1, 2. Ki késyon bokou moun ka pozé yé kò ?

 DLO ka monté épi ka charyé tout roun vilaj. Roun mouché ka antré annan roun légliz é i ka tiré asou tout moun : i ka blésé é i ka tchwé plizyèr moun. Roun madanm ki trapé roun kansèr ka mouri : so senk pitit pa gen manman ankò.

² Lò katastròf ouben malò ka rivé, bokou moun ka doumandé yé kò : « Poukisa monn-an plen ké moun ka rayi moun é plen ké soufrans ? » É ou menm, ès ou ja pozé ou kò sa késyon-an ?

3, 4. a) Ki késyon Abakik doumandé Jéova ? b) Kisa Jéova réponn Abakik ?

³ Labib-a ka di ki menm wonm ki té gen bokou lafwa annan Bondjé pozé yé kò sa késyon-an. Parèkzanp, profèt Abakik doumandé Jéova : « Poukisa to ka fè mo wè enjistis ? É poukisa to ka pèrmèt moun dominé ròt moun ké méchansté ? Poukisa mo an mitan sa vyolans-a ké sa dèstriksyon-an ? Poukisa i gen tousa blo ké tousa konba ? » (Habacuc 1:3).

⁴ Bondjé réponn Abakik. Annan Habacuc 2:2 ké 3, i promèt li ki i ké ranjé sitiyasyon-an. Jéova kontan moun-yan bokou. Labib-a ka di : « I ka pran swen di zòt » (1 Pierre 5:7). Bondjé rayi wè moun soufri pasé nou menm (Isaïe 55:8, 9). Mé, poukisa i gen sa patché soufrans-ya ?

5. a) Kisa bokou ansényan rélijyé ka di asou soufrans-ya ? b) Kisa Labib-a ka anprann nou asou soufrans-ya ?

⁵ Souvan, lò roun moun ka soufri, pastèr, monpè ké ròt ansényan rélijyé-ya ka di : « A Bondjé ki té lé sa. » Défwa, yé ka di osi ki tousa ki ka rivé roun moun, menm malò i ka jwenn, a Bondjé ki té ja désidé tousa, é ki nou pa pouvé konprann poukisa i ka fè sa. Rounòt bagaj ankò, lò roun moun ouben menm roun timoun ka mouri, yé ka di ki Bondjé té lé ki i vini jwenn li annan syèl-a. Mé anyen di tousa pa vré. Jéova pa janmen ka voyé malò. Labib-a ka di ki Bondjé pa pouvé aji ké méchansté ni ké enjistis (Job 34:10).

6. Bokou moun ka di ki a fot Bondjé si i gen soufrans asou latè-a. Poukisa ?

⁶ Bokou moun ka di ki a fot Bondjé si i gen soufrans. Poukisa ? Paské yé ka pansé ki a li ki chèf monn-an. Mé nou anprann annan chapit 3-a ki a Satan Djab-a ki chèf monn-an.

7, 8. Poukisa monn-an plen ké soufrans ?

⁷ Labib-a ka di ki « Tout monn-an anba dominasyon méchan-an » (1 Jean 5:19). Satan, chèf monn-an, mové menm. I « ka bloublou tout moun asou latè-a » (Révélation 12:9). É roun patché moun ka swiv li. A pou sa latè-a plen ké moun ka manti, moun ka rayi moun é moun ka fè méchansté.

⁸ Mé a pa pou sa rounso latè-a plen ké soufrans. Adan ké Èv révòlté kont Jéova é yé bay yé désandan péché-a. Akoz di péché-a, moun ka fè ròt moun soufri é souvan, yé lé dominé yé konpanyen. Toupatou  yé ka lévé blo roun ké ròt, yé ka malmennen yé konpanyen é yé ka fè lagèr (Ecclésiaste 4:1 ; 8:9). Épi détan moun-yan ka soufri paské roun bagaj yenki tonbé blip anlè yé konsa (Ecclésiaste 9:11). Roun moun pouvé gen roun aksidan, ouben roun malò pouvé rivé li paské i alé roun koté épi o menm moman roun mové bagaj rivé.

