa-a fè roun lalwa. Sa lalwa-a té ké montré pou kimoun Danyèl té fidèl : pou so Bondjé ouben pou rwa-a. Sèl bagaj Danyèl té divèt fè pou i té montré ki i té fidèl pou rwa-a, a té fè kou tout moun épi pa priyè Jéova pannan 30 jou. Kou i désidé pa fè pyès konpromi, yé jité l’ annan trou-a koté i té gen lyon. Mé Jéova rékonpansé so fidélité, i sové so lavi (Dan. 6:12-15, 20-22). Kouman nou pouvé rété fidèl ké Jéova kou Danyèl ?

12. Kouman Danyèl rivé rété fidèl ké Jéova ?

¹² Kou nou wè l’, si nou lé rété fidèl ké Jéova, nou divèt kontan li bokou. Anyen pa té pouvé anpéché Danyèl rété fidèl ké Jéova paské i té kontan li bokou. Pi i té ka réfléchi asou so bèl kalité épi asou fason i té ka montré yé, pi so lanmou pou li té ka vin pi fò (Dan. 9:4). I té ka pran tan osi réfléchi asou tout bèl  bagaj so Papa ki annan syèl-a té fè pou li é pou so sèrvitèr-ya. I té gen bokou rékonésans (Dan. 2:20-23 ; 9:15, 16).

13. a) Annan ki sitiasyon sa pouvé rèd pou jennjan-yan kontinyé rété fidèl jòdla ? (gadé zimaj-a osi). b) Kou nou ka wè l’ annan vidéyo-a, kouman to té ké pouvé réponn si roun moun té ka doumandé to kisa Témwen Jéova-ya ka pansé di omosèksyalité-a ?

¹³ Kou Danyèl, nou jennjan-yan ka viv an mitan moun ki pa ka rèspèkté ni Jéova ni sa i ka di asou sa ki bon ké sa ki pa bon. Détan, moun-yan pa kontan sa-ya ki ka di ki yé kontan Bondjé. Roun ran annan yé ka jis malmennen nou jennjan-yan pou anpéché yé rété fidèl ké Jéova. Parèkzanp, annou wè sa ki rivé Gabriel c, ki ka rété an Òstrali. Lò i té o lisé, i trouvé so kò annan roun sitiasyon ki té rèd menm. Roun annan so profésèr doumandé zélèv-ya annan so klas kouman yé té ké réyaji si roun annan yé zanmi té ka di yé ki i té omosèksyèl. Apré sa, profésèr-a doumandé tout sa-ya ki té ké dakò pou di ki i pa gen pyès problèm si yé zanmi omosèksyèl, mété yé kò asou roun bò, épi ròt-ya, asou ròt bò-a. Men sa Gabriel ka rakonté : « Apar mo ké rounòt Témwen, tout moun annan klas-a mété yé kò asou menm bò-a. » Akoz di sa ki pasé apré, sa té rèd menm pou Gabriel rété fidèl ké Jéova. Men sa i ka di : « Pannan tout larèstan léson-an, ròt zélèv-ya é menm profésèr-a osi ari di nou tèt é yé jouré nou. Mo fè tousa mo té pouvé pou défann mo lafwa jantiman, mé yé pa kouté mo menm. » Kouman sa aji asou Gabriel ? Men sa i ka réponn : « Sa pa fè mo plézi tandé yé jouré mo konsa, mé a pa ti kontan mo té kontan paské mo té pouvé défann mo krwayans san mo pa fè pyès konpromi d. »

