Adan é Èv fè timoun, é i té gen bokou moun asou latè-a. Apré sa, kèk zanj swiv Satan annan so révòlt kont Bondjé.

Yé vini asou latè-a é yé chanjé yé kò an wonm pou yé té maryé ké sé madanm-yan. Sé madanm-yan fè timoun ki té ka divini dé jéan féròs ké pwisan.

Latè-a té plen ké moun ki té ka fè bagaj ki pa bon. Labib-a ka di ki moun ki té asou latè-a té mové bokou. Sèl bagaj yé té ka sonjé, a té fè sa ki mal.

Noé té sa roun bon moun. Jéova té di l’ i té ké détrwi sé méchan-yan ké roun délij.

Bondjé doumandé Noé konstrwi roun gran bato, roun arch. Noé té divèt fè so fanmi ké tout kalité zannimo antré annan l’.

Noé avèrti sé moun-yan ki i té ké gen roun délij. Mé yé pa kouté. Sèrten annan yé té ka ari di so tèt, ròt-ya té ka rayi l’.

Lò arch-a té fini, Noé fè sé zannimo-ya antré annan l’.