Kou nou wè l’ annan ròt léson-an, Bondjé pa ka asèpté tout rélijyon-yan. Mé nou pouvé adoré nou Kréyatèr fason i lé nou adoré l’. Ki kalité « ladorasyon [ouben : rélijyon] » Bondjé ka asèpté ? (Jacques 1:27 ; nòt). Annou wè kisa Labib-a ka anprann nou.

1. Kouman nou pouvé anprann fason Bondjé lé nou adoré l’ ?

Nou pouvé anprann sa annan Labib-a. Annan roun lapriyè, Jézi di Bondjé : « To paròl sa lavérité » (Jean 17:17). Pasé yé swiv sa Paròl Bondjé-a ka di, bokou rélijyon ka bay plis enpòrtans pou ansèyman ké tradisyon ki ka vini di monn-an. Mé Jéova pa ka asèpté sa-ya ki ka ‘mété so koumannman asou koté’ (li Marc 7:9). Parkont, lò nou ka obéyi sa Labib-a ka di, Jéova gen tchò kontan.

2. Kouman nou divèt adoré Jéova ?

Nou divèt adoré Jéova rounso paské a li nou Kréyatèr (Révélation 4:11). Sa lé di nou divèt montré nou lanmou é adoré Bondjé, san nou pa itilizé bagaj kou zimaj ké zidòl (li Isaïe 42:8).

Pou Jéova « asèpté » nou ladorasyon, nou divèt « sen » (Romains 12:1). Sa lé di nou divèt obéyi ké kontan so lalwa. Parèkzanp, moun-yan ki kontan Jéova ka obéyi sa i ka di asou maryaj-a. Anplis di sa, yé pa ka fè bagaj malpròp kou fimen, pran ladròg ouben bwè tròp lalkòl a (gadé nòt-a).

3. Poukisa nou divèt adoré Jéova ansanm ké ròt krétyen ?

Jéova ka doumandé nou alé annan réinyon-yan pas i kontan nou, é i savé sa ké idé nou gen tchò kontan pou tout-tan. Lò nou ka réini ké ròt moun annan asanblé-a, nou pouvé adoré Jéova. Roun fason di fè sa, a chanté pou Bondjé (li Psaume 104:33). Kantik-ya ka bay nou posibilité ‘louwé Jéova annan asanblé-a’ (Psaume 111:1, 2). Anplis di sa, lò nou ka alé annan réinyon-yan, nou ka ankourajé ròt-ya, é yé ka ankourajé nou.

 ANNOU FOUYÉ ANNAN LABIB-A

4. Nou pa divèt itilizé bagaj pou adoré Bondjé

5. Adoré Jéova rounso ka libéré nou di bagaj ki pa vré

 6. Nou ka adoré Jéova annan nou réinyon

Nou ka louwé Jéova é nou ka ankourajé nou kò roun ròt lò nou ka partisipé annan réinyon-yan. Li Psaume 22:22, épi kozé asou sa késyon-yan :

• Ès ou kontan tandé ròt-ya partisipé annan sé réinyon-yan ?

• Ès ou té ké kontan préparé ou kò pou partisipé ?

7. Jéova kontan lò nou ka palé di sa nou ka anprann

Nou gen bokou posibilité palé di vérité-ya ki annan Labib-a. Li Psaumes 9:1 et 34:1, épi kozé asou sa késyon-an :

• Ou ja anprann patché bagaj annan Labib-a, kilès ou té ké kontan fè roun moun konnèt ?

 SA NOU WÈ

Pou Bondjé asèpté fason nou ka adoré l’, nou divèt adoré li rounso, louwé l’ annan réinyon-yan épi palé pou ròt-ya di sa nou ka anprann.

Kisa ou anprann

• Kouman nou pouvé anprann adoré Bondjé kou i lé ?

• Poukisa nou divèt adoré Jéova rounso ?

• Poukisa nou divèt adoré Bondjé ansanm ké ròt moun ki lé fè so volonté ?