14. Bay roun fason ki ké idé to byen désidé rété fidèl ké Jéova.

¹⁴ Pi nou lanmou pou Jéova ké fò, pi nou ké byen désidé rété fidèl ké li. É nou ké pouvé gen sa kalité lanmou-a pou li si nou ka chaché konnèt so kalité pi byen. Pou to rivé fè sa, to pouvé étidyé sa i kréyé parèkzanp (Rom. 1:20). Si to lé kontan Jéova é rèspèkté li plis, to pouvé gadé artik-ya ké vidéyo-ya annan parti « Évolution ou conception ? ». Men rounòt lidé : to pouvé étidyé sa ki annan ti liv La vie a-t-elle été créée ? ké Cinq questions à se poser sur l’origine de la vie e. Men sa Esther, roun jenn sò ki ka rété o Danmark ka pansé di sa ti liv-ya : « Fason yé ka èspliké bagaj-ya entérésan toubonnman. Yé pa ka di to sa to divèt krè, yé ka palé di bagaj-ya kou yé fika, é a to pou désidé sa to lé krè. » Men sa Ben nou ja palé anvan ka di : « Sa piblikasyon-yan vréman fè mo lafwa vin pi fò. Yé bay mo prèv ki a byen Bondjé ki fè tout bagaj. » Lò to ké fin étidyé yé, asiré pa pitèt to ké dakò ké sa Labib-a ka di : « To ka mérité, Jéova nou Bondjé, rousouvwè laglwar ké lònò ké pwisans paské a to ki kréyé tout bagaj » (Rév. 4:11).

15. Kisa nou pouvé fè ankò pou nou gen roun lanmityé ké Jéova ki fò ?

¹⁵ Rounòt bagaj nou pouvé fè pou nou lanmou pou Jéova vin pi fò, a étidyé lavi so Pitit, Jézi. A sa roun jenn sò, Samira, ki ka rété an Almagn, fè. Men sa i ka di :  « A gras a Jézi mo anprann konnèt Jéova pi byen. » Lò i té piti, Samira pa té ka rivé konprann ki Jéova té pouvé gen santiman. Parkont i té ka rivé konprann sa Jézi té rousanti. I ka di : « Mo té kontan Jézi paské i té janti, é i té kontan timoun-yan. » Pi i té ka anprann bagaj asou Jézi, pi so lanmityé ké Jéova té ka vin pi fò. Poukisa ? I ka di : « Piti piti, mo vin konprann ki Jézi ka byen imité so Papa. Yé ka sanblé bokou, é mo konprann ki a té pou sa osi Jéova té voyé Jézi asou latè-a : a té pou pèrmèt moun-yan anprann konnèt li pi byen » (Jean 14:9). Si to lé to lanmityé ké Jéova vin pi fò, to pouvé anprann plis bagaj asou Jézi. Pi to ké konnèt Jézi, pi to ké kontan Jéova é to ké rété fidèl ké li.

16. Ki bénédiksyon nou ka jwenn paské nou ka rété fidèl ké Jéova ? (Psaume 18:25 ; Michée 6:8).

¹⁶ Souvan, sa-ya ki fidèl ké ròt-ya, ka rivé gen bon zanmi ki fidèl ké yé (Ruth 1:14-17). Anplis di sa, sa-ya ki fidèl ké Jéova kontan é yé ka santi yé kò byen. Poukisa ? Paské Jéova ka promèt ki i ké fidèl ké sa-ya ki fidèl (li Psaume 18:25 ; Michée 6:8). Ès to ka randé to kò kont : menm si nou toupiti parapòrta Kréyatèr-a ki tou-pwisan, i ka promèt nou ki i ké toujou kontan nou ! É pyès éprèv, pyès moun ki lé baré nou chimen, pa menm lanmò pa pouvé kasé sa lanmityé-a (Dan. 12:13 ; Luc 20:37, 38 ; Rom. 8:38, 39). Donk sa enpòrtan pou nou imité Danyèl é pou nou rété fidèl ké Jéova !

17-18. Ki ròt bagaj nou pouvé anprann ankò gras a Danyèl ?

¹⁷ Annan sa artik-a nou wè sèlman dé kalité Danyèl té gen. Mé i gen bokou ròt bagaj pou anprann gras a so èkzanp. Jéova bay li vizyon ké rèv, é i pèrmèt li èspliké plizyèr profési. Roun ran annan sa profési-ya ja fèt. É ròt-ya ka bay nou détay asou sa ki ké rivé dimen é ki ké touché lavi tout moun asou latè-a !

¹⁸ Annan ròt artik-a, nou ké gadé dé profési Danyèl ékri. Ki nou jenn ki nou vyé, sa profési-ya ké idé nou tout pran bon désizyon. Anplis di sa, yé ké idé nou gen plis kouraj é nou ké pi désidé ankò rété fidèl ké Jéova. Konsa, nou ké paré pou éprèv nou ké jwenn titalò.