1-2. Kouman Jéova fè nou, é poukisa nou pouvé di ki a roun bon bagaj ?

 JÉOVA fè nou pou nou tchò plis kontan lò nou ka bay ki lò nou ka rousouvwè (Actes 20:35). Ès sa lé di ki nou pa kontan lò roun moun ka bay nou roun bagaj ? Non ! Nou tout kontan lò yé ka bay nou roun kado, mé nou tchò pi kontan ankò lò a nou ki ka bay roun moun roun kado. Jéova fè nou konsa pas sa bon pou nou. Poukisa ?

² Kou Jéova fè nou konsa, i gen bagaj nou pouvé fè pou nou tchò kontan. Nou tchò pouvé kontan ankò plis si nou ka chaché wè kouman nou pouvé bay ròt-ya. Jéova fè nou roun fason ki bèl toubonnman ! (Ps. 139:14).

3. Poukisa Labib ka di ki Jéova sa « Bondjé ki éré-a » ?

³ Labib ka èspliké ki lò nou ka bay, sa ka fè nou tchò kontan. Donk, nou ka byen konprann poukisa i ka di ki Jéova sa « Bondjé ki éré-a » (1 Tim. 1:11). A li prémyé ki koumansé bay é a li ki ka bay plis pasé pyès moun. Kou Pòl di l’, « a grasa li nou ka viv, nou ka boujé é nou la » (Actes 17:28). A sa menm paské, « tout bèl bagaj ké tout kado parfè ka [...] vini di [li] » (Jacq. 1:17).

4. Kisa ki ké fè nou tchò pi kontan ankò ?

⁴ Nou tout anvi bay ankò plis pou nou tchò kontan ankò plis. Nou ké rivé fè sa si nou ka imité Jéova ki kontan bay (Éph. 5:1). Annan sa artik-a, nou ké wè kouman nou pouvé imité l’ é nou ké wè sa nou pouvé fè lò yé té  ké di ki moun pa mélé ké sa nou ka fè pou yé. Sa ké bay nou anvi kontinyé bay é nou tchò ké pi kontan ankò.

IMITÉ JÉOVA KI KONTAN BAY

5. Kisa Jéova ka bay nou ?

⁵ Kisa Jéova kontan bay nou ? Annou wè déztrwa bagaj. Jéova ka bay nou sa nou bézwen pou viv. Pitèt nou pa rich, mé grasa Jéova, nou tout nou gen sa nou bézwen pou viv. Parèkzanp, grasa li, nou gen manjé, lenj ké roun koté pou nou rété (Ps. 4:8 ; Mat. 6:31-33 ; 1 Tim. 6:6-8). Ès Jéova ka fè sa jis paské i ka santi ki i blijé fè l’ ? Awa ! Atò, poukisa i ka fè l’ ?

6. Kisa Matthieu 6:25, 26 ka anprann nou ?

⁶ Jéova ka bay nou sa nou bézwen pou viv paské i kontan nou. Réfléchi asou sa Jézi di annan Matthieu 6:25, 26 (li). Annan sa vèrsé-ya, i ka pran èkzanp zozo-ya. Men sa i ka di asou yé : « Yé pa ka sonmen, yé pa ka rékòlté é yé pa ka mété manjé asou koté. » Apré sa, i ka di : « Zòt Papa ki annan syèl-a ka bay yé manjé. » É apré sa, i ka doumandé : « Ès zòt pa gen plis valò ki yé ? » Kisa sa ka anprann nou ? Pou Jéova, so sèrvitèr gen lontan plis valò pasé zannimo-ya. Donk, si i ka bay zannimo-ya sa yé bézwen pou viv, nou pouvé sir ki i ké bay nou sa nou bézwen nou menm osi. Kou roun Papa ki ka okipé di so fanmi, Jéova ka pran swen di so fanmi pas i kontan l’ (Ps. 145:16 ; Mat. 6:32).

