1. Poukisa nou pa ka rété èstébékwé lò nou ka wè ki roun patché moun pa ka fè pyès moun konfyans ?

 ROUN patché moun pa ka rivé fè ròt-ya konfyans ankò. Yé dégouté lò yé ka wè kouman sistèm komèrsyal-a malonnèt, é lò yé ka wè kouman chèf politik-ya ké chèf rélijyé-ya ka aji. Souvan, yé pa ka fè pyès moun konfyans ankò, ni moun yé konnèt, ni yé zanmi, ni menm yé fanmi. Mé nou pa divèt rété èstébékwé pou sa. Labib-a té di ki « annan dèrnyé jou-ya », moun-yan ‘pa té ké fidèl’, yé té ké « palé moun mal » é yé té ké « trèt ». Anfèt i té ka anonsé ki moun-yan té ké kou bondjé sa monn-an, roun moun nou pa pouvé fè konfyans (2 Tim. 3:1-4 ; 2 Cor. 4:4).

2. a) Annan kimoun é annan kisa nou pouvé gen konfyans ? b) Kisa roun ran ka doumandé yé kò ?

² Mé nou savé ki nou toujou pouvé fè Jéova konfyans (Jér. 17:7, 8). Nou sir ki i kontan nou é ki i pa ké « janmen lésé » so zanmi (Ps. 9:10). Nou pouvé fè Jézi konfyans osi paské i bay so lavi pou nou (1 Pierre 3:18). É nou wè kouman Labib-a ka bay nou konsèy ki bon (2 Tim. 3:16, 17). Donk an tout sans, nou pouvé fè Jéova, Jézi ké Labib-a konfyans. Mé roun ran ka doumandé yé kò si yé pouvé vréman fè yé frè ké sò-ya konfyans. Kisa ki ka pèrmèt nou di ki nou pouvé fè yé konfyans ?

3. Ki bèl lònò nou gen ? (Marc 10:29, 30).

³ Jéova fè nou vini òbò li. É jòdla nou ka fè parti di so fanmi, sa lé di tout sa ki ka adoré li. A roun lònò ki ka pèrmèt nou jwenn roun patché bénédiksyon !  (li Marc 10:29, 30). Asou tout latè-a, nou gen frè ké sò ki, kou nou menm, kontan Jéova é ka fè tousa yé pouvé pou rèspèkté so prensip. Pitèt nou pa ka palé menm lang-a, nou pa gen menm kiltir-a, nou pa ka abiyé menm fason-an mé nou ka santi nou pròch ké yé, menm lò a prémyé fwa nou ka kontré ké yé. Nou kontan èspésyalman louwé ké adoré nou Bondjé ansanm ké yé ! (Ps. 133:1).

4. Poukisa nou bézwen nou frè ké sò-ya ?

⁴ Nou bézwen rété ansanm ansanm ké nou frè ké sò-ya jòdla plis pasé anvan. Yé ka idé nou tchenbé rèd lò nou gen problèm (Rom. 15:1 ; Gal. 6:2). Yé ka idé nou fè nou lanmityé ké Jéova rété fò é toujou gen bokou bagaj pou fè pou Jéova (1 Thess. 5:11 ; Héb. 10:23-25). Anplis di sa, ès nou pa té ké pè douvan nou lèlmi, Satan ké so monn, si nou pa té gen tousa asanblé-a ka bay nou pou protéjé nou ? Titalò, Satan ké sa-ya ki ka swiv li ké ataké sa-ya ki ka adoré Bondjé. Imajiné kouman nou ké kontan gen nou frè ké sò-ya òbò nou lò sa ké rivé !

5. Poukisa sa rèd pou roun ran fè yé frè ké sò-ya konfyans ?

⁵ Magré sa, roun ran pa ka rivé fè yé frè ké sò-ya konfyans. Pitèt roun annan yé mété tout yé zafè dèrò ouben i pa tchenbé so promès. Ouben pitèt roun moun annan asanblé-a di ouben fè roun bagaj ki fè yé lapenn bokou. Lò roun bagaj konsa ka rivé nou, sa pouvé rèd pou nou fè ròt-ya konfyans. Kisa ki ké idé nou ?

