1. Aprézan ou konnèt roun patché vérité ki annan Labib-a, kisa ou pitèt ka doumandé ou kò ?

LÒ OU étidyé sa liv-a, ou anprann roun patché vérité ki annan Labib-a. Parèkzanp ou dékouvri lavérité asou moun mouri-ya, èspwar rézirèksyon-an ké promès lavi pou tout-tan (Ecclésiaste 9:5 ; Luc 23:43 ; Jean 5:28, 29 ; Révélation 21:3, 4). Pitèt ou ka alé annan réinyon Témwen Jéova-ya é asiré ou ka krè ki yé ka adoré Bondjé kou i lé (Jean 13:35). Anplis di sa, ou déja divèt koumansé gen roun lanmityé ké Jéova  é ou lé fè so volonté. Mé pitèt ou ka doumandé ou kò : « Kisa mo divèt fè pou sèrvi Bondjé ? »

2. Poukisa roun Étchopyen té lé batizé ?

² Roun Étchopyen annan lépòk Jézi doumandé sa i té divèt fè pou adoré Bondjé. Roun tibi tan apré Jézi résisité, Filip, roun annan so disip-ya, préché pou sa mouché-a. I montré l’ ki Jézi té sa Mési-a. Sa Étchopyen anprann-an touché so tchò tèlman ki lanmenm i di : « Gadé ! I gen dlo la ; kisa ki ka anpéché mo batizé ? » (Actes 8:26-36).

3. a) Ki lòrd Jézi bay so disip ? b) Kouman batenm-an divèt fèt ?

³ Labib-a klè : si ou lé adoré Jéova, ou divèt batizé. Jézi di so disip : «Alé épi fè disip annan moun tout nasyon é batizé yé » (Matthieu 28:19). Li menm Jézi bay èkzanp lò i batizé. Yé pa jis vidé roun tibi dlo asou so tèt : yé plonjé tout so kò anba dlo-a (Matthieu 3:16). Lò roun krétyen ka batizé, tout so kò divèt plonjé osi anba dlo-a.

4. Lò roun moun ka batizé, kisa i ka montré ròt moun-yan ?

⁴ Lò roun moun ka batizé, i ka montré ròt moun-yan ki a lé i lé divini zanmi Bondjé é fè so volonté (Psaume 40:7, 8). Aprézan, pitèt ou ka doumandé ou kò : « Kisa mo divèt fè pou mo batizé ? »

5. a) Anvan ou batizé, kisa ou divèt fè ? b) Poukisa réinyon krétyen-yan enpòrtan ?

⁵ Anvan ou batizé, ou divèt anprann konnèt Jéova ké Jézi. Ou ja koumansé fè sa ké ou étid di Labib-a (li Jean 17:3). Mé a pa sa rounso ou divèt  fè. Labib-a ka di ki ou divèt « plen ké vré konésans » asou volonté Jéova-a (Colossiens 1:9). Réinyon Témwen Jéova-ya ké idé ou gen roun lanmityé pi fò ké Jéova. A pou sa sa enpòrtan ou alé annan sa réinyon-yan chak simenn (Hébreux 10:24, 25).

6. Anvan ou batizé, ki ansèyman Labib-a ou divèt konnèt ?

⁶ Jéova pa ka doumandé ou konnèt tout bagaj asou Labib-a anvan ou batizé. I pa doumandé Étchopyen-an konnèt tout bagaj anvan so batenm (Actes 8:30, 31). Pou byen di, nou pa ké janmen fini anprann bagaj asou Bondjé (Ecclésiaste 3:11). Mé anvan ou batizé, ou divèt konnèt épi asèpté ansèyman prensipal-ya di Labib-a (Hébreux 5:12).

7. Kouman ou étid di Labib-a idé ou ?

⁷ Labib-a ka di ki, san lafwa, ou pa pouvé fè Bondjé plézi (Hébreux 11:6). A pou sa ou divèt gen lafwa annan Bondjé anvan ou batizé. Lò roun ran moun ki té ka rété Korent fin tandé sa disip Jézi té ka ansényé, yé « koumansé krè é yé batizé » (Actes 18:8). Menm fason-an, ou étid di Labib-a idé ou gen lafwa annan promès Bondjé fè-ya. Ké sa étid-a ou rivé gen lafwa annan sakrifis Jézi. Sa sakrifis-a pouvé sové nou di péché ké lanmò-a (Josué 23:14 ; Actes 4:12 ; 2 Timothée 3:16, 17).

8. Kisa ki ké bay ou anvi palé ròt moun-yan di sa ou ka anprann ?

⁸ Plis ou ké anprann bagaj asou Labib-a plis ou ké wè kouman i pouvé sèrvi ou annan ou lavi é plis ou  lafwa ké vini pi fò. A sa moman-an ou ké anvi palé ròt moun-yan di sa ou ka anprann (Jérémie 20:9 ; 2 Corinthiens 4:13).

9, 10. a) Ké kimoun ou pouvé koumansé palé di sa ou ka anprann ? b) Si ou lé préché ké asanblé-a, kisa ou divèt fè ?

