1. a) Ki travay sò-ya ka fè annan òrganizasyon Jéova-a ? (gadé zimaj-a anlè prémyé paj-a). b) Ki problèm bokou sò ka jwenn ?

NOU vréman kontan nou gen roun patché sò ki ka travay rèd annan nou asanblé ! Yé ka bay répons annan réinyon-yan. Yé ka préché ké balan. Yé ka pran swen di yé frè ké yé sò. Roun ran annan yé ka fè réparasyon annan Sal di Rwayonm-yan. Mé, yé gen yépa problèm. I gen sa ki ka okipé di yé manman ké yé papa ki ja gen roun bon laj. Ròt divèt tchenbé rèd menm si yé fanmi ka éséyé anpéché yé sèrvi Jéova. Ròt ankò ka lévé yé timoun yé rounso é yé ka travay rèd pou bay yé manjé.

2. Poukisa nou divèt soutni nou sò-ya ?

² Poukisa nou divèt soutni nou sò-ya ? Paské annan sa monn-an a pa tout tan yé ka bay yé rèspè yé mérité. Mé pi enpòrtan-an, a paské Labib-a ka ankourajé nou fè l’. Parèkzanp, apot Pòl doumandé asanblé ki té Ròm byen rousouvwè Fébé é ‘idé li annan tousa i té ké bézwen’ (Rom. 16:1, 2). Pòl té sa roun farizyen anvan. É pou farizyen-yan, fanm-yan té gen mwens valò pasé wonm-yan. Mé aprézan i té sa roun krétyen, i té ka fè kou Jézi, i té ka rèspèkté madanm-yan é i té janti ké yé (1 Cor. 11:1).

3. Kouman Jézi té ka aji ké tout madanm-yan, é kouman i té ka wè sa-ya ki té ka fè volonté so Papa ?

³ Jézi té ka rèspèkté tout madanm-yan (Jean 4:27). I pa té ka wè yé kou chèf rélijyé jwif-ya a so lépòk. Men sa nou ka li annan roun liv ki ka palé di Labib-a : « Jézi pa janmen di anyen pou dérèspèkté madanm-yan ni pou méprizé yé. » Mé i té ka rèspèkté èspésyalman madanm-yan ki té ka fè volonté so Papa. I jis té ka wè yé kou so sò : pou  li, yé té ka fè parti di so fanmi, kou sé wonm-yan (Mat. 12:50).

4. Kisa nou ké wè annan sa artik-a ?

⁴ Jézi té toujou paré pou idé fanm-yan ki té ka adoré Bondjé. I té kontan yé é i té ka défann yé. Annou wè kouman nou pouvé fè kou Jézi.

5. Détan poukisa sa rèd pou sò-ya pasé roun tibi tan ké yé bon zanmi ?

⁵ Frè-ya kou sò-ya bézwen pasé roun tibi tan ké yé bon zanmi. Mé détan, sa rèd pou sò-ya pouvé fè sa. Poukisa ? Gadé sa déztrwa sò ka di. Jòrdan * ka di : « Détan, mo ka santi ki, kou mo pa maryé, mo pa ka fè parti di asanblé-a. Mo pa ka santi mo itil annan asanblé-a. » Kristèn, roun sò pyonyé ki déménajé pou préché plis, ka di : « Lò to fin rivé annan roun asanblé, to pouvé santi to tousèl ké to kò. ». I gen sa ki ka rété annan fanmi ki pa Témwen Jéova, détan, sa pouvé rèd pou yé santi yé kò pròch di yé é an menm tan, yé ka santi ki yé pa tèlman pròch di yé frè ké sò annan asanblé-a. Sa ki pa pouvé soti di yé kaz pouvé santi kousidiré yé tousèl ké yé kò. A sa ki pouvé rivé sa-ya ki ka okipé di yé fanmi ki malad. Anèt ka di: « Mo pa té pouvé asèpté lò yé té ka envité mo, paské a près mo tousèl ki té ka okipé di mo manman. »

6. Dapré Luc 10:38-42, kouman Jézi idé Mart ké Mari ?

⁶ Jézi té ka pran tan pou so sò èspirityèl-ya, é i té sa roun vré zanmi pou yé. Annou palé di so lanmityé ké Mart ké Mari, ki dapré sa nou ka li annan Labib-a, pa té maryé (li Luc 10:38-42). Sa Jézi té ka di é sa i té ka fè té ka mété yé alèz *. Roun jou i té annan yé kaz, Mari pa té pè asiz òbò pyé Jézi kou roun disip té ka fè ké moun-an ki té ka ansényé l’. É Mart, ki pa té kontan paské Mari té ka lésé l’ fè travay-a li rounso, pa té pè di Jézi sa i té ka pansé. Sa jou-a Jézi idé sa dé madanm-yan anprann plizyèr léson enpòrtan. É i montré yé i té kontan yé ké yé frè Lazar, lò i rouvin wè yé plizyèr fwa apré sa (Jean 12:1-3). A pou sa, jou Lazar tonbé malad séryé, Mart ké Mari pa té pè doumandé Jézi idé yé (Jean 11:3, 5).

