Mo fèt an 1934. Mo papa ké mo manman té soti Laswis pou vini Timmins, roun vil an Ontario o Kanada. Bò d’ 1939, mo manman koumansé li La Tour de Garde é i koumansé alé annan réinyon Témwen Jéova-ya. I té ka mennen nou ké li, mo ké mo sis frè ké sò. E annan roun ti moman i divini Témwen Jéova.

Mo papa pa té kontan sa menm. Mé mo manman té kontan lavérité-a é i té byen désidé rété fidèl ké Jéova. É i pa bat dèyè lò yé défann Témwen Jéova-ya kontinyé préché o Kanada bò d’ 1940. Anplis di sa, i toujou rété janti ké mo papa é i toujou rèspèkté l’, menm lò i té ka jouré l’. I bay nou roun bon èkzanp é a pou sa, mo ké mo frè ké sò-ya nou asèpté lavérité. Érèzman, piti piti, mo papa chanjé. I vin pi janti ké nou tout.

An 1950, nou alé annan asanblé « L’accroissement de la théocratie » ki té ka fèt Nouyòrk. Mo palé ké plizyèr frè ké sò ki té ka vini di tout koté asou latè-a é mo tandé plizyèr frè ké sò ki té fè lékòl Galaad palé di yé lavi. A pa ti anvi sa bay mo anvi fè plis pou Jéova. Mo té byen désidé pran sèrvis a plen tan-an. Lò mo rivé lakaz, mo ranpli roun démann pou divini pyonyé pèrmanan. Bétèl Kanada réponn mo ki mo té divèt batizé anvan. Donk, a sa mo fè 1^é òktòb 1950. Roun mwa apré sa, mo divini pyonyé pèrmanan é yé voyé mo Kapuskasing. Sa vil-a té lwen di koté mo té ka rété a sa lépòk-a.

An 1951, Bétèl-a ankourajé Témwen-yan ki té ka rété o Kanada é ki té ka palé fransé, alé o Kébèk koté yé té ka palé fransé é koté yé té bézwen plis moun pou préché. Kou mo té anprann palé fransé ké anglé, mo asèpté alé laba é yé doumandé mo alé annan roun  vil yé ka aplé Rouyn. Mo pa té konnèt pyès moun annan sa vil-a. Kou mo di l’ anvan, sèl bagaj mo té gen, a té roun adrès. Mé bagaj-a byen pasé. Mo ké Marcel, nou divini bon zanmi, é mo pran plézi préché o Kébèk pannan kat lannen. Épi apré sa kat lannen-yan, mo divini pyonyé èspésyal.

Lò mo té o Kébèk, yé envité mo fè 26^è klas Lékòl Galaad annan vil South Lansing, Nouyòrk. 12 févriyé 1956, yé bay nou nou diplonm é yé voyé mo o Gana b, an Afrik di Lwès. Mé anvan mo alé laba mo routounen o Kanada « déztrwa simenn » pou mo té gen tout dokiman mo té bézwen pou mo té pouvé vwayajé.

Mo té pou rété déztrwa simenn, mé mo rété sèt mwa Toronto ka antann mo dokiman paré ! Pannan tout sa tan-an, fanmi Cripps pèrmèt mo rété koté li é mo kontré ké yé tifi Sheila. Nou vin kontan nou konpanyen. Mé lò mo té pou doumandé li maryé ké mo, mo viza rivé. Nou priyè ansanm é nou désidé ki mo té divèt alé koté òrganizasyon-an té voyé mo. Donk, nou désidé ékri nou konpanyen épi antann pou wè si nou té ké pouvé maryé pita. Sa pa té fasil, mé ké tan-an, nou wè ki a té roun bon désizyon.

Mo vwayajé pannan roun mwa. Mo pran tren, bato, avyon é finalman, mo rivé Accra, o Gana. Lò mo rivé, mo divini surveillant de district. A konsa mo vwayajé annan tout Gana-a é mo alé Kotdivwar ké Togo. An jénéral, mo té ka vwayajé mo rounso, annan roun loto Bétèl-a té ka prété mo. A pa ti kontan mo té kontan vwayajé pou alé wè frè ké sò-ya !

Sanmdi ké dimanch, mo té gen partisipasyon annan asanblé sirkonskripsyon. Kou nou pa té gen lasal pou fè nou gran asanblé-ya, frè-ya té ka fè roun ti karbé ké banbou, é yé té ka kouvri l’ ké féy palmyé pou paré solèy-a. É kou i pa té gen frijidèr annan  lakwizin-an, yé té ka gadé ki kantité moun ki té ké manjé anvan yé désidé konmyen zannimo yé té ké tchwé pannan asanblé-a.

