Lò Jéova kréyé fanmi-a, i bay manman ké papa rèsponsabilité okipé di yé timoun (Colossiens 3:20). Kou ou sa papa ouben manman, a ou pou anprann ou timoun kontan Jéova é idé li divini roun moun yé ké pouvé fè konfyans lò i ké gran (2 Timothée 1:5 ; 3:15). Ou divèt konnèt osi sa ou timoun gen ofon so tchò. Ou èkzanp trè enpòrtan. Sa ké pi fasil pou ou anprann ou timoun ansèyman ki ka vini di Jéova si ou menm ja fè yé antré annan ou tchò (Psaume 40:8).

SA LABIB-A KA DI : « Chak moun toujou divèt plis paré pou kouté pasé palé » (Jacques 1:19). Asiré pa pitèt, ou lé ou timoun santi i pouvé vini palé pou ou san problèm. Chak kou i bézwen di ou roun bagaj, a pou i savé ou paré pou kouté l’. Mété li alèz pou i pouvé di ou sa i gen annan so tchò (Jacques 3:18). Si i ka pansé ou pa ké lésé l’ palé é ki ou ké tonbé dèyè l’, i pa ké louvri so tchò pou ou. A pou ou gen pasyans, é a pou i tandé ou souvan di li ou kontan l’ (Matthieu 3:17 ; 1 Corinthiens 8:1).

SA OU POUVÉ FÈ :

• Lò ou timoun bézwen palé ou, a pou ou pran tan byen kouté l’.

• Pran tan kozé ké li souvan, pa sèlman lò i ka jwenn problèm annan so lavi.

SA LABIB-A KA DI : « Sa la ki ka montré i pèrspikas (entélijan) annan roun bagaj ké rivé » (Proverbes 16:20). Détan, ou ké divèt chaché savé sa i pa ka di ou pou konprann sa i gen ofon so tchò. Souvan jennjan-yan ka èkzajéré sa yé ka di ouben yé ka di dé bagaj yé pa ka pansé. Mé « lò roun moun ka pran parti annan roun bagaj anvan menm i tandé sa ki pasé, a roun moun ki sòt » (Proverbes 18:13). Atò, pa kouri faché (Proverbes 19:11).

SA OU POUVÉ FÈ :

• A pou ou byen désidé kouté ou timoun san koupé so paròl, é pa tonbé dèyè l’.

• Éséyé sonjé sa ou menm té ka santi lò ou té gen so laj ké sa ki té enpòrtan pou ou a sa lépòk-a.

SA LABIB-A KA DI : « Mo pitit, tchenbé sa to papa anprann to-a, épi pa mété asou koté tout léson to manman bay to » (Proverbes 1:8). A manman-an ké papa-a Jéova mété pou koumandé timoun-yan. Ou divèt anprann ou timoun kouté ké rèspèkté ou (Éphésiens 6:1-3). Roun timoun ka santi lò so papa ké so manman pa ka tonbé dakò (1 Corinthiens 1:10). Atò, si zòt pa dakò, pa montré timoun-an sa, paské sa pouvé fè l’ pédi rèspè i gen pou zòt.

SA OU POUVÉ FÈ :

• Désidé ansanm kouman zòt ké korijé zòt timoun.

• Si zòt toulédé gen zòtpa lidé asou fason pou korijé zòt timoun, éséyé konprann zòt konpanyen.

SA LABIB-A KA DI : « Anprann timoun-an ki chimen i divèt pran » (Proverbes 22:6). A pa toubonnman konsa ou ka rivé lévé roun timoun. A pou ou réfléchi é désidé kouman ou ké lévé timoun-an. Épi pa bliyé prévwè korijé l’ osi (Psaume 127:4 ; Proverbes 29:17). Korijé, a ké pitèt pini, mé pi enpòrtan-an a fè ou timoun konprann poukisa i gen règ pou i swiv (Proverbes 28:7). Anprann li kontan Paròl Jéova-a, épi anprann li osi wè prensip ki annan l’ (Psaume 1:2). Sa ké idé l’ gen roun konsyans drèt (Hébreux 5:14).

SA OU POUVÉ FÈ :

• Idé ou timoun wè Bondjé kou roun Moun ka èkzisté é ki i pouvé fè konfyans.

• Anprann li rékonnèt ké évité danjé i gen asou Entèrnèt ké mwayen kominikasyon asou Entèrnèt é ki pouvé fè li gen roun mové kondwit. Anprann li protéjé so kò kont moun ki lé fòrsé li fè bagaj sèksyèl.