9. Poukisa nou pouvé sir ki Jéova gen roun bon rézon pou pèrmèt soufrans-ya ?

⁹ A pa janmen Jéova ki ka fè si i gen soufrans. I pa rèsponsab di lagèr-ya, ni di vyolans, ni lò moun ka tchwé moun. A pa li non plis ki dèyè katastròf natirèl-ya kou tranblémandétèr, tanpèt ké inondasyon. Mé atò pitèt ou ké doumandé ou kò : « Si Jéova sa moun-an ki pi pwisan annan inivèr-a, poukisa i ka pèrmèt tout sa malò-ya ? » Nou savé ki Bondjé kontan nou. Asiré pa pitèt i divèt gen roun bon rézon pou pèrmèt ki moun kontinyé soufri (1 Jean 4:8).

10. Kisa Satan di asou Jéova ?

¹⁰ Annan jarden Éden-an, Satan Djab-a bloublou Adan ké Èv. I di ki Bondjé sa roun mové chèf. Épi i di Adan ké Èv ki Bondjé té ka anpéché yé gen roun bon bagaj. Satan fè yé krè ki i té ké sa roun miyò chèf é ki yé pa té bézwen Jéova (Genèse 3:2-5) (gadé nòt n^o 27, paj 222).

11. Asou ki késyon nou bézwen répons ?

¹¹ Adan ké Èv dézobéyi Jéova é yé révòlté kont li. Yé té ka pansé ki yé té gen drwa désidé pou yé menm sa ki té bon ké sa ki pa té bon. Mé yé pa té gen rézon.  Jéova savé sa ki miyò pou nou. Kouman i té pouvé montré sa ?

12, 13. a) Poukisa Jéova pa tchwé Adan ké Èv lanmenm ? b) Poukisa Jéova pèrmèt Satan divini chèf monn-an ? c) Poukisa Jéova lésé moun-yan dirijé yé pròp kò ?

¹² Jéova pa tchwé Adan ké Èv lanmenm. I pèrmèt yé gen timoun. É i lésé désandan Adan ké Èv chwazi yé chèf. Bondjé té lé ki latè-a plen ké moun ki parfè. É a sa ki té ké fèt, menm si Djab-a té ké mété baryè (Genèse 1:28 ; Isaïe 55:10, 11).

¹³ Satan akizé Jéova douvan milyon zanj (Job 38:7 ; Daniel 7:10). A pou sa Jéova bay Satan tan pou i montré si sa i té ka di té vré. I bay moun-yan tan osi pou yé montré si yé té ké pouvé dirijé yé pròp kò san Jéova idé yé. A pou sa i lésé yé fè yépa gouvèrnman anba dominasyon Satan.

14. Apré tousa lannen ki pasé, kisa nou ka konprann ?

¹⁴ Dipi milyé lannen, moun-yan ka éséyé dirijé yé pròp kò mé yé pa ka rivé. Sa ka montré ki Satan sa roun mantèr. Moun-yan bézwen Bondjé idé yé. Profèt Jérémi té gen rézon lò i di : « Jéova, mo byen savé ki, roun moun pa pouvé trouvé so chimen li rounso. Moun-an ki ka maché-a, a pa li pou dirijé so pròp kò » (Jérémie 10:23).

15, 16. a) Poukisa Jéova ka pèrmèt soufrans-ya dipi tousa tan-an ? b) Jéova pòkò réglé problèm Satan mennen. Poukisa ?

¹⁵ Poukisa Jéova ka pèrmèt soufrans-ya dipi tousa tan-an ? Poukisa i ka lésé malò-ya rivé ? Tan té divèt pasé pou montré ki dominasyon Satan-an  mové. Moun-yan éséyé tout kalité gouvèrnman, mé yé pyès pa mennen bon bagaj. Menm si yé fè progrè annan lasyans ké tèknoloji, i gen plis enjistis, plis moun maléré, plis moun ka tchwé moun épi plis lagèr ankò. An tout sans, nou pa pouvé dirijé nou kò san Bondjé idé nou.