7. Kisa nou pouvé fè pou ankourajé nou sò-ya ?

⁷ Pou roun ran sò, a pitèt annan réinyon-yan rounso yé pouvé rété roun tibi tan ké yé frè ké sò-ya. A pou sa nou lé byen rousouvwè yé, palé ké yé é fè yé santi nou kontan yé. Men sa Jòrdan, ka di ankò : « Sa ka fè mo tèlman plézi lò roun moun ka doumandé mo alé an prédikasyon ké li, lò yé ka di mo kouman yé kontan lò mo ka bay mo répons pannan réinyon-yan, ouben lò yé ka montré mo yé kontan mo rounòt fason ankò. » Nou divèt fè nou sò-ya savé ki yé gen valò pou nou. Kiya ka di : « Lò mo pa pouvé alé annan roun réinyon, mo savé roun moun ké voyé roun mésaj pou mo pou doumandé mo kouman mo fika. A la mo ka wè ki mo frè-ya ka gadé pou mo ! »

8. Kouman nou pouvé imité Jézi ?

⁸ Nou pouvé imité Jézi si nou ka pasé roun tibi tan ké nou sò-ya. Annou envité yé pou manjé parèkzanp ouben  pannan roun moman pou anmizé. Mé, lò nou ka fè sa, a pou nou panga pou kozé-a toujou ankourajan (Rom. 1:11, 12). Ansyen-yan ké lé réfléchi kou Jézi. I té savé ki rété san maryé té ké rèd pou roun ran moun, mé i byen fè yé konprann ki a pa lò roun moun ka maryé ké gen timoun i gen tchò kontan pou tout-tan (Luc 11:27, 28). Pou nou gen tchò kontan tout-tan, nou divèt mété sèrvis pou Jéova an prémyé annan nou lavi (Mat. 19:12).

9. Kisa ansyen-yan pouvé fè pou idé sò-ya ?

⁹ Ansyen-yan èspésyalman divèt aji ké sò-ya annan asanblé-a kousidiré a té yé sò ké yé manman (1 Tim. 5:1, 2). A pou yé pran tan palé ké yé anvan ké apré réinyon-yan. Kristèn ka di : « Roun ansyen wè ki mo toujou té gen bokou bagaj pou fè. I té lé konprann kouman mo té ka òrganizé mo kò. Mo té byen kontan i pran tan vini gadé pou mo. » Lò ansyen-yan ka pran tan palé ké sò-ya annan yé asanblé yé ka montré yé ki yé lé pran swen di yé *. Anèt ka di poukisa i kontan palé ké ansyen-yan. I ka di : « Sa  ka pèrmèt nou byen konnèt nou konpanyen. Konsa, lò mo ka pasé anba problèm, mo pa pè doumandé yé idé mo.»

10. Kouman nou pouvé idé nou sò-ya gen tchò kontan ?

¹⁰ Lò moun-yan ka rékonnèt sa nou konnèt fè é ka di nou mèrsi pou sa nou ka fè, sa ka bay nou tchò kontan. Mé lò pésonn pa ka di nou mèrsi pou travay nou ka fè ouben pou fason nou ka sèrvi sa nou konnèt fè, sa ka dékourajé nou. Ki pou wonm ki pou fanm a menm bagaj-a. Abigayil, roun sò pyonyé ki pa maryé, ka di ki détan i ka santi ki frè ké sò-ya ka fè kousidiré i pa té la. I ka di : « Pou ròt-ya, mo sa sò frè Entèl ouben pitit frè Entèl, pa plis ki sa. Détan, a kousidiré yé pa ka wè mo. » Parkont, gadé sa rounòt sò ki pa maryé yé ka aplé Pam ka pansé. I té misyonèr pannan lontan. Épi i routounen annan so péyi pou okipé di so manman ké so papa. Jòdla, i gen pasé 70 an, é i pyonyé toujou. I ka di : « Sa ki ka idé mo bokou, a lò yé ka di mo yé kontan mo. »

11. Kouman Jézi montré i té kontan madanm-yan ki té ka alé ké li annan prédikasyon-an ?

¹¹ Plizyèr madanm « té ka sèrvi sa yé té gen » pou randé Jézi sèrvis. Jézi té kontan sa yé té ka fè pou idé li (Luc 8:1-3). Yé té gen lònò sèrvi li, é anplis di sa Jézi anprann yé plizyèr vérité trè enpòrtan asou volonté Bondjé. Parèkzanp, i di yé i té ké mouri é Bondjé té ké résisité l’ apré (Luc 24:5-8). Menm fason i fè ké apot-ya, i préparé sa madanm-yan pou tribilasyon yé té ké jwenn (Marc 9:30-32 ; 10:32-34). Menm si apot-ya pran kouri lò yé arété Jézi, plizyèr madanm ki té sèrvi li rété òbò li lò i té ka mouri asou poto-a (Mat. 26:56 ; Marc 15:40, 41).