6. Poukisa nou ka di ki lanmou ka pousé nou fè ròt-ya konfyans ? (1 Corinthiens 13:4-8).

⁶ Pou to rivé fè roun moun konfyans, a pou to kontan l’. 1 Corinthiens chapit 13 ka di plizyèr bagaj asou lanmou ki pouvé  pousé nou fè ouben roukoumansé fè ròt-ya konfyans (li 1 Corinthiens 13:4-8). Parèkzanp, vèrsé 4-a ka di ki « lanmou pasyan ké bon ». Jéova ka pran pasyans ké nou, menm lò nou ka péché kont li. Donk a pou nou pran pasyans ké nou frè ké sò-ya lò yé ka di ouben yé ka fè bagaj ki ka nèrvé nou ouben ki ka fè nou mal. Vèrsé 5-a ka di dèyè sa : « [Lanmou] pa ka kouri faché. I pa ka marké tout mové bagaj yé fè l’. » A pa pou nou janmen tchenbé annan nou tèt tout mové bagaj yé fè nou, pou nou viré asou sa lò nou ké bézwen. Ecclésiaste 7:9 ka montré nou ki nou pa divèt « kòlè pou anyen ». Nou divèt swiv konsèy nou ka jwenn annan Éphésiens 4:26 : « A pa pou zòt rété faché jistan solèy-a kouché. »

7. Kouman prensip-ya nou ka jwenn annan Matthieu 7:1-5 pouvé idé nou fè ròt-ya konfyans ?

⁷ Sa ké pi fasil pou nou fè ròt-ya konfyans si nou ka wè yé kou Jéova ka wè yé. I kontan yé é i pa ka tchenbé péché yé fè. Donk a pa pou nou fè l’ non plis (Ps. 130:3). Pasé nou rété asou défo yé gen, annou fè sa nou pouvé pou nou wè ki bèl kalité yé gen, é annou réfléchi asou tout bèl bagaj yé pouvé fè (li Matthieu 7:1-5). Kou lanmou « ka krè tout bagaj », annou kontinyé pansé ki yé lé fè bon bagaj, ki yé pa lé fè nou lapenn (1 Cor. 13:7). Jéova pa ka doumandé nou fè yé konfyans toubonnman konsa. Si nou ka fè yé konfyans, a paské yé ka montré nou ki yé mérité nou fè yé konfyans b.

8. Kouman to pouvé fè to frè ké sò-ya plis konfyans ?

⁸ A pa lanmenm konsa to pouvé fè to frè ké sò-ya konfyans ! A roun bagaj ki ka pran tan. Kouman to pouvé rivé fè sa ? Anprann konnèt yé byen. Pran tan kozé ké yé anvan ké apré réinyon-yan. Préché ké yé. Pran pasyans ké yé é bay yé tan pou yé montré to ki to pouvé fè yé konfyans. Lò to ka koumansé anprann konnèt roun moun, pitèt to pa ké di li tròp bagaj asou to. Mé pi to ké vin pròch ké li, pi to ké alèz pou to louvri to tchò pou li (Luc 16:10). Mé kisa to pouvé fè si roun frè ouben roun sò ka trayi to ? Pa kouri di i pa sa to zanmi ankò. Lésé roun ti moso tan pasé. É a pa paské roun moun fè to lapenn ki sa divèt anpéché to fè tout to frè ké sò-ya konfyans. Annou wè èkzanp plizyèr sèrvitèr Jéova ki kontinyé fè ròt-ya konfyans menm si roun ran fè yé lapenn.

9. a) Kouman Ann montré ki i té ka fè Jéova konfyans menm si sa-ya ki té ka réprézanté l’ té ka péché ? b) Kisa èkzanp Ann ka anprann nou asou zafè fè Jéova konfyans ? (gadé zimaj-a).

⁹ Ès roun frè ki gen rèsponsabilité annan asanblé-a fè ouben di roun bagaj ki fè to lapenn ? Si sa ja rivé to, èkzanp Ann ké idé to. Annan sa lépòk-a, a té gran prèt Éli ki té ka réprézanté Jéova annan péyi Israyèl. Mé sèrten moun annan so fanmi pa té sa roun bon èkzanp menm. So pitit té gen rèsponsabilité annan tabèrnak-a. Mé a pa ti mové bagaj yé té ka fè é yé té gen roun kondwit sèksyèl malpròp. Éli li menm té mòl ké yé, mé a pa la pou la Jéova fè li pédi so privilèj. Magré sa, Ann pa arété fè Jéova konfyans ; i pa arété adoré l’ annan  tabèrnak-a jistan Éli pa gran prèt ankò. Anplis di sa, lò Éli wè Ann priyè ké tout so tchò, i konprann di ki i té sou. I pa menm pran tan vérifyé. I akizé sa madanm-an ki té tris toubonnman (1 Sam. 1:12-16). Mé Ann té promèt Jéova ki si i té gen roun garson, timoun-an té ké sèrvi li annan tabèrnak-a (1 Sam. 1:11). É i pa rouvini asou sa i té di, menm si sa té lé di ki so timoun té ké anba rèsponsabilité Éli. Ès pitit Éli té mérité pini pou sa yé té ka fè ? Wi, é Jéova fè roun bagaj lò moman-an té rivé (1 Sam. 4:17). Épi osi, i rékonpansé Ann, i bay li roun garson, Samiyèl (1 Sam. 1:17-20).

