LÉSON 19

Ès Témwen Jéova-ya sa vré krétyen ?

KOUTÈ SA

Nou, Témwen Jéova-ya, ka krè ki nou sa vré krétyen. Poukisa ? Annan sa léson-an, nou ké wè di ki koté nou krwayans ka soti, poukisa nou ka poté non-an Témwen Jéova é kouman nou ka montré nou lanmou roun pou ròt.

1. Di ki koté krwayans Témwen Jéova-ya ka soti ?

Jézi di : ‘Paròl Bondjé sa lavérité’ (Jean 17:17). Kou Jézi, nou krwayans toujou ka soti di Paròl Bondjé. Parèkzanp, gadé sa ki pasé lafen 19^èm syèk-a. Pannan lannen 1870, roun piti group moun koumansé byen étidyé Labib-a. Yé té lé savé kisa Labib-a vréman ka anprann nou. Lò yé té ka konprann roun ansèyman biblik a sa yé té ka krè, menm si sa té diféran di sa légliz-ya té ka anprann moun-yan. Épi, yé koumansé ansényé sa vérité-ya pou ròt moun a (gadé nòt-a).

2. Poukisa nou ka poté non-an Témwen Jéova ?

Jéova ka aplé sa-ya ki ka adoré l’ so témwen paské yé ka di lavérité asou li (Hébreux 11:4 – 12:1). Parèkzanp, tan-lontan, Bondjé di pou so pèp : « Zòt sa mo témwen » (li Isaïe 43:10). Yé ka aplé Jézi « Témwen fidèl-a » (Révélation 1:5). A pou sa, dipi 1931, nou koumansé poté non-an Témwen Jéova. A pa ti fyèr nou fyèr di sa non-an.

3. Kouman Témwen Jéova-ya ka imité lanmou Jézi ?

Jézi té tèlman kontan so disip-ya ki pou li yé té kou so fanmi (li Marc 3:35). Menm fason-an, Témwen Jéova-ya ka travay ansanm kou roun fanmi asou tout latè-a. A pou sa yé ka aplé yé kò roun ròt frè ké sò (Philémon 1, 2). Nou ka obéyi osi sa koumannman-an : « Kontan tout frè ké sò-ya » (1 Pierre 2:17). Nou ka montré sa lanmou-a di plizyèr fason. Parèkzanp, nou ka idé nou frè ké sò-ya ki bézwen nou idé yé annan tout koté asou latè-a.

ANNOU FOUYÉ ANNAN LABIB-A

Annou anprann plis bagaj asou istwè Témwen Jéova-ya é annou wè osi ròt bagaj ki ka byen montré ki yé sa vré krétyen.

Krwayans vré krétyen-yan ka soti di Labib-a é yé ka palé di sa pou ròt-ya.

4. Nou krwayans ka soti di Labib-a

Jéova té di ki sa nou té ké konprann annan Labib-a té ké divini klè kou dlo ròch. Li Daniel 12:4, épi kozé asou sa késyon-an :

Pi pèp Bondjé té ké byen étidyé Labib-a, kisa ki té ké « vini bokou » ?

Annou wè kouman roun group moun té ka étidyé Paròl Bondjé. Annan sa group-a, i té gen roun mouché yé té ka aplé Charles Russell. Gadé VIDÉYO-a, épi kozé asou sa késyon-an.

VIDÉYO : Yé ka routrouvé lavérité ki annan Labib-a (7:45)

Kouman Charles Russell ké moun-yan ki té annan so group té ka étidyé Labib-a ?

Ès ou savé sa ?

Sa ka rivé ki nou divèt chanjé sa nou té ka krè. Poukisa ? Paské a piti piti Bondjé ka fè konprann so Paròl. A kou lò solèy-a ka lévé é ki, piti piti, nou ka rivé wè péyizaj-a (li Proverbes 4:18). A vré, Labib-a pa ka chanjé, mé lò nou ka konprann pi byen sa i ka di, nou ka chanjé nou krwayans pou yé alé ké Labib-a.

5. Nou ka préché lavérité-a asou Jéova

Poukisa nou chwazi poté non-an Témwen Jéova ? Gadé VIDÉYO-a, épi kozé asou sa késyon-yan.

VIDÉYO : Roun non ki ka montré kimoun nou sa (2:40)

Poukisa a roun bon bagaj nou chwazi poté non-an Témwen Jéova ?

Poukisa Jéova chwazi moun pou yé sa so témwen ? Pou yé fè tout moun savé ki i sa vré Bondjé-a é pou yé dénonsé tout manti moun-yan ka di asou li. Annou wè dé manti asou Bondjé.

Sèrten rélijyon ka anprann moun ki Bondjé lé nou itilizé bagaj kou èstati ouben zimaj pou adoré l’. Mé ès sa vré ? Li Lévitique 26:1, épi kozé asou sa késyon-yan :

Ès sa vré ki Bondjé lé nou itilizé èstati ouben zimaj pou adoré l’ ? Kisa Jéova ka pansé di èstati ké zimaj ?

Sèrten rélijyon ka anprann moun ki Jézi a Bondjé. Mé ès a sa menm ? Li Jean 20:17, épi kozé asou sa késyon-yan :

Ès sa vré ki Jézi sa Bondjé ? Ès Jézi ké Bondjé a menm moun-an ?
Bondjé chwazi roun pèp pou i di lavérité asou li ké so Pitit. Kisa ou ka rousanti lò ou ka anprann sa ?

6. Nou gen lanmou roun pou ròt

Labib-a ka konparé krétyen-yan ké diféran parti kò roun moun. Li 1 Corinthiens 12:25, 26, épi kozé asou sa késyon-yan :

Kisa roun vré krétyen divèt fè lò i ka wè ki ròt krétyen ka soufri ?
Dapré sa ou ja wè, kouman Témwen Jéova-ya ka montré yé gen lanmou roun pou ròt ?

Lò Témwen Jéova-ya annan roun péyi bézwen yé idé yé, Témwen Jéova-ya asou tout latè-a ka idé yé san pédi tan. Pou wè roun èkzanp di sa, gadé VIDÉYO-a. Épi kozé asou sa késyon-an.

VIDÉYO : Ouragan-an Matthew ka malmennen Ayiti (5:29)

Nou wè ki lò roun problèm ka rivé, Témwen Jéova-ya ka organizé lanmenm pou idé sa-ya ki bézwen. Kouman sa ka byen montré lanmou yé gen ?

Vré krétyen-yan ka montré yé lanmou pou sa-ya ki bézwen yé idé yé.

I GEN MOUN KA DI : « Mo pa ka konprann poukisa zòt ka aplé zòt kò Témwen Jéova. »

Dipi kitan Jéova ka aplé so sèrvitèr-ya so « Témwen » ?

SA NOU WÈ

Témwen Jéova-ya sa vré krétyen. Nou sa roun fanmi asou tout latè-a ki ka adoré Bondjé, nou krwayans ka soti di Labib-a é nou ka fè konnèt lavérité-a asou Jéova.