LÉSON 50
Kouman ou fanmi pouvé gen tchò kontan ? (parti 2)
Timoun-yan sa roun kado di Jéova. Jéova ka doumandé papa ké manman-yan pran swen di sa kado-a. Jéova ka bay yé bon konsèy pou idé yé fè sa. I ka idé timoun-yan osi wè sa yé pouvé fè pou yé fanmi gen tchò kontan.
1. Ki konsèy Jéova ka bay pou papa ké manman-yan ?
Jéova lé ki papa ké manman-yan kontan yé pitit é i lé yé pasé bokou tan ké yé pitit. Jéova lé osi ki papa ké manman-yan protéjé yé pitit é i lé yé itilizé prensip Labib-a ka bay pou bay roun bon édikasyon pou yé timoun (Proverbes 1:8). Jéova ka di papa-ya : ‘Kontinyé lévé zòt timoun soulon prensip ké avèrtisman Jéova ka bay’ (li Éphésiens 6:4). Jéova kontan lò i ka wè ki papa ké manman-yan ka swiv sa konsèy-a. So tchò kontan osi lò i ka wè ki papa ké manman-yan ka pran rèsponsabilité lévé yé timoun san yé pa mété sa rèsponsabilité-a asou do pyès moun.
2. Ki konsèy Jéova ka bay timoun-yan ?
Jéova ka di timoun-yan : « Obéyi zòt papa ké zòt manman » (li Colossiens 3:20). Lò timoun-yan ka obéyi ké rèspèkté yé papa ké yé manman, yé ka fè tchò Jéova kontan é yé ka fè tchò yé papa ké yé manman kontan osi (Proverbes 23:22-25). Jézi bay roun bon èkzanp lò i té piti. Jézi té parfè. Menm si so papa ké so manman pa té parfè, Jézi obéyi yé é i rèspèkté yé kanmenm (Luc 2:51, 52).
3. Kouman tout fanmi-a pouvé fè yé lanmityé ké Bondjé vin pi fò ?
Si ou sa roun papa ouben roun manman, asiré pa pitèt ou lé ou timoun kontan Jéova kou ou menm ou kontan Jéova. Kouman ou pouvé idé yé fè sa ? Men sa Labib-a ka di : « To ké divèt répété [paròl Jéova-ya] souvan pou to timoun pou fè yé rété annan yé tchò lò to ké asiz annan to kaz é lò to ké maché anlè larout-a » (Deutéronome 6:7). Ou byen savé konmyen fwa ou divèt « répété » menm bagaj-a pou ou timoun anprann. Menm fason-an, sa vèrsé-a ka èspliké ki ou ké divèt souvan chaché pran tan palé di Jéova pou ou timoun. Pran tan chak simenn pou adoré Jéova ké ou fanmi, a roun bon bagaj. É menm si ou pa gen timoun, a roun bon bagaj pran tan étidyé Labib-a chak simenn.
ANNOU FOUYÉ ANNAN LABIB-A
Annou wè kisa chak moun annan fanmi-a pouvé fè pou gen tchò kontan é santi yé kò an sékirité.
4. Lévé ou timoun ké lanmou
Lévé roun timoun pa mòl. Kouman Labib-a pouvé idé ou ? Li Jacques 1:19, 20, épi kozé asou sa késyon-yan :
-
Kouman papa ké manman-yan pouvé montré yé lanmou lò yé ka palé pou yé timoun ?
-
Poukisa nou pa janmen divèt disipliné a nou timoun lò nou anba kòlè ? (gadé nòt-a).
5. Protéjé zòt timoun
Pou protéjé ou timoun, sa enpòrtan toubonnman ou pran tan palé ké yé asou zafè sèksyalité, menm si ou pa alèz pou palé di sa. Gadé VIDÉYO-a, épi kozé asou sa késyon-yan :
-
Poukisa sa pa fasil pou sèrten papa ké manman palé asou zafè sèksyalité ké yé timoun ?
-
Di ki fason sèrten papa ké manman-yan ka palé asou zafè sèksyalité ké yé timoun ?
Kou Labib-a ja té ka di l’, monn Satan-an ka vin plizanpli mové. Li 2 Timothée 3:1, 13, épi kozé asou sa késyon-an :
-
Vèrsé 13-a ka palé di moun ki méchan é nou savé ki i gen annan yé ki lé fè bagaj malpròp ké timoun-yan. Atò, poukisa sa enpòrtan papa ké manman-yan palé ké yé timoun asou zafè sèksyalité é anprann yé protéjé yé kò kont moun ki pouvé fè yé méchansté ?
