LÉSON 25
Kisa Bondjé lé pou nou ?
Labib-a ka di ki nou ‘ka viv roun ti moso tan é nou néyé anba traka’ (Job 14:1). Ès a sa lavi-a Bondjé té lé pou nou ? Si a pa sa, kisa Bondjé té lé pou nou ? Ès roun jou Bondjé ké réyalizé so projè ? Annou wè sa Labib-a ka di asou sa.
1. Ki kalité lavi Bondjé lé pou nou ?
Jéova lé nou gen pi bèl lavi nou pouvé gen. Lò i kréyé latè-a, Bondjé mété prémyé imen-yan, Adan ké Èv, annan roun bèl paradi, jarden Édèn-an. Apré sa, Bondjé béni yé é i di yé : « Fè pitit é divini bokou ; plen latè-a é okipé di li » (Genèse 1:28). Bondjé té lé yé té gen pitit, fè tout latè-a divini roun paradi ké pran swen di zannimo-ya. Sa i té lé, a té ki tout moun viv ké roun bon lasanté é pou tout-tan.
Sa vré ki bagaj-ya pa fèt kou Bondjé té lé a (gadé nòt-a). Mé sa i lé pou nou pa chanjé (Isaïe 46:10, 11). Jéova lé ankò ki imen-yan ki ka obéyi gen roun bèl lavi pou tout-tan (li Révélation 21:3, 4).
2. Kouman nou pouvé viv ké tchò kontan dipi aprézan ?
Nou bézwen Jéova montré nou « chimen-an » ; a konsa i kréyé nou. A pou sa nou lé anprann konnèt li ké obéyi l’ (li Matthieu 5:3-6). I lé nou gen roun lanmityé ki fò ké li, « swiv tout so chimen-yan », kontan li ké sèrvi li ‘ké tout nou tchò’ (Deutéronome 10:12 ; Psaume 25:14). Si nou ka fè sa nou ké gen tchò kontan menm si nou anba problèm. Lò nou ka adoré Jéova nou lavi gen roun sans paské nou ka viv fason i lé nou viv.
ANNOU FOUYÉ ANNAN LABIB-A
Annou wè kouman Jéova préparé latè-a pou nou ké bokou lanmou. Annou wè osi sa Labib-a ka anprann nou asou poukisa nou asou latè-a.
3. Jéova lé imen-yan gen roun lavi ki bèl toubonnman
Gadé VIDÉYO-a, épi kozé asou sa késyon-an :
-
Poukisa Bondjé kréyé latè-a bèl konsa ?
Li Ecclésiaste 3:11, épi kozé asou sa késyon-yan :
-
Kisa Jéova mété annan nou tchò ? Kisa sa ka montré asou sa i lé pou nou ?
4. Sa Jéova lé pou nou pa chanjé
Li Psaume 37:11, 29 ké Isaïe 55:11, épi kozé asou sa késyon-an :
-
Kouman nou savé ki sa Jéova lé pou nou pa chanjé ?
5. Adoré Jéova ka bay nou lavi roun sans
Savé poukisa nou asou latè-a ka bay nou tchò kontan. Gadé VIDÉYO-a, épi kozé asou sa késyon-an :
-
Kouman lavi Terumi chanjé lò i konprann a kisa sans lavi-a ?
Li Ecclésiaste 12:13, épi kozé asou sa késyon-an :
-
Lò nou ka réfléchi asou tousa Jéova fè pou nou, kisa nou anvi fè pou li ?
SI ROUN MOUN DOUMANDÉ OU : « Poukisa nou asou latè-a ? »
-
Kisa ou té ké réponn ?
SA NOU WÈ
Jéova lé nou viv ké tchò kontan pou tout-tan. Lò nou ka adoré Jéova ké tout nou tchò, nou lavi gen roun sans dipi aprézan.
Kisa ou anprann
-
Kisa Jéova té lé pou Adan ké Èv ?
-
Kouman nou savé ki sa Bondjé lé pou nou pa chanjé ?
-
Kouman ou lavi pouvé vréman gen roun sans ?
SA OU POUVÉ TRAPÉ OSI
Ès jarden Édèn-an vréman èkzisté ?
« Le jardin d’Éden—Un mythe ? » (La Tour de Garde, 1é janvyé 2011)
Gadé poukisa nou pouvé sir ki latè-a ké la pou tout-tan.
Gadé sa Labib-a ka di asou poukisa nou asou latè-a.
Gadé istwè roun mouché ki trapé sa ki té ka manké li annan so lavi.
a Nòt-a : Annan léson-an ki ka swiv, nou ké wè poukisa nou pa gen sa kalité lavi jòdla.