1. Ki kalité késyon roun kolèg travay ouben roun kanmarad lékòl pouvé pozé nou ?

 KOUMAN to ka santi to kò lò roun kolèg travay ouben roun kanmarad lékòl ka pozé to roun késyon asou sa to ka krè ? Ès to pè ? A sa ka rivé près nou tout. Mé késyon to kolèg ouben to kanmarad ka pozé to-a, pouvé pèrmèt to savé sa i ka pansé ouben sa i ka krè, é sa pouvé bay to okazyon palé li di Labib-a. Mé sa pouvé rivé ki roun moun ka pozé nou roun késyon pou lévé roun blo. Sa pa ka étoné nou. Sèrten moun tandé mové bagaj asou nou (Actes 28:22). Anplis di sa, nou ka viv annan « dèrnyé jou-ya », koté moun-yan ‘pa ka rivé tonbé dakò’ é yé « mové menm » (2 Tim. 3:1, 3).

2. Poukisa dousèr-a a roun kalité ki enpòrtan ?

² Pitèt to ka doumandé to kò : « Kouman mo pouvé rété kalm épi réponn jantiman lò roun moun ka kritiké sa mo ka krè ? » Roun bagaj ki pouvé idé to, a dousèr-a. Roun moun ki dous ka rété kalm é i ka kontrolé so kò lò ròt-ya ka provoké l’ ouben lò i pa djè savé sa pou i réponn (Prov. 16:32). Roun ran moun ké di ki a roun bagaj pi fasil pou di ki pou fè. Atò, kouman nou pouvé rivé gen dousèr ? Kouman to pouvé réyaji ké dousèr lò roun moun ka kritiké sa to ka krè ? É si to gen timoun, kouman to pouvé anprann yé défann yé lafwa ké dousèr ? A sa nou ké wè annan sa artik-a.

3. Poukisa nou ka di ki roun moun ki dous, a roun moun ki fò, a pa roun moun ki fèb ? (2 Timothée 2:24, 25).

³ Moun ki dous, a moun ki fò. Yé pa fèb. Dousèr-a, a roun annan kalité « frwi lèspri-a » ka bay (Gal. 5:22, 23). Détan yé ka sèrvi mo grèk-a ki lé di « dousèr » pou palé di roun chouval sovaj yé drésé. Imajiné roun chouval sovaj ki ka vin fran. Aprézan i dous, mé i fò toujou. É nou menm, kouman nou pouvé divini roun moun ki dous toupannan nou ka rété fò ? A pa loutou di lé divini roun moun ki dous. A pou nou doumandé Jéova bay nou so lèspri sen épi idé nou gen sa bèl kalité-a. Roun patché Témwen divini dous. Aprézan, yé ka rété dous lò moun ka provoké yé é sa ka pèrmèt ròt-ya ki ka gadé yé, wè Témwen Jéova-ya roun pi bon fason (li 2 Timothée 2:24, 25). Kouman to pouvé sa roun moun ki dous é an menm tan roun moun ki fò ?

4. Kouman èkzanp Izaak ka montré ki sa enpòrtan pou nou sa dé moun ki dous ?

⁴ Annan Labib-a, i gen roun patché istwè ki ka montré ki sa enpòrtan pou nou sa dé moun ki dous. Annou palé di Izaak. Lò i déménajé pou alé Gérar, roun vil annan péyi Filisten-yan, so vwazen koumansé jalou li é yé bouché tout pi sèrvitèr so papa té fouyé. Pasé i briga pou i défann so drwa, i pati pi lwen ké tout so fanmi é i fouyé ròt pi (Gen. 26:12-18). Mé Filisten-yan di ki sa dilo-a té di yé osi. Sa kou-a ankò, Izaak fè sa ki té fo pou i té rété byen ké yé (Gen. 26:19-25). Kisa ki idé l’ rété dous douvan dé moun ki té byen désidé pou fè roun dézòrd ké li ? I dèt byen gadé èkzanp so papa ké so manman, i dèt anprann roun patché bagaj ké Abraam ki té sa roun moun ki té kontan lapè épi ké Sara ki té sa roun moun ki té ‘dous é ki té ka chaché lapè’ (1 Pierre 3:4-6 ; Gen. 21:22-34).