¹⁶ Jéova pa réglé problèm Satan mennen. Si i té fè sa, a kousidiré i té idé Satan dirijé monn-an. Mé i pa ké janmen soutni dominasyon Djab-a ! Anplis di sa, moun-yan té ké pouvé krè ki yé pouvé dirijé yé kò yé rounso. Mé a roun manti. É Jéova pa ké janmen fè roun bagaj ki pouvé fè moun-yan krè sa manti-a ! Jéova pa janmen ka manti (Hébreux 6:18).

17, 18. Kisa Jéova ké fè pou réparé tout malò Satan mennen ?

¹⁷ Paské Satan ké moun-yan révòlté kont Jéova, i gen roun patché malò asou latè-a. Ès Jéova pouvé réparé tousa ? Wi. Pou Bondjé, tout bagaj posib. Jéova savé kitan i ké gen asé prèv pou montré ki tousa Satan té di a manti. Apré sa, Bondjé ké fè latè-a divini roun paradi kou i té prévwè. Tout moun ki annan « tonm-yan » ké rouviv (Jean 5:28, 29). Moun-yan pa ké janmen tonbé malad ankò é yé pa ké mouri ankò. Jézi ké réparé tout déga Satan mennen. Jéova ké itilizé Jézi pou « détrwi travay Djab-a » (1 Jean 3:8). Nou byen kontan ki anvan sa rivé, i ka pran pasyans ké nou. I ka bay nou tan anprann konnèt li é chwazi li pou Chèf (li 2 Pierre 3:9, 10). Épi lò nou ka soufri, i ka idé nou tchenbé rèd (Jean 4:23 ; li 1 Corinthiens 10:13).

 ¹⁸ Jéova pa ka blijé nou chwazi l’ pou Chèf. I bay nou roun kado ki bèl toubonnman : libèrté di chwazi. Annou wè kouman nou pouvé itilizé sa kado-a.

19. Ki kado Jéova bay nou ? É poukisa nou divèt bay sa kado-a valò ?

¹⁹ Libèrté di chwazi, a roun kado Bondjé bay nou ki gen bokou valò. A pou sa nou pa kou zannimo-ya. Zannimo-ya ka aji ké yé ensten. Yé pa pouvé désidé sa ki bon ké sa ki pa bon. Mé nou menm, nou pouvé chwazi ki lavi nou lé gen é désidé fè Jéova plézi (Proverbes 30:24-28). Nou pa kou robo. Robo-ya réglé pou yé fè sa moun ka doumandé yé fè. Mé nou menm, nou gen libèrté di chwazi ki kalité moun nou lé divini, ki zanmi nou ké gen é sa nou ké fè di nou lavi. Jéova lé nou viv ké tchò kontan.

20, 21. Ki miyò chwa ou pouvé fè jòdla ?

²⁰ Jéova lé nou kontan l’ (Matthieu 22:37, 38). I kou roun papa ki kontan lò so timoun ka di li « Mo kontan to » ké tout so tchò, é pa paské yé blijé l’ di sa. I ka lésé nou libèrté di chwazi si nou lé ouben si nou pa lé adoré l’. Satan, Adan ké Èv chwazi pa adoré Bondjé. É ou menm, kisa ou ké fè ké sa libèrté Jéova bay ou ?

²¹ Milyon moun chwazi obéyi Jéova pasé obéyi Satan. Ou osi, itilizé oupa libèrté pou adoré Jéova (Proverbes 27:11). Annan monn nouvo-a, i ké fè tout soufrans-ya fini nèt. Kisa ou pouvé fè pou viv annan sa monn nouvo-a ? Chapit ki ka vini dèyè-a ka bay répons asou sa késyon-an.