1-2. Poukisa nou pouvé di ki Ecclésiaste 11:6 ka alé ké prédikasyon-an ?

ANNAN roun ran péyi, bokou moun anvi konnèt bon nouvèl-a. Sa Labib-a ka di, a sa menm yé ka chaché. Annan ròt péyi, près tout moun ka di i pa gen Bondjé é yé pa lé savé sa Labib-a ka di. É koté to ka rété ? Kouman moun-yan ka réyaji ? Ki moun-yan di nou koté lé ouben pa lé kouté, Jéova ka di nou kontinyé préché jistan i di nou arété.

² Lò Jéova ké désidé l’, nou ké arété préché, « é la lafen-an ké rivé » (Mat. 24:14, 36). Anvan sa, kouman nou pouvé rivé, ‘pa lésé nou lanmen pozé’ *, kou Ecclésiaste 11:6 ka di ? (li).

3. Kisa nou ké wè annan sa artik-a ?

³ Annan artik simenn pasé-a, nou wè kat kalité nou divèt gen pou nou divini vayan pou préché bon nouvèl-a (Mat. 4:19) Annan sa artik-a, nou ké wè trwa bagaj ki ké idé nou pi désidé préché, kèlkéswa problèm nou ka jwenn. Nou ké wè poukisa sa enpòrtan 1) pou nou mété prédikasyon-an an prémyé annan nou lavi, 2) pou nou gen pasyans é 3) pou nou kontinyé gen roun lafwa ki fò.

4. Poukisa nou divèt mété travay Jéova bay nou fè-a an prémyé annan nou lavi ?

⁴ Jézi di ki sa ki té ké pasé asou tout latè-a pannan dèrnyé jou-ya té ké rèd. I té savé ki akoz di sa, nou té ké pouvé  arété mété prédikasyon-an an prémyé annan nou lavi. A pou sa i di : « Panga » (Mat. 24:42). Annan lépòk Noé-a, moun-yan té tèlman pri annan sa yé té ka fè ki yé pa pran tan kouté avèrtisman Noé. Jòdla ankò sa menm bagaj-ya pouvé anpéché nou wè prédikasyon-an kou roun bagaj enpòrtan (Mat. 24:37-39 ; 2 Pierre 2:5). A pou sa nou lé mété travay Jéova bay nou fè-a an prémyé annan nou lavi.

5. Dapré Actes 1:6-8, jis ki koté prédikasyon-an té ké fèt ?

⁵ Nou divèt bay prédikasyon-an bokou valò. Jézi té di ki so disip-ya té ké kontinyé préché lontan apré so lanmò é ki yé té ké préché bokou plis pasé li lò li menm té asou latè-a (Jean 14:12). Apré lanmò Jézi, roun ran disip roupran yé travay lapèch. Lò i résisité, Jézi fè roun mirak ki pèrmèt yé pran soso poson kou yé pa té janmen wè anvan. I profité pou fè yé sonjé ki alé péché moun té pi enpòrtan pasé pyès ròt bagaj (Jean 21:15-17). Jis anvan i monté laro syèl-a, i di so disip-ya ki prédikasyon-an té ké fèt lontan pi lwen pasé péyi Israyèl-a (li Actes 1:6-8). Plizyèr lannen apré, i bay Jan roun vizyon pou montré sa ki té ké pasé pannan « jou Sényèr-a * ». Jan wè roun bagaj ki fè li rété èstébékwé : roun zanj ki té gen « roun bon nouvèl étèrnèl » pou di « pou tout nasyon, piti kou gran, é pou tout lang, é pou tout pèp » (Rév. 1:10 ; 14:6). Asiré, Jéova lé nou bay annan prédikasyon-an ki ka fèt asou tout latè-a jistan i di i fini.

