1 Rongorongo 11:1-47
11 Imwina riki ao a a bane n ikotaki tibun Iteraera iroun Tawita i Eberon+ ao a taku: “Noria! Boni ngaira riim ao irikom.*+
2 N taai aika nako, ngke e uea Tauro, ao boni ngkoe ae ko kaiririia tibun Iteraera n aia buaka.*+ Ao e taku Iehova ae Atuam nakoim: ‘Ko na kawakinia au aomata aika tibun Iteraera ngkai kaanga tiibu ngaiia, ao ko na riki bwa te tia kairiri i aoia au aomata aika tibun Iteraera.’”+
3 Mangaia are a bane n roko aia unimwaane tibun Iteraera iroun te uea i Eberon, ao e karaoa te berita Tawita ma ngaiia i Eberon i matan Iehova. Ao a kabira Tawita bwa te uea i Iteraera,+ ni kaineti ma ana taeka Iehova rinanon Tamuera.+
4 Imwina riki ao e nako Tawita ma tibun Iteraera ni kabane nako Ierutarem, ae taekan Iebuti,+ ike a maeka iai I-Iebuti.+
5 A kakanikoa Tawita kaain Iebuti ni kangai: “Ko na bon aki kona n rin ikai!”+ Ma e taua te kaawa ae nonoaki ae Tion+ Tawita, ae e a riki ngkai bwa Ana Kaawa Tawita.+
6 Mangaia are e taku Tawita: “Ane e moani buakania I-Iebuti ao e na riki bwa te mataniwi ao te toka.” Ao e moani waerake Ioaba+ are natin Teruia, ao e a riki bwa te mataniwi.
7 Ao e maeka Tawita n te kaawa ae nonoaki. Anne bukina ae a aranna bwa Ana Kaawa Tawita.
8 E a katea Tawita te kaawa ni kabutaa, man te Miro* ni karokoa taabo ake i rarikina, ao e kaoki Ioaba nikiran te kaawa.
9 Ngaia are e a ririkirake kakannaton Tawita,+ ao e memena irouna Iehova ae Atuaia taanga ni buaka.*
10 Ao aikai mataniwi i aoia ana tia buaka Tawita aika korakora, ae korakora aia boutoka nakon teuaei n te nakoa n uea are irouna, n ikotaki ma tibun Iteraera ni kabane, bwa a kaueaa ni kaineti ma ana taeka Iehova ibukia tibun Iteraera.+
11 Aikai araia ana tia buaka Tawita aika korakora aika karinanaki: Iatiobeam+ ae tibun Akemoni, ae te mataniwi irouia naake teniman.+ E katioa ana kainiwai i aoia 300 aomata ao a mate n teuana te tai.+
12 Imwin teuanne bon Ereata+ are natin Toto are tibun Aoa.+ Boni ngaia naba temanna i buakoia taani buaka aika korakora ake teniman.
13 E mena i rarikin Tawita i Batitammim+ ike a ikotaki iai I-Biritia ibukin te buaka. Ao iai te mwakoro n aba ae on n te baare, ao a a birinako aomata ibukia I-Biritia.
14 Ma e tei ngaia i nukan te tawaana ni kamanoa ao e teimatoa n oreiia I-Biritia, mangaia are e anga te tokanikai* ae korakora Iehova.+
15 A ruo rikaaki teniman mai buakoia rorobuaka ake mataniwi ake 30, nakon te bwaa nakon Tawita n te nangananga are i Aruram,+ ngke a kaembwa kaain aia taanga ni buaka I-Biritia n te Mwarua* ae Rebaim.+
16 E mena Tawita n te nono n te tai anne, ao aia taanga ni buaka I-Biritia e mena i Betereem.
17 Ao e a kaota te bwai ae bwaruia Tawita ni kangai: “Tera ngke e reke nimau te ran man te mwarua n ran are i rarikini mataroan ooni Betereem!”+
18 Ngaia are a a kakorakoraia naake teniman akekei ni karekea kawaia n rin n aia kaembwa I-Biritia, ao a itia te ran man te mwarua n ran are i rarikini mataroan ooni Betereem, ao a uotia nakon Tawita. Ma e rawa n nimma Tawita ao e kabwaroa nakon Iehova.