12. Kisa Jézi doumandé plizyèr madanm fè ?

¹² Jézi bay plizyèr madanm fè bagaj enpòrtan. Parèkzanp, a plizyèr madanm ki wè li an prémyé lò i résisité é a yé i doumandé alé di apot-ya i té résisité (Mat. 28:5, 9, 10). Pannan Lapannkot 33, i dèt té gen madanm la osi, lò lèspri sen vini asou krétyen ki té rasanblé annan roun kaz. Si a sa, sa sò-ya ki té fin rousouvwè lèspri sen-an té divèt pouvé palé annan plizyèr lang pou di « bèl bagaj Bondjé fè » (Actes 1:14 ; 2:2-4, 11).

13. Kisa nou sò-ya ka fè annan sèrvis Jéova é kouman nou pouvé di yé mèrsi ?

¹³ Nou sò-ya mérité nou di yé mèrsi pou tousa yé ka fè annan sèrvis Jéova. Yé annan konstriksyon, réparasyon, yé ka soutni group ké asanblé koté yé ka palé rounòt lang, yé bétélit ouben volontèr annan roun Bétèl. Lò Bétèl-a ka òrganizé pou alé idé koté yé bézwen, yé la. Yé ka idé pou tradwi nou piblikasyon-yan, é yé pyonyé ouben misyonèr. Kou frè-ya, yé ka fè Lékòl pou sèrvis pyonyé-a, Lékòl pou évanjélizatèr Rwayonm-an ké Lékòl Galaad. Anplis di sa, yé ka soutni yé mari lò yé gen gro rèsponsabilité annan asanblé-a ouben annan òrganizasyon Jéova-a. Sa frè-ya pa té ké pouvé fè tousa bagaj-ya é yé pa té ké pouvé sa « kado » Bondjé té promèt-a si yé madanm pa té ka soutni yé (Éph. 4:8). Ès to ja doumandé to kò : « Kouman mo menm mo pouvé idé sa sò-ya ki ka travay rèd ? »

14. Dapré sa Psaume 68:11 ka di, kisa ansyen-yan ki plen ké sajès ka fè ?

¹⁴ Ansyen-yan ki plen ké sajès ka konprann ki sò-ya sa roun « gran  larmé ». Sa madanm-yan ka adoré Jéova ké bokou balan é yé vayan annan prédikasyon-an (li Psaume 68:11). Kou sa sò-ya gen bokou èspéryans yé ka profité di yé èspéryans. Abigayil, roun sò nou ja palé anvan, ka di i kontan lò frè-ya ka doumandé l’ kisa i ka di annan prédikasyon-an é ki ka maché byen. I ka di : « Sa ka fè mo sonjé ki Jéova gen roun travay enpòrtan pou mo fè annan so òrganizasyon. » Anplis di sa, ansyen-yan ka rékonnèt ki sò-ya ki ja gen roun ti laj é ki fidèl pouvé byen idé sò-ya ki pi jenn é ki ka jwenn problèm (Tite 2:3-5). An tout sans, sò-ya mérité nou di yé mèrsi é osi kouman nou kontan yé !

15. Annan ki sitiasyon nou sò-ya bézwen détan roun moun idé yé ?

¹⁵ Détan, sa pouvé rivé ki nou sò-ya bézwen roun moun vini défann yé (Is. 1:17). Parèkzanp, roun sò ki pédi so mari ouben ki divòrsé pitèt bézwen roun moun vini fè sèrten bagaj so mari té ka fè anvan. Pitèt roun granmoun ké bézwen yé mennen l’ koté dòktèr. Ouben pitèt roun sò pyonyé ki ka travay asou projè òrganizasyon-an ka bay li, ké bézwen roun moun palé pou li si yé ka kritiké l’ paské i pa ka préché kou ròt pyonyé-ya. Annan ki ròt sitiasyon ankò nou divèt défann nou sò-ya ? Pou nou bay répons asou sa késyon-an, annou wè èkzanp Jézi-a ankò.