Plizyèr bagaj ki té dròl rivé nou pannan sa asanblé-ya. Roun jou, lò Herb Jennings c, rounòt misyonèr, té ka fè roun diskour, roun béf maron é i kouri annan lasal-a. Lò Herb arété palé, béf-a pa té savé sa pou i té fè. Mé kat frè byen kòsto rivé tchenbé béf-a é yé viré mennen l’ annan lakwizin-an toupannan tout moun té ka bat lanmen.

Pannan simenn-an, mo té ka mété nou fim La société du monde nouveau en action pou moun annan vilaj-ya gadé. Mo té ka louvri roun dra blan anmitan dé poto ouben dé pyébwa. Moun-yan té kontan kou sousouri ! Yé pa té janmen wè pyès fim. A pa ti bat lanmen yé té ka bat lanmen lò yé té ka wè moun ka batizé. Sa fim-an té ka pèrmèt yé konprann ki Témwen Jéova-ya, a roun òrganizasyon ké moun asou tout latè-a ki ka rété ansanm ansanm.

An 1958, sa té ka fè dé lannen mo té an Afrik, mo alé annan asanblé entèrnasyonal-a ki té ka fèt Nouyòrk. Mo té tou kontan jwenn Sheila, ki té soti Kébèk, koté i té pyonyé èspésyal ! Nou té fè plizyèr lannen ka ékri nou konpanyen, mé kou aprézan nou té ansanm, mo doumandé li si i té lé maryé ké mo é i asèpté. Atò, mo ékri frè Knorr d pou doumandé li si Sheila té pouvé fè lékòl Galaad épi vini jwenn mo an Afrik. Frè Knorr asèpté. Finalman, Sheila rivé o Gana é, 3 òktòb 1959, nou maryé annan vil Accra. Nou té sir ki Jéova té ka béni nou paské nou té mété li an prémyé annan nou lavi.

An 1961, yé voyé nou o Kamroun. Yé doumandé mo louvri roun filyal. I té gen bokou bagaj pou fè. Kou mo divini serviteur de filiale, mo té gen bokou bagaj pou anprann. Apré sa, an 1965, Sheila tonbé ansent. Sa pran tan pou nou asèpté ki nou té ké gen roun timoun pou lévé. Nou té koumansé kontan zafè gen roun timoun épi nou té ka  òrganizé pou routounen o Kanada, lò roun gran malò rivé.

Sheila fè roun fos kouch. Dòktèr-a di nou ki a té roun tibolonm. A roun bagaj ki rivé i ja gen pasé 50 lannen, mé nou pa jen bliyé sa. Menmsi nou té tris toubonnman, nou rété o Kamroun. Nou té kontan sa koté-a bokou.

Souvan, yé té ka pèrsékité frè ké sò-ya ki té ka rété o Kamroun paské yé pa té ka mélé annan lapolitik. Sitiasyon-an té rèd èspésyalman lò i té gen élèksyon. É 13 mé 1970, sa ki té ka fè nou plis pè rivé : yé défann Témwen Jéova-ya kontinyé préché kou yé té lé annan péyi-a. Gouvèrnman-an pran Bétèl-a. I té tou nòv, sa té ka fè senk mwa sèlman nou té antré annan l’. Yé pa menm pran roun simenn pou mété tout misyonèr-ya dèrò. Mo ké Sheila, nou té divèt pati osi. Sa té rèd pou nou lésé nou frè ké sò-ya. Nou té kontan yé bokou é nou té pè sa ki té pouvé rivé yé.

Nou rété sis mwa annan Bétèl Lafrans. Mo kontinyé fè tout sa mo té pouvé fè pou idé nou frè ké sò-ya ki té o Kamroun. Sa menm lannen-an, an désanm, yé voyé nou annan Bétèl Nijérya, ki koumansé okipé di travay Témwen Jéova-ya ka fè o Kamroun. O Nijérya, frè ké sò-ya byen rousouvwè nou, é nou pran plézi travay annan sa Bétèl-a pannan plizyèr lannen.

An 1973, nou pran roun désizyon ki té rèd menm. Sheila té gen gro problèm lasanté. Nou té Nouyòrk pou roun gran asanblé épi Sheila koumansé kriyé, i di mo : « Mo pa pouvé ankò ! Lò mo pa malad, mo las. » I té ka sèrvi Jéova ansanm ké mo an Afrik di Lwès dipi pasé 14 lannen. Mo té fyèr di li, mé nou pa té pouvé kontinyé konsa. Nou palé bokou di sa, nou priyè Jéova bokou osi, épi nou désidé viré Kanada pou Sheila swanyé so kò. Lésé Kamroun ké sèrvis a plen tan-an, a désizyon ki té pi rèd pou pran annan nou lavi é sa raché nou tchò.

