1. Ki jijman ké fèt titalò ?

 NOU ka viv roun lépòk koté bokou bagaj ké chanjé ! Titalò, Jézi ké jijé tout moun. I bay so disip roun « sign » pou palé di sa ki ké pasé anvan sa jijman-an. Matthieu chapit 24 ké 25, Marc chapit 13 ké Luc chapit 21 ka palé di ‘sign ki ké montré so prézans [nou pa pouvé wè] ké dèrnyé moman sa monn-an’ (Mat. 24:3).

2. Kisa nou ké wè annan sa artik-a, é poukisa sa ké idé nou ?

² Jézi pran trwa èkzanp pou idé nou préparé nou kò. A kousidiré i té ka avèrti nou. I pran èkzanp brébi ké kabrit-ya, èkzanp vyèrj-ya ki saj ké vyèrj-ya ki sòt épi èkzanp talan-yan. Chak èkzanp ké idé nou konprann ki Jézi ké jijé roun moun dapré sa i ka fè. Annan sa artik-a, nou ké palé di sa trwa istwè-ya é nou ké wè sa sa ka anprann nou. Prémyé èkzanp nou ké wè, a istwè brébi ké kabrit-ya.

BRÉBI KÉ KABRIT-YA

3. Kitan Jézi ké séparé brébi-ya di kabrit-ya ?

³ Jézi di ki i ké jijé moun-yan dapré fason yé ka réyaji lò yé ka tandé bon nouvèl-a é i ké gadé si yé ka soutni so frè wen-yan (Mat. 25:31-46). Jézi ké koumansé jijé lò « gran tribilasyon »-an ké fini, anvan Armagédon koumansé (Mat. 24:21). Menm fason bèrjé-a ka mété brébi-ya asou roun bò épi kabrit-ya asou rounòt bò, Jézi ké séparé sa-ya ki soutni so disip wen di sa-ya ki pa fè l’.

4. Dapré Isaïe 11:3, 4, poukisa nou pouvé sir ki Jézi ké jis lò i ké jijé ? (gadé zimaj-a anlè osi).

 ⁴ Profési-ya ki annan Labib ka montré ki Jézi, Jij Jéova chwazi-a, ké toujou jis lò i ké jijé (li Isaïe 11:3, 4). Jézi ka byen gadé kisa moun-yan ka fè, kouman yé ka réfléchi, kisa yé ka di é kouman yé ka aji ké so frè ki wen (Mat. 12:36, 37 ; 25:40). Atò, i ké savé si yé soutni so frè é si yé idé yé fè travay i té bay yé fè-a a. Sa-ya ki lé montré ki yé ka soutni frè Kris-ya divèt fè roun bagaj enpòrtan, yé divèt préché. Si yé ka fè sa, Jézi ké di ki jis « jis » é yé ké pouvé gen « lavi pou tout-tan » asou latè-a (Mat. 25:46 ; Rév. 7:16, 17). Men roun bèl rékonpans ! Si yé ka rété fidèl pannan gran tribilasyon-an ké apré, yé non ké rété annan « liv lavi-a » (Rév. 20:15).

5. Kisa èkzanp brébi ké kabrit-ya ka anprann nou, é a pou kimoun ?

⁵ Sa sa ka anprann nou : a pou nou fidèl. Jézi pran èkzanp brébi ké kabrit-ya èspésyalman pou sa-ya ki gen èspwar viv asou latè-a. Sa moun-yan ka montré ki yé gen lafwa é ki yé fidèl lò yé ka idé frè Kris-ya préché é lò yé ka fè sa èsklav fidèl ké avizé-a ka di yé fè (Mat. 24:45). Mé, sa-ya ki gen èspwar viv annan syèl-a, yé menm osi yé divèt kouté avèrtisman i gen annan sa èkzanp Jézi pran. Poukisa ? Paské Jézi ka gadé sa yé ka fè, fason yé ka réfléchi ké sa yé ka di. Donk, yé menm osi yé divèt fidèl. Jézi pran dé èkzanp koté i ka avèrti yé èspésyalman. Nou ka jwenn sa èkzanp-ya osi annan Matthieu chapit 25. Annou koumansé ké èkzanp vyèrj-ya ki saj ké vyèrj-ya ki sòt.

