ARTIK POU ÉTIDYÉ 37
KANTIK 118 « Bay nou plis lafwa »
Roun lèt ki pouvé idé nou tchenbé rèd jiktan lafen-an rivé
« Nou ka kontinyé gardé konfyans nou gen dipi koumansman-an jiska lafen » (HÉB. 3:14).
SA NOU KÉ ANPRANN
Nou ké wè sa lèt pou Ébré-ya ka anprann nou é kouman sa pouvé idé nou tchenbé rèd jiktan lafen sa monn-an rivé.
1-2. a) Lò apot Pòl ékri pou Ébré-ya, annan ki sitiasyon yé té fika ? b) Poukisa nou pouvé di ki sa lèt-a rivé jiskont lò yé té bézwen ?
LÒ JÉZI mouri, krétyen-yan ki té ka rété Jérizalèm ké Jidé viv roun lépòk ki té rèd menm. Lò asanblé krétyen-an té fin fèt, moun-yan pèrsékité disip Jézi-ya bokou (Actes 8:1). É apéprè 20 lannen pita, yé soufri akoz di lafamin ké problèm soumaké annan péyi-a (Actes 11:27-30). Mé bò d’ 61 di nou lépòk, pèrsékisyon-an bésé roun tibi menmsi bagaj-ya vin pi rèd pita. Annan sa lépòk-a, yé rousouvwè roun lèt Bondjé té fè Pòl ékri pou yé. Sa lèt-a vin jiskont lò yé té bézwen !
2 Poukisa nou ka di ki a té jiskont lò yé té bézwen ? Paské menmsi bagaj-ya té pi fasil pou yé, sa pa té ké rété konsa. Donk, Pòl bay yé plizyèr konsèy ki té ké idé yé lò malò té ké tonbé asou yé. Kou Jézi té di, i pa té ka rété bokou tan ankò anvan yé krazé Jérizalèm (Luc 21:20). Ni Pòl ni krétyen-yan ki té ka rété Jidé pa té savé kitan sa té ké fèt. Mé sa krétyen-yan té pouvé sèrvi tan yé té gen-an pou yé préparé yé kò. É pou fè sa, yé té divèt fè yé lafwa vin pi fò épi kontinyé tchenbé rèd (Héb. 10:25 ; 12:1, 2).
3. Poukisa lèt Pòl ékri pou Ébré-ya bon pou nou jòdla osi ?
3 Titalò, nou ké pasé anba roun tribilasyon lontan pi gran pasé sa krétyen ébré-ya viv (Mat. 24:21 ; Rév. 16:14, 16). Annou wè déztrwa konsèy Jéova bay yé é ki pouvé idé nou nou menm osi.
« ANNOU BYEN DÉSIDÉ VANSÉ POU NOU VIN DJÒK »
4. Ki problèm Jwif-ya ki té divini krétyen té gen ? (gadé zimaj-a osi).
4 Jwif-ya ki té divini krétyen té gen bokou bagaj pou chanjé é sa pa té fasil pou yé. Pannan roun patché lannen, Jérizalèm té sa roun koté èspésyal. A la rwa-a ki té ka réprézanté Jéova té ka rété é a annan Tanp-a ki té Jérizalèm moun ki té lé adoré Jéova té divèt alé. Tout Jwif-ya ki té fidèl té ka obéyi Lalwa Moyiz ké sa yé chèf rélijyé té ka anprann yé. Donk i gen sèrten bagaj yé pa té ka manjé, yé té ka rèspèkté sirkonsizyon-an é yé té ka rèspèkté fason Bondjé té ka doumandé yé aji ké sa-ya ki pa té Jwif. Mé lò Jézi mouri, yé pa té bézwen fè sa Lalwa Moyiz té ka di épi fè sakrifis annan Tanp-a ankò. Sa chanjman-an pa té fasil pou Jwif-ya ki té divini krétyen, pas yé té abitchwé obéyi Lalwa (Héb. 10:1, 4, 10). Menm pou krétyen-yan ki té djòk kou apot Pyèr, sa té rèd pou chanjé (Actes 10:9-14 ; Gal. 2:11-14). Anplis di sa, chèf rélijyé jwif-ya té ka pèrsékité yé pas yé té divini krétyen.
Krétyen-yan té divèt kontinyé kontan lavérité épi réfizé kouté fo ansèyman yé lèlmi té ka sonmen (gadé paragraf 4-5).
5. Kimoun krétyen ébré-ya té divèt panga ?
5 I té gen dé kalité moun ki té ka fè krétyen ébré-ya wè mizè : chèf rélijyé jwif-ya ki té ka di ki yé té anbandonnen yé rélijyon, é roun ran annan asanblé-a ki té ka di ki krétyen-yan té divèt kontinyé swiv Lalwa Moyiz, pitèt pou Jwif-ya pa pèrsékité yé (Gal. 6:12). Kisa ki té ké idé krétyen-yan rété fidèl ké Jéova ?