Lò nou rivé Kanada, mo trapé roun travay annan roun vil pròch di Toronto. Mo té ka travay annan roun magazen loto. A té mo bon zanmi ki té gen sa magazen-an. Nou louwé roun ti kaz é pou mété sa nou té bézwen annan kaz-a, nou achté bagaj ki pa té nòv. Konsa, nou pa prété soumaké koté pyès moun. Nou té lé kontinyé gen roun lavi ki senp paské nou té lé viré annan sèrvis a plen tan-an roun jou. É nou rivé fè l’ pi vit pasé sa nou té ka pansé.

Mo koumansé travay asou chantyé pou konstrwi sal asanblé-a ki té Norval, an Ontario. Mo té ka travay la chak sanmdi. Apré sa, yé doumandé mo divini rèsponsab sa sal asanblé-a. Kou Sheila té k’alé plizanpli byen, nou désidé ki nou té pouvé asèpté sa envitasyon-an. Donk, an jwen 1974, nou déménajé é nou alé annan ti kaz-a ki té  bò d’ lasal asanblé-a. A pa ti kontan nou té kontan pas nou té viré annan sèrvis a plen tan-an !

Dé lannen pita, kou Sheila té plizanpli byen, lò yé doumandé nou alé annan sèrvis sirkonskripsyon-an, nou asèpté. Yé voyé nou Manitoba, a roun provens di Kanada koté i ka fè frèt pou mouri lò a sézon frédi. Mé frè ké sò-ya té kontan nou tèlman ki a kousidiré nou pa té ka santi frédi-a ankò. Nou anprann ki sa ki pi enpòrtan, a pa koté nou ka sèrvi Jéova, a sèrvi l’ koté nou fika.

Nou fè plizyèr lannen annan sèrvis sirkonskripsyon-an é, an 1978, yé doumandé nou si nou té lé divini bétélit. Roun ti moman apré sa, mo anprann roun bagaj ki fè mo mal mé ki té enpòrtan. Yé doumandé mo fè roun diskour di roun lèr é dimi an fransé pannan roun réinyon èspésyal ki té ka fèt Montréal. Mé pannan diskour-a, mo pa rivé bay frè ké sò-ya anvi kouté mo é roun frè ki annan biro pou sèrvis-a vin bay mo roun konsèy. Sa jou-a, mo té divèt konprann ki zafè bay diskour, a pa té mopa. Mé mo konprann sa pita. Malérèzman, lò frè-a bay mo konsèy, mo pa pran l’ menm. Mo té faché paské pou mo, a yenki kritiké i té ka kritiké mo é i pa menm té di mo sa mo té fè ki té byen. Mo pa kouté so konsèy akoz di fason i té palé pou mo épi paské sa frè-a pa té k’alé ké mo disan. Mo pa té divèt fè sa.

Déztrwa jou pita, roun frè ki té annan komité filyal-a vin palé mo di sa ki té pasé. Mo rékonnèt ki mo pa té byen pran konsèy-a. Mo di li osi ki mo té ka rigrété sa mo té fè. Apré sa, mo alé wè frè-a ki té bay mo konsèy-a é frè-a pardonnen mo. Mo pa ké janmen bliyé sa mo anprann sa jou-a : mo pa divèt fè ròklò (Prov. 16:18). A pa dé fwa mo priyè Jéova pou sa, é mo byen désidé pa janmen réyaji konsa ankò lò yé ka bay mo roun konsèy.

Aprézan, sa ka fè 40 lannen mo annan Bétèl Kanada-a é dipi 1985, mo ka fè parti di komité filyal-a é sa ka fè mo tchò kontan. Malérèzman, an févriyé 2021, mo ti madanm chéri, Sheila, mouri. I ka manké mo tèlman, é anplis di sa, mo pa pouvé fè bokou bagaj akoz di mo lasanté. Mé mo gen tèlman bagaj pou fè annan mo sèrvis pou Jéova é mo tchò tèlman kontan ki mo pa menm ka « wè tan-an ki ka pasé » (Eccl. 5:20). A vré, mo jwenn plizyèr problèm, mé mo jwenn plis bénédiksyon pasé mo jwenn problèm. Mo lavi té bèl pas mo toujou mété Jéova an prémyé é mo sèrvi l’ a plen tan pannan 70 lannen. Mo ka priyè pou jennjan-yan kontinyé mété Jéova an prémyé annan yé lavi. Mo sir ki yé menm osi yé lavi ké bèl é yé tchò ké kontan. To ka gen sa kalité lavi-a sèlman lò to ka sèrvi Jéova.