Ès ou savé sa ?
Témwen Jéova-ya gen plizyèr piblikasyon ké vidéyo ki ka idé papa ké manman-yan palé ké yé timoun asou zafè sèksyalité é anprann yé protéjé yé kò kont moun ki pouvé fè yé méchansté. Men kèk piblikasyon ké vidéyo :
-
Protéjé zòt timoun (vidéyo)
-
« Parler de sexualité à son enfant » (Réveillez-vous ! no 5 2016)
6. Rèspèkté ou papa ké ou manman
Toupiti-ya ké jennjan-yan pouvé montré ki yé ka rèspèkté yé papa ké yé manman annan fason yé ka palé ké yé. Gadé VIDÉYO-a, épi kozé asou sa késyon-yan :
-
Ki bon bagaj roun jennjan ka jwenn lò i ka palé ké rèspè pou so papa ké so manman ?
-
Kouman roun jennjan ka montré i ka bay so papa ké so manman lònò annan fason i ka palé ké yé ?
Li Proverbes 1:8, épi kozé asou sa késyon-an :
-
Kouman roun jennjan divèt réyaji lò so papa ké so manman ka montré li sa i divèt fè ?
7. Adoré Jéova ansanm ké ou fanmi
Fanmi ki Témwen Jéova ka pran tan chak simenn pou étidyé Labib-a ansanm, a konsa yé ka adoré Jéova. Kouman sa ka pasé ? Gadé VIDÉYO-a, épi kozé asou sa késyon-yan :
-
Kouman roun fanmi pouvé gen roun program pou étidyé Labib-a ansanm ?
-
Kisa roun papa ké roun manman pouvé fè pou randé sa moman-an chwit ké itil ? (gadé zimaj-a o koumansman sa léson-an).
-
Poukisa sa pouvé difisil pou ou étidyé Labib-a ké ou fanmi ?
Annan Israyèl tan-lontan, Jéova té lé tout fanmi-ya palé souvan asou so Paròl. Li Deutéronome 6:6, 7, épi kozé asou sa késyon-an :
-
Kouman ou pouvé apliké sa prensip-a annan ou fanmi ?
Men déztrwa lidé pou étidyé Labib-a ké ou fanmi :
-
Préparé réinyon-yan.
-
Li roun istwè annan Labib-a épi kozé asou l’.
-
Si ou gen timoun ki toupiti, télécharjé ouben enprimé aktivité pou timoun-yan anlè sit jw.org.
-
Si ou gen timoun ki jennjan, kozé asou roun artik pou jennjan-yan asou jw.org.
-
Fè roun ti pyès téyat ké ou timoun asou roun istwè ki annan Labib-a.
-
Gadé roun vidéyo anlè sit jw.org épi kozé asou l’.
I GEN MOUN KA DI : « Labib-a trò difisil pou timoun-yan. »
-
Kisa ou té ké di ?
SA NOU WÈ
Jéova lé ki papa ké manman-yan kontan yé timoun, épi ansényé ké protéjé yé. I lé ki timoun-yan rèspèkté ké obéyi yé papa ké yé manman é i lé fanmi-a adoré li yé tout ansanm.
Kisa ou anprann
-
Kouman papa ké manman-yan pouvé protéjé ké ansényé yé timoun ?
-
Kouman timoun-yan pouvé montré lònò pou yé papa ké yé manman ?
-
Ki bénédiksyon ou ka jwenn lò ou ka étidyé Labib-a ansanm ké ou fanmi chak simenn ?
SA OU POUVÉ TRAPÉ OSI
Ki léson ké idé ou timoun préparé so kò pou lò i ké divini gran ?
« Six valeurs à transmettre aux enfants » (Réveillez-vous ! no 2 2019)
Gadé konsèy Labib-a ka bay pou sa-ya ki ka pran swen di yé papa ouben yé manman ki granmoun.
« Kisa Labib-a ka di asou zafè pran swen di papa ouben manman ki granmoun ? » (artik jw.org)
Gadé kouman roun mouché ki pa té savé kouman lévé timoun divini roun bon papa.
Kouman roun papa pouvé gen roun lanmityé ki fò ké so garson ?
« Comment un père peut-il rester proche de son fils ? » (La Tour de Garde, 1é novanm 2011)
a Nòt-a : Annan Labib-a, disipliné, sa lé di anprann roun moun roun bagaj, gidé l’ ouben korijé l’. Sa pa lé di malmennen roun moun ouben fè li méchansté (Proverbes 15:5).