6. Kisa ki pouvé ankourajé nou mété prédikasyon-an an prémyé annan nou lavi ?

⁶ Nou ké mété prédikasyon-an an prémyé annan nou lavi si nou ka réfléchi asou tousa Jéova ka fè pou nou.  Parèkzanp, i ka bay nou roun patché manjé èspirityèl : piblikasyon asou papyé ouben asou Entèrnèt, bagaj pou nou kouté, vidéyo ké émisyon yé ka bay nou chak mwa asou Télé JW. Ès to ka randé to kò kont : asou nou sit, nou ka jwenn piblikasyon annan pasé 1000 lang ! (Mat. 24:45-47). Asou tout latè-a pésonn pa ka tonbé dakò paské, ki annan lapolitik ki annan larélijyon, chak moun ka pran yé bò, épi bokou moun plen ké soumaké mé pannan sa tan-an ròt-ya san anyen. Magré sa, asou tout latè-a pasé 8 milyon sèrvitèr Bondjé ka fè rounsèl fanmi. Sonjé sa : Vandrédi 19 avril 2019, tout Témwen Jéova-ya asou tout latè-a gadé menm ladorasyon pou koumansé lajournen-an. É sa jou aswè-a, 20 919 041 moun té rasanblé pou Mémoryal-a. Lò nou ka sonjé lònò nou gen di wè sa bèl bagaj-ya ka fèt douvan nou wéy é lònò nou gen di bay annan, asiré pa pitèt sa ka bay nou anvi mété prédikasyon-an an prémyé annan nou lavi ?

7. Poukisa èkzanp Jézi ka idé nou mété prédikasyon-an an prémyé annan nou lavi ?

⁷ Nou ké mété prédikasyon-an an prémyé annan nou lavi osi si nou ka réfléchi asou èkzanp Jézi bay nou. Anyen pa anpéché l’ fè moun-yan konnèt lavérité-a (Jean 18:37). I réfizé lanmenm lò Satan propozé l’ « tout rwayonm asou latè-a ké yé glwar », é i fè menm bagaj-a lò roun ran moun chaché fè l’ divini rwa (Mat. 4:8, 9 ; Jean 6:15). I pa janmen tonbé annan zafè chaché gen plis bagaj. É i pa bat dèyè lò yé té ka chaché baré so chimen ké patché méchansté (Luc 9:58 ; Jean 8:59). É nou menm, kouman nou pouvé kontinyé mété Rwayonm-an an prémyé annan nou lavi menm lò yé ka éséyé fè nou anbandonnen nou lafwa ? Pòl ka ankourajé nou réfléchi asou èkzanp Jézi pou ‘nou pa las é pou nou pa anbandonnen’ (Héb. 12:3).

8. Pasyans a kisa, é poukisa nou bézwen sa èspésyalman annan lépòk nou ka viv-a ?

⁸ Pasyans, a sa ki ka pèrmèt nou antann jantiman roun sitiasyon ranjé. Nou bézwen pasyans si nou annan roun sitiasyon ki rèd é nou présé fini ké sa, ouben si nou ka antann roun bagaj dipi lontan. Profèt Abakik té lé ki tout vyolans ki té ka fèt annan péyi Jida-a fini (Hab. 1:2). Disip Jézi-ya té lé Rwayonm Bondjé-a « parèt lanmenm » pou Romen-yan pa dirijé yé ankò (Luc 19:11). Nou tout présé wè jou Rwayonm Bondjé-a ké fè tout méchansté disparèt é ké mété monn nouvo-a koté « i ké gen lajistis » (2 Pierre 3:13). Mé nou divèt gen pasyans é antann jou-a Jéova chwazi pou fè sa. Atò, annou wè kouman Jéova ka anprann nou gen pasyans.

9. Kisa ka montré ki Jéova gen pasyans ?

⁹ Pyès moun pa janmen montré pasyans kou Jéova. I bay Noé asé tan pou i fè arch-a é pou i « préché lajistis » (2 Pierre 2:5 ; 1 Pierre 3:20). I pran tan kouté Abraam ki té enkyèt lò i anprann i té ké krazé vil Sodòm ké Gomòr (Gen. 18:20-33). Lannen apré lannen, a pa ti pasyans i pran ké nasyon Israyèl-a ki pa té fidèl (Néh. 9:30, 31). É jòdla, i ka bay moun i ka fè vini òbò li-ya ‘tan pou yé répanti yé kò’ (2 Pierre 3:9 ; Jean 6:44 ; 1 Tim. 2:3, 4). So èkzanp ka bay nou anvi pran pasyans lò nou ka préché ké fè disip. Mé Jéova ka montré nou osi kouman nou pouvé gen pasyans gras a roun èkzanp nou ka jwenn annan so paròl.

