1. Annan ki sitiasyon ki té rèd Joas, Ozyas, ké Jozyas trouvé yé kò ?

 IMAJINÉ SA : to ka divini rwa di pèp Bondjé-a alòr ki to sa roun timoun ouben roun jennjan ! Kouman to ké sèrvi pouvwar to gen ké to otorité ? Labib-a ka palé di plizyèr jennjan ki divini rwa. Parèkzanp, Joas divini rwa lò i té gen 7 lannen, Ozyas lò i té gen 16 lannen, é Jozyas lò i té gen 8 lannen. A pa ti rèsponsabilité pou roun jennjan ! Mé yé toulétrwa pa té tousèl pou yé réglé problèm yé jwenn, é yé toulétrwa fè bèl bagaj pou Jéova.

2. Poukisa nou divèt pran tan gadé èkzanp Joas, Ozyas, ké Jozyas ?

² Menm si nou pa sa dé rwa ouben renn, sa trwa moun-yan yé ka palé annan Labib-a pouvé anprann nou roun patché bagaj. Yé pran bon désizyon mé yé pran désizyon ki pa té bon osi. Nou ké wè sèrten bagaj ki rivé yé é nou ké wè poukisa sa enpòrtan di gen bon kalité zanmi di kontinyé gen imilité épi di kontinyé vini pròch di Jéova.

3. Kisa ki ka montré ki rwa Joas byen kouté konsèy Joad bay li ?

³ Joas pran bon désizyon : fè kou li. Lò rwa Joas té jenn, i pran roun désizyon ki té saj. Kou i pa té gen papa, i swiv konsèy roun granprèt ki té fidèl ké Bondjé. A té Joad. Sa granprèt-a lévé l’ kousidiré a té so pròp pitit. Gras a bon èkzanp i bay li, Joas désidé adoré Jéova é i idé pèp-a adoré Jéova osi. I jis fè sa ki té fo pou ranjé tanp Jéova-a (2 Chron. 24:1, 2, 4, 13, 14).

4. Lò koumannman Jéova gen valò pou nou, ki bénédiksyon nou ka jwenn ? (Proverbes 2:1, 10-12).

 ⁴ Si to paran ouben rounòt moun ka anprann to kontan Jéova é rèspèkté so Lalwa, a pou to wè sa kou roun bèl kado yé ka fè to (li Proverbes 2:1, 10-12). Yé pouvé fè plizyèr bagaj diféran pou yé fòrmé to. Annou wè kouman papa roun sò yé ka aplé Katia té ka idé l’ pou i pran bon désizyon. Touléjou, lò i té ka mennen l’ lékòl, i té ka palé ké li di tèks pou koumansé lajournen-an. Katia ka di : « Gras a sa kozé-ya, mo té ka rivé jéré problèm mo té gen pannan lajournen-an. » Mé kisa to pouvé fè si to paran ka bay to konsèy ki ka vini di Labib-a, mé ki to ka trouvé ki sa ka anpéché to gen to libèrté ? Kisa ki pouvé idé to pou to asèpté sa yé ka di to fè ? Roun sò yé ka aplé Anastassia ka sonjé ki so papa ké so manman té ka pran tan èspliké li poukisa yé té mété sèrten règ. I ka di : « Sa idé mo konprann ki yé pa té ka éséyé anpéché mo viv, mé yé té kontan mo é yé té lé protéjé mo. »

5. Kouman sa to ka fè pouvé aji asou to paran ké asou Jéova ? (Proverbes 22:6 ; 23:15, 24, 25).

⁵ Si to ka swiv konsèy to paran ka bay to é ki ka vini di Labib-a, sa ké fè yé tchò kontan. É sa ki pi enpòrtan ankò, Jéova ké kontan é to ké rété zanmi ké li pou tout-tan (li Proverbes 22:6 ; 23:15, 24, 25). Men roun bèl rézon pou imité èkzanp Joas lò i té jennjan !