7. Kouman nou pouvé imité Jéova ki kontan bay ? (gadé zimaj-a osi).

⁷ Kou Jéova, nou pouvé bay ròt-ya sa yé bézwen pas nou kontan yé. Parèkzanp, ès to konnèt roun frè ouben roun sò ki pa gen manjé ouben ki pa gen lenj ? Jéova pouvé itilizé to pou idé l’. Lò i gen roun problèm, lanmenm sèrvitèr Jéova-ya ka fè mannèv pou idé yé konpanyen. Pannan pandémi Covid-19-a, plizyèr frè ké sò bay manjé, lenj ké ròt bagaj pou sa-ya ki té bézwen. I gen roun patché osi ki bay soumaké pou tousa òrganizasyon-an ka fè asou tout latè-a. Grasa sa, nou rivé gen asé soumaké pou òrganizé opérasyon pou poté sékour annan plizyèr koté asou latè-a. Sa Témwen-yan ki kontan bay fè sa nou ka jwenn  annan Hébreux 13:16 ki ka di : « Pa bliyé fè sa ki byen é partajé ké ròt-ya, pas Bondjé kontan sa kalité sakrifis-ya. »

8. Kisa fòrs Jéova ka bay nou ka pèrmèt nou fè ? (Philippiens 2:13).

⁸ Jéova ka bay nou fòrs. Jéova kontan bay sa-ya ki ka adoré l’ so fòrs ki pa jen ka fini (li Philippiens 2:13). Ès to ja doumandé li bay to fòrs pou to pa tonbé annan roun tantasyon, pou to gen fòrs pou tchenbé annan roun éprèv ouben jis pou to rivé tchenbé rounòt jou ankò ? Lò i réponn to lapriyè, kou Pòl, to té pouvé di : « Pou tout bagaj mo gen fòrs grasa sa-la ki ka bay mo pwisans » (Phil. 4:13).

9. Kisa nou pouvé fè si nou lé sèrvi fòrs nou gen-an kou Jéova ka fè l’ ? (gadé zimaj-a osi).

⁹ Menmsi nou pa parfè, nou pouvé sèrvi fòrs nou gen-an kou Jéova ka sèrvi sopa. A vré, nou pa pouvé bay ròt-ya fòrs kou Jéova ka fè l’. Mé nou pouvé sèrvi fòrs nou gen-an pou idé yé. Parèkzanp, nou pouvé alé fè komisyon pou roun frè ouben roun sò ki ja gen so laj ouben ki andikapé. Ouben nou pouvé idé l’ nétwayé so kaz. É si nou sitiasyon ka pèrmèt nou fè l’, nou pouvé bay roun lanmen pou okipé di nou sal di Rwayonm. Si nou ka sèrvi fòrs nou gen-an konsa, nou ké fè tchò nou frè ké sò-ya kontan.

10. Kouman nou pouvé bay ròt-ya fòrs grasa sa nou ka di ?

¹⁰ Annou pa bliyé nonplis ki sa nou ka di pouvé bay ròt-ya fòrs. Ès to konnèt roun moun ki bézwen to konsolé l’ ouben to félisité l’ pou i kontinyé vansé ? Si to konnèt roun moun konsa, to pouvé di li ki to pa ka bliyé l’. To pouvé alé wè l’, to pouvé aplé l’ ouben voyé roun kart, roun imèl, ouben roun mésaj bay li. Épi pa bliyé : to pa bézwen di gran bagaj ! Déztrwa ti paròl tou senp ki ka vini di to tchò pouvé idé li rété fidèl ouben santi so kò pi byen (Prov. 12:25 ; Éph. 4:29).

11. Kouman Jéova ka partajé so sajès ké nou ?

¹¹ Jéova ka bay nou sajès. Men sa disip Jak ékri : « Si roun annan zòt pa gen asé sajès, a pou i kontinyé doumandé Bondjé toulong pou i bay li sajès, pas i ka bay tout moun san konté é i pa ka fè pyès répròch » (Jacq. 1:5). Kou nou ka wè l’ annan sa vèrsé-a, Jéova pa ka gardé so sajès pou li rounso. I kontan bay ròt-ya so sajès. Jak ka di osi ki lò i  ka bay so sajès, « i pa ka fè pyès répròch ». I pa lé nou ronté doumandé li idé nou. I pito ka ankourajé nou doumandé li bay nou sajès (Prov. 2:1-6).

