1, 2. Ki késyon ou divèt doumandé ou kò ? É poukisa sa enpòrtan ?

DIPI ou ka étidyé Labib-a, ou anprann ki bokou moun ka di yé ka adoré Bondjé mé pannan sa tan-an, yé ka ansényé ouben yé ka fè bagaj i rayi (2 Corinthiens 6:17). A pou sa Jéova ka di nou soti annan fo rélijyon-an, « Gran Babilòn-an » (Révélation 18:2, 4). Kisa ou ké fè ? Nou tout gen roun chwa pou fè. Nou divèt doumandé nou kò : « Ès mo lé adoré Bondjé kou i lé ouben mo lé fè kou mo abitchwé fè ? »

² Si ou déja lésé fo rélijyon-an, a roun bon bagaj. Mé pitèt i gen tradisyon annan fo rélijyon-an ou kontan toujou. Annou gadé plizyèr annan sa tradisyon-yan. Ou ké konprann poukisa sa enpòrtan di wè yé kou Jéova ka wè yé.

3. a) Roun ran moun pa ka rivé adoré Bondjé san sèrvi zimaj. Poukisa ? b) Kisa Labib-a ka di asou zafè sèrvi zimaj lò nou ka adoré Bondjé ?

³ Roun ran moun ka sèrvi zimaj, zidòl ouben lotèl pou adoré Bondjé é yé ka fè sa dipi lontan. Ès a sa ou ka fè ? Si a sa ou ka fè, pitèt ou ké pansé ki sa dròl ouben ki sa pa bon si ou pa ka adoré Bondjé ké sa bagaj-ya. Mé pa bliyé : A Jéova ki ka désidé kouman nou divèt adoré l’. É Labib-a ka di san katakata : i pa lé  nou sèrvi zimaj pou nou adoré l’ (li Exode 20:4, 5 ; Psaume 115:4-8 ; Isaïe 42:8 ; 1 Jean 5:21).

4. a) Nou pa divèt adoré moun mouri-ya. Poukisa ? b) Jéova di so sèrvitèr-ya pa éséyé palé ké moun mouri-ya. Poukisa ?

⁴ I gen moun ki ka pran bokou annan yé tan, yé fòrs ké yé soumaké pou yé fè yé moun mouri-ya plézi. Défwa yé jis ka adoré yé. Mé nou anprann ki moun mouri-ya pa pouvé ni idé nou ni fè nou pyès méchansté. Yé pa ka viv pyès ròt koté. É sa trè danjéré di éséyé palé ké yé paské lò ou ka krè ki roun mésaj ka vini di roun moun mouri, a démon-yan ki dèyè sa. A pou sa Jéova di Israyélit-ya pa éséyé palé ké moun mouri-ya. Yé pa té divèt fè anyen ki té mélé ké tchenbwa (Deutéronome 18:10-12 ; gadé nòt n^os 26 ké 31, paj 221 ké 223).

5. Si ou ka sèrvi zimaj pou adoré Bondjé, ouben si ou ka adoré moun mouri-ya, kisa ki ké idé ou arété fè sa ?

⁵ Si ou ka sèrvi zimaj pou adoré Bondjé, ouben si ou ka adoré moun mouri-ya, kisa ki ké idé ou arété fè sa ? Ou divèt li Labib-a épi pran tan byen réfléchi asou sa Bondjé ka pansé di sa : i « rayi » sa (Deutéronome 27:15). Priyè Bondjé chak jou pou i idé ou wè sa bagaj-ya kou li menm lé, é pou ou adoré l’ kou i lé (Isaïe 55:9). Asiré pa pitèt, i ké bay ou fòrs pou ou tiré annan ou lavi tout bagaj ki mélé ké fo rélijyon-an.

6. Poukisa chèf Légliz-a désidé fété nésans Jézi jou 25 désanm-an ?

⁶ Toupatou asou latè-a, Nwèl sa roun lafèt bokou moun konnèt. Près tout moun ka pansé ki a lafèt  nésans Jézi. Mé Nwèl mélé ké fo rélijyon-an. Roun liv ka èspliké ki Romen-yan, ki té payen (moun ki té ka adoré plizyèr bondjé), té ka fété nésans solèy-a jou 25 désanm-an. Chèf Légliz-a té lé plis moun payen divini krétyen. A konsa yé désidé fété nésans Jézi jou 25 désanm-an, menm si a pa sa jou-a i fèt (Luc 2:8-12). Disip Jézi-ya pa té ka fété Nwèl. Rounòt liv ka di ki pannan 200 lannen apré Jézi fèt, « pésonn pa té savé ki jou i té fèt, é i pa té gen bokou moun ki té mélé ké sa » (Sacred Origins of Profound Things). Pou byen di, moun-yan koumansé fété Nwèl santenn lannen apré Jézi fèt.

