LÉSON 16
Kisa Jézi fè lò i té asou latè-a ?
Lò yé ka sonjé Jézi, bokou moun ka wè li kou roun ti bébé, roun profèt ouben kou roun wonm ki ka mouri. Mé lò nou ka étidyé sa i fè lò i té asou latè-a, ki ròt bagaj nou pouvé anprann asou li ? Annan sa léson-an, nou ké wè déztrwa bagaj pi enpòrtan Jézi fè é kouman sa bagaj-ya pouvé chanjé ou lavi.
1. Ki travay pi enpòrtan Jézi té gen ?
Travay pi enpòrtan Jézi té gen, a té « préché bon nouvèl rwayonm Bondjé-a » (li Luc 4:43). Bon nouvèl Jézi préché-a té ka palé di Rwayonm-an, sa lé di, gouvèrnman Bondjé ki ké fin ké tout problèm i gen asou latè-a a (gadé nòt-a). Pannan trwa lannen é dimi, Jézi travay rèd pou palé ké moun-yan di sa bèl mésaj-a ki ka bay èspwar (Matthieu 9:35).
2. Poukisa Jézi té ka fè mirak ?
Labib-a ka di ki Bondjé itilizé Jézi pou fè « mirak ké sign » (Actes 2:22). Gras a pouvwar Bondjé bay li, Jézi kalmé roun gro tanpèt, i bay manjé milyé moun, i géri malad-ya é i menm résisité moun (Matthieu 8:23-27 ; 14:15-21 ; Marc 6:56 ; Luc 7:11-17). Mirak Jézi fè té ka montré ki a Bondjé ki té voyé l’. Yé montré osi ki Jéova gen pouvwar pou fini ké tout nou problèm.
3. Kisa nou pouvé anprann asou lavi Jézi ?
Jézi toujou obéyi Jéova (li Jean 8:29). I fè sa tout so lavi menm si bokou moun éséyé arété l’. Jézi montré ki nou pouvé sèrvi Bondjé menm lò sa difisil. A konsa Jézi lésé ‘roun modèl pou nou, pou nou byen swiv so tras’ (1 Pierre 2:21).
ANNOU FOUYÉ ANNAN LABIB-A
Annou gadé kouman Jézi préché bon nouvèl-a é kouman i fè mirak.
4. Jézi préché bon nouvèl-a
Pou i fè plizanpli moun konnèt bon nouvèl-a, Jézi maché plizyèr kilomèt asou larout plen ké lapousyè. Li Luc 8:1, épi kozé asou sa késyon-yan :
-
Ès Jézi té ka préché pou moun-yan ki té ka vin kouté l’ rounso ?
-
Ki éfòr Jézi fè pou trouvé moun-yan ?
Bondjé té ja di ki Mési-a té ké préché bon nouvèl-a. Li Isaïe 61:1, 2, épi kozé asou sa késyon-yan :
-
Kouman Jézi réyalizé sa profési-a ?
-
Ès ou ka pansé ki moun-yan bézwen tandé sa bon nouvèl-a jòdla ?
5. Jézi ansényé vérité ki enpòrtan
Jézi préché bon nouvèl-a asou rwayonm Bondjé-a, mé i osi bay bokou bon konsèy. Annou gadé déztrwa èkzanp annan diskour i fè asou montangn-an. Li Matthieu 6:14, 34 ké 7:12, épi kozé asou sa késyon-yan :
-
Ki bon konsèy Jézi ka bay annan sa vèrsé-ya ?
-
Ès ou ka pansé ki sa konsèy-ya pouvé idé nou jòdla ?
6. Jézi fè mirak
Jéova bay Jézi pouvwar pou i fè bokou mirak. Annou pran roun èkzanp : li Marc 5:25-34 ouben gadé VIDÉYO-a. Épi kozé asou sa késyon-yan.
-
Nou wè ki madanm-an té vréman malad. Magré sa, di kisa i té sir ?
-
Kisa ou pi kontan annan sa mirak-a ?
Li Jean 5:36, épi kozé asou sa késyon-an :
-
Ki « témwanyaj » mirak Jézi bay, pou byen di, kisa yé montré ?
Ès ou savé sa ?
Près tout sa nou savé asou Jézi ka vini di kat liv annan Labib-a : Matthieu, Marc, Luc ké Jean. Yé ka aplé sa liv-ya Évanjil-ya. Annan chak liv, nou ka trapé roun enfòrmasyon asou lavi Jézi ki ròt liv-ya pa ka bay. Tout sa enfòrmasyon-yan ka idé nou wè kouman Jézi té ka viv lò i té asou latè-a.
-
MATYÉ
ékri prémyé Évanjil-a. Annan sa liv-a nou ka jwenn bokou ansèyman Jézi, èspésyalman sa i ansényé asou rwayonm Bondjé-a.
-
MARK
ékri Évanjil ki pi kourt-a. Fason i ékri l’ ka randé lévènman-yan vivan, plen ké aksyon.
-
LIK
ka rakonté kouman lapriyè-a té enpòrtan pou Jézi é fason i té janti ké madanm-yan.
-
JAN
ékri bokou asou kozman Jézi té gen ké so pi pròch zanmi épi ké ròt moun. Sa ka anprann nou plis bagaj asou bèl kalité Jézi gen.
I GEN MOUN KA DI : « Jézi vini asou latè-a pou mouri pou nou. »
-
Ès ou ka pansé ki a sèl bagaj Jézi vini fè asou latè-a ?
SA NOU WÈ
Jézi préché rwayonm Bondjé-a, i fè mirak, épi i toujou obéyi Jéova.
Kisa ou anprann
-
Lò i té asou latè-a, ki travay pi enpòrtan Jézi té gen pou fè ?
-
Kisa mirak-ya Jézi fè ka montré ?
-
Ki bon konsèy Jézi bay ?
SA OU POUVÉ TRAPÉ OSI
Asou kisa Jézi té plis kontan palé ?
« Le Royaume de Dieu : son importance pour Jésus » (La Tour de Garde, 1é òktòb 2014)
Gadé poukisa nou pouvé krè ki mirak Jézi-ya vréman rivé.
« Les miracles de Jésus : que vous enseignent-ils ? » (La Tour de Garde, 15 jwiyé 2004)
Gadé kouman lavi roun mouché chanjé lò i anprann fason Jézi té ka gadé pou ròt-ya.
« Je ne vivais que pour moi » (La Tour de Garde, 1é òktòb 2014)
Gadé bagaj pi enpòrtan-yan Jézi fè roun apré ròt.
a Nòt-a : Annan léson 31 jik 33 nou ké anprann plis bagaj asou rwayonm Bondjé-a.