19 E taku: “I bon aki kona n iangoa karaoan aei i matan Atuau! E riai bwa N na nima raraaia mwaane aikai aika karuanikaia maiuia?*+ Bwa a uotia ni karuanikaia maiuia* iai.” Mangaia are e rawa n nimma. Aikai baike a karaoi ana tia buaka ake a korakora ake teniman.
20 E riki Abitiai+ are tarin Ioaba+ bwa te mataniwi i aoia naake teniman riki. E katioa ana kainiwai i aoia 300 ao a mate ao e rangi n atongaki naba n aroia naake teniman.+
21 Mai buakoia naake teniman, e kakannato riki nakoia naake uoman, ao bon aia mataniwi, ma e bon aki naba roko n aia karinan naake teniman ake mai mwaina.
22 Bon te mwaane ae ninikoria* Benaia+ are natin Ieoiata, are e karaoi mwakuri aika korakora aika bati i Kabeteera.+ E kamateia uoman natin Ariera are te I-Moaba, ao e ruo nako nanon te mwarua n ran ni bongin te tino ao e tiringa te raian.+
23 E kamatea naba te I-Aikubita ae rangi n abwabwaki ae nimaua te mwanokunibai* abwakina.+ E ngae ngke iai ana kainiwai te I-Aikubita arei i baina ae ai aron aia kai taan rarangaa te kunnikai,+ ma e kaitaraa ma te kai ao e burita te kainiwai mai bain te I-Aikubita arei ao e tiringnga n oin ana kainiwai.+
24 Aikai baika e karaoi Benaia are natin Ieoiata. Ao e rangi n atongaki naba n aroia taani buaka ake a korakora ake teniman.
25 Ma e ngae ngke e kakannato riki nakoia naake teningaun, ma e aki roko n aia karinan naake teniman.+ Ma e mwiokoia Tawita i aoia taani kawakinna.
26 Taani buaka aika korakora n te taanga ni buaka bon Ataera+ are tarin Ioaba, Ereanan are natin Toto are te I-Betereem,+
27 Tiammota are te I-Arorite, Ereti are te Beronaite,
28 Ira+ are natin Iketi are te I-Tekoa, Abietera+ are te I-Anatota,
29 Tibekai+ are tibun Utiaa, Irai are tibun Aoa,
30 Maarai+ are te I-Netoba, Erete+ are natini Banaa are te I-Netoba,
31 Itiaai are natin Ribai mai Kibea are aia kaawa tibuni Beniamin,+ Benaia are te I-Biraton,
32 Urai man te mwarua ae Kaati,+ Abiera are te I-Arabaite,
33 Atimaweta are te I-Baurim, Eriaaba are te I-Tiaarebon,
34 natin nako Atem are te Kitione, Ionatan are natin Tiake are te I-Ara,
35 Aiam are natin Taka are te I-Ara, Eribara are natin Ura,
36 Ebee are te I-Mekera, Aiia are te Beronaite,
37 Etiro are te I-Karemera, Nairai are natin Etibai,
38 Ioera are tarin Natan, Mibea are natin Akeri,
39 Tereka are tibun Ammon, Naarai are te I-Beerota, are te tia uouotii ana bwai ni buaka Ioaba are natin Teruia,
40 Ira are te Ietera, Kaareba are te Ietera,
41 Uria+ are tibun Eta, Tabata are natin Arai,
42 Arina are natin Tita are tibun Reuben, ae te mataniwi temanna irouia tibun Reuben, ao raon teuaei aika 30,
43 Aanan are natini Maaka, Iotiabata are te Mitenaite,
44 Utitia are te I-Atitarota, Tiama ao Ieeiera, ake natin Ootam are te I-Aroera,
45 Ieriaera are natin Timiri, ao Ioaa are tarina are te I-Titiaite,
46 Eriera are te Maawaite, Ieribai ma Iotiawia ake natin Erenaam, ao Itema are te I-Moaba,
47 Eriera, Obeta, ao Iaatiera are te I-Metobaite.
Taiani Kabwarabwara Mai Nano
^ Ke, “am koraki aika bon raraam.”
^ Ebera, “teuare kaiririia tibun Iteraera n otiotinako ao n riirin.”
^ Te taeka n Ebera ae nanona “kanoaaki.” Nora Nanon Taeka.
^ Ke, “Tabaota.” Nora Nanon Taeka.
^ Ke, “kakamaiu.”
^ Ke, “te Tabo ae Aoraoi ae Mena n te Mwarua.”
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ebera, “natin te mwaane ae rangi n ninikoria.”
