Bondjé ka envité tout sé moun-yan vini pròch di li gras a lapriyè (Psaume 65:2). Mé i pa ka kouté tout sé lapriyè-ya, sa lé di i pa ka asèpté yé tout. Si roun mouché ka malmennen so madanm, Bondjé pouvé désidé pa kouté so lapriyè (1 Pierre 3:7). Lò sé Israyélit-ya pa té lé arété fè mové bagaj, Bondjé pa té ka kouté yé. Mé Bondjé ka asèpté lapriyè roun moun ki péché mé ki répanti so kò (sa lé di i ka rigrété sa i fè), menm si so péché té grav. Asiré pa pitèt, lapriyè sa vréman roun lònò Bondjé ka fè nou. — Li Isaïe 1:15 ; 55:7.

Gadé vidéyo Ès Bondjé ka kouté tout sé lapriyè-ya ?

Lò nou ka priyè, nou ka adoré Bondjé. A pou sa nou divèt priyè nou Kréyatèr Jéova li rounso (Matthieu 4:10 ; 6:9). Anplis, kou nou pa parfè, nou divèt priyè o non di Jézi paské i mouri pou nou péché (Jean 14:6). Jéova pa lé nou répété lapriyè nou anprann ouben lapriyè ki ja ékri. I lé nou di sa ki ka vini di nou tchò. — Li Matthieu 6:7 ; Philippiens 4:6, 7.

Nou Kréyatèr ka tandé nou menm lò nou ka priyè annan nou tchò (1 Samuel 1:12, 13). I ka di nou priyè l’ nenpòrt kitan, parèkzanp lò lajournen-an ka koumansé é lò i ka fini, lò nou paré pou manjé, ouben lò nou gen problèm. — Li Psaume 55:22 ; Matthieu 15:36.

Vini pi pròch di Bondjé pa fasil paské nou ka viv an mitan moun ki pa gen lafwa annan li é ki ka ari di so promès di mété lapè asou latè-a (2 Timothée 3:1, 4 ; 2 Pierre 3:3, 13). A pou sa nou bizwen rasanblé ké ròt  adoratèr Bondjé paské yé ka ankourajé nou, épi yé menm osi bizwen nou. — Li Hébreux 10:24, 25.

Lò nou ka rasanblé ké moun ki kontan Bondjé, sa ka édé nou vini pi pròch di li. Réinyon sé Témwen Jéova-ya ka bay bèl okazyon divini pi fò gras a lafwa di sé lézòt-ya. — Li Romains 1:11, 12.

Ou pouvé vini pròch di Jéova si ou ka pran tan réfléchi asou sa ou ka anprann annan so Paròl. Réfléchi asou so aksyon, asou konsèy i ka bay ké asou promès i fè. Lapriyè ké méditasyon-an ké édé ou gen toujou plis rékonésans pou lanmou ké sajès Bondjé. — Li Josué 1:8 ; Psaume 1:1-3.

Pou vini pròch di Bondjé ou divèt gen konfyans é gen lafwa annan li. Mé lafwa, a kou roun plant, a pou bay li sa i bizwen pou grandi. A pou ou kontinyé réfléchi asou sa ou ka krè é poukisa ou ka krè sa. A konsa ou ka bay ou lafwa sa i bizwen pou grandi. — Li Matthieu 4:4 ; Hébreux 11:1, 6.

Jéova ka gadé pou moun ki kontan li. I pouvé protéjé ou di tousa ki pouvé fè ou lafwa divini pi fèb é fè ou pédi èspwar viv pou tout-tan (Psaume 91:1, 2, 7-10). I ka avèrti ou pou ou pa gen pyès konpòrtman ki pa bon pou ou santé ké ou bonèr. I ka ansényé ou kouman ou pouvé gen miyò lavi i pouvé gen. — Li Psaume 73:27, 28 ; Jacques 4:4, 8.