⁹ Pitèt ou ké anvi palé di sa ou ka anprann ké ou fanmi, ou zanmi, ou vwazen ké ou kolèg travay. A roun bon bagaj mé toujou palé jantiman ké dousèr. Piti piti ou ké lé préché ké asanblé-a. Lò ou ké santi ou paré, palé di sa ké Témwen-an ki ka anprann ou Labib-a. Si i ka pansé ki ou paré é si ou ka viv soulon prensip-ya ki annan Labib-a, ou ké kozé ansanm ké li ké dé ròt ansyen di ou asanblé.

¹⁰ Kisa ki ké pasé pannan sa réinyon-an ? Ansyen-yan ké palé ké ou pou wè si ou ka konprann ansèyman prensipal-ya di Labib-a é si ou ka krè annan tousa. Yé ké lé savé si annan ou lavi ou ka obéyi sa Labib-a ka di é si ou lé vréman divini roun Témwen Jéova. Fo pa ou pè palé ké ansyen-yan. Pa bliyé : yé ka pran swen di tout moun annan asanblé-a, é ou menm osi annan (Actes 20:28 ; 1 Pierre 5:2, 3). Apré sa réinyon-an, yé ké di ou si ou pouvé préché ké asanblé-a.

11. Si ansyen-yan ka di ou ki ou gen chanjman pou fè toujou, poukisa sa trè enpòrtan di fè sa chanjman-yan ?

¹¹ Pitèt ansyen-yan ké di ou ki ou gen chanjman pou fè toujou anvan ou préché ké asanblé-a. Poukisa sa trè enpòrtan di fè sa chanjman-yan ? Paské lò nou ka palé ròt moun-yan di Jéova, nou ka  rouprézanté l’. A pou sa, fason nou ka viv divèt bay li lònò (1 Corinthiens 6:9, 10 ; Galates 5:19-21).

12. Poukisa tout moun bézwen répanti yé kò ?

¹² Anvan ou batizé, ou divèt fè rounòt bagaj ankò. Apot Pyèr di : « Répanti zòt kò é tounen zòt kò, pou zòt péché éfasé » (Actes 3:19). Kisa sa lé di « répanti so kò » ? Sa lé di rigrété vréman tousa ou fè ki pa té bon. Parèkzanp, si ou té annan péché sèksyèl, ou divèt répanti ou kò. É menmsi ou toujou éséyé fè sa ki byen, ou divèt répanti ou kò kanmenm. Kou nou tout péchèr, nou tout bézwen doumandé Bondjé pardon (Romains 3:23 ; 5:12).

13. Kisa sa lé di « tounen ou kò » ?

¹³ Ès a rigrété sa ou fè ki pa té bon rounso ? Non. Pyèr di ki a pou osi « tounen so kò ». Sa lé di ki ou divèt rijété tout kalité mové konpòrtman épi fè sa ki byen. Annou pran roun èkzanp : Ou ka alé roun koté pou prémyé fwa. Roun ti moman apré, ou ka konprann ki ou pran mové chimen-an. Kisa ou ka fè ? Ou ka ralanti, ou ka arété, épi « ou ka tounen ou kò », sa lé di ou ka fè démitour, épi ou ka pran bon chimen-an. Menm fason-an, ké sa ou ka étidyé annan Labib-a ou ké pitèt randé ou kò kont ki ou divèt fè chanjman annan ou lavi ouben lésé dé bagaj ou té abitchwé fè. A pou ou paré pou « tounen ou kò », sa lé di fè tout chanjman ou divèt fè épi koumansé fè sa ki byen.

14. Kisa sa lé di « vouwé so kò pou Jéova » ?

¹⁴ Anvan ou batizé, ou divèt fè rounòt bagaj enpòrtan : vouwé ou kò pou Jéova. Vouwé ou kò pou Bondjé, a lò ou ka promèt li annan roun lapriyè ki a li rounso ou ké adoré, é ki fè so volonté, a sa ki ké pi enpòrtan annan ou lavi (Deutéronome 6:15).

15, 16. Kisa ki ka pousé roun moun vouwé so kò pou Jéova ?

¹⁵ Lò ou ka promèt ki a Jéova rounso ou ké adoré, a kou lò ou ka promèt pasé larèstan ou lavi ké roun moun ou kontan. Annou pran roun èkzanp : Roun mouché ké roun madanm kontan yé konpanyen. Plis sa mouché-a ka anprann konnèt sa madanm-an, plis i kontan l’. Epi i lé maryé ké li. A roun désizyon ki enpòrtan, mé i paré asèpté rèsponsabilité maryaj-a ka mennen paské i kontan madanm-an.

