LÉSON 1
Ki bon nouvèl Bondjé gen pou nou ?
1. A kisa sa nouvèl-ya ki ka vini di Bondjé ?
Bondjé lé nou viv éré asou latè-a. I fè latè-a ké tout sa i gen asou l’ paské i kontan nou. Titalò, i ké aji : i ké ofri tout moun di nenpòrt ki péyi roun avénir miyò. I ké soulajé yé lò i ké fè disparèt tout bagaj ki ka mennen soufrans. — Li Jérémie 29:11.
Pyès gouvèrnman pa janmen rivé tiré vyolans-a, maladi-ya ouben lanmò. Mé i gen bon nouvèl ! Titalò, Bondjé ké tiré tout sé gouvèrnman-yan pou mété sopa gouvèrnman. Moun ki ké viv anba dominasyon gouvèrnman Bondjé ké viv annan lapè ké roun bon santé. — Li Isaïe 25:8 ; 33:24 ; Daniel 2:44.
2. Poukisa sa trè enpòrtan di konnèt sa bon nouvèl-ya ?
Soufrans-ya ké fini sèlman lò Bondjé ké tiré sé méchan-yan di latè-a (Sophonie 2:3). Kitan sa ké rivé ? Paròl Bondjé-a, Labib-a, té ja palé di mové bagaj nou ka viv jòdla. Tousa ki ka pasé jòdla ka montré ki Bondjé ké aji titalò. — Li 2 Timothée 3:1-5.
3. Kisa nou divèt fè ?
Nou divèt anprann konnèt Bondjé gras a so Paròl, Labib-a. Labib-a, a kou roun lèt ki roun papa plen ké lanmou ékri pou nou. I ka di nou sa nou divèt fè pou nou viv byen jòdla, é pou nou viv pita asou latè-a pou tout-tan. Pitèt sèrten moun pa ké kontan ki ou rousouvwè èd pou konprann Labib-a. Mé pa bliyé, ou pouvé gen roun avénir miyò : pa lésé sa bèl okazyon-an chapé ! — Li Proverbes 29:25 ; Révélation 14:6, 7.
Gadé osi...
KIMOUN NOU SA ?
Poukisa étidyé Labib-a ?
Labib-a ka bay milyon moun annan monn-an répons anlè gran késyon lavi-a. Ès ou té ké lé sa roun annan yé ?