VYÈRJ-YA KI SAJ KÉ VYÈRJ-YA KI SÒT

6. Kouman senk annan dis vyèrj-ya montré ki yé té saj ? (Matthieu 25:6-10).

⁶ Annan èkzanp vyèrj-ya, Jézi ka palé di dis vyèrj ki soti pou jwenn roun mouché ki fin maryé (Mat. 25:1-4). Yé tout té lé vini manjé ké li pannan lafèt maryaj-a. Jézi di ki i té gen senk ki té « saj » épi senk ki té « sòt ». Vyèrj-ya ki té saj té ka véyé maryé-a rivé é yé té préparé yé kò pou yé antann maryé-a tout tan yé té ké gen pou antann li menmsi i té ka vin ta. Yé té pran yé lalanp ké dilwil pou kléré yé. Yé té jis pran plis dilwil pou si maryé-a té ka vini pi ta ki sa yé té ka pansé. Donk, yé té paré, yé té prévwè sa yé té ké bézwen pou yé lalanp pa étenn asou yé (li Matthieu 25:6-10). Lò maryé-a rivé, yé antré annan lafèt maryaj-a ké li. Menm fason-an, krétyen wen-yan ké montré ki yé paré si yé ka véyé é si yé ka rété fidèl jiktan Jézi vini. Si yé ka fè sa, yé ké pouvé antré annan rwayonm-an ki annan syèl-a ké Jézi b (Rév. 7:1-3). Mé kisa ki rivé senk vyèrj-ya ki sòt ?

7. Kisa ki rivé vyèrj-ya ki té sòt-ya, é poukisa ?

⁷ Senk vyèrj-ya ki té sòt pa té paré kou senk vyèrj-ya ki té saj. Lò yé anprann ki maryé-a té pròch rivé, yé  lalanp té paré pou étenn. É kou yé pa té pran asé dilwil, yé té gen pou alé achté ròt. Lò maryé-a rivé, yé patékò rouviré. Parkont, « vyèrj-ya menm ki té paré, yé antré ké li pou répa maryaj-a, épi yé fronmen lapòt-a » (Mat. 25:10). Pita, lò vyèrj-ya ki té sòt té lé antré, maryé-a di yé : « Mo pa konnèt zòt » (Mat. 25:11, 12). Sa vyèrj-ya pa té paré yé kò pou antann maryé-a tout tan yé té ké gen pou antann li. Kisa sa istwè-a ka anprann krétyen wen-yan ?

8-9. Kisa krétyen wen-yan pouvé anprann grasa èkzanp vyèrj-ya ? (gadé zimaj-a osi).

⁸ Sa sa ka anprann nou : a pou nou paré é a pou nou montré ki nou ka véyé. Lò Jézi pran èkzanp vyèrj-ya, i pa té lé di ki i té ké gen dé group annan krétyen wen-yan, roun ran ki té ké paré pou antann jiktan lafen monn-an rivé épi rounòt ran ki pa té ké fè l’. I té ka èspliké krétyen wen-yan sa ki té ké pasé si yé pa té ka paré yé kò pou rété fidèl jiktan lafen-an rivé. Si yé pa té paré, yé pa té ké rousouvwè yé rékonpans (Jean 14:3, 4). A bagaj pou fè nou réfléchi séryé ! Ki nou gen èspwar viv asou latè-a, ki nou gen èspwar viv annan syèl-a, nou tout divèt kouté avèrtisman Jézi bay lò i pran sa èkzanp-a. A pou nou véyé é a pou nou paré tchenbé jiktan lafen-an rivé ! (Mat. 24:13).

⁹ Jézi bay èkzanp vyèrj-ya pou montré ki sa enpòrtan ki nou paré é ki nou véyé. Apré sa, i bay èkzanp talan-yan. Sa èkzanp-a ka montré ki nou divèt travay rèd.

