LÉSON 22
Kouman ou pouvé palé di bon nouvèl-a pou ròt-ya ?
Jis aprézan ou anprann bokou vérité ki annan Labib-a. Pitèt ou ka pansé : « Tout moun divèt konnèt sa ! » A vré, tout moun bézwen konnèt sa vérité-ya. Magré sa, pitèt ou pè palé pou ròt-ya di sa ou ka anprann. Annan sa léson-an, nou ké wè kisa ki pouvé idé ou si ou pè préché é kouman ou pouvé pran plézi koumansé préché bon nouvèl-a.
1. Kouman ou pouvé palé pou ròt-ya di sa ou ka anprann ?
Disip Jézi-ya di : « Nou pa pouvé arété palé di sa nou wè ké sa nou tandé » (Actes 4:20). Yé té tèlman kontan lavérité-a ki yé té lé palé di sa ké tout moun. Ès ou ka rousanti sa osi ? Si a sa, chaché tout okazyon pou palé ké rèspè ké ou fanmi é ou zanmi di sa ou ka anprann (li Colossiens 4:6).
Men déztrwa lidé pou koumansé préché
-
Pannan ou ka palé ké roun moun annan ou fanmi, pitèt ou pouvé di : « Mo anprann roun bagaj entérésan sa simenn-an. »
-
Li roun vèrsé annan Labib-a pou konsolé roun zanmi ki malad ouben ki enkyèt.
-
Si ou kolèg travay ka doumandé ou a kouman ou fika, di li kisa ou anprann annan ou étid Labib-a ouben annan roun réinyon.
-
Montré ou zanmi sit-a jw.org.
-
Envité roun moun annan ou léson biblik pou i wè kouman sa ka pasé ouben montré l’ kouman i pouvé doumandé roun léson asou jw.org.
2. Poukisa a roun bon bagaj préché ké asanblé-a ?
Disip Jézi-ya pa té ka palé di bon nouvèl-a ké moun-yan yé té konnèt rounso. Jézi « voyé yé alé dépadé annan tout vil-ya » (Luc 10:1). Lò prédikasyon-an òrganizé konsa, sa ka pèrmèt plis moun tandé bon nouvèl-a. Anplis di sa, préché roun ké ròt bay disip-ya bokou lajwa (Luc 10:17). Ès ou menm osi, ou té ké pouvé òrganizé ou kò pou préché ké asanblé-a ?
ANNOU FOUYÉ ANNAN LABIB-A
Gadé kisa ki pouvé idé ou gen kouraj pou préché é pran plézi fè konnèt bon nouvèl-a.
3. Jéova ké idé ou
I gen moun ki anvi préché, mé yé pè di sa ròt-ya ké pansé ouben kouman yé ké réyaji.
-
Ès ou pè palé ké ròt-ya di sa ou ka anprann ? Poukisa ?
Gadé VIDÉYO-a, épi kozé asou sa késyon-an :
-
Kouman sa jennjan-yan trapé kouraj pou préché ?
Li Isaïe 41:10, épi kozé asou sa késyon-an :
-
Kouman lapriyè-a ké idé ou si ou pè préché ?
Ès ou savé sa ?
Anvan yé koumansé préché bon nouvèl-a, bokou Témwen Jéova té ka pansé ki yé pa té ké janmen rivé fè sa. Gadé èkzanp roun frè yé ka aplé Sergey ki ka rété Larisi. I té ka santi so kò initil é sa té difisil pou li palé ké moun-yan, mé i koumansé étidyé Labib-a. I ka di : « Magré mo té pè, mo koumansé palé ké ròt-ya di sa mo té ka anprann annan Labib-a. Mo rété èstébékwé lò mo wè ki palé ké moun-yan di Labib-a roubay mo konfyans é sa osi fè mo lafwa divini pi fò. »
4. Palé ké rèspè
Lò ou ka palé di bon nouvèl-a, réfléchi asou sa ou ké di mé osi asou fason ou ké di l’. Li 2 Timothée 2:24 ké 1 Pierre 3:15, épi kozé asou sa késyon-yan :
-
Lò ou ka palé ké ròt-ya di Labib-a, kouman ou pouvé fè sa vèrsé-ya ka di ?
-
Pitèt moun annan ou fanmi ouben ou zanmi pa ké dakò ké ou. Kisa ou pouvé fè ? Kisa ou pa divèt fè ?
-
Kisa ki miyò, palé ké rèspè pou yé ouben blijé yé asèpté sa ou ka di ? Poukisa ou ka di sa ?
5. Préché ka bay tchò kontan
Jéova doumandé Jézi préché bon nouvèl-a. Kisa Jézi té ka pansé di sa travay-a ? Li Jean 4:34, épi kozé asou sa késyon-yan :
-
Nou bézwen manjé pou viv, mé anplis di sa, nou ka pran plézi manjé. Poukisa sa té kou roun manjé pou Jézi fè volonté so Papa, parèkzanp préché bon nouvèl-a ?
-
Poukisa préché bon nouvèl-a pouvé fè ou gen tchò kontan ?
Kèk konsèy pou pran plézi préché
-
Pannan réinyon simenn-an, ékri déztrwa lidé ki ké idé ou koumansé roun kozé asou Labib-a.
-
Enskri ou kò pou partisipé annan réinyon simenn-an. Sa partisipasyon-yan ké idé ou gen plis konfyans pou palé ké ròt-ya di sa ou ka anprann.
-
Itilizé parti-ya « I gen moun ka di » ouben « Si roun moun doumandé ou » pou antréné ou kò réponn késyon moun ka pozé ouben gadé sa ou pouvé di si roun moun pa dakò ké ou.
SI ROUN MOUN DOUMANDÉ OU : « Sa ou fè ? »
-
Kouman ou té ké pouvé itilizé sa okazyon-an pou palé di sa ou anprann annan ou léson biblik ?
SA NOU WÈ
Palé di bon nouvèl-a pou ròt-ya ka bay tchò kontan é sa pitèt pi fasil ki sa ou ka pansé.
Kisa ou anprann
-
Poukisa nou ka palé di bon nouvèl-a pou ròt-ya ?
-
Kouman ou pouvé fè sa ké rèspè ?
-
Si ou pè préché, kisa ou pouvé fè ?
SA OU POUVÉ TRAPÉ OSI
Gadé kat fason ki senp pou préché ké kart vizit jw.org.
Gadé kat bèl kalité ki pouvé idé ou palé di bon nouvèl-a.
Gadé roun èkzanp biblik ki pouvé idé nou gen kouraj pou préché, menm si nou jenn.
Anprann kouman ou pouvé palé di Labib-a ké ou fanmi ki pòkò konnèt Jéova.
« Touchons le cœur de nos parents non Témoins » (La Tour de Garde, 15 mars 2014)