6. Lò Joad mouri, konsèy kimoun Joas koumansé kouté é kisa sa mennen ? (2 Chroniques 24:17, 18).

⁶ Joas pran désizyon ki pa té bon : gadé wè sa sa ka anprann to. Lò Joad mouri, Joas chwazi zanmi ki pa té bon pou li (li 2 Chroniques 24:17, 18). I désidé kouté prens Jida-ya ki pa té kontan Jéova. To dèt dakò pou di ki sa té ké pi bon ki Joas pa swiv lidé sa moun-yan ki pa té ka fè bon bagaj (Prov. 1:10). Mé i lésé moun ki té ka di yé té sa so zanmi swadizan, détenn asou li. É lò Zakari, so kouzen, éséyé fè l’ réfléchi, i fè yé tchwé l’ (2 Chron. 24:20, 21 ; Mat. 23:35). A té roun mové désizyon menm ! O koumansman, Joas té fidèl, mé i divini roun apòsta é roun kriminèl. É finalman, so pròp sèrvitèr tchwé l’ (2 Chron. 24:22-25). Bagaj-ya pa té ké pasé konsa si i té kontinyé kouté Jéova ké so sèrvitèr-ya ! Kisa sa ka anprann nou ?

7. Ki kalité zanmi to divèt chwazi ? (gadé zimaj-a osi).

 ⁷ Roun bagaj nou pouvé anprann di lavi Joas, a ki nou divèt chwazi zanmi ki ké fè nou fè bon bagaj. Nou divèt chwazi zanmi ki kontan Jéova é ki lé fè so tchò kontan. Yé pa blijé gen menm laj ké nou. Joas té lontan pi jenn pasé so zanmi Joad, é sa pa anpéché yé divini zanmi. Doumandé to kò : « Ès mo zanmi ka bay mo anvi fè mo lafwa annan Jéova vin pi fò ? Ès yé ka ankourajé mo rèspèkté sa i ka di asou sa ki bon ké sa ki mové ? Ès yé kontan palé di li ké di bèl vérité ki annan Labib-a ? Ès yé ka rèspèkté sa i ka di asou sa ki bon ké sa ki mové ? Ès yé ka di mo sa mo anvi tandé ouben ès yé gen kouraj bay mo konsèy lò mo bézwen ? » (Prov. 27:5, 6, 17). Franchman, si to zanmi pa kontan Jéova, to pa bézwen yé. Parkont, si yé kontan l’, gardé yé ; a bon zanmi ki la (Prov. 13:20).

8. Si nou ka sèrvi rézo sosyal-ya, ki késyon nou divèt pozé nou kò ?

⁸ Rézo sosyal-ya ka pèrmèt nou kontinyé palé ké nou fanmi ouben ké nou zanmi. Mé bokou moun ka mété foto ouben vidéyo di sa yé achté ouben di sa yé fè, tousa pou fè moun wè. Si to ka sèrvi roun rézo sosyal, doumandé to kò : « Ès mo ka chaché fè moun wè ? Ès mo lé ankourajé yé ouben ès mo lé yé poté mo anlè ? Ès mo ka lésé moun ki ka sèrvi sa rézo sosyal-a gaté fason mo ka réfléchi, fason mo ka palé épi fè mo fè mové bagaj ? » Frè Nathan Knorr, ki té annan kolèj santral-a, bay sa konsèy-a : « Pa chaché fè moun plézi. Paské i gen roun moman, zòt pa ké pouvé fè moun plézi ankò. Fè Jéova plézi é zòt ké fè tout sa-ya ki kontan l’ plézi. »

9. Kisa Jéova pèrmèt Ozyas fè ? (2 Chroniques 26:1-5).

⁹ Ozyas pran bon désizyon : fè kou li. Lò i té jenn, rwa Ozyas té gen imilité. I anprann a kisa ki « lakrent pou vré Bondjé-a ». I viv 68 lannen é Jéova béni l’ pannan près tout so lavi (li 2 Chroniques 26:1-5). Ozyas ganyen roun patché nasyon ki té sa so lèlmi é i fè sa ki té fo pou byen protéjé Jérizalèm (2 Chron. 26:6-15). I dèt té kontan pou tousa Jéova té ka pèrmèt li fè (Eccl. 3:12, 13).

10. Kisa ki rivé Ozyas ?

¹⁰ Ozyas pran mové désizyon : gadé wè sa sa ka anprann to. Rwa Ozyas té gen labitid tout moun obéyi l’. Ès a sa ki fè l’ krè ki i té pouvé fè sa i té lé ? Enben roun jou, i antré annan tanp Jéova-a pou boulé lansan. A té roun bagaj rwa-ya pa té gen drwa fè (2 Chron. 26:16-18). Granprèt Azaryas éséyé anpéché l’ fè sa, mé Ozyas lévé faché. Malérèzman, magré i rété fidèl pannan tout sa lannen-yan, i fè roun mové bagaj é Jéova bay li lalèp pou pini l’ (2 Chron. 26:19-21). Sa pa té ké rivé l’ si i té kontinyé gen imilité !

