LÉSON 44
Ès tout lafèt ka fè Bondjé plézi ?
Jéova lé nou profité di lavi-a é i lé nou fè lafèt. Mé ès tout lafèt ka fè li plézi ? Kouman nou pouvé montré nou kontan Jéova annan sa zafè-a ?
1. Poukisa roun patché lafèt pa ka fè Jéova plézi ?
Ou ké pitèt rété èstébékwé lò ou ké anprann ki roun patché lafèt pa ka alé ké sa Labib-a ka anprann nou ouben ki yé ka vini di fo rélijyon-an. I gen sa ki mélé ké tchenbwa ouben ki ka apiyé asou lidé ki nanm-an pa ka mouri. I gen ròt ankò ki ka apiyé asou sipèrstisyon-an ouben asou lachans (Isaïe 65:11). Donk, nou ka konprann poukisa Jéova ka bay sa-ya ki ka adoré l’ sa avèrtisman-an : « Séparé zòt kò di yé [...], é arété manyen bagaj ki pa pròp-a a » (gadé nòt-a) (2 Corinthiens 6:17).
2. Kouman Jéova ka wè lafèt yé ka fè pou poté moun anlè ?
Jéova ka di nou pa ‘fè moun kou nou menm konfyans’ pas a roun bagaj ki danjéré (li Jérémie 17:5). I gen sèrten lafèt yé envanté pou poté chèf politik ouben sòlda-ya anlè. I gen ròt lafèt osi yé ka fè pou endépandans péyi-a ouben pou bagaj ki ka réprézanté péyi-a (1 Jean 5:21). I gen ròt lafèt ankò yé ka fè pou bay roun mouvman politik ouben sosyal lònò. Kisa Jéova té ké rousanti si nou té ka poté roun moun ouben roun òrganizasyon anlè, èspésyalman si sa moun-an ouben sa òrganizasyon-an ka di bagaj ki pa ka alé ké sa i prévwè pou nou ?
3. Ki konpòrtman ka fè ki roun lafèt pa bon ?
Labib-a pa dakò ké ‘tafyatò, lafèt koté yé ka fè yenki bagaj malpròp ké zafè bwè pou sou’ (1 Pierre 4:3). Annan sèrten lafèt moun-yan pa ka tchenbé yé kò é yé ka fè bagaj sèksyèl ki malpròp. Pou nou rété zanmi ké Jéova, a pou nou rété lwen di tout sa bagaj-ya ki pa pròp.
ANNOU FOUYÉ ANNAN LABIB-A
Annou wè kouman nou pouvé fè Jéova plézi lò nou ké désidé si nou ké partisipé ouben si nou pa ké partisipé annan roun lafèt.
4. Pa bay annan lafèt ki pa ka fè Jéova plézi
Li Éphésiens 5:10, épi kozé asou sa késyon-yan :
-
Anvan nou désidé si nou ké partisipé annan roun lafèt ouben si nou pa ké partisipé annan l’, kisa nou divèt vérifyé ?
-
Ki lafèt moun-yan ka fè koté ou ka rété-a ?
-
Dapré ou, ès sa lafèt-ya ka fè Jéova plézi ?
Parèkzanp, ès ou ja doumandé ou kò kisa Bondjé ka pansé di anivèrsèr-ya ? Nou pa ka trouvé pyès koté yé ka di nou annan Labib-a ki roun moun ki té ka adoré Jéova fété so anivèrsèr. Parkont, i ka rakonté anivèrsèr dé moun ki pa té ka adoré Jéova. Li Genèse 40:20-22 ké Matthieu 14:6-10, épi kozé asou sa késyon-yan :
-
Poukisa sa dé anivèrsèr-ya ka sanblé ?
-
Dapré ou, kisa sa dé istwè-ya ka anprann nou asou fason Jéova ka wè anivèrsèr-ya ?
Mé pitèt ou ka doumandé ou kò si, pou Jéova, sa vréman grav si nou ka partisipé annan roun anivèrsèr ouben rounòt lafèt ki pa ka alé ké sa Labib-a ka di ? Li Exode 32:1-8. Apré sa, gadé VIDÉYO-a, épi kozé asou sa késyon-yan :
-
Poukisa sa enpòrtan pou nou vérifyé si roun lafèt ka fè Jéova plézi ?
-
Kouman nou pouvé fè sa ?
