1-2. Poukisa nou divèt pran tan gadé istwè Sanson ?

 LÒ TO ka tandé « Sanson », kimoun to ka wè ? Pitèt to ka wè roun mouché Labib-a ka palé, ki té fò toubonnman. É to gen rézon. Sanson, a té roun moun ki té gen bokou fòrs. Mé ès to savé ki i soufri bokou paské i pran roun mové désizyon ? Magré sa, Jéova rété asou bon bagaj i fè. É i fè moun marké sa annan Labib-a pou sa idé nou.

² Jéova sèrvi Sanson pou fè roun patché bèl bagaj pou so pèp Israyèl. É plizyèr syèk apré Sanson mouri, i fè apot Pòl marké non so sèrvitèr annan lis non wonm ké fanm ki montré ki yé té gen roun bèl lafwa (Héb. 11:32-34). Èkzanp Sanson pouvé idé nou bokou, paské i fè Jéova konfyans menm lò sitiasyon-an té rèd. Annou wè kouman sa i viv pouvé ankourajé nou é kouman sa pouvé idé nou.

3. Ki misyon Jéova bay Sanson ?

³ Lò Sanson fèt, a té Filisten-yan ki té ka koumandé nasyon Israyèl-a é yé té rèd ké yé (Juges 13:1). Israyélit-ya té ka soufri anba yé lanmen. Alòr Jéova chwazi Sanson « pou sové Israyèl annan lanmen Filisten-yan » (Juges 13:5). Mé a té roun misyon ki té rèd toubonnman ! Pou i té rivé, Sanson té ké divèt fè Jéova konfyans.

4. Kouman Jéova idé Sanson lò i té Léyi ? (Juges 15:14-16).

 ⁴ Annou pran roun èkzanp ki ka montré ki Sanson té ka fè Jéova konfyans é ki i té ka konté asou li pou i idé l’. Roun larmé filisten té vini Léyi, ki té pitèt annan vil Jida, pou tchenbé l’. Afòrs yé té pè, moun Jida-ya — moun di so pròp pèp ! — trayi l’. Yé lésé l’ annan lanmen Filisten-yan. Yé byen maré l’ ké dé kòrd nòv é yé mennen l’ pou Filisten-yan (Juges 15:9-13). Mé « lèspri Jéova plen Sanson ké fòrs » é gras a sa, i rivé kasé kòrd-ya ki té ka maré so lanmen. Apré sa, i trapé « machwè roun nann ki té mouri pa té gen lontan », é i sèrvi sa pou tchwé 1000 Filisten ! (li Juges 15:14-16).

5. Kisa ki ka montré ki Sanson té ka fè Jéova konfyans ?

⁵ Machwè roun nann… A ki modèl zarm sa ? Poukisa Sanson sèrvi machwè roun nann pou ataké so lèlmi ? I té savé ki a pa sa i té ké sèrvi kont so lèlmi ki té ké idé l’ ganyen, mé a té Jéova, asiré pa pitèt ! Sa mouché-a ki té gen lafwa sèrvi sa i trapé pou fè volonté so Bondjé. I rivé ganyen asou so lèlmi paské i té ka fè Jéova konfyans.

6. Kouman sa ki rivé Sanson pouvé ankourajé nou lò Jéova ka doumandé nou fè roun bagaj ?

⁶ Jéova pouvé bay nou fòrs osi pou nou fè sa i ka doumandé nou fè, menm sa nou ka trouvé ki rèd pou fè. É détan, fason i ka bay nou sa fòrs-a pouvé sirprann nou ! A pou to sir ki si to ka kontinyé fè li konfyans, i ké bay to fòrs é i ké idé to fè so volonté kou i fè l’ pou Sanson (Prov. 16:3).