7. Poukisa vré krétyen-yan pa ka fété Nwèl ?

⁷ Bokou moun savé ki Nwèl ké so tradisyon (bay ké rousouvwè kado épi manjé ké bwè sa jou-a) ka vini di nasyon payen. I gen roun tan, an Anglétèr ké plizyèr koté an Amérik, yé té défann moun-yan fété Nwèl akoz di so istwè. Yé té ka pini tout sa ki pa té ka obéyi sa lalwa-a. Mé apré sa, moun-yan roukoumansé fété Nwèl. Poukisa vré krétyen-yan pa ka fété Nwèl ? Paské yé lé fè Bondjé plézi.

8, 9. Prémyé krétyen-yan pa té ka fété anivèrsèr nésans. Poukisa ?

⁸ Bokou moun ka fété anivèrsèr yé nésans. Ès vré krétyen-yan ka fè sa ? Labib-a ka palé di anivèrsèr nésans, mé moun-yan ki té fè sa lafèt-a pa té ka adoré Jéova (Genèse 40:20 ; Marc 6:21). Moun ki té payen té ka fété yé anivèrsèr pou onoré fo bondjé-ya. A pou sa pou prémyé krétyen-yan, « sélébrasyon anivèrsèr  nésans té sa roun tradisyon payen » (The World Book Encyclopedia).

⁹ Romen ké Grèk-ya té ka krè ki jou nésans chak moun a té osi anivèrsèr roun bondjé. Yé té ka pansé ki sa bondjé-a té an rélasyon ké roun lèspri ki té la jou nésans moun-an. É pou sa lèspri-a protéjé sa moun-an, i té divèt fété so anivèrsèr.

10. Vré krétyen-yan pa ka fété anivèrsèr nésans. Poukisa ?

¹⁰ Kisa ou ka pansé : ès Jéova kontan lafèt ki mélé ké fo rélijyon-an ? (Isaïe 65:11, 12). Non. A pou sa vré krétyen-yan pa ka fété anivèrsèr nésans ni pyès ròt lafèt ki mélé ké fo rélijyon-an.

11. a) Poukisa i gen moun ki ka fété lafèt payen ? b) Kisa ki divèt pi enpòrtan pou ou ?

¹¹ Roun patché moun savé ki Nwèl, ké ròt lafèt ankò, ka vini di nasyon ki pa té ka adoré Bondjé. Mé yé ka kontinyé fété yé kanmenm. Pou yé, a roun okazyon pou pasé roun tibi tan ké yé fanmi. É ou menm, kisa ou ka pansé di sa ? I pa gen anyen ki mové annan pasé tan ké ou fanmi. A Jéova ki fè fanmi-a é i lé nou viv byen ké nou fanmi (Éphésiens 3:14, 15). Mé nou pa divèt fété lafèt ki ka vini di fo rélijyon-an pou éséyé fè yé plézi. Sa ki pi enpòrtan-an, a di chaché gen bon rélasyon ké Jéova. Apot Pòl di : « Kontinyé chaché savé sa ki ka fè Sényèr-a plézi » (Éphésiens 5:10).

12. Poukisa Jéova pa ka asèpté tout kalité lafèt ?

¹² Roun patché moun ka pansé ki nou pa bézwen savé koté roun lafèt soti. Mé a pa sa Jéova ka pansé.  I pa kontan ni lafèt moun ranmasé annan fo rélijyon-an, ni lafèt ki ka onoré moun ouben roun péyi. Parèkzanp, Éjipsyen-yan té gen bokou lafèt pou yé fo bondjé. Apré yé soti Éjip, Israyélit-ya kopyé asou roun lafèt éjipsyen épi yé di ki a té « roun lafèt pou Jéova ». Mé Jéova pini yé (Exode 32:2-10). Profèt Izayi di ki nou pa divèt « manyen anyen ki pa pròp » (li Isaïe 52:11).

13. Jou ou ké désidé arété fété lafèt payen, pitèt ou ké gen patché késyon. Kilès ?

¹³ Jou ou ké désidé arété fété lafèt payen, pitèt ou ké gen patché késyon. Parèkzanp : « Kisa pou mo fè si mo kolèg travay ka doumandé mo poukisa mo pa ka fété Nwèl ké yé ? Kisa mo divèt fè si roun moun ka bay mo roun kado pou Nwèl ? Kisa mo divèt fè si mo mari ouben mo madanm lé mo fété roun lafèt payen ? Kouman pou mo fè pou mo timoun pa gen lanpenn paské yé pa ka fété roun lafèt payen ouben yé anivèrsèr ? »

14, 15. Si yé ka di ou « bonn fèt » ouben si yé ka bay ou roun kado, kisa ou pouvé fè ?

