1. Kisa Bondjé fè Pyèr ékri roun ti moso tan anvan i mouri ?

 APOT Pyèr sèrvi Jéova ké fidélité pannan roun patché lannen. I préché ké Jézi lò i té asou latè-a. A li ki koumansé préché pou sa-ya ki pa té Jwif, é i té annan kolèj santral-a. I té ja gen so bon laj é i té savé i té ké mouri titalò lò Jéova bay li rounòt travay pou fè. Ant 62 ké 64 di nou lépòk apéprè, i ké ékri dé lèt yé ké aplé 1 Pierre ké 2 Pierre. Annan sa lèt-ya, i ké di ki, apré so lanmò, i lé yé itil pou krétyen-yan (2 Pierre 1:12-15).

2. Poukisa sa té enpòrtan ki Pyèr ékri so dé lèt ?

² Lò Pyèr ékri sa dé lèt-ya, so frè ké sò-ya té anba ‘tout kalité éprèv ki té ka oblijé yé gen chagren’ (1 Pierre 1:6). Moun ki té mové té ka sali asanblé-a ké yé fo ansèyman é ké yé konpòrtman ki pa té pròp (2 Pierre 2:1, 2, 14). Anplis di sa, krétyen-yan ki té Jérizalèm té ké viv « lafen tout bagaj » : roun ti moso tan ankò é Romen-yan té ké krazé sa vil-a ké so tanp (1 Pierre 4:7). Nou pouvé sir ki lèt Pyèr ékri-ya idé krétyen-yan wè sa yé té divèt fè pou tchenbé annan yé éprèv. Sa idé yé osi pou yé té paré pou problèm yé té ké jwenn pita b.

3. Poukisa nou divèt pran tan étidyé lèt Pyèr ékri ?

³ Lèt Pyèr ékri-ya, a té pou krétyen-yan annan 1^é syèk-a, mé Jéova fè sa ki fo pou mété yé annan so Paròl. Donk, nou pouvé profité di sa lèt-ya (Rom. 15:4). Nou menm osi nou ka rété annan roun monn koté roun patché moun gen  roun konpòrtman ki pa pròp, é nou divèt briga pou nou rété fidèl. Anplis di sa, titalò, i ké gen roun tribilasyon lontan pi gran pasé sa-la Jwif-ya viv. Nou ka jwenn bon konsèy annan dé lèt Pyèr ékri-ya. Sa konsèy-ya ké idé nou kontinyé antann jou Jéova-a, pa pè moun épi kontinyé kontan nou konpanyen ké tout nou tchò. Yé ké itil pou ansyen-yan osi, paské yé gen pou pran swen di brébi Bondjé-ya é yé divèt idé yé rété fò.

4. Kou nou ka wè l’ annan 2 Pierre 3:3, 4, kisa ki pouvé fè nou lafwa fébli ?

⁴ Nou an mitan moun ki pa ka krè profési-ya ki annan Labib-a. Roun ran moun ka ari di nou tèt paské sa ka fè lontan nou ka préché ki lafen sa monn-an ké rivé ; dapré yé, sa lafen-an pa ké janmen rivé (li 2 Pierre 3:3, 4). É lò roun moun annan nou fanmi, roun kolèg ouben roun moun nou ka jwenn an prédikasyon ka di nou sa, sa pouvé fè nou lafwa fébli. Sa Pyèr marké annan roun di so lèt pouvé fè nou lafwa vin pi fò.

5. Si pou nou, lafen monn-an ka pran tan pou rivé, kisa ki ké idé nou wè bagaj-ya kou Bondjé ka wè yé ? (2 Pierre 3:8, 9).

⁵ Nou pouvé gen lenprésyon ki Jéova ka pran tan pou i fini ké sa monn-an, kou i promèt nou fè l’. Mé Pyèr pouvé idé nou wè bagaj-ya kou nou divèt wè yé. I ka fè nou sonjé ki fason Jéova ka wè tan-an, a pa menm fason nou menm nou ka wè tan-an (li 2 Pierre 3:8, 9). Pou li, roun jou, a kou mil lannen. Anplis di sa, i gen pasyans, i pa lé rounsèl moun mouri. Parkont, lò so jou ké rivé, sa monn-an ké fini nèt. Anvan sa rivé, nou gen roun bèl lònò : préché pou moun tout nasyon.