5. Kisa ki ka montré ki papa ké manman-yan ki krétyen pouvé anprann yé timoun divini dé moun ki dous ? Bay roun èkzanp.

⁵ Papa ké manman, zòt menm osi zòt pouvé anprann zòt timoun sa dé moun ki dous. A sa papa ké manman Maxence, ki gen 17 lannen, fè. Ki lékòl ki an prédikasyon, détan i té ka bité ké moun ki té ka kòlè. Piti piti, so papa ké so manman anprann li divini roun moun ki dous. Yé ka di : « Maxence konprann ki lò roun moun ka provoké nou, a pou nou fò annan nou tèt pou nou pa réponn chou pou chou. Sa pi fasil pou nou kòlè épi volé asou moun-an. » Jòdla, Maxence sa roun moun ki dous é ki fò.

6. Kouman lapriyè pouvé idé nou aji ké plis dousèr ?

⁶ Mé kisa nou pouvé fè lò ròt-ya ka provoké nou, parèkzanp lò roun moun ka malpalé non Bondjé ouben ka ari di sa Labib-a ka di ? Pou nou pouvé réyaji ké dousèr, annou doumandé Jéova so lèspri sen ké so sajès. É si nou ka randé nou kò kont ki nou pa réyaji kou nou té divèt réyaji, annou priyè Jéova ankò é annou doumandé li fè pi byen prochen kou-a. I ké bay nou so lèspri sen. Sa ké idé nou kontrolé nou kò lò nou kòlè épi aji ké dousèr.

7. Poukisa nou ka di ki si nou ka anprann sèrten vèrsé annan Labib-a sa pouvé idé nou lò sa rèd pou nou palé ké dousèr ? (Proverbes 15:1, 18).

⁷ Sèrten vèrsé annan Labib-a pouvé idé nou lò sa rèd pou nou palé ké dousèr. É lèspri sen Bondjé pouvé idé nou sonjé sa vèrsé-ya (Jean 14:26). Prensip-ya ki  nou ka jwenn annan liv Proverbes parèkzanp, pouvé idé nou aji ké dousèr (li Proverbes 15:1, 18). Sa liv-a ka montré nou osi ki kalité bénédiksyon nou ka jwenn lò nou ka kontrolé nou kò lò yé ka provoké nou (Prov. 10:19 ; 17:27 ; 21:23 ; 25:15).

8. Poukisa nou divèt chaché konprann poukisa roun moun ka kritiké sa nou ka krè ?

⁸ Si nou sa roun moun ki chaché konprann bagaj-ya, sa pouvé idé nou bokou (Prov. 19:11). Roun moun ki ka chaché konprann bagaj-ya ka panga sa i ka di lò ròt moun ka kritiké sa i ka krè. Souvan, lò roun moun ka pozé nou roun késyon, i pa ka di nou poukisa i ka pozé nou sa késyon-an. A pou sa, anvan nou réponn, annou sonjé ki pitèt nou pa savé kisa ka fè moun-an pozé nou sa késyon-an (Prov. 16:23).

9. Lò wonm Éfrayim-yan chaché problèm ké Jédéyon, kouman i chaché konprann sitiasyon-an é kouman i montré ki té sa roun moun ki té dous ?

⁹ Annou wè kouman Jédéyon réponn wonm Éfrayim-yan. Yé té kòlè kont li é yé doumandé li poukisa i pa té envité yé vin briga ké lèlmi Israyèl pi bònò. Mé poukisa yé té kòlè vréman ? Sèl bagaj nou savé, a ki Jédéyon éséyé konprann poukisa yé  té faché é i réponn yé ké dousèr. Kisa sa bay ? Yé pa té gen anyen pou di ankò, « yé kalmé yé kò » (Juges 8:1-3).

10. Dapré 1 Pierre 3:15, kouman nou divèt réponn sa-ya ki ka kritiké sa nou ka krè ?

¹⁰ Kisa nou pouvé fè si roun kolèg travay ouben roun kanmarad lékòl ka doumandé nou poukisa nou ka rèspèkté prensip-ya ki annan Labib-a ? Annou fè tousa nou pouvé pou nou défann sa nou ka krè mé an menm tan, a pou nou rèspèkté fason i ka wè bagaj-ya (li 1 Pierre 3:15). Pasé nou krè ki moun-an ka pozé nou sa késyon-an pou ataké nou ouben pou kritiké nou, annou wè sa kou roun okazyon pou savé sa ki enpòrtan pou li. Menm si nou pa savé poukisa moun-an pozé nou sa késyon-an, annou réponn li jantiman épi ké dousèr. Sa nou ké réponn li ké pouvé fè li chanjé fason i ka wè bagaj-ya. Menm si fason moun-an ka palé pou nou-a pa janti, sa nou lé, a réyaji jantiman (Rom. 12:17).