7. Bay roun èkzanp ki ka montré ki sa enpòrtan pou nou lésé Jéova gidé nou ?

⁷ Roun patché frè ké sò ki ka partisipé annan konstriksyon batiman nou ka sèrvi pou adoré Jéova, montré Jéova ki yé ka fè l’ konfyans. Anvan, a nou menm ki té ka konstrwi sa batiman-yan. Mé kou i gen plizanplis Témwen, sitiasyon-an chanjé é sa nou bézwen osi.  Frè-ya ki ka okipé di konstriksyon-an doumandé Jéova gidé yé é yé éséyé ròt métòd. Roun annan sa métòd-ya, a achté roun batiman épi ranjé l’. Robert, ki partisipé annan plizyèr konstriksyon sa dèrnyé lannen-yan, ka èspliké : « O koumansman, roun ran pa té ka rivé asèpté sa chanjman-an, sa té konplètman diféran di sa nou té fè pannan plizyèr lannen. Mé frè-ya té paré pou adapté yé kò é nou byen wè ki Jéova té ka béni sa chanjman-yan. » A roun ti èkzanp ki ka montré kouman Jéova ka dirijé so pèp pou i fè so volonté fèt. A pou sa, tanzantan, annou doumandé nou kò : « Ès mo ka chaché konprann sa Jéova lé mo fè ? É ès mo paré pou adapté mo kò lò mo divèt fè l’ ? »

8. Kisa Sanson fè roun jou i té swèf bokou ?

⁸ Pitèt to ka sonjé ròt bèl bagaj Sanson rivé fè. Parèkzanp, i tchwé roun lyon ké so dé lanmen, é pita i tchwé 30 Filisten annan vil Askalon (Juges 14:5, 6, 19). A pa ti bèl bagaj i té ka rivé fè. Mé i té savé ki si i té ka rivé fè sa, a té sèlman gras a Jéova. A sa nou ka wè annan fason i réyaji apré i tchwé 1000 Filisten. Lò i fini, i té swèf pou mouri. Mé, pasé i konté asou li menm pou i trapé dlo, i doumandé Jéova idé li (Juges 15:18).

9. Kouman Jéova réponn lapriyè Sanson ? (Juges 15:19).

⁹ Jéova réponn Sanson, i fè roun mirak : i fè roun sours dlo pou i té pouvé bwè. Lò Sanson bwè, « i roupran fòrs é i vin gen plis kouraj » (li Juges 15:19). Dapré sa nou ka wè, plizyèr lannen apré, lò Samiyèl ékri liv Juges, sa sours dlo-a té la toujou. Pitèt sa dlo-a té ka fè Israyélit-ya sonjé ki yé té pouvé konté asou Jéova lò sa té rèd.

10. Kisa nou divèt fè pou Jéova idé nou ? (gadé zimaj-a osi).

¹⁰ Nou menm osi, nou divèt doumandé Jéova idé nou, kèlkéswa sa nou konnèt fè, kèlkéswa don nou gen ouben kèlkéswa sa nou ja fè pou li. Nou divèt rékonnèt nou limit épi nou divèt rékonnèt osi ki a sèlman si nou ka fè Jéova konfyans ki nou pouvé fè sa i ka doumandé nou fè. Menm fason dlo Jéova bay Sanson bay li fòrs, nou ké gen fòrs nou menm osi annan domenn èspirityèl-a si nou ka profité di tousa Jéova ka bay nou (Mat. 11:28).

11. Kouman nou pouvé byen profité di sa Jéova ka fè pou idé nou ? Bay roun èkzanp.

¹¹ Annou palé di Alekseï, roun frè Larisi yé ka pèrsékité. Kisa ki a idé l’ rété fò èspirityèlman ? A bon labitid èspirityèl li ké so madanm gen. Men sa i èspliké anvan yé mété l’ lajòl : « Mo ka éséyé gardé mo bon labitid, mo ka étidyé é mo ka li Labib-a touléjou. Chak bonmanten, mo ka li tèks pou koumansé lajournen-an ké mo madanm é nou ka priyè Jéova ansanm. » Kisa èkzanp Alekseï ka anprann nou ? Pasé nou konté asou nou menm, nou divèt konté asou Jéova. Pou nou rivé fè sa, annou gen bon labitid èspirityèl pou nou fè nou lafwa vin pi fò. Annou étidyé Labib-a nou rounso, annou priyè, annou alé annan réinyon-yan, épi annou préché souvan. Si nou ka fè sa, Jéova ké béni tout éfòr nou ka fè. I bay Sanson fòrs, i pouvé bay nou fòrs nou menm osi.

