1. Kouman mirak Jézi fè aji asou Pyèr ?

 PYÈR péché tout lannwit é i pa trapé anyen. Pourtan, men sa Jézi ka doumandé li fè : « Alé koté dlo-a fon, épi lagé zòt filé pou péché » (Luc 5:4). Pyèr pa djè krè i ké trapé poson, mé i ka fè sa Jézi ka doumandé li fè. Afòrs Pyèr ké mouché-ya ki ka travay ké li ka trapé poson, filé-ya ka koumansé déchiré. Yé ka rété èstébékwé : yé ka randé yé kò kont ki Jézi fin fè roun mirak ! Pyèr ka rélé : « Pa rété òbò mo, Sényèr, paské mo sa roun wonm plen ké péché » (Luc 5:6-9). Aparaman, yenki savé ki Jézi òbò li, i ja ronté.

2. Kisa èkzanp Pyèr ka anprann nou ?

² Pyèr té gen rézon : i té sa roun « wonm plen ké péché ». Kou nou ka wè l’ annan Labib-a, détan, i di épi i fè bagaj i rigrété apré. Ès sa ja rivé to, to menm osi ? Ès to ka briga ké roun défo ouben ké roun vyé tandans ? Si a sa, èkzanp Pyèr pouvé ankourajé to. Jéova pa té blijé marké défo Pyèr té gen, annan Labib-a. Mé i fè l’ pou nou pouvé anprann roun patché bagaj (2 Tim. 3:16, 17). Sa ki rivé sa mouché-a ki té gen défo é ki té ka rousanti menm bagaj ké nou, ka montré nou ki Jéova pa ka doumandé nou pou nou parfè. I lé nou pa lagé. I lé nou kontinyé briga ké défo nou gen.

3. Poukisa nou pa divèt lésé tonbé ?

 ³ Poukisa sa enpòrtan pou nou pa lagé ? Paské i gen roun dolo ka di : « C’est en forgeant qu’on devient forgeron ». Réfléchi asou sa : Roun moun pouvé pasé roun patché lannen ka antréné so kò anvan i byen konnèt jwé roun enstriman lanmizik. Pannan tout sa tan-an, i ké fè fot. Mé si i ka kontinyé antréné so kò, i ké vin pi fò. É menm lò i ké vin vayan, i ké pouvé fè fot toujou. Mé i pa ké lésé tonbé. I ké kontinyé chaché vin pi fò. Menm fason-an, menm si nou ka pansé ki nou fini ké roun défo, nou pouvé viré tonbé annan l’. Mé, ès nou ka arété fè éfòr ? Non ! Nou tout nou ka di é nou ka fè bagaj nou ka rigrété apré. Mé, si nou ka kontinyé fè éfòr, Jéova ké idé nou kontinyé fè progrè (1 Pierre 5:10). Annan sa artik-a, nou ké wè èkzanp Pyèr ki pa lagé. Nou ké wè ki Jézi montré so konpasyon pou li, menm si i té gen défo, é sa ké bay nou anvi kontinyé adoré Jéova.

4. Dapré Luc 5:5-10, kouman Pyèr ka palé di li menm, mé kouman Jézi rasiré li ?

⁴ Labib-a pa ka di nou poukisa Pyèr di ki i té sa roun « wonm plen ké péché » ni di ki péché i té ka palé (li Luc 5:5-10). Pitèt i té fè péché ki té grav. Jézi wè ki Pyèr té pè, pitèt paské i té ka pansé ki i pa té vo anyen. Mé i té savé osi ki i té pouvé rété fidèl. Donk, i di li jantiman : « Pa pè konsa. » Jézi fè Pyèr konfyans, é sa chanjé tout so lavi. Pita, li ké so frè André désidé lésé yé antrépriz lapèch pou yé swiv Mési-a toulong. É sa désizyon-an pèrmèt yé trapé roun patché bénédiksyon (Marc 1:16-18).