Kouman nou pouvé savé si roun lafèt ka fè Bondjé plézi
-
Ès sa lafèt-a ka apiyé asou lidé ki pa ka alé ké sa Labib-a ka di ? Pou nou savé sa, a pou nou chaché koté sa lafèt-a soti.
-
Ès sa lafèt-a ka bay moun, òrganizasyon ouben roun péyi lònò yé pa mérité ? A Jéova nou ka bay lònò an prémyé, é a li nou ka fè konfyans pou i réglé tout problèm annan monn-an.
-
Kouman moun-yan ka aji annan sa lafèt-a, ès yé ka fè bagaj ki pa ka alé ké sa Labib-a ka di ? Nou divèt rété pròp.
5. Idé ròt-ya rèspèkté sa ou désidé
Sa pouvé rèd pou ou di non lò ròt-ya ka mété présyon anlè ou pou ou partisipé annan roun lafèt Jéova pa kontan. Annan sa sitiasyon-an, a pou gen pasyans é a pou palé ké rèspè lò ou ka èspliké yé poukisa ou désidé pa fété sa lafèt-a. Kouman ou pouvé fè sa ? Pou wè roun èkzanp, gadé VIDÉYO-a.
Li Matthieu 7:12, épi kozé asou sa késyon-yan :
-
Dapré sa prensip-a, ès ou divèt di ou fanmi ki pa Témwen yé pa divèt fété roun lafèt ?
-
Kouman ou pouvé montré ou fanmi ki, menm si ou pa ka fété sèrten lafèt ankò ké yé, sa pa lé di ki ou pa kontan yé ?
6. Jéova lé nou gen tchò kontan
Jéova lé nou pran plézi pasé tan ké nou fanmi ké nou zanmi. Li Ecclésiaste 8:15, épi kozé asou sa késyon-an :
-
Kouman sa vèrsé-a ka montré ki Jéova lé nou gen tchò kontan ?
Jéova lé sa-ya ki ka adoré l’ anmizé é pran plézi pasé tan ansanm. Gadé VIDÉYO-a ki ka montré ki nou ka byen wè sa annan gran asanblé nou ka fè asou tout latè-a.
Li Galates 6:10, épi kozé asou sa késyon-yan :
-
Ès nou blijé partisipé annan lafèt tout moun ka fè pou nou pouvé « fè bon bagaj » pou ròt-ya ?
-
Kisa ou pi kontan : bay roun kado paské ou blijé fè l’ pas i gen roun lafèt, ouben bay roun kado paské ou anvi fè l’ ?
-
Détan roun patché Témwen ka òrganizé bagaj èspésyal pou yé timoun é yé pa ka bliyé bay yé kado. Si ou gen timoun, kouman ou pouvé fè yé plézi ?
I GEN MOUN KA DI : « Nou pa bézwen gadé koté roun lafèt soti ! Sa ki pi enpòrtan-an, a pasé roun bon ti moman ké nou fanmi ké nou zanmi. »
-
Kisa ou ké di ?
SA NOU WÈ
Jéova lé nou pran plézi pasé tan ké nou fanmi ké nou zanmi. Mé i lé osi nou pa bay annan lafèt ki pa ka fè li plézi.
Kisa ou anprann
-
Ki késyon pouvé idé nou savé si roun lafèt ka fè Jéova plézi ?
-
Kouman nou pouvé idé nou fanmi ké nou zanmi konprann poukisa nou désidé pa fété sèrten lafèt ?
-
Kouman ou savé ki Jéova lé nou tchò kontan é ki nou anmizé ?
SA OU POUVÉ TRAPÉ OSI
Gadé ki lafèt krétyen-yan pa ka fè.
« Poukisa i gen lafèt Témwen Jéova-ya pa ka fété ? » (artik jw.org)
Gadé kat rézon ki ka fè ki anivèrsèr-ya pa ka fè Bondjé plézi.
« Poukisa Témwen Jéova-ya pa ka fété anivèrsèr ? » (artik jw.org)
Gadé kouman roun timoun pouvé fè Jéova plézi lò i gen pou désidé si i ké partisipé annan roun lafèt Bondjé pa kontan.
Roun patché krétyen chwazi pa fété Nwèl. Kisa yé ka pansé di désizyon yé pran ?
a Nòt-a : Parti-a « Pou byen konprann » no 5 ka èspliké kisa nou pouvé fè annan sitiasyon koté ròt moun ka fè lafèt.