12. Kouman nou pouvé partajé sa nou konnèt ké ròt-ya ?

¹² É nou menm, ès nou pouvé imité Jéova ? Ès nou pouvé partajé nou sajès, sa lé di sa nou konnèt, ké ròt-ya ? (Ps. 32:8). Sèrvitèr Jéova-ya ka partajé sa yé anprann ké ròt-ya. Yé ka fè l’ di plizyèr fason. Souvan, yé ka anprann nouvo frè ké sò préché. Ansyen-yan ka pran pasyans pou montré asistan-yan ké ròt frè, kouman yé pou fè sa yé ka bay yé fè annan asanblé-a. Épi frè ké sò-ya ki vayan annan zafè konstriksyon ouben pou okipé di koté nou ka adoré Jéova ka fòrmé ròt-ya ki gen mwens èspéryans.

13. Lò nou ka fòrmé roun moun, kouman nou pouvé imité fason Jéova ka partajé so sajès ?

¹³ Lò nou ka fòrmé roun moun, annou fè éfòr pou nou imité fason Jéova ka partajé so sajès. Annou sonjé ki i ka bay li san konté. Menm fason-an, annou partajé sa nou konnèt fè ké nou èspéryans ké moun nou ka fòrmé-a é annou fè l’ san konté. Annou pa séré sa nou konnèt paské nou pè moun-an pran nou plas roun jou. É annou pa janmen di : « Pyès moun pa montré mo mo menm ! Lésé l’ bat so mizè ! » Sa kalité mantalité-a pa gen so plas annan pèp Bondjé-a. Nou pito lé fè li savé tousa nou konnèt é nou lé « bay [li] nou pròp lavi » osi, sa lé di fè tousa nou pouvé pou fòrmé li (1 Thess. 2:8). É nou ka èspéré ki roun jou « [li] menm apré sa ké adòk pou ansényé ròt-ya » (2 Tim. 2:1, 2). Si nou tout ka partajé nou sajès san konté, nou tout ké vin pi saj é nou tchò ké pi kontan.

LÒ YÉ TÉ KÉ DI KI MOUN PA MÉLÉ KÉ SA NOU KA FÈ POU YÉ

14. Souvan, kisa moun ka fè lò nou ka fè roun bagaj pou yé ?

¹⁴ Souvan, moun ké di nou mèrsi pou sa nou ka fè pou yé, èspésyalman si a nou frè ké sò-ya. Pitèt yé ké voyé nou roun kart ouben yé ké fè rounòt bagaj pou di nou mèrsi (Col. 3:15). Lò yé ka fè sa, sa ka fè nou tchò kontan.

15. Kisa nou divèt sonjé si roun moun pa ka di nou mèrsi pou sa nou fè pou li ?

¹⁵ Mé détan, i gen sa ki pa ké di nou mèrsi pou sa nou fè pou yé. Détan, yé té ké di ki roun ran pa mélé ké sa nou fè pou idé yé ouben yé pa ka randé yé kò kont ki kantité tan, fòrs ké soumaké nou sèrvi pou fè roun bagaj pou yé. Si roun bagaj konsa ka rivé nou, kisa nou pouvé fè pou nou pa yèg é pou nou pa pédi nou lajwa ? A pou nou sonjé Actes 20:35. Lò nou ka bay roun moun roun bagaj, a pa fason moun-an ka réyaji ka fè nou tchò kontan. Nou pouvé pran plézi bay, menmsi yé té ké di ki moun pa mélé ké sa nou ka fè pou idé yé. Kisa ki ké idé nou fè sa ? Plizyèr bagaj.

16. Kisa nou divèt fè ?

¹⁶ Fè kou Jéova. Ki nou ka di l’ mèrsi, ki nou pa ka di l’ mèrsi, Jéova ka bay nou bon bagaj (Mat. 5:43-48). É i ka promèt nou ki si nou menm osi nou ka bay ‘san nou pa antann anyen di tou’ nou « ké gen roun gro rékonpans » (Luc 6:35). Donk, a pa pou to tris si détan yé pa ka di to mèrsi. Sonjé ki Jéova ké toujou rékonpansé to pou tout bon bagaj to ka fè pou ròt-ya é paské to ka  « bay ké tchò kontan » (Prov. 19:17 ; 2 Cor. 9:7).