16. Kou nou ka li annan Marc 14:3-9, kouman Jézi défann Mari ?

¹⁶ Jézi pa té pè défann so sò èspirityèl-ya lò moun té ka palé yé mal. Parèkzanp, i défann Mari lò Mart vini poté rapòr asou li (Luc 10:38-42). I défann li rounòt kou lò sèrten kritiké l’ paské dapré yé i pa té pran roun bon désizyon (li Marc 14:3-9). Jézi té savé ki Mari té gen bon lentansyon, é i félisité l’. I di : « A roun bon bagaj i fè pou mo. [...] I fè sa i té pouvé fè. » I menm di ki yé té ké rakonté sa bèl bagaj i fè-a « asou tout latè-a », ‘tout koté yé té ké préché bon nouvèl-a’. É a sa sa artik-a ka fè. Ès a pa roun bèl bagaj lò Jézi félisité Mari pou sa bèl bagaj i té fè-a ? I profité pou di ki bon nouvèl-a té ké préché asou tout latè-a ? Asiré pa pitèt, sa Jézi di fè l’ plézi paské yé pa té konprann sa i té fè é yé té mal palé l’ !

17. Annan ki sitiasyon, parèkzanp, roun sò bézwen roun moun vini défann li ?

¹⁷ Ès to ka défann to sò annan asanblé-a lò to divèt fè l’ ? Annou pran roun èkzanp : Plizyèr frè ké sò ka wè roun sò ki maryé ké roun mouché ki pa Témwen ka souvan rivé an rétar lasal é i ka pati lanmenm lò réinyon-an fini. Yé ka wè ki a pa souvan i ka vini ké so timoun lasal. Yé ka di ki sò-a divèt pi rèd ké so mari épi yé ka kritiké l’. Mé, sa yé pa savé, a ki sò-a ka fè tousa i pouvé. A pa li ki ka désidé tousa i ka fè annan so lajournen. É a pa li ka pran dèrnyé désizyon-an pou so timoun. Kisa to pouvé fè annan roun sitiasyon konran ? Si to ka félisité sò-a douvan ròt-ya é to ka di bon bagaj asou li, to pouvé fè yé arété mal palé sò-a.

18. Kisa nou pouvé fè ankò pou idé nou sò-ya ?

¹⁸ Nou pouvé montré nou sò-ya nou kontan yé lò nou ka randé yé sèrvis (1 Jean 3:18). Anèt, ki té ka pran swen di so manman ki té malad, ka di : « Sèrten frè ké sò té ka vini okipé di mo manman pou mo. Ròt té ka mennen manjé pou  nou. Mo té ka wè yé té kontan mo é ki mo té gen valò annan asanblé-a.» Yé idé Jòrdan osi. Roun frè montré li kouman pou okipé di so loto. I ka di : « Sa ka fè mo plézi lò mo ka wè frè ké sò-ya ka enkyété yé kò pou mo sékirité. »

19. Kisa ansyen-yan pouvé fè ankò pou idé sò-ya ?

¹⁹ Ansyen-yan osi ka chaché idé sò-ya sélon sa yé bézwen. Yé savé ki, Jéova, ka véyé kouman yé ka fè ké yé (Jacq. 1:27). Yé ka fè kou Jézi, yé rézonab. Yé pa ka chaché mété yé lalwa lò i miyò pou yé chaché konprann sitiasyon-an (Mat. 15:22-28). Lò ansyen-yan ka pran douvan pou idé sò-ya, yé ka fè yé santi ki yé ka soutni yé. Lò rèsponsab prédikasyon-an group koté Kiya té fika anprann i té ka déménajé, lanmenm i òrganizé roun mayouri pou idé l’. Kiya ka di : « Sa tiré roun gro fardo anlè mo. Ansyen-yan ankourajé mo é yé randé mo sèrvis. Sa fè mo konprann ki mo gen roun plas enpòrtan annan asanblé-a é ki, si roun jou mo anba traka, mo pa tousèl. »

20-21. Kouman nou pouvé montré nou sò-ya ki nou kontan yé toubonnman ?

²⁰ Annan nou asanblé-ya, i gen roun patché sò ki ka travay rèd é ki ka mérité nou soutni yé. Kou Jézi, annou pran tan pou palé ké yé é anprann konnèt yé. Annou di yé mèrsi pou sa yé ka fè annan sèrvis Bondjé. É annou défann yé lò yé bézwen.

²¹ Lò Pòl fini so lèt i té ékri pou Romen-yan, i palé di nèf madanm krétyen (Rom. 16:1, 3, 6, 12, 13, 15). Asiré pa pitèt, lò sa madanm-yan tandé Pòl ki té ka palé di yé é ki té ka di yé mèrsi, sa ankourajé yé. Annou fè menm bagaj-a, annou soutni tout nou sò-ya annan nou asanblé. A konsa nou ké montré yé ki nou kontan yé toubonnman é ki yé gen bokou valò annou nou fanmi.