12. a) Ki mové désizyon Sanson pran ? b) Poukisa rélasyon Sanson té gen ké Dalila té diféran ké sa-la i té gen ké madanm filisten-an épi ké pròstityé-a ?

¹² Kou nou menm, Sanson pa té parfè. Donk, détan, i pran sèrten désizyon ki pa té bon. É roun annan yé mété li annan roun bèl benyenyen. I té jijé nasyon Israyèl-a pannan plizyèr lannen, é apré sa i « vin kontan roun fanm ki té ka rété annan roun koté yé ka aplé Sorèk […]. Yé té ka aplé sa madanm-an Dalila » (Juges 16:4). Anvan sa, i té fiyansé ké roun madanm filisten, mé ‘a Jéova ki té fè li pran sa désizyon-an’ paské « i té ka chaché roun okazyon pou i ataké Filisten-yan ». Apré sa, i té rété roun ti moman annan kaz roun pròstityé annan vil Gaza, mé sa té bay li okazyon briga ké Filisten-yan annan sa vil-a ; gras a fòrs Jéova té bay li, i té rivé raché lapòt sa vil-a épi poté yé alé lwen pou jité yé (Juges 14:1-4 ; 16:1-3). Parkont, sitiasyon-an té diféran ké Dalila paské sa madanm-an té divèt sa roun israyélit.

13. Annan ki benyenyen pinèz Sanson mété so kò paské i fè Dalila konfyans ?

¹³ Filisten-yan propozé Dalila bay li bokou soumaké pou i trayi Sanson, é i asèpté. Poukisa Sanson pa panga madanm-an ? Ès afòrs i té kontan li i pa wè sa i té lé fè ké li ? Nou pa savé, mé plizyèr fwa Dalila mété présyon asou li pou i di li koté i té ka pran so fòrs. Finalman, i asèpté bay li so sigré. Malérèzman, Sanson mété so kò annan roun sitiasyon ki fè li péché é pannan roun tan, i pédi so fòrs ké rélasyon èspésyal i té gen ké Jéova (Juges 16:16-20).

14. Kisa ki rivé Sanson paské i fè Dalila konfyans ?

 ¹⁴ Pas i fè Dalila konfyans pasé i fè Jéova konfyans, Sanson soufri bokou. Filisten-yan trapé l’ é yé krévé so dé wéy. Yé mété l’ lajòl annan vil Gaza. A lapòt sa vil-a Sanson té raché. É yé fè li divini yé èsklav, i té ka krazé grenn pou yé. Apré sa, yé fè l’ ronté annan roun lafèt yé fè pou Dagon, yé fo bondjé. Yé fè roun gran sakrifis pou sa fo bondjé-a paské yé té ka pansé ki a li ki té pèrmèt yé tchenbé Sanson. Épi yé désidé fè Sanson soti di so lajòl, yé fè li vini annan yé lafèt pou i « fè yé ari ». Yé ari di so tèt pou fè l’ ronté ! (Juges 16:21-25).

15. Kouman Sanson montré ki i té ka roukoumansé fè Jéova konfyans ? (Juges 16:28-30 ; gadé zimaj-a anlè prémyé paj-a).

¹⁵ Sanson té fè roun fot ki té grav, mé i pa lésé tonbé, i kontinyé sèrvi Jéova. I chaché kontinyé fè travay so Bondjé té bay li fè-a, sa lé di briga kont Filisten-yan (li Juges 16:28-30). A pou sa, i sipliyé l’, i di li : « Fè mo pran mo vanjans asou Filisten-yan. » Vré Bondjé-a réponn so lapriyè é i roubay li fòrs èspésyal i té gen-an. Sa jou-a, Sanson tchwé plis Filisten pasé sa i té tchwé pannan tout so lavi.