17. Kisa ki ké idé nou wè bagaj-ya kou Jéova ka wè yé ? (Luc 14:12-14).

¹⁷ Rounòt bagaj ki ké idé nou imité Jéova, a fè sa Jézi di annan Luc 14:12-14 (li). A pa roun mové bagaj si nou ka envité ouben si nou ka idé sa-ya ki pouvé fè menm bagaj-a pou nou. Mé kisa nou pouvé fè si nou ka randé nou kò kont ki, détan, nou ka antann ki moun fè roun bagaj pou nou pas nou fè roun bagaj pou yé ? Annou fè sa Jézi di : annou envité sa-ya nou savé ki pa ké pouvé bay nou anyen di tou. Si nou ka imité Jéova, nou tchò ké kontan. É si nou ka fè sa, nou tchò ké kontan menmsi yé pa ka di nou mèrsi pou sa nou ka fè.

18. Kisa nou pa divèt fè, é poukisa ?

¹⁸ Pa di ki ròt-ya engra (1 Cor. 13:7). Lò roun moun pa ka di nou mèrsi, annou doumandé nou kò : « Ès a engra i engra ouben ès a bliyé i bliyé di nou mèrsi ? » Pitèt a rounòt bagaj ki fè ki i pa réyaji kou nou té lé i réyaji. Pitèt a pa ti anvi roun ran anvi di mèrsi, mé yé pa ka rivé fè l’. Rounòt ran jennen lò moun ka idé yé, èspésyalman si anvan a yé ki té ka idé ròt-ya. Si nou vréman kontan nou frè ké sò-ya, nou ké éséyé konprann poukisa yé ka réyaji konsa é a konsa nou ké rivé kontinyé bay ké tchò kontan (Éph. 4:2).

19-20. Poukisa nou divèt gen pasyans lò nou ka bay ròt-ya ? (gadé zimaj-a osi).

¹⁹ A pou to gen pasyans. Men sa rwa Salomon ki té gen sajès di : « Voyé to dipen asou dlo-ya, paské to ké viré jwenn li apré roun patché jou » (Eccl. 11:1). Kou nou ka wè l’ annan sa vèrsé-a, roun ran ké di nou mèrsi « apré roun patché jou », sa lé di lontan apré nou fè roun bagaj pou yé. Annou wè roun èkzanp ki ka montré sa.

 ²⁰ I gen plizyèr lannen, madanm roun rèsponsab sirkonskripsyon té voyé roun ti kart pou roun sò ki té fin batizé. É annan sa kart-a, i té ka ankourajé l’ rété fidèl. Apéprè wit lannen pita, sò-a ékri li. Men sa i di : « A té pou mo di to kouman to ankourajé mo pannan tout sa lannen-yan san to pa menm savé. » I di ankò : « Sa to ékri pou mo-a té janti toubonnman. Mé sa ki fè mo plis plézi, a vèrsé-a a to marké annan l’. Mo pa janmen bliyé l’. » Lò i fin èspliké déztrwa problèm i jwenn, sò-a di : « Détan, sèl bagaj mo té ka wè, a té lésé tout bagaj tonbé épi arété adoré Jéova. Mé apré sa, mo toujou té ka sonjé vèrsé to té marké pou mo-a é sa idé mo pa lésé tonbé. » Pou fini, i di : « Pannan tout sa lannen-yan, i pa gen pyès ròt bagaj ki ankourajé mo konsa. » Imajiné kouman madanm rèsponsab sirkonskripsyon-an té kontan lò i rousouvwè sa lèt-a « apré roun patché jou » ! Pitèt nou menm osi roun moun ké di nou mèrsi lontan apré nou fè roun bon bagaj pou li.

21. Poukisa to byen désidé kontinyé imité Jéova ki kontan bay ?

²¹ Kou nou wè l’, Jéova fè nou roun fason èspésyal. Nou kontan rousouvwè, mé nou tchò ankò pi kontan lò nou ka bay. Lò nou ka idé nou frè ké sò-ya, nou tchò kontan. Nou kontan lò yé ka di nou mèrsi. Mé ki yé ka di nou ki yé pa ka di nou mèrsi, nou kontan paské nou fè sa nou té divèt fè. Annou pa janmen bliyé ki kèlkéswa sa nou ka bay, ‘Jéova pouvé bay nou lontan plis ki sa’ (2 Chron. 25:9). Nou pa ké janmen pouvé bay plis pasé li. É lò a Jéova li menm ki ka rékonpansé nou, i pa gen anyen ki pi bèl pasé sa. Donk, annou toujou byen désidé fè kou nou Papa ki annan syèl-a ki kontan bay !