11. Kisa ki ké idé nou kontinyé gen imilité ? (gadé zimaj-a osi).

¹¹ Lò Ozyas vin fò, i bliyé ki si i té gen fòrs é si so zafè té ka byen maché, a té gras a Jéova. Kisa sa ka anprann nou ? Annou toujou sonjé ki a Jéova ki ka bay nou bénédiksyon ké rèsponsabilité nou gen. Pasé nou bay nou kò grad pou sa nou ka rivé fè, annou toujou di ki a gras a Jéova b (1 Cor. 4:7). Épi ké imilité, annou rékonnèt ki nou pa parfè é  ki, détan, nou bézwen yé rouprann nou. Roun frè ki gen pasé 60 lannen ékri : « Mo anprann pa dékourajé lò ròt-ya ka rémarké sa mo ka fè ki pa bon. Lò mo ka fè roun bétiz, épi yé ka rouprann mo, mo ka mo éséyé chanjé épi kontinyé bay Jéova sa mo gen ki miyò. » Si nou gen lakrent pou Jéova é si nou ka kontinyé gen imilité, tout bagaj ké alé byen pou nou (Prov. 22:4).

12. Lò Jozyas té jenn, kouman i koumansé chaché Jéova ? (2 Chroniques 34:1-3).

¹² Jozyas pran bon désizyon : fè kou li. Jozyas té sa roun jennjan lò i koumansé chaché Jéova. I té lé anprann konnèt li pi byen épi fè so volonté. Mé, bagaj-ya pa té fasil pou sa jenn rwa-a. Près tout Israyélit-ya té ka adoré fo bondjé. É i té divèt gen kouraj pou i té ankourajé yé adoré vré Bondjé-a. Ès Jozyas té gen kouraj ? Wi ! Anvan menm i té gen 20 lannen, i koumansé tiré fo ladorasyon annan péyi-a (li 2 Chroniques 34:1-3).

13. Si to ka bay Jéova to lavi, kouman to lavi ké chanjé ?

¹³ Menm si to jenn, to pouvé imité Jozyas. Si to ka vin pròch di Jéova é si to ka anprann kontan so kalité, sa ké bay to anvi bay li to lavi. Kouman to lavi ké chanjé lò to ké fè sa ? Luke batizé lò i té gen 14 lannen. Jou-a i bay Jéova so lavi, i di : « Aprézan, a mo sèrvis pou Jéova ki ké an prémyé annan mo lavi é mo ké fè tousa mo ké pouvé pou mo fè li plézi » (Marc 12:30). Si a sa to lé to menm osi, to pouvé sir ki to ké gen roun bèl lavi !

14. Kouman Johan ké Rachel ka imité rwa Jozyas ?

¹⁴ Ki kalité problèm jennjan-yan ki ka sèrvi Jéova ka jwenn ? Johan, ki batizé lò i té gen 12 lannen, ka èspliké ki so kanmarad lékòl ka mété présyon asou l’ pou i vapoté, sa lé di pou i fimen roun sigarèt élèktronik. Pou i pouvé trouvé fòrs pou i di non, i ka sonjé ki sa labitid-a pouvé gaté so lasanté é pouvé fè li pédi so lanmityé ké Jéova. Rachel, ki batizé lò i té gen 14 lannen, ka èspliké sa ki ka idé li lò i gen problèm lékòl. Men sa i ka di : « Mo toujou ka éséyé konparé sa mo ka wè  ouben sa mo ka anprann ké sa Labib-a ka di. Parèkzanp, roun léson annan kour istwè-a ké fè mo sonjé roun istwè ouben roun profési annan Labib-a. Ouben roun kozé ké roun moun ké fè mo sonjé roun vèrsé mo pouvé bay li. » Problèm to ka jwenn jòdla, a pa menm problèm Jozyas té ka jwenn, mé kou li, to pouvé aji ké sajès ké fidélité. Si to ka rété fidèl annan éprèv to ka jwenn jòdla, sa pouvé préparé to pou to tchenbé annan éprèv to ké jwenn pita.