5. Ki bénédiksyon Pyèr trapé pas i pa rété asou sa ki té ka fè li pè é i asèpté envitasyon Jézi ?

⁵ Pyèr viv roun patché bèl bagaj òbò Jézi. I wè li géri roun patché moun malad, fè démon soti annan moun é menm résisité moun mouri b (Mat. 8:14-17 ; Marc 5:37, 41, 42). Épi osi, annan roun vizyon, i wè laglwar Jézi té ké gen annan Rwayonm-an, é i pa janmen bliyé sa (Marc 9:1-8 ; 2 Pierre 1:16-18). Si i pa té divini so disip, i pa té ké janmen wè sa bagaj-ya. Menm si i té ronté, i pa rété asou sa. I dèt té byen kontan, paské a konsa i rivé gen tout sa bénédiksyon-yan !

6. Ès a lanmenm Pyèr rivé pa rété asou so défo ? Èspliké.

 ⁶ Magré sa i té wè é sa i té tandé, Pyèr té divèt briga ké so défo toujou. Annou pran déztrwa èkzanp. Lò Jézi èspliké ki i té ké soufri é ki i té ké mouri, kou profési-ya annan Labib-a té ka di, i roupran li (Marc 8:31-33). Plizyèr fwa li ké ròt apot-ya briga pou savé kimoun ki té pi gran. (Marc 9:33, 34). Lannwit anvan Jézi mouri, i pa réfléchi, i koupé zorè roun mouché (Jean 18:10). Épi sa menm lannwit-a, i pran pè : trwa fwa, i di ki i pa té konnèt so zanmi, Jézi (Marc 14:66-72). Atò, i mété pléré atè (Mat. 26:75).

7. Lò Jézi résisité, ki posibilité i bay Pyèr ?

⁷ Mé Jézi pa anbandonnen so apot ki té dékourajé. Lò i résisité, i bay li posibilité montré l’ i té kontan l’ toujou. I doumandé li pran swen di so brébi ké imilité (Jean 21:15-17). Ès Pyèr asèpté sa travay-a ? Wi ! I té Jérizalèm jou Lapannkot é i té annan prémyé moun-yan Bondjé wen ké lèspri sen.

8. Ki gro bétiz Pyèr fè lò i té Antyòch ?

⁸ Menm lò Bondjé vidé so lèspri sen asou l’, Pyèr té gen pou kontinyé briga ké défo i té gen. Annan lannen 36 di nou lépòk, Kòrnèy, roun moun ki pa té Jwif é ki pa té sirkonsi, rousouvwè lèspri sen. Kou sa mouché-a té wen ké lèspri sen, sa té ka montré ki « Bondjé pa ka fè préférans » é ki sa-ya ki pa té Jwif té pouvé fè parti di asanblé krétyen-an (Actes 10:34, 44, 45). Pyèr té la lò sa bagaj-a rivé. É apré sa, i koumansé manjé ké sa-ya ki pa té Jwif. A té roun bagaj i pa té ké janmen fè anvan sa (Gal. 2:12). Mé i té gen Jwif ki té vin krétyen ki té ka pansé ki a pa té roun bon bagaj ki Jwif-ya ké sa-ya ki pa té Jwif, manjé ansanm. Lò roun ran annan yé vini Antyòch, kou Pyèr té pè choké yé, i arété manjé ké so frè ki pa té jwif. Apot Pòl rémarké ki i té ka fè ipokrit é i roupran li douvan tout moun (Gal. 2:13, 14). Magré sa, Pyèr kontinyé vansé. Kisa ki idé li pa lésé tonbé ?

9. Kisa ka montré ki Pyèr té sa roun moun ki té fidèl ? (Jean 6:68, 69).

⁹ Pyèr té sa roun moun ki té fidèl ; i pa janmen lésé anyen dékourajé l’ nèt. I montré i té fidèl jou-a Jézi di roun bagaj so disip pa konprann (li Jean 6:68, 69). Roun ran disip arété swiv Jézi san yé pa menm chaché konprann sa i té lé di. Mé a pa sa Pyèr fè. I rékonnèt ki a Jézi rounso ki té « gen palò ki ka bay lavi pou tout-tan ».