6. Kouman nou pouvé ‘toujou gardé prézans jou Jéova-a annan nou lèspri’ ? (2 Pierre 3:11, 12).

⁶ Pyèr ka ankourajé nou ‘toujou gardé prézans jou Jéova-a annan nou lèspri’ (li 2 Pierre 3:11, 12). Kouman nou pouvé fè sa ? Chak jou, nou pouvé éséyé réfléchi asou bèl bénédiksyon nou ké gen annan monn nouvo-a. Imajiné to kò ka rèspiré lè-a ki pròp, to ka manjé bon kalité manjé, to ka rousouvwè moun to kontan ki résisité, épi to ka èspliké moun ki viv an tan-lontan kouman profési-ya ki annan Labib-a réyalizé. Si to ka pran tan réfléchi konsa, sa ké idé to antann monn nouvo-a ké konfyans é sa ké idé to pa mété tousa ki ka montré ki nou ka viv dèrnyé jou-ya asou koté. Kou nou konnèt « alavans » sa ki ké rivé dimen, nou pa ké lésé fo ansényan « ralé » nou (2 Pierre 3:17).

7. Si nou pè moun, kouman sa pouvé aji asou nou ?

⁷ Kou nou toujou ka sonjé jou Jéova-a, nou anvi palé di bon nouvèl-a. Pourtan, détan nou ka ézité fè l’. Poukisa ? Paské détan nou ka pè moun. A sa ki rivé Pyèr. Lannwit yé jijé Jézi, Pyèr té pè di ki i té sa so disip, i jis di plizyèr fwa ki i pa té konnèt li (Mat. 26:69-75). Mé pita, i di ké tout so fòrs : « A pa pou zòt pè sa ki ka fè yé pè, é a pa pou sa troumanté zòt » (1 Pierre 3:14). Sa Pyèr di ka fè nou sir ki nou menm osi, nou pouvé briga ké zafè pè moun.

8. Kisa ki ké idé nou pa pè moun ? (1 Pierre 3:15).

⁸ Kisa ki ké idé nou pa pè moun ? Men sa Pyèr ka réponn : « A pou zòt rékonnèt annan zòt tchò ki Kris sa roun Sényèr é ki i sen » (li 1 Pierre 3:15). A pou nou sonjé ki Jézi sa nou Rwa é ki a pa ti pwisan i  pwisan. Si to gen okazyon palé di bon nouvèl-a mé ki to pè, sonjé nou Rwa. Éséyé wè li ka dirijé an mitan roun patché zanj to pa menm pouvé konté. Sonjé ki « Bondjé bay [li] tout pouvwar annan syèl-a ké asou latè-a » é ki i « ké la ké [to] touléjou jistan lafen monn-an rivé » (Mat. 28:18-20). Pyèr ka ankourajé nou pou nou « toujou paré » pou nou défann nou lafwa. Ès to té ké lé palé di to lafwa annan to travay, annan to lékòl c, ouben rounòt koté ? Si a sa, doumandé to kò kitan sa pi bon pou to fè l’, préparé sa to ké di épi doumandé Jéova bay to kouraj. To pouvé sir ki i ké idé to pa pè moun (Actes 4:29).

9. Roun jou, kouman Pyèr montré ki i pa té gen asé lanmou ? (gadé zimaj-a osi).

⁹ Pyèr té anprann sa sa lé di montré to kontan to konpanyen. I té la lò Jézi té di : « Mo ka bay zòt roun nouvo koumannman : a pou zòt kontan zòt konpanyen ; menm fason mo té kontan zòt, zòt menm osi a pou zòt kontan zòt konpanyen » (Jean 13:34). Pourtan, roun jou, i réfizé manjé ké so frè ké sò ki pa té  jwif paské i té pè krétyen-yan ki té jwif. Apot Pòl di ki Pyèr té ka fè « sinéma », sa lé di ki i té ipokrit (Gal. 2:11-14). Ès Pyèr asèpté Pòl korijé l’ ? Wi, é i pa bliyé sa i anprann. Annan so dé lèt, i ékri ki a pa loutou di gen lanmou pou nou frè ké sò-ya, mé a montré nou lanmou pou yé ki tout.