6. Kisa Pòl ankourajé so frè ké sò ébré-ya fè ? (Hébreux 5:14 – 6:1).
6 Annan lèt Pòl ékri pou krétyen ébré-ya, i ankourajé yé étidyé épi réfléchi asou Paròl Bondjé-a (li Hébreux 5:14 – 6:1). Pòl sèrvi Ékritir ébrayik-ya pou èspliké poukisa fason krétyen-yan té ka adoré Jéova té lontan pi bon pasé fason Jwif-ya té ka adoré l’ a. Pòl ankourajé yé anprann konnèt ké konprann pi byen lavérité ki annan Ékritir-ya. Konsa, lanmenm yé té ké wè lò roun moun té ké ansényé bagaj ki pa vré é yé pa té ké asèpté sa.
7. Ki problèm nou ka jwenn jòdla ?
7 Jòdla, i gen roun patché moun ki ka sonmen vyé lidé ki pa k’alé ké sa Jéova ka di asou sa ki vré ké sa ki bon. I gen sa ki ka kritiké Témwen Jéova-ya paské yé ka obéyi sa Labib ka di asou zafè sèksyalité-a. Pi sa k’alé, pi fason moun-yan ka réfléchi pa k’alé ké fason Jéova ka réfléchi (Prov. 17:15). Donk, sa enpòrtan pou nou wè lò roun moun ka ansényé bagaj ki pa vré é a pou nou réfizé kouté sa bagaj-ya. Konsa, nou pa ké lésé pyès moun dékourajé nou ouben fè nou arété adoré Jéova ! (Héb. 13:9).
8. Kisa nou divèt fè pou nou byen désidé vansé pou nou vin djòk ?
8 A pou nou swiv konsèy Pòl bay krétyen ébré-ya : annou byen désidé vansé pou nou vin djòk ! Sa lé di ki nou divèt byen étidyé Labib pou nou rivé konprann pi byen kouman Jéova ka réfléchi. É nou divèt fè l’ menm apré nou batizé. Ki nou fin batizé, ki nou Témwen Jéova dipi nanninannan, nou tout divèt li ké étidyé Paròl Bondjé-a touléjou (Ps. 1:2). Si nou gen labitid étidyé Labib, sa ké idé nou fè nou lafwa vin pi fò. A sa Pòl té ankourajé krétyen ébré-ya fè (Héb. 11:1, 6).
« ANNOU GEN LAFWA POU SOVÉ NOU LAVI »
9. Poukisa krétyen ébré-ya té divèt gen roun lafwa ki té fò ?
9 Krétyen-yan té divèt gen roun lafwa ki té fò pou yé pa mouri lò Romen-yan té ké fè malò tonbé asou sa-ya ki té ka rété Jidé (Héb. 10:37-39). Jézi té di so disip ki lò yé té ké wè roun larmé baré Jérizalèm, yé té ké divèt pran kouri pou alé pa bò d’ montangn-yan. A té roun konsèy pou tout krétyen-yan, ki yé té annan vil-ya, ki yé té lakanpagn (Luc 21:20-24). Lò roun larmé té ka ataké, moun-yan ki té ka rété lakanpagn té gen labitid kouri séré annan roun vil paské so miray té pouvé protéjé yé. Lò krétyen-yan té ké pran kouri pou alé pa bò d’ montangn-yan, sèrten moun té ké pouvé pansé ki yé té pédi yé tèt, paské sa pa té ké gen sans. Donk yé té ké divèt gen bokou lafwa pou fè l’.
10. Si lafwa krétyen-yan té fò, kisa yé té ké fè ? (Hébreux 13:17).
10 Krétyen ébré-ya té divèt fè frè-ya Jézi té ka sèrvi pou dirijé asanblé-a konfyans osi. Sa frè-ya dèt byen èspliké yé kitan é kouman yé té divèt chapé (li Hébreux 13:17). Apot Pòl té di so frè ké sò-ya ‘obéyi sa-ya ki ka dirijé yé’. I pa té lé di ki yé té divèt obéyi ansyen-yan paské yé té oblijé fè l’, mé pito paské yé té ka fè ansyen-yan konfyans. Donk, krétyen ébré-ya té divèt fè frè-ya plis konfyans anvan jou malò tonbé asou yé. Si yé té ka obéyi lò tout bagaj té k’alé byen, sa té ké pi fasil pou yé fè l’ lò bagaj-ya té ké vin pi rèd.