10. Kouman Jézi montré Pyèr ki i té ka fè li konfyans ? (gadé zimaj-a osi).

¹⁰ Jézi pa lésé Pyèr tonbé. A vré, i té savé ki kou ròt apot-ya, Pyèr té ké lésé l’ lannwit anvan i mouri. Mé magré sa, i montré l’ ki i té ka fè l’ konfyans. I di li ki i té sir ki i té ké viré maré so kanmza é ki i té ké rété fidèl (Luc 22:31, 32). Jézi té savé ki « lèspri-a lé fè bokou bagaj, mé [ki] lachè-a li menm, i fèb » (Marc 14:38). A pou sa, menm lò Pyèr di ki i pa té konnèt li, i pa lésé l’ tonbé. Lò i résisité, i parèt douvan li roun jou i dèt té li rounso (Marc 16:7 ; Luc 24:34 ; 1 Cor. 15:5). Sa dèt ankourajé Pyèr toubonnman pas i té tris menm !

11. Kouman Jézi idé Pyèr sir ki Jéova té ké idé l’ ?

 ¹¹ Jézi idé Pyèr pou i té sir ki Jéova té ké idé li. Lò i résisité, i fè li ké plizyèr ròt apot trapé poson. A té dézyèm fwa i té ka fè sa mirak-a (Jean 21:4-6). Sa dèt idé Pyèr vin sir ki Jéova té pouvé bay li fasilman sa i té bézwen pou viv. É pitèt menm i sonjé sa Jézi té di asou Jéova : i té ké bay sa-ya ki té ké kontinyé « chaché Rwayonm-an […] an prémyé » sa yé té bézwen pou viv (Mat. 6:33). Tout sa bagaj-ya pousé Pyèr mété so ministèr an prémyé annan so lavi pasé i mété so antrépriz lapèch an prémyé. Jou Lapannkot 33, i préché ké kouraj, é sa pèrmèt roun patché moun asèpté bon nouvèl-a (Actes 2:14, 37-41). Apré sa, i idé Samariten-yan ké sa-ya ki pa té Jwif, anprann konnèt Jézi épi swiv li (Actes 8:14-17 ; 10:44-48). Sa klè, Jéova sèrvi Pyèr pou i fè tout kalité moun antré annan asanblé-a.

12. Kouman èkzanp Pyèr pouvé ankourajé nou si nou ka briga ké menm défo-a dipi lontan ?

¹² Jéova pouvé bay nou fòrs pou nou pa lésé tonbé. Souvan, nou ké divèt fè roun patché éfòr, èspésyalman si nou ka briga ké menm défo-a dipi lontan. É détan, pitèt nou ké gen lenprésyon ki nou défo pi rèd pou lésé pasé défo Pyèr té gen. Mé Jéova pouvé bay nou fòrs pou nou pouvé kontinyé vansé (Ps. 94:17-19). Annou palé di roun frè ki té omosèksyèl pannan lontan anvan i anprann lavérité. I lésé mové konpòrtman i té gen-an tonbé, paské sa pa té k’alé ké sa Labib-a ka di. Mé, pannan roun tan, i briga ké mové anvi i té gen. Kisa ki idé l’ pa lésé tonbé ? I ka èspliké : « Jéova ka bay [nou] fòrs. » Apré sa i ka di : « [Gras a] lèspri sen Jéova […], mo anprann ki nou pouvé viv lavérité […] Jéova itilizé mo é […] magré défo mo gen, i ka kontinyé bay mo fòrs. »

13. Kouman nou pouvé imité Pyèr ? (Actes 4:13, 29, 31 ; gadé zimaj-a osi).

¹³ Kou nou wè l’, a pa dé fwa rounso Pyèr fè mové bagaj paské i té pè. Mé lò i konté asou fòrs Jéova pouvé bay nou, i rivé aji ké kouraj (li Actes 4:13, 29, 31).  Nou menm osi, nou pouvé rivé pa pè. A sa Horst wè. A roun frè ki viv an Almagn lò a té Nazi-ya ki té ka kontrolé péyi-a. Plizyèr fwa, i pa rivé tchenbé anba présyon yé té ka mété asou l’ lò i té lékòl é i di : « Heil Hitler ! » Pasé yé babyé l’, so papa ké so manman té ka priyè ké li. Yé té ka doumandé Jéova bay li kouraj. Gras a sa yé fè pou idé li é kou i konté asou Jéova, Horst rivé trapé fòrs pou tchenbé anba présyon yé té ka mété asou l’. Pita i di : « Jéova pa janmen lésé mo tonbé c. »