TALAN-YAN

10. Kouman dé sèrvitèr montré ki yé té fidèl ké yé mèt ? (Matthieu 25:19-23).

¹⁰ Annan èkzanp talan-yan Jézi palé di dé sèrvitèr ki té fidèl ké yé mèt é  di rounòt sèrvitèr ki pa té fidèl (Mat. 25:14-18). Sèrvitèr-ya ki té fidèl travay rèd pou soumaké yé mèt fè pitit. Anvan mèt-a té pati, i té bay yé plizyèr talan, sa lé di roun patché soumaké. Yé travay rèd é yé byen sèrvi soumaké-a. Kisa sa bay ? Lò yé mèt rouvini, yé té gen dé fwa plis soumaké pasé sa i té bay yé. Mèt-a félisité yé é i envité yé ‘vini fè lafèt ké li’ (li Matthieu 25:19-23). É trwazyèm sèrvitèr-a, kisa i fè ké soumaké so mèt té bay li-a ?

11. Kisa ki rivé sèrvitèr-a ki té « fenyan », é poukisa ?

¹¹ Trwazyèm sèrvitèr-a té rousouvwè roun talan. So mèt té lé i byen sèrvi sa soumaké-a. Mé kou i té « fenyan », i antéré talan-an. Lò so mèt rouvini, a so talan rounso i té pouvé bay li. É pasé i doumandé pardon pas i pa té byen jéré soumaké so mèt kou i té divèt fè l’, i di ki so mèt té sa « roun moun ki tro rèd ». Fason sa sèrvitèr-a té ka pansé pa té bon menm ! Donk, so mèt pa té kontan menm. Pi mal ankò, yé pran so talan é yé mété l’ dèrò (Mat. 25:24, 26-30).

12. Kimoun dé sèrvitèr-ya ki fidèl ka réprézanté ?

¹² Dé sèrvitèr fidèl-ya ka réprézanté krétyen wen-yan ki fidèl. Jézi, Mèt-a, ka envité yé ‘vini fè lafèt ké li’ é lò yé ka mouri, yé ka rousouvwè yé rékonpans annan syèl-a : prémyé rézirèksyon-an (Mat. 25:21, 23 ; Rév. 20:5b). Parkont, èkzanp sèrvitèr-a ki fenyan sa roun avèrtisman pou yé. Poukisa nou pouvé di sa ?

13-14. Kisa èkzanp talan-yan ka anprann krétyen wen-yan ? (gadé zimaj-a osi).

¹³ Sa sa ka anprann nou : a pou nou travay rèd ké balan. Si Jézi bay èkzanp talan-yan ké èkzanp vyèrj-ya, a pa té pou di ki krétyen wen-yan té ké vin fenyan. Sa i té lé, a té èspliké sa ki té ké pasé si yé pa té gen balan ankò. Yé pa té ké pouvé rété annan sa-ya  Bondjé aplé épi chwazi é yé pa té ké gen drwa antré annan rwayonm-an ki annan syèl-a (2 Pierre 1:10).

¹⁴ Èkzanp talan-yan ké èkzanp vyèrj-ya ka byen montré ki tout krétyen wen-yan divèt paré, véyé épi travay rèd ké bon balan. Mé ès Jézi bay yé rounòt avèrtisman ankò ? Wi. Nou pouvé jwenn sa avèrtisman-an annan Matthieu 24:40, 41.

KIMOUN YÉ KÉ « PRAN » ?

15-16. Kouman Matthieu 24:40, 41 ka montré ki sa enpòrtan ki krétyen wen-yan véyé ?

¹⁵ Anvan Jézi bay trwa èkzanp nou fin wè-ya, i palé di jou Bondjé té ké jijé krétyen wen-yan pou wè kimoun i té ké asèpté. I pran èkzanp dé mouché ki ka travay annan roun bati ké èkzanp dé madanm ki ka krazé séréyal. Dapré sa nou ka wè, yé tout ka fè menm travay-a, pourtan, Jézi ka di ki « yé ké pran roun, mé yé ké lésé ròt-a la » (li Matthieu 24:40, 41). Apré sa, i bay so disip sa avèrtisman-an : « Atò panga, paské zòt pa savé ki jou zòt Sényèr ka vini » (Mat. 24:42). Jézi di roun bagaj konsa osi lò i fin bay èkzanp vyèrj-ya (Mat. 25:13). Dapré sa nou ka konprann, a menm lidé-a i gen annan sa dé avèrtisman-yan. A sèlman krétyen-yan ki vréman wen é ki ké rété fidèl Jézi ké « pran », sa lé di i ké rousouvwè annan rwayonm-an ki annan syèl-a (Jean 14:3).

