Anvan to koumansé étidyé, to pouvé doumandé to kò : « Kisa mo ké anprann jòdla ? » Pitèt to ja gen roun ti lidé asou sa to ké anprann. Mé pa rété asou sa, sinon sa ké anpéché to anprann ròt bagaj Jéova lé to anprann. Kouman to pouvé konprann sa Jéova lé anprann to ?

Priyè Jéova pou i bay to sajès. Doumandé li idé to konprann sa i lé anprann to lò to ké étidyé (Jacq. 1:5). Pa rété asou sa to ja konnèt (Prov. 3:5, 6).

Lésé pwisans Labib-a aji asou to. « Paròl Bondjé-a vivan » (Héb. 4:12). Atò, chak fwa nou ka li Labib, nou pouvé anprann rounòt bagaj ki pouvé idé nou annan nou lavi. Mé sa ké rivé sèlman si nou ka rékonnèt ki nou bézwen konprann sa Jéova lé anprann nou.

Manjé annan tout manjé i gen asou tab Jéova-a. Lò Jéova ka bay nou manjé, a kousidiré nou annan « roun lafèt koté i […] gen bon kalité manjé » (Is. 25:6). Si i gen roun « manjé » to pa anvi manjé, manjé l’ kanmenm. Si to ka fè sa, to ké lésé Jéova idé to divini roun pi bon moun é to ké pran plézi étidyé !