10. Dapré Jacques 5:7, 8, kisa èkzanp moun-an ki ka travay latè ka fè nou sonjé ?

 ¹⁰ (Li Jacques 5:7, 8.) Èkzanp moun-an ki ka travay latè ka fè nou sonjé kouman sa enpòrtan pou nou gen pasyans. I gen roun ran grèn ké plan ki ka pousé vit, mé près yé tout ka pran tan pou yé pousé, èspésyalman sa-ya yé ka planté pou manjé. Annan péyi Israyèl-a, plant-ya té ka pran apéprè 6 mwa pou yé pousé. Moun-yan ki té ka travay latè, té ka planté apré prémyé lapli ki té ka tonbé koté yé an mitan mwa òktòb, é yé té ka rékòlté yé sèlman apré dèrnyé lapli ki té ka tonbé koté yé an mitan mwa avril (Marc 4:28). Nou ké montré nou gen sajès si nou ka imité yé pasyans. Mé a pa roun bagaj ki fasil pou fè.

11. Poukisa nou divèt pran pasyans lò nou ka préché ?

¹¹ Souvan, pas nou pa parfè, nou gen labitid lé tout bagaj lanmenm. Mé annou pran roun èkzanp. Si nou lé rékòlté roun bagaj annan nou bati, a tout tan pou nou alé annan sa bati-a : a pou nou fouyé, planté, séklé ké rozé. Menm fason-an, nou divèt kontinyé travay rèd pou nou fè disip. Sa ka pran tan pou nou idé sa-ya ki ka étidyé Labib-a anprann pa pézé moun ké wéy é kontan yé konpanyen. A kou mové zèrb nou divèt raché annan yé tchò. Si nou pasyan nou pa ké dékourajé lò moun-yan pa ka kouté nou. É lò roun moun anvi konnèt lavérité, a pou nou pasyan osi. Nou pa pouvé fòrsé roun moun ki ka étidyé Labib-a vansé pi vit. Détan menm disip Jézi-ya pran tan konprann sa Jézi té ka anprann yé (Jean 14:9). A pa pou nou janmen bliyé sa : a nou ki ka planté ké rozé, mé a Bondjé ki ka fè pousé (1 Cor. 3:6).

12. Kouman nou pouvé gen pasyans ké nou fanmi ki pa Témwen Jéova ?

¹² Lò nou lé palé di lavérité ké nou  fanmi ki pa Témwen Jéova, a pa tout tan nou ka rivé pran pasyans ké yé. Lò a konsa, prensip nou ka trouvé annan Ecclésiaste 3:1, 7 pouvé idé nou. Nou ka li annan sa vèrsé-ya : « I gen roun tan [...] pou pa di anyen ké roun tan pou palé. » Ké nou konpòrtman rounso nou pouvé préché lavérité-a san palé, mé nou divèt toujou paré pou palé yé di Jéova. (1 Pierre 3:1, 2). Nou ka préché ké ansényé ké bokou balan, mé sa pa divèt anpéché nou pran pasyans ké tout moun, é ké nou fanmi osi.

13-14. Bay èkzanp déztrwa moun ki montré yé té gen pasyans.

¹³ Nou pouvé anprann gen plis pasyans lò nou ka gadé èkzanp sèrvitèr fidèl Jéova jòdla ké tan-lontan. Abakik té présé wè tout méchansté ki té ka fèt annan péyi Jida-a fini, mé i montré i té gen pasyans lò i di : « Mo ké rété koté yé mété mo pou véyé » (Hab. 2:1). Apot Pòl té lé fini travay yé té bay li fè-a mé a ké pasyans i « kontinyé palé bay tout moun di bon nouvèl-a » (Actes 20:24).

¹⁴ Annou palé osi di roun frè ké so madanm, ki fè lékòl Galaad, é ki yé voyé annan roun péyi koté i pa té gen bokou Témwen Jéova. Annan sa koté-a, près tout moun pa té krétyen. I pa té gen bokou moun ki té lé étidyé Labib-a. Ròt frè ké sò ki té fè lékòl Galaad ké yé, té ka palé yé souvan di bèl bagaj ki té ka rivé yé annan prédikasyon-an annan ròt péyi, é di kantité léson biblik yé té ka bay. Mé a ké pasyans yé kontinyé préché, menm si près tout moun koté yé té ka préché-a pa té lé kouté yé. Wit lannen apré, a ké tchò kontan yé wè roun annan sa ki té étidyé Labib-a ké yé batizé. Kisa sa èkzanp tan-lontan ké jòdla ka anprann nou ? Yé pa pédi yé balan, yé pa lésé yé lanmen pozé, é Jéova béni yé pou yé pasyans. Atò, annou « imité sa-ya ki ké rousouvwè sa Bondjé promèt, gras a yé lafwa ké yé pasyans » (Héb. 6:10-12).