11-12. a) Ki kalité késyon nou divèt pozé nou kò anvan nou réponn roun moun ? (gadé zimaj-a osi). b) Bay roun èkzanp pou montré kouman késyon roun moun ka pozé pouvé louvri chimen-an pou roun bon kozé.

¹¹ Parèkzanp, si roun kolèg ka doumandé nou poukisa nou pa ka fété anivèrsèr, annou pozé nou kò sa késyon-yan : « Ès i ka pansé ki nou pa gen drwa anmizé ? Ouben, kou nou pa ka fété anivèrsèr, ès pou li sa ka riské anpéché tout moun rété byen annan antrépriz-a ? » Pitèt nou ké pouvé rasiré l’ si nou ka di li ki nou kontan wè li ka gadé pou ròt-ya é ki nou menm osi nou ka gadé pou ròt-ya é ki nou lé i gen roun bon anbyans annan travay-a. Pitèt apré sa, zòt ké pouvé palé trankilman di sa Labib-a ka di asou anivèrsèr-ya.

¹² Nou pouvé fè menm bagaj-a ké moun ki ka pozé nou késyon ki difisil. Nou pouvé gen roun kanmarad lékòl ki pouvé di ki Témwen Jéova-ya divèt chanjé fason yé ka wè omosèksyalité-a. Ès i ka di sa pas i pa ka byen konprann fason Témwen Jéova-ya ka wè omosèksyalité-a ? Ès i gen roun di so zanmi ouben roun moun annan so fanmi ki omosèksyèl ? Ouben ès i ka pansé ki nou pa kontan sa-ya ki omosèksyèl ? Pitèt nou ké divèt rasiré l’, di li ki nou kontan é nou ka rèspèkté tout moun é ki, pou nou, chak moun pouvé pran yépa désizyon b (1 Pierre 2:17). Apré sa, pitèt nou ké pouvé palé li di tout bénédiksyon nou ka jwenn lò nou ka rèspèkté prensip-ya ki annan Labib-a.

13. Lò roun moun ka pansé ki sa-ya ki ka krè annan Bondjé, a dé moun ki tèbè, kisa to pouvé propozé li fè ?

¹³ Lò roun moun pa dakò ké nou, a pa pou nou kouri pansé ki i ka krè annan tèl bagaj ouben i pa ka krè annan tèl bagaj (Tite 3:2). Parèkzanp, imajiné ki to gen roun kanmarad lékòl ki ka di ki to tèbè paské to ka krè i gen roun Bondjé. Ès to divèt pansé ki i ka krè annan évolution-an rèd é ki i byen konnèt sa zafè-a ? Mé pitèt i pa janmen étidyé évolution-an. Pasé to antré annan roun déba ké roun patché èsplikasyon syantifik, ès to pa pouvé bay li okazyon réfléchi asou sa pita. Kouman to pouvé fè sa ? Parèkzanp, to pouvé voyé roun lyen bay li pou i alé asou jw.org, pou i gadé roun artik ouben roun vidéyo asou kréyasyon-an. To pa savé, pitèt apré sa i ké paré pou kozé ké to. Si to ka rèspèkté l’ sa pouvé fè li chanjé lidé.

14. Kouman Niall byen sèrvi nou sit pou idé so kanmarad lékòl konprann ki sa moun ka di asou Témwen Jéova-ya pa vré ?

 ¹⁴ Niall, roun jennjan, sèrvi nou sit pou montré ki sa moun ka di asou Témwen Jéova-ya pa vré. I ka di : « Mo té gen roun kanmarad lékòl ki pa té ka las di mo ki mo pa té ka krè annan lasyans paské mo té préféré krè sa roun liv ka di pasé mo krè sa syantifik-ya té trapé. » Kou sa kanmarad-a pa té ka lésé l’ èspliké poukisa i té ka krè annan Bondjé, Niall ankourajé l’ alé wè parti « La Bible et la science » asou jw.org. Pita, Niall randé so kò kont ki so kanmarad té alé asou sit-a é i rivé palé ké li di ki koté lavi-a soti. To menm osi, pitèt to ké pouvé gen bon rézilta si to ka sèrvi nou sit.