16. Kisa fot Sanson fè-a ka anprann nou ?

¹⁶ Menm si Sanson soufri paské i fè roun fot, i pa janmen arété anvi fè volonté Jéova. Nou menm osi, menm si nou fè roun fot é yé rouprann nou, ouben nou té oblijé lésé roun rèsponsabilité yé té bay nou, annou pa lagé. Annou sonjé ki Jéova ka pardonnen ké tout so tchò (Ps. 103:8-10). Menm si nou fè bagaj ki pa bon, nou pouvé itil pou Jéova toujou, kou Sanson.

17-18. Kisa ki ka ankourajé to annan sa Michael ka di ? (gadé zimaj-a osi).

¹⁷ Annou palé di roun jenn frè yé ka aplé Michael. I té asistan ké pyonyé pèrmanan annan so asanblé. I té byen okipé annan so sèrvis pou Jéova. Malérèzman, i fè roun mové bagaj, é akoz di sa i pédi so rèsponsabilité annan asanblé-a é i té blijé lésé so sèrvis pyonyé. I ka di : « Mo té ka sèrvi Jéova san pran van, é rounsèl kou konsa, tout bagaj arété. Mo pa janmen pansé ki Jéova té ké lésé mo, mé mo té ka doumandé mo kò si roun jou mo té ké pouvé viré gen  menm lanmityé mo té gen ké li anvan, ouben si mo té ké pouvé viré sèrvi li annan asanblé-a kou anvan. »

¹⁸ Michael byen réyaji, i pa lésé tonbé. I ka di : « Mo fè tousa mo té pouvé pou mo té vin pi pròch ké Jéova. Souvan mo priyè l’ pou di li sa mo té gen asou mo tchò. Mo étidyé é mo pran tan réfléchi asou sa mo té ka étidyé ». Piti piti, Michael viré gen roun bon répitasyon annan asanblé-a. Jòdla i ansyen é i pyonyé pèrmanan. I ka di : « Frè ké sò-ya ankourajé mo é yé idé mo, èspésyalman ansyen-yan. É sa idé mo konprann ki Jéova kontan mo toujou. Jòdla mo pouvé adoré li annan asanblé-a ké roun bon konsyans. Sa ki rivé mo anprann mo ki i ka pardonnen tout sa-ya ki ka répanti ké tout yé tchò. » Si nou fè roun mové bagaj mé nou ka fè tousa nou pouvé pou nou chanjé é nou ka kontinyé konté asou Jéova, nou pouvé sir ki i ké roukoumansé itilizé nou é i ké béni nou (Ps. 86:5 ; Prov. 28:13).

19. Kouman èkzanp Sanson fè to gen plis fòrs ?

¹⁹ Annan sa artik-a, nou wè déztrwa bagaj ki rivé Sanson. I pa té parfè, mé i toujou fè tousa i té pouvé pou adoré Jéova ké fidélité, menm lò i fè roun fot paské Dalila mété présyon asou l’. Apré sa, Jéova sèrvi li ankò pou i fè roun bagaj ki té bèl toubonnman. Donk, pou li, Sanson té toujou sa roun moun ki té gen bokou lafwa. É pita, i fè yé mété so non annan lis so sèrvitèr fidèl nou ka jwenn annan Hébreux chapit 11. Sa ka ankourajé nou lò nou savé ki Bondjé nou ka sèrvi-a, a roun Papa ki kontan nou é ki vréman lé bay nou fòrs, èspésyalman lò nou bézwen i idé nou ! Atò, kou Sanson, annou sipliyé Jéova : « Sonjé mo souplé, é bay mo fòrs » (Juges 16:28).