15. Kouman nou lafwa annan sa Labib-a ka di ka idé nou pi désidé préché ?

¹⁵ Nou gen lafwa annan sa nou ka préché-a : nou ka krè rèd annan sa, é a pa ti anvi nou anvi palé di sa ké tout moun. Nou gen konfyans annan promès ki annan Paròl Bondjé-a (Ps. 119:42 ; Is. 40:8). Nou ka wè profési ki ka fèt douvan nou wéy. É nou ka wè ki lò moun-yan ka swiv konsèy ki annan Labib-a, yé lavi ka vin miyò. Tousa ka montré ki tout moun bézwen tandé bon nouvèl Rwayonm-an.

16. Dapré Psaume 46:1-3, kouman nou lafwa annan Jéova ké Jézi ka idé nou pi désidé préché ?

¹⁶ Nou gen lafwa annan Jéova ki bay nou mésaj nou ka préché-a, é annan Jézi i mété Rwa (Jean 14:1). Annan tout problèm nou ké jwenn, Jéova ké toujou protéjé nou é ké toujou bay nou fòrs (li Psaume 46:1-3). Anplis di sa, nou sir ki Jézi ka dirijé prédikasyon-an dipi laro syèl-a, é pou sa, i ka sèrvi lotorité ké pwisans Jéova bay li (Mat. 28:18-20).

17. Rakonté roun bagaj ki pasé ki ka montré ki nou divèt kontinyé préché.

¹⁷ Gras a nou lafwa, nou plis sir ankò ki Jéova ké béni travay nou ka fè-a. Détan, i ka fè sa roun fason nou pa té ké jen pansé (Eccl. 11:6). Parèkzanp, chak jou, roun lo ké roun patché moun ka pasé douvan tab koté nou ka mété nou piblikasyon-yan ké nou prézantwar-ya pou moun-yan wè. Ès sa ka maché ? Asiré pa pitèt ! Ministère du Royaume novanm 2014 té ka palé di roun  jennfi ki té ka alé linivèrsité é ki té lé fè roun dévwar asou Témwen Jéova-ya. I pa rivé trouvé pyès Sal di Rwayonm, mé i wè roun tab koté nou ka mété nou piblikasyon. A konsa i rivé trouvé tout enfòrmasyon i té bézwen pou fè so dévwar. Finalman i divini roun sò é atchèlman i sa roun pyonyé pèrmanan. Sa istwè-a ké ròt ankò ka ankourajé nou kontinyé préché, paské sa ka montré nou ki i gen ròt moun ankò ki bézwen tandé bon nouvèl-a.

18. Poukisa nou pouvé sir ki prédikasyon-an ké fini jiskont lò Jéova ké lé ?

¹⁸ Nou pouvé sir ki prédikasyon-an ké fini jiskont jou Jéova ja prévwè. Annan lépòk Noé, Jéova montré ki a li ki ka koumandé tan-an ké sa ki pou fèt. Apéprè 120 lannen anvan, i désidé kitan Délij-a té ké rivé. Plizyèr lannen apré, i doumandé Noé fè roun arch. Noé travay rèd pannan 40 ouben 50 lannen. Menm si moun-yan pa té ka kouté li, i kontinyé avèrti moun-yan jistan Jéova di li ki tan-an té rivé pou fè zannimo-ya antré annan arch-a. Épi, jou-a i té prévwè, « Jéova fronmen lapòt-a » (Gen. 6:3 ; 7:1, 2, 16).

19. Ki bénédiksyon nou ké jwenn si nou pa ka lésé nou lanmen pozé ?

¹⁹ Titalò, Jéova ké fè nou savé ki tan-an rivé pou nou arété préché Rwayonm-an. Épi i ‘ké fronmen lapòt-a’. I ké kayakaya monn Satan-an, é i ké fè roun monn nouvo koté i ké gen lajistis. Pannan sa tan-an, annou imité Noé, Abakik ké tout ròt sèrvitèr Bondjé ki pa lésé yé lanmen pozé. Annou bay prédikasyon-an prémyé plas annan nou lavi, annou montré nou gen pasyans é annou kontinyé gen roun lafwa ki fò annan Jéova é annan so promès.