11. Poukisa krétyen-yan jòdla bézwen gen roun lafwa ki fò toubonnman ?
11 Kou krétyen ébré-ya, nou bézwen gen lafwa. Jòdla, près tout moun ka réfizé krè ki lafen sa monn-an pròch rivé. Yé jis ka ari di sa (2 Pierre 3:3, 4). Anplis di sa, menmsi Labib ka di nou roun patché bagaj asou fason gran tribilasyon-an ké fèt, i gen bokou bagaj nou pa savé. Atò, a pou nou sir ki lafen sa monn-an ké rivé jou Jéova désidé é ki i ké protéjé nou (Hab. 2:3).
12. Kisa nou divèt fè pou nou rété vivan pannan gran tribilasyon-an ?
12 Nou divèt fè « èsklav fidèl ké avizé-a » plis konfyans. A li Jéova ka sèrvi pou gidé nou jòdla (Mat. 24:45). Lò gran tribilasyon-an ké koumansé, i ké byen di nou sa pou nou fè pou nou sové nou lavi menm fason yé di krétyen ébré-ya sa yé té divèt fè lò Romen-yan rivé. A pou sa, dipi aprézan nou divèt fè sa-ya ki ka dirijé nou plis konfyans épi obéyi. Si a pa sa nou ka fè jòdla, sa ké rèd pou nou obéyi pannan gran tribilasyon-an.
13. Poukisa krétyen ébré-ya té bézwen konsèy-a ki marké annan Hébreux 13:5 ?
13 Toupannan yé té ka antann moman-an pou yé pran kouri, krétyen ébré-ya pa té divèt tonbé annan zafè « kontan soumaké » épi yé té divèt mété yé sèrvis pou Jéova an prémyé annan yé lavi (li Hébreux 13:5). Roun ran té ja wè mizè paské yé pa té gen manjé ni soumaké (Héb. 10:32-34). É menmsi yé té tchenbé pou bon nouvèl-a lò bagaj-ya té rèd, pitèt aprézan yé té ka koumansé chaché gen plis soumaké pou anyen pa rivé yé. Mé lò yé té ké krazé Jérizalèm, yé soumaké pa té ké fè anyen pou yé (Jacq. 5:3). Anfèt, si roun moun té kontan bagaj i té gen, sa té ké pi rèd pou i chapé épi lésé so kaz ké tousa i té gen dèyè.
14. Si nou sir ki lafen sa monn-an pròch rivé, ki désizyon nou ké pran ?
14 Si nou sir ki titalò Jéova ké krazé sa monn méchan-an, nou pa ké pansé ki gen plis soumaké ouben plis bagaj, a sa ki pi enpòrtan. Labib ka di ki moun-yan ké « jité yé soumaké annan lari » paské yé ké konprann ki « ni yé soumaké, ni yé lò pa ké pouvé sové yé jou Jéova ké kòlè » (Ézéch. 7:19). Donk, pasé nou chaché gen plizanplis soumaké, annou chaché fè sa nou pouvé pou nou okipé di nou menm ké di nou fanmi é pou nou sèrvi Jéova. Sa pa té ké roun bon bagaj si nou té ka dépansé plis soumaké ki sa nou gen ouben si nou té ka pran roun patché tan pou okipé di sa nou gen. Nou divèt panga osi kontan sa nou ja gen kousidiré a sa ki pi enpòrtan annan nou lavi (Mat. 6:19, 24). Toupannan nou ka antann lafen sa monn-an, pitèt nou ké divèt désidé si nou ké konté asou Jéova ouben si nou ké konté asou sa nou gen pou sové nou.
« NOU BÉZWEN TCHENBÉ RÈD »
15. Poukisa krétyen ébré-ya té bézwen tchenbé rèd ?
15 Krétyen-yan ki té Jidé té divèt tchenbé annan yé sèrvis pou Jéova paské problèm té ka vin dèyè (Héb. 10:36). Roun ran té ja soufri anba bon pèrsékisyon, mé roun patché annan yé pa té jen konnèt sa. A pou sa Pòl di yé ki yé té ké pèrsékité yé, donk yé té divèt préparé yé kò é yé té divèt paré pou mouri pou rété fidèl, kou Jézi (Héb. 12:4). Bokou Jwif té kòlè toubonnman é té vyolan paské roun patché moun té ka divini krétyen. Déztrwa lannen anvan sa, lò Pòl té ka préché Jérizalèm, roun patché moun ataké l’. Pasé 40 Jwif té « promèt ki yé pa té ké ni manjé ni bwè anvan yé tchwé l’ » (Actes 22:22 ; 23:12-14). Magré moun-yan té ké rayi yé é té ké pèrsékité yé, krétyen-yan té divèt kontinyé rasanblé pou adoré Jéova, préché bon nouvèl-a épi kontinyé gen roun lafwa ki fò.
