Dapré sa moun ka di : Témwen Jéova-ya krè ki pyès doktèr pa pouvé idé yé, é a pou sa yé pa ka swanyé yé kò.

Lavérité-a : Nou ka chaché pi bon trètman i pouvé gen pou nou menm ké nou timoun. Lò nou malad, nou ka alé wè doktèr ki byen konnèt nou problèm lasanté pou yé pouvé swanyé nou é opéré nou san yé sèrvi disan. Nou byen ka wè tout progrè yé fè pou idé nou pran swen di nou lasanté, é nou byen kontan sa progrè-ya. É si nou ka byen gadé, fason yé ka swanyé Témwen Jéova san sèrvi disan itil pou bokou moun jòdla. Annan bokou péyi aprézan, roun moun ki malad pouvé désidé pa pran pyès risk ké zafè disan-an, kou parèkzanp maladi i pouvé trapé annan disan, mannyè so kò ké réaji ké roun disan ki pa di li, ouben si yé ka tronpé yé kò épi yé ka bay li mové disan-an.

Dapré sa moun ka di : Témwen Jéova-ya krè ki a lafwa ki ka géri.

Lavérité-a : Nou pa ka fè mirak pou géri moun.

Dapré sa moun ka di : Swanyé so kò san pran disan ka kouté chè.

Lavérité-a : Roun moun ki ka swanyé so kò san pran disan ka dépansé mwens soumaké *.

Dapré sa moun ka di : Chak lannen, i gen bokou Témwen Jéova ké yé timoun ki ka mouri paské yé pa lé pran disan.

Lavérité-a : Sa pa pyès vré. Souvan, i gen doktèr ki ka fè opérasyon ki konpliké (opérasyon kardjak, opérasyon ortopédik, ouben opérasyon pou ranplasé òrgann moun-yan, ouben ròt opérasyon ankò), é yé pa ka sèrvi disan *. Ki a gran moun, ki a timoun, sa-ya ki malad é ki pa ka pran disan lò yé ka opéré, ka géri menm fason-an ki sa-ya ki pran disan. É pitèt menm ki yé ka géri pi byen *. Antouka, pèsonn pa pouvé di ki roun moun ki pa ka pran disan ké mouri, ouben ki roun moun ki ka pran disan ké viv.

A pa paské nou pa lé swanyé nou kò, mé a parapòrta nou rélijyon. Ki a Ansyen Tèstaman-an, ki a Nouvo Tèstaman-an, yé toulédé ka di nou réfizé disan-an nèt (Genèse 9:4 ; Lévitique 17:10 ; Deutéronome 12:23 ; Actes 15:28, 29). An plis di sa, pou Bondjé, disan-an ka rouprézanté lavi-a (Lévitique 17:14). Donk, paské nou ka obéyi Bondjé é ki nou ka rèspèkté l’, li menm ki ka bay lavi-a, nou pa ka pran pyès disan.

I gen roun tan, dòktèr-ya té ka pansé ki tèknik médikal pou swanyé san sèrvi disan té danjéré. É yé jis té ka pansé ki roun moun ki té ka chwézi sa tèknik-ya té lé tchwé so kò. Mé dipi déztrwa lannen, moun-yan ka chanjé lidé. Parèkzanp, an 2004, men sa nou té pouvé li annan roun journal ki ka sèrvi pou fòrmé dòktèr-ya : « Roun patché tèknik ki dòktèr-ya trouvé pou swanyé Témwen Jéova-ya ki malad ké divini tèknik nòrmal pou dimen *. » An 2010, roun artik annan journal Heart, Lung and Circulation té ka di : « “Opérasyon san bay moun disan” pa divèt pou Témwen Jéova-ya rounso. Sa kalité opérasyon-yan divèt sa roun annan fason dòktèr-ya ka opéré moun touléjou. »

Jòdla, toupatou asou latè-a, i gen dòktèr ki ka itilizé tèknik pou pa gaspiyé disan roun moun pannan roun opérasyon. A konsa yé ka rivé fè opérasyon konpliké san yé sèrvi disan. Yé jis ka itilizé sa tèknik-ya annan péyi koté moun pa gen bokou soumaké. É i gen moun malad ki pa Témwen ki ka doumandé sa tèknik-ya.