15. Kisa ki bay Jozyas anvi aji ? (2 Chroniques 34:14, 18-21).

¹⁵ Lò Jozyas té gen 26 lannen, i koumansé ranjé Tanp-a. Pannan yé té ka fè travo-ya, yé trapé « liv Lalwa Jéova té bay Moyiz ». Lò rwa-a tandé sa sa liv-a té ka di, i vin anvi apliké Lalwa (li 2 Chroniques 34:14, 18-21). Ès to anvi li Labib-a souvan ? Si to ja ka éséyé fè l’, ès to ka pran plézi li Labib-a ? Kisa to ka fè pou to pouvé sonjé vèrsé ki pouvé idé to ? Luke, nou ja palé anvan-an, ka marké annan roun kayé lidé entérésan i ka jwenn lò i ka li. Ès to pouvé fè roun bagaj konsa pou to rivé sonjé vèrsé ké lidé to kontan ? Pi to ké anprann bagaj annan Labib-a, pi to ké kontan sa liv-a é pi to ké anvi sèrvi Jéova. É kou sa pasé pou rwa Jozyas, Paròl Bondjé-a ké bay to anvi aji.

16. Poukisa Jozyas fè roun péché ki té grav, é kisa sa ka anprann nou ?

¹⁶ Jozyas pran mové désizyon : gadé wè sa sa ka anprann to. Lò Jozyas té gen apéprè 39 lannen, i fè roun bagaj ki fè li pédi so lavi. Pasé i doumandé Jéova sa i té divèt fè, i fè sa so lidé di li fè (2 Chron. 35:20-25). Kisa sa ka anprann nou ? Kèlkéswa laj nou gen, ki sa ka fè lontan ki sa pa ka fè lontan nou ka étidyé Labib-a, nou toujou divèt chaché konnèt sa Jéova ka pansé. Pou nou fè sa, annou doumandé  li idé nou, annou étidyé so Paròl é annou doumandé krétyen ki gen èspéryans bay nou konsèy. Konsa, nou ké gen mwens chans fè péché ki grav é nou ké gen plis chans gen tchò kontan (Jacq. 1:25).

17. Kisa nou pouvé anprann gras a lavi Joas, Ozyas ké Jozyas ?

¹⁷ Lò to jenn, to pouvé fè bokou bagaj. Istwè lavi Joas, Ozyas, ké Jozyas ka montré ki jennjan-yan pouvé pran bon désizyon épi fè sa Jéova kontan. Sa vré, kou nou wè l’, nou pouvé tonbé. Mé nou savé ki nou pouvé imité sa sa rwa-ya fè ki té bon épi nou pouvé évité fè sa yé fè ki pa té bon. Konsa, nou ké sir ki tout bagaj ké byen pasé pou nou.

18. Èkzanp kimoun annan Labib-a ka montré ki to pouvé gen roun bèl lavi ? (gadé zimaj-a osi).

¹⁸ Annan Labib-a, nou ka jwenn èkzanp ròt jennjan ki té pròch di Jéova, ki Jéova té kontan é ki rivé gen roun bèl lavi. David té annan yé. Lò i té jenn, i chwazi adoré Jéova é pita, lò i té rwa, i rété fidèl. Sa vré, détan, i fè dé bagaj ki pa té bon menm, mé Jéova toujou wè l’ kou roun moun ki té fidèl (1 Rois 3:6 ; 9:4, 5 ; 14:8). Lavi David pouvé idé to ké ankourajé to sèrvi Jéova ké fidélité. To pouvé étidyé osi lavi Mark ouben Timoté. To ké wè ki yé désidé sèrvi Jéova lò yé té jenn é yé fè Jéova plézi pannan tout yé lavi. To ké wè ki yé rivé gen roun bèl lavi.

19. Ki kalité lavi to pouvé gen ?

¹⁹ Sa to ka fè di to lavi jòdla enpòrtan. Si to ka fè Jéova konfyans, pasé to mété to konfyans annan to entélijans, i ké idé to maché asou bon chimen-an (Prov. 20:24). Konsa, to ké pouvé gen roun lavi ki bèl é viv ké tchò kontan. Pa janmen bliyé ki Jéova kontan tousa to ka fè pou li. Ès i gen roun pi bèl bagaj pasé sèrvi to Papa ki annan syèl-a é ki kontan nou ?