16. Kouman lèt Pòl ékri pou Ébré-ya pouvé idé nou wè bon bagaj ki pouvé rivé lò yé ka pèrsékité nou ? (Hébreux 12:7).
16 Kisa ki té ké idé krétyen ébré-ya tchenbé magré pèrsékisyon-an ? Pòl té lé idé yé wè ki bon bagaj éprèv-ya té pouvé mennen si yé té ka tchenbé. I èspliké yé ki lò krétyen-yan ka soufri akoz di roun éprèv, Bondjé pouvé sèrvi sa pou fòrmé yé (li Hébreux 12:7). Sa kalité fòrmasyon-an té ké idé yé gen bèl kalité ki ka fè Jéova plézi. Si yé té ka mété yé lidé asou bon bagaj ki té pouvé rivé pannan sa éprèv-ya, sa té ké pi fasil pou yé tchenbé (Héb. 12:11).
17. Kisa Pòl anprann lò i pasé anba pèrsékisyon-an ?
17 Pòl ankourajé krétyen ébré-ya gen kouraj épi pa bat dèyè lò yé té ka jwenn éprèv. I té pouvé bay yé bon konsèy asou sa. Anvan i divini krétyen, li menm té pèrsékité krétyen-yan, donk i té wè kouman yé té ka soufri. Mé i té savé kisa yé té pouvé fè osi pou yé tchenbé rèd pas lò i divini krétyen i pasé anba plizyèr kalité pèrsékisyon li menm osi (2 Cor. 11:23-25). Donk, Pòl té byen savé sa yé té divèt fè pou yé tchenbé rèd. I fè krétyen ébré-ya sonjé ki yé pa té divèt konté asou yé pròp fòrs, yé té divèt konté asou Jéova. Li menm té pouvé gen kouraj épi di : « Jéova ka sové mo ; mo pa ké pè » (Héb. 13:6).
18. Kouman nou pouvé paré nou kò pou pèrsékisyon-an ?
18 Roun ran annan nou frè ké sò-ya ja anba pèrsékisyon. Nou pouvé soutni yé lò nou ka priyè pou yé é détan, nou pouvé bay yé sa yé bézwen (Héb. 10:33). Mé Labib ka di san katakata ki « tout sa ki lé kontinyé adoré Bondjé ké fidélité é kontinyé swiv Jézi Kris, yé ké pèrsékité yé » (2 Tim. 3:12). Donk, nou tout nou divèt paré nou kò pou sa ki ka vin dèyè. Kouman nou pouvé fè sa ? A pou nou toujou konté asou Jéova é a pou nou sir ki i ké idé nou tchenbé rèd kèlkéswa éprèv nou pouvé jwenn. Lò moman-an ké rivé pou i fè l’, i ké soulajé tout so sèrvitèr ki fidèl (2 Thess. 1:7, 8).
19. Ki konsèy nou divèt swiv pou préparé nou kò pou gran tribilasyon-an ? (gadé zimaj-a osi).
19 Asiré pa pitèt, konsèy Pòl bay Ébré-ya annan so lèt idé yé préparé yé kò pou tribilasyon ki té ka vin dèyè-a. Pou koumansé, i ankourajé yé byen étidyé épi konprann Paròl Bondjé-a pi byen. Konsa, sa té ké idé yé wè lanmenm lò moun té ké ansényé bagaj ki té pouvé fè yé lafwa fébli. I ankourajé yé fè yé lafwa vin pi fò osi pas sa té ké idé yé obéyi Jézi ké sa-ya ki té ka dirijé asanblé-a. Pou fini, pou ankourajé yé tchenbé rèd, i idé yé konprann ki yé Papa ki kontan yé pouvé sèrvi éprèv yé ka jwenn pou fòrmé yé. Nou menm osi, a pou nou swiv sa konsèy-a ki ka vini di Bondjé. Konsa, nou ké pouvé tchenbé rèd jiktan lafen-an rivé (Héb. 3:14).
Bondjé béni krétyen-yan ki té fidèl pas yé tchenbé rèd. Lò yé chapé di Jidé, yé kontinyé rasanblé. Kisa sa ka anprann nou ? (gadé paragraf 19).
KANTIK 126 Rété byen dibout, tchenbé rèd, divini vayan
a Annan prémyé chapit di so lèt pou Ébré-ya, Pòl ka pran Ékritir ébrayik-ya omwen sèt fwa pou montré ki fason krétyen-yan ka adoré Bondjé lontan pi bon pasé fason Jwif-ya ka adoré l’ (Héb. 1:5-13).