¹⁴ Lò ou ké désidé sa ou ké di ouben sa ou ké fè, pran tan byen réfléchi. Parèkzanp, si roun moun ka di ou « bonn fèt », ou pa divèt fè kousidiré ou pa tandé l’. Ou pouvé jis di li mèrsi. Mé défwa, roun ran moun lé savé plis bagaj asou sa. A sa moman-an ou pouvé èspliké poukisa ou pa ka fété sa lafèt-ya. A pou ou toujou rété janti, rèspèkté moun-yan é pa di  anyen ki ké fè yé lanpenn. Labib-a ka di : « A pou zòt paròl toujou chwit, kousidiré i gen so ti disèl, konsa zòt ké savé kouman pou zòt réponn chak moun » (Colossiens 4:6). Ou pouvé èspliké parèkzanp ki ou kontan pasé tan ké ròt moun é bay yé kado, mé pa pou sa lafèt-ya.

¹⁵ É si yé ka bay ou roun kado pou roun lafèt payen ? Labib-a pa ka bay roun lis bagaj pou fè ké bagaj pou pa fè, mé i ka di nou kontinyé gen roun bon konsyans (1 Timothée 1:18, 19). Moun-an ki ka ofri ou roun kado pitèt pa savé ki ou pa ka fété sa lafèt-a. Ouben i pouvé di ou : « Mo savé to pa ka fété sa lafèt-a mé mo lé bay to sa kado-a kanmenm. » Annan sa dé sitiyasyon-yan, ou pouvé désidé asèpté ouben réfizé. Mé, a pou ou kontinyé gen roun bon konsyans. Nou pa lé fè anyen ki pouvé gaté nou rélasyon ké Jéova.

16. Si ou fanmi lé fété roun lafèt payen, kisa ou divèt fè ?

¹⁶ Kisa pou ou fè si ou fanmi lé fété roun lafèt payen ? Pa briga ké yé. Yé gen drwa fè sa yé lé. A pou ou janti épi rèspèkté sa yé ka pansé, menm fason ou lé yé rèspèkté sa ou ka pansé (li Matthieu 7:12). Mé aprézan, kisa pou ou fè si yé lé ou pasé roun tibi tan ké yé pannan sa lafèt-a ? Prémyé bagaj pou ou fè a priyè Jéova pou i idé ou pran bon désizyon-an. Apré sa, pran tan réfléchi asou sitiyasyon-an épi chaché konnèt plis bagaj asou sa. Pa bliyé : sa ou lé, a fè Jéova plézi.

17. Kouman ou pouvé idé ou timoun pou yé pa gen lanpenn lò yé ka wè ròt moun-yan fété roun lafèt payen ?

 ¹⁷ Kouman ou pouvé idé ou timoun pou yé pa gen lanpenn lò yé ka wè ròt moun-yan fété roun lafèt payen ? Tanzantan, ou pouvé fè roun bagaj èspésyal pou yé. Ou pouvé osi bay yé kado. Pi bèl kado ou pouvé bay yé a di pasé tan ké yé é montré ou kontan yé.

18. Poukisa nou divèt alé annan réinyon krétyen-yan ?

¹⁸ Pou fè Jéova plézi, a pou lésé fo rélijyon-an, so lafèt ké so tradisyon. Mé a pou osi adoré Bondjé kou i lé. Kouman ? Parèkzanp, alé chak simenn annan réinyon krétyen-yan (li Hébreux 10:24, 25). Sa réinyon-yan trè enpòrtan annan vré ladorasyon-an (Psaume 22:22 ; 122:1). Annan sa réinyon-yan nou pouvé ankourajé nou konpanyen (Romains 1:12).

19. Poukisa sa enpòrtan di palé ké ròt moun-yan di sa ou anprann annan Labib-a ?

¹⁹ Pou adoré Bondjé kou i lé, ou divèt osi palé ké ròt moun-yan di sa ou anprann annan Labib-a. Bokou moun ka enkyété yé kò paské yé ka wè tèlman méchansté ka fèt asou latè-a. Pitèt ou konnèt moun konsa. Palé yé di bèl èspwar ou gen pou dimen. Lò ou ké alé annan réinyon krétyen-yan é lò ou ké palé ké ròt moun-yan di vérité-ya ki annan Labib-a, ou pa ké anvi alé annan pyès fo rélijyon ni swiv yé tradisyon ankò. Asiré pa pitèt : si ou ka chwazi adoré Jéova kou i lé, i ké béni éfòr ou ka fè é ou ké kontan (Malachie 3:10).