14. Kisa roun bèrjé ki kontan brébi-ya pouvé fè pou rasiré roun brébi ki dékourajé ?

¹⁴ Ni Jéova ni Jézi pa ké janmen lésé nou tonbé. Lò Pyèr di ki i pa té konnèt Jézi, i té gen roun chwa enpòrtan pou fè. Ès i té ké arété sa roun disip Kris, ouben ès i té ké kontinyé ? Jézi té sipliyé Jéova pou so lafwa pa fébli. Anplis di sa, i té di Pyèr ki i té priyè pou li é i té di li ki i té sir ki pita, i té ké rivé bay so frè fòrs (Luc 22:31, 32). Pyèr té divèt rasiré lò i té ka sonjé sa Jézi té di l’ ! Lò nou gen roun désizyon enpòrtan pou pran, Jéova pouvé sèrvi dé bèrjé ki kontan nou pou rasiré nou é pou idé nou rété fidèl (Éph. 4:8, 11). A sa Paul, ki ansyen dipi lontan, ka fè osi. I ka éséyé rasiré so frè ké sò-ya. I ka di sa-ya ki dékourajé éséyé sonjé kouman Jéova fè yé vini annan lavérité-a. Apré sa, i ka èspliké yé ki, kou Jéova sa roun Bondjé ki gen bokou lanmou fidèl, i pa ké lésé yé tonbé. I ka di : « Mo wè ki roun patché frè ké sò ki té dékourajé ka rivé tchenbé gras a Jéova ki ka idé yé. »

15. Kouman èkzanp Pyèr ké Horst ka montré ki sa Matthieu 6:33 ka di, vré ?

 ¹⁵ Menm fason Jéova bay Pyèr ké plizyèr ròt apot sa yé té bézwen pou viv, i ké bay nou sa nou bézwen pou viv si nou ka mété prédikasyon-an an prémyé annan nou lavi (Mat. 6:33). Apré Dézyèm Lagèr mondyal-a, Horst, nou ja palé anvan, té lé divini pyonyé. Problèm-an, a ki i té pov menm. I té ka pansé ki i pa té ké janmen rivé gen sa i té bézwen pou viv alòr ki i té annan sèrvis a plen tan-an. Atò, kisa i fè ? Pou i wè si Jéova té ké vréman bay li sa i té bézwen, i préché pannan tout simenn-an lò rèsponsab sirkonskripsyon-an té ka vizité so asanblé. Lò simenn-an fini, i rété èstébékwé lò rèsponsab sirkonskripsyon-an bay li roun anvlòp plen ké soumaké, mé i pa di li a kimoun ki té ka bay li sa. Gras a sa soumaké-a, Horst té pouvé rété pyonyé pannan plizyèr mwa. Pou li, sa té klè : gras a sa kado-a, Jéova té ka rasiré l’ é i té ka fè l’ konprann ki i té ké toujou la pou idé l’. Horst kontinyé mété Rwayonm-an an prémyé pannan tout so lavi (Mal. 3:10).

16. Poukisa nou divèt gadé èkzanp Pyèr ké lèt i ékri ?

¹⁶ Pyèr té divèt byen kontan Jézi pa fè sa i té doumandé l’, i rété òbò li ! Jézi fòrmé l’ pou i divini roun apot ki fidèl é pou i sa roun èkzanp pou krétyen-yan. Vèrsé-ya annan Labib-a ki ka palé di fòrmasyon i rousouvwè-a, ka anprann nou roun patché bagaj ki pouvé idé nou tout. Pyèr ka palé di roun ran annan sa bagaj-ya ké ròt bagaj ankò annan dé lèt i ékri gras lèspri sen Bondjé é ki i voyé bay asanblé-ya annan 1^é syèk-a. Annan ròt artik-a, nou ké wè déztrwa lidé nou ka jwenn annan sa lèt-ya é nou ké wè kouman nou pouvé apliké yé jòdla.