¹⁶ Sa sa ka anprann nou : a pou nou véyé. Si roun krétyen wen pa ka panga, i pa ké annan sa-ya yé ké « chwazi » lò yé ké rasanblé yé (Mat. 24:31). É tout sa-ya ki gen èspwar viv asou latè-a divèt pran sa Jézi di kou roun avèrtisman épi rété fidèl é kontinyé véyé.

17. Si sa lannen-yan ki fin pasé Jéova chwazi roun ran krétyen ki fidèl pou yé divini wen, poukisa nou pa enkyèt pou sa ?

¹⁷ Nou ki byen konnèt Jéova, nou sir ki i toujou ka fè sa ki jis. Si sa lannen-yan ki fin pasé, Jéova chwazi roun ran krétyen fidèl pou yé divini wen, nou pa enkyèt pou sa c. Nou ka sonjé èkzanp plantasyon rézen Jézi pran-an é sa i di asou ouvriyé-ya ki rivé bò d’ senkèr di laprémidi (Mat. 20:1-16). Ouvriyé-ya yé envité vin travay annan plantasyon rézen-an pita annan lajournen-an rousouvwè menm soumaké ki sa-ya ki té koumansé travay bònò. Menm fason-an, kèlkéswa moman Bondjé ka chwazi krétyen wen-yan, si Bondjé ka di ki yé fidèl, rékonpans yé ké gen, a lavi annan syèl-a.

KOUTÉ AVÈRTISMAN-YAN !

18-19. Kisa èkzanp Jézi pran ka anprann nou ?

¹⁸ Kisa nou anprann ? Èkzanp brébi ké kabrit-ya ka montré kouman sa enpòrtan pou sa-ya ki gen èspwar viv asou latè-a pou tout-tan rété fidèl jòdla é pannan gran tribilasyon-an ki ké vini titalò. Jis anvan Armagédon, i ké gen roun jijman, é Jézi ké pèrmèt sa-ya ki rété fidèl « rousouvwè lavi pou tout-tan » (Mat. 25:46).

¹⁹ Nou wè osi dé èkzanp Jézi pran pou avèrti krétyen wen-yan. Annan èkzanp vyèrj-ya, i gen senk ki té saj. Yé  té paré pou antann maryé-a tout tan yé té ké gen pou fè l’. Kanta vyèrj-a ki té sòt, yé pa té paré. A pou sa maryé-a pa lésé yé antré annan so lafèt maryaj. Kisa sa ka anprann nou ? Nou tout divèt préparé nou kò pou nou antann tout tan nou ké divèt antann jou Jézi ké fin ké sa monn-an. Annan èkzanp talan-yan, dé èsklav fidèl-ya travay rèd ké balan. Yé travay rèd pou zafè yé mèt byen maché é sa fè l’ plézi. Kanta sèrvitèr-a ki té fenyan, yé mété l’ dèrò. Kisa sa ka anprann nou ? Nou tout divèt gen bokou bagaj pou fè pou Jéova jiktan lafen-an rivé. Pou fini, nou wè ki krétyen wen-yan divèt kontinyé véyé si yé lé Jézi « pran » yé é si yé lé rousouvwè yé rékonpans annan syèl-a. A pa ti antann yé ka antann jou yé ké ‘rasanblé yé pou yé ansanm ké li’ annan syèl-a. Lò lagèr Armagédon ké fini, maryaj Timouton-an ké fèt, é yé ké gen lònò divini so madanm (2 Thess. 2:1 ; Rév. 19:9).

20. Kisa Jéova ké fè pou sa-ya ki ka kouté avèrtisman i ka bay yé ?

²⁰ Titalò, Jézi ké jijé moun-yan, mé nou pa bézwen pè. Si nou ka rété fidèl, nou Papa ki annan syèl-a é ki plen ké lanmou ké bay nou « pwisans-a ki ka dépasé pwisans ki nòrmal-a » pou nou pouvé « dibout douvan Pitit wonm-an » (2 Cor. 4:7 ; Luc 21:36). Ki nou gen èspwar viv annan syèl-a, ki nou gen èspwar viv asou latè-a, nou ké fè li plézi si nou ka kouté sa Jézi di annan èkzanp-ya i pran pou avèrti nou. É grasa so favèr nou pa mérité-a, nou non ké « marké annan liv » lavi-a (Dan. 12:1 ; Rév. 3:5).