15. Kouman papa ké manman-yan pouvé anprann yé timoun réyaji ké dousèr lò moun ka kritiké sa yé ka krè ?

¹⁵ Papa ké manman-yan pouvé anprann yé timoun réyaji ké dousèr lò roun moun ka kritiké sa yé ka krè (Jacq. 3:13). Sèrten papa ké manman ka òrganizé pou yé antréné yé kò pannan étid yé ka fè ké tout fanmi-a. Yé ka chwazi palé di bagaj yé timoun pouvé tandé lò yé lékòl é yé ka gadé sa yé pouvé di. Sa yé lé, a anprann yé palé ké dousèr épi jantiman (gadé karé-a «  Fè èkzèrsis ké tout fanmi-a »).

16-17. Kouman fè èkzèrsis ka idé nou jennjan ?

¹⁶ Sa kalité èkzèrsis-ya ka idé nou jennjan bokou. Sa ka pèrmèt yé pi sir ki sa yé ka krè vré é sa ka pèrmèt yé savé sa yé pouvé di yé kanmarad. Annan parti « Les jeunes s’interrogent » asou jw.org, nou ka trapé roun patché ‘fiche de réflexion’. Sa ‘fiche’-ya fèt pou idé jennjan-yan fè yé lafwa  vin pi fò é pou yé préparé répons yé ké pouvé bay di yépa fason. Si zòt ka étidyé artik-ya ki annan sa parti-a ansanm ké tout fanmi-a, tout moun ké anprann défann so lafwa ké dousèr épi jantiman.

¹⁷ Annou wè kouman sa ka idé roun jennjan yé ka aplé Matthew. Pannan yé étid ké fanmi-a, li ké so paran ka fè réchèrch asou bagaj i pouvé tandé lò i lékòl. I ka èspliké : « Nou ka imajiné sa ki pouvé rivé, nou ka fè réchèrch épi apré sa, nou ka antréné nou kò. Lò mo ka byen konprann poukisa mo ka krè roun bagaj, mo pi alèz é sa pi fasil pou mo rété dous ké ròt-ya. »

18. Colossiens 4:6 ka palé di valò ki kalité paròl ?

¹⁸ Menm si nou ka èspliké bagaj-ya roun fason ki klè é di roun fason pou moun sir ki sa nou ka di-a vré, a pa tout moun ki ké asèpté sa nou ka di. Mé pitèt yé ké kontan paské nou palé jantiman ké yé épi ké dousèr (li Colossiens 4:6). Lò nou ka palé di sa nou ka krè, a kousidiré nou té ka lansé roun balon. Nou pouvé lansé balon-an dousman ouben fò. Si nou ka lansé l’ dousman, moun-an ké pouvé trapé l’ épi kontinyé jwé. Menm fason-an, si nou ka palé jantiman épi ké dousèr, moun-an ké pi anvi kouté nou épi kontinyé kozé ké nou. Mé si a yenki briga moun-an lé briga ké nou ouben ari di sa nou ka krè, nou pa bézwen kontinyé kozé-a (Prov. 26:4). Mé a pa tout moun ki konsa ; roun ran moun, pitèt menm bokou, ké kouté nou.

19. Kisa ki divèt pousé nou défann sa nou ka krè ké dousèr ?

¹⁹ Nou ka trapé roun patché bénédiksyon lò nou ka chaché divini roun moun ki dous, asiré pa pitèt. Doumandé Jéova idé to rété dous lò moun ka pozé to késyon ki rèd ouben lò yé ka kritiké to. Pa bliyé ki si to ka réyaji ké dousèr épi ké rèspè, sa pouvé idé to kontinyé kozé jantiman ké roun moun menm si zòt pa dakò, san zòt pa koumansé babyé ké zòt konpanyen. Sa pouvé menm idé sa-ya ki ka kouté to chanjé lidé asou nou ouben asou sa Labib-a ka di. Atò, a pou to « toujou paré pou défann » sa to ka krè, « ké dousèr ké bokou rèspè » (1 Pierre 3:15). Épi montré ki, kou to sa roun moun ki dous, to fò !