10. Kisa ki ka pèrmèt nou ‘kontan nou frè ké sò-ya ké tout nou tchò, pa ké dé vizaj’ ? (1 Pierre 1:22).

¹⁰ Pyèr di osi ki nou divèt ‘kontan nou frè ké sò-ya ké tout nou tchò, pa ké dé vizaj’ (li 1 Pierre 1:22). É dèyè sa, i di ki a si nou ka obéyi lavérité nou pouvé kontan nou frè ké sò-ya konsa. É annan sa vérité-a i gen rounòt lidé ki ka di ki « Bondjé pa ka fè préférans » (Actes 10:34, 35). Donk, si nou ka montré nou kontan roun ran frè ké sò épi nou pa ka fè menm bagaj-a pou rounòt ran, nou pa ka obéyi koumannman Jézi bay. Nou pouvé santi ki nou pi pròch di sèrten frè ké sò, menm fason Jézi té ka santi so kò pi pròch di roun ran apot (Jean 13:23 ; 20:2). Mé Pyèr ka fè nou sonjé ki nou divèt « kontan » nou frè ké sò-ya ‘ké tout nou tchò’, sa lé di ké menm lanmou i gen annan roun fanmi koté tout moun kontan yé konpanyen (1 Pierre 2:17).

11. Kisa sa lé di ‘gen roun lanmou ki fò roun pou ròt ké tout nou tchò’ ?

¹¹ Pyèr di osi ki ‘a pou nou gen roun lanmou ki fò roun pou ròt ké tout nou tchò’. Annan sa vèrsé-ya, lò Pyèr ka di nou gen roun lanmou ki « fò », sa lé di kontan roun moun menm si sa rèd pou nou di fè l’. Parèkzanp, kisa pou nou fè si roun frè ouben roun sò ka fè nou lapenn ouben ka fè nou faché ? Nou pouvé gen tandans fè kou sa moun-an pasé nou aji ké li ké lanmou. Mé gras a Jézi, Pyèr anprann ki Jéova pa kontan lavanjans (Jean 18:10, 11). I ékri : « Pa randé pyès moun mové bagaj yé fè zòt, pa jouré pyès moun pas yé jouré zòt. Pasé zòt fè sa, réponn yé ké roun bénédiksyon » (1 Pierre 3:9). Si nou gen roun lanmou ki fò pou nou frè ké sò-ya, nou ké janti ké yé é nou ké montré yé ki nou kontan yé, menm si yé fè nou lapenn.

12. a) Kisa nou ké fè si nou gen bokou lanmou pou nou frè ké sò-ya ? b) Kou nou ka wè l’ annan vidéyo Préservons l’unité, un cadeau précieux, kisa to byen désidé fè ?

¹² Annan prémyé lèt i ékri-a, Pyèr palé di zafè « gen bokou lanmou ». Sa kalité lanmou-a pa ka kouvri déztrwa péché rounso, mé i ka kouvri « roun patché péché » (1 Pierre 4:8). Pitèt Pyèr té ka sonjé sa Jézi té anprann li plizyèr lannen anvan asou zafè pardonnen. Pyèr té di ki i té ké pardonnen so frè « jiska 7 fwa » é dapré li, a té bokou. Mé Jézi té èspliké l’ ki i té divèt pardonnen so frè « jiska 77 fwa », sa lé di ki i té divèt toujou pardonnen (Mat. 18:21, 22). Si to ka sonjé roun sitiasyon koté sa té rèd pou to té pardonnen, pa dékourajé. Nou tout ka trouvé ki sa rèd pou pardonnen détan. Aprézan, sa ki enpòrtan, a ki to pardonnen to frè ouben to sò é ki to fè roun bagaj pou fè lapè ké li d.

13. Poukisa sa pouvé rèd pou ansyen-yan trapé tan yé bézwen pou ankourajé yé frè ké sò-ya ?

¹³ Asiré pa pitèt, Pyèr pa jen bliyé sa Jézi di li apré i résisité : « Mennen mo ti brébi-ya » (Jean 21:16). Si to sa roun ansyen, to savé ki a pou to Jézi té ka palé  osi. Mé sa pouvé rèd pou roun ansyen trapé tan i bézwen-an pou i fè sa travay-a ki enpòrtan. Ansyen-yan divèt bay yé fanmi sa yé bézwen pou viv, idé yé santi yé kò byen, épi idé yé rété pròch ké Jéova. A sa ki ka vin an prémyé annan yé rèsponsabilité Yé divèt bay èkzanp osi annan prédikasyon-an épi préparé ké fè diskour osi. Roun ran ka fè parti di Comité de Liaison hospitalier ouben di Service Local de Développement Construction. Ansyen-yan vréman gen bokou travay pou fè !