¹⁶ Plis ou ké konnèt Jéova, plis ou ké kontan l’ é plis ou ké lé fè tousa ou pouvé pou adoré l’. Sa ké pousé ou promèt li annan roun lapriyè ki ou ké fè so volonté. Labib-a ka di ki sa-la ki lé divini disip Jézi divèt « arété viv pou li menm » (Marc 8:34). Sa lé di ki obéyi Jéova a sa ki divèt pi enpòrtan pou ou. Pou byen di, sa Jéova lé pi enpòrtan pasé sa ou menm lé ké sa ou prévwè fè annan ou lavi (li 1 Pierre 4:2).

17. Poukisa roun ran moun pa ka vouwé yé kò pou Jéova ?

¹⁷ Roun ran moun pa ka vouwé yé kò pou Jéova paské yé pè pa rivé tchenbé yé promès di fè so volonté.  Yé pa lé fè l’ lanpenn. Ouben yé ka pansé ki si yé pa vouwé yé kò pou Bondjé, douvan li, yé pa ké rèsponsab di sa yé ka fè.

18. Kisa ki ké idé ou pou ou pa pè fè Jéova lanpenn ?

¹⁸ Ou lanmou pou Jéova ké idé ou pou ou pa pè fè Jéova lanpenn. Paské ou kontan l’, ou ké fè tousa ou pouvé pou tchenbé ou promès (Ecclésiaste 5:4 ; Colossiens 1:10). Ou pa ké di ki sa tro rèd di fè volonté Jéova. Apot Jan ékri : « Kontan Bondjé, men sa sa lé di : obéyi so lalwa. Mé, so lalwa pa fòrsan » (1 Jean 5:3).

19. Ou pa divèt pè vouwé ou kò pou Jéova. Poukisa ?

¹⁹ Ou pa bézwen parfè pou vouwé ou kò pou Jéova. I pa janmen ka doumandé nou fè plis ki sa nou pouvé fè (Psaume 103:14). I ké idé ou fè sa ki byen (Isaïe 41:10). Si ou ka fè li konfyans ké tout ou tchò, « i ké fè ou chimen vini drèt » (Proverbes 3:5, 6).

20. Apré ou vouwé ou kò pou Jéova, kisa ou divèt fè ?

²⁰ Ès ou paré pou vouwé ou kò pou Jéova ? Apré ou vouwé ou kò pou Jéova, ou divèt batizé : a sa ki ka vini apré.

21, 22. Kouman ou pouvé fè roun déklarasyon di ou lafwa douvan tout moun ?

²¹ Di koòrdinatèr kolèj ansyen-yan annan ou asanblé lokal ki ou vouwé ou kò pou Jéova é ki ou lé batizé. I ké doumandé ansyen-yan gadé ké ou  ansèyman prensipal di Labib-a. Si yé ka pansé ki ou paré, yé ké di ou ki ou pouvé batizé annan asanblé Témwen Jéova-ya ki ka vini. Pannan asanblé-a, roun diskour ké èspliké kisa batenm-an lé di. Apré sa, moun-an ki ké fè diskour-a ké pozé moun-yan ki ké batizé dé késyon senp. Lò ou ké réponn sa  késyon-yan, ou ké fè roun déklarasyon di ou lafwa douvan tout moun (Romains 10:10).

²² Apré sa, ou ké batizé. Yé ké plonjé tout ou kò anba dlo-a. Ou batenm ké montré tout moun ki ou  vouwé ou kò pou Jéova é ki aprézan ou sa roun Témwen Jéova.

23. Kisa sa lé di batizé « annan non Papa-a, Pitit-a ké lèspri sen-an » ?

²³ Jézi di ki so disip té ké batizé « annan non Papa-a, Pitit-a ké lèspri sen-an » (li Matthieu 28:19). Sa lé di ki ou divèt asèpté otorité Bondjé. Ou divèt asèpté osi ròl Jézi gen annan projè Bondjé. É a pou ou asèpté fason Bondjé ka sèrvi so lèspri sen pou fè so volonté (Psaume 83:18 ; Matthieu 28:18 ; Galates 5:22, 23 ; 2 Pierre 1:21).

24, 25. a) Kisa batenm-an ka rouprézanté ? b) Ki késyon dèrnyé chapit-a ké réponn ?

²⁴ Batenm-an ka rouprézanté roun bagaj enpòrtan. Lò ou plonjé anba dlo-a, sa lé di ki ou ka lésé fason ou té gen labitid viv anvan. É lò ou ka soti annan dlo-a, sa lé di ki ou ka koumansé roun nouvo lavi, pou sèrvi Bondjé. Sa ka montré ki aprézan, ou ké fè volonté Jéova. Sonjé : ou pa vouwé ou lavi ni pou roun moun, ni pou roun òrganizasyon, ni pou roun travay, mé pou Jéova !

²⁵ Promès ou fè Jéova ké idé ou gen roun bèl lanmityé ké li (Psaume 25:14). Sa pa lé di ki nou ké sové sèlman paské nou batizé. Apot Pòl ékri : « Travay pou sové zòt kò ké lakrent ké rèspè » (Philippiens 2:12). Batenm-an, a sèlman koumansman-an. Mé atò, kouman ou pouvé rété zanmi Jéova ? Dèrnyé chapit-a ké réponn sa késyon-an.