10. Lò plizyèr moun trayi David, ès i arété fè ròt-ya konfyans ?

¹⁰ Ès roun zanmi trayi to ? Si sa ja rivé to, èkzanp rwa David pouvé idé to. I té gen roun zanmi yé té ka aplé Ayitofèl. Lò Absalon chaché pran plas so papa asou tronn-an, Ayitofèl bay Absalon lanmen. Sa té divèt rèd pou David paské so pitit arété soutni l’, mé anplis di sa, roun mouché i té ka wè kou so zanmi arété soutni l’ osi ! Mé a pa pou sa i arété fè ròt-ya konfyans. Parèkzanp, Ouchay té sa roun di so zanmi ki té fidèl, é David kontinyé fè l’ konfyans. Sa mouché-a té réfizé maché ké sa-ya ki té tounen do bay David. É David té gen rézon fè li konfyans : Ouchay montré ki i té sa roun vré zanmi. I jis té paré pédi so lavi pou li (2 Sam. 17:1-16).

11. Kouman roun sèrvitèr Nabal montré ki i té ka fè Abigayil konfyans ?

¹¹ Annou palé osi di roun sèrvitèr Nabal. David ké mouché-ya ki té ka maché ké li té byen aji ké sèrvitèr roun Israyélit yé té ka aplé Nabal. Yé té protéjé yé. Pita, David doumandé Nabal, ki té rich, bay li larèstan manjé i té gen. Mé Nabal pa asèpté. Pourtan, sa pa té anyen pou li. David lévé faché é i désidé tchwé tout mouché-ya annan kaz Nabal. Roun sèrvitèr Nabal alé di Abigayil, madanm Nabal, sa ki té ka pasé. I té savé ki a li i té divèt alé wè si i té lé chapé so lapo ; i té pouvé pran kouri, mé i té sir ki Abigayil té  ké pouvé réglé problèm-an, paské tout moun té savé ki a té roun madanm ki té entélijan. Sa ki rivé apré montré ki i té byen gen rézon fè li konfyans. Abigayil aji ké kouraj é i anpéché David fè sa i té prévwè fè (1 Sam. 25:2-35). É i fè David konfyans : i té sir ki i té ké rézonab.

12. Kisa ki ka montré nou ki Jézi té ka fè so disip konfyans menm si yé té gen défo ?

¹² Jézi té ka fè so disip konfyans menm si yé té gen défo (Jean 15:15, 16). Lò Jak ké Jan doumandé li bay yé roun bon plas annan Rwayonm-an, i pa doumandé so kò poukisa yé té ka adoré Jéova, é i pa di yé ki, akoz di sa, yé pa té pouvé rété so apot ankò (Marc 10:35-40). Pita, jou-a yé arété l’, tout so disip pran kouri, yé lésé l’ li rounso (Mat. 26:56). Mé i pa arété fè yé konfyans. Menm si i té savé ki défo yé té gen, i « montré yé ki i té kontan yé jiska lafen » (Jean 13:1). Apré so rézirèksyon, i bay so 11 apot-ya roun rèsponsabilité ki té enpòrtan : yé té divèt dirijé travay prédikasyon-an ké pran swen di so brébi ki gen bokou valò (Mat. 28:19, 20 ; Jean 21:15-17). É i té gen rézon fè yé konfyans : yé tout sèrvi Jéova ké fidélité jistan yé mouri. Ann, David, sèrvitèr Nabal, Abigayil ké Jézi fè moun ki pa té parfè konfyans. Yé ka bay nou roun bon èkzanp pou nou swiv !

13. Poukisa sa rèd pou roun ran fè ròt-ya konfyans ?

¹³ Ès sa ja rivé to di roun moun roun bagaj épi apré sa to ka randé to kò kont ki moun-an alé répété sa to di li ? Sa kalité sitiasyon-an pouvé fè to mal bokou. Roun jou, roun sò palé ké roun ansyen di roun problèm i té ka jwenn. Landimen-an, madanm ansyen-an aplé sò-a pou ankourajé l’. I té savé sa sò-a té di pou ansyen-an sèlman. Sò-a pa té ka rivé fè ansyen-an konfyans ankò é nou ka konprann li. Mé i byen réyaji. I alé doumandé rounòt ansyen idé li é sa ansyen-an idé li roufè ansyen-yan konfyans.