14. Ki koté ansyen-yan ké trapé fòrs pou pran swen di troupo Bondjé-a ? (1 Pierre 5:1-4).

¹⁴ Men sa Pyèr ékri pou ansyen-yan di so lépòk : « Pran swen di troupo Bondjé » (li 1 Pierre 5:1-4). Zòt ki ansyen, nou savé ki zòt kontan zòt frè ké sò-ya é ki zòt lé pran swen di yé. Mé détan, zòt pouvé gen lenprésyon ki zòt gen tròp bagaj pou fè ouben ki zòt tro las pou fè sa. Kisa zòt pouvé fè ? Di Jéova sa zòt gen asou zòt tchò. Pyèr di : « Si roun moun ka sèrvi, a pou i konté asou fòrs Bondjé ka bay » (1 Pierre 4:11). Détan zòt frè ké sò-ya ka jwenn problèm ki ké disparèt annan monn nouvo-a rounso. Mé sonjé ki « bèrjé-a ki chèf », Jézi, pouvé idé yé pi byen pasé pyès moun. I pouvé fè l’ dipi jòdla é i ké fè l’ annan monn nouvo-a osi. Sa Jéova ka doumandé zòt fè, a kontan zòt frè ké sò-ya, pran swen di yé é « divini dé èkzanp pou troupo-a ».

15. Kouman roun ansyen ka montré ki i ka konprann poukisa sa enpòrtan pou i ankourajé so frè ké sò-ya ? (gadé zimaj-a osi).

¹⁵ William ki ansyen dipi lontan, ka konprann poukisa sa enpòrtan pou i ankourajé so frè ké sò-ya. Lò pandémi Covid-19-a koumansé, li ké ròt ansyen di so asanblé aplé chak moun di yé group prédikasyon chak simenn. A sa ki té pi enpòrtan pou yé. William ka èspliké poukisa : « Roun patché frè ké sò té tousèl annan yé kaz é sa té pouvé fasil pou yé koumansé réfléchi tròp ». Lò roun di so konpanyen gen problèm, William ka byen kouté l’ pou byen konprann kisa ki ka fè li enkyèt é sa i bézwen. Apré sa, i ka chaché ki piblikasyon ouben ki  vidéyo ké pouvé idé so frè ouben so sò. I ka di : « Sa enpòrtan di ankourajé nou frè ké sò-ya jòdla plis pasé anvan. Nou ka travay rèd pou idé moun-yan anprann konnèt Jéova. Ès nou pa divèt travay rèd osi pou nou pran swen di so brébi-ya é idé yé chak rété annan lavérité-a ? »

16. Kouman nou pouvé apliké sa nou ka anprann annan lèt Pyèr ékri ?

¹⁶ Annan lèt Pyèr ékri-ya, nou pouvé anprann plizyèr léson. A déztrwa annan yé nou wè rounso. Ès to wè roun bagaj to lé fè pi byen ? Parèkzanp, ès to lé pran tan réfléchi pi souvan asou bénédiksyon to ké jwenn annan monn nouvo-a ? Ès to prévwè préché annan to travay, annan to lékòl ouben rounòt koté ? Ès to pran tan réfléchi asou kouman to pouvé gen bokou lanmou pou to frè ké sò-ya ? Zòt ki ansyen, ès zòt byen désidé pran swen di brébi Jéova-ya ké ti kouri épi ké tchò kontan ? Si to ka pran tan réfléchi asou bagaj to divèt chanjé, to ké wè ki to gen patché progrè pou fè toujou, mé pa dékourajé. Nou Sényèr, Jézi, « bon » é i ké idé to amélyoré to kò (1 Pierre 2:3). Pyèr ka di nou : « Bondjé […] ké fini fòrmé zòt li menm. I ké fè zòt divini djòk, i ké fè zòt divini fò, é i ké fè zòt rété byen dibout » (1 Pierre 5:10).

17. Si nou ka tchenbé é ki nou ka lésé Jéova fòrmé nou, ki rékonpans nou ké gen ?

¹⁷ Roun jou, Pyèr santi ki i pa té ka mérité rété òbò Pitit Bondjé-a (Luc 5:8). Mé gras a lanmou Jéova ké Jézi é paské yé té ka soutni l’, i rivé tchenbé ; i kontinyé swiv Kris. A konsa Bondjé pèrmèt li « antré annan Rwayonm nou Sényèr ké Sa-la ki ka sové nou-a, Jézi Kris, roun rwayonm ki ké la pou tout-tan » (2 Pierre 1:11). A pa ti bèl kado non ! Si, kou Pyèr, to ka tchenbé é to ka lésé Jéova fòrmé to, to menm osi to ké rousouvwè lavi pou tout-tan. To ké ‘rivé gen sa to lafwa ka poté, to délivrans’ (1 Pierre 1:9).