14. Kisa ki idé roun frè roukoumansé fè dé ansyen konfyans ?

¹⁴ Roun frè té gen roun problèm dipi lontan ké dé ròt ansyen, é i té ka pansé ki i pa té ké pouvé fè yé konfyans ankò. Mé, i té tandé roun frè i té ka rèspèkté bokou di roun bagaj ki té senp mé ki té fò : « Nou lèlmi a Satan, a pa nou frè-ya. » I réfléchi asou sa, i priyè bokou é finalman i alé fè lapè ké sa dé ansyen-yan.

15. Poukisa nou ké pitèt bézwen tan pou roufè roun moun konfyans ? Bay roun èkzanp.

¹⁵ Ès to pédi roun rèsponsabilité annan asanblé-a ? A roun bagaj ki pouvé rèd. Anvan dézyèm Lagèr Mondyal-a, Témwen Jéova-ya té entèrdi an Almagn nazi. Magré sa, Grete ké so manman té ka adoré Jéova ké fidélité ; yé té jis doumandé Grete préparé sa yé té ka aplé stencils pou yé kopyé Tourdégard-a. Mé lò frè-ya anprann ki so papa pa té kontan lavérité-a, yé di Grete arété fè sa paské yé té pè ki so papa bay yé lèlmi enfòrmasyon asou asanblé-a. Mé a pa sa sèlman ! Pannan tout dézyèm Lagèr Mondyal-a, frè-ya pa bay ni Grete ni so manman pyès Tourdégard. É lò yé té ka wè yé annan lari-a, yé pa té ka palé pou yé. Sa té ka fè yé bokou lapenn. Yé tchò té gro é sa pran tan pou Grete ké so manman pardonnen yé frè ké sò-ya é roufè yé konfyans. Finalman  Grete rékonnèt ki kou Jéova té pardonnen yé, li menm osi té divèt fè sa c.

16. Poukisa nou pa divèt rété asou sa ki pouvé anpéché nou roufè nou frè ké sò-ya konfyans ?

¹⁶ Si roun bagaj rèd konsa rivé to, pa rété asou sa ki pouvé anpéché to roufè to frè ké sò-ya konfyans. Pitèt sa ké pran tan, mé a pa ké charyé dlo ké panyen. Annou pran roun èkzanp : Lò nou tonbé malad paské nou manjé roun bagaj ki pa té bon, nou ka fè atansyon, nou ka panga sa nou ka manjé. Mé a pa pou sa nou ka arété manjé ! Menm fason-an, a pa paské roun moun fè nou lapenn ki nou ka arété fè tout nou frè ké sò-ya (é nou byen savé yé pa parfè) konfyans. Si nou ka roufè sa moun-an konfyans, nou tchò ké pi kontan é sa ké pi fasil pou nou mété nou lidé asou sa nou pouvé fè pou idé tout moun annan asanblé-a fè yé konpanyen konfyans.

17. Poukisa sa enpòrtan pou nou fè nou frè ké sò-ya konfyans é kisa nou ké wè annan ròt artik-a ?

¹⁷ Annan monn Satan-an, roun patché moun pa ka fè ròt-ya konfyans ankò. Mé nou menm nou pouvé fè nou frè ké sò-ya konfyans paské nou kontan nou konpanyen. Paské nou ka fè nou konpanyen konfyans, nou tchò kontan é nou ka rivé rété ansanm ansanm, é sa ké protéjé nou lò bagaj-ya ké vin rèd dimen. Alòr kisa to pouvé fè si roun bagaj ka anpéché to fè roun moun konfyans ? Fè tousa to pouvé pou wè bagaj-ya kou Jéova ka wè yé. Swiv prensip-ya ki annan Labib-a, kontinyé kontan to frè ké sò-ya ké tout to tchò, é swiv èkzanp sèrvitèr Jéova tan-lontan ki té fidèl. Si to tchò blésé, to pouvé rivé pa rété asou sa é roukoumansé fè to frè ouben to sò konfyans. A konsa to ké pouvé gen roun patché zanmi ki « pi fidèl pasé roun frè » (Prov. 18:24). Mé annan zafè konfyans-a, a pa rounsèl moun ki divèt fè éfòr. Annan ròt artik-a, nou ké wè sa nou pouvé fè pou nou frè ké sò-ya fè nou konfyans.