1 Rongorongo 13:1-14
13 Ao e maroro Tawita ma mataniwi i aoia kaka teuana tenga ao i aoia kaka tebubua ao taani kairiri nako.+
2 E taku ngkanne Tawita nakon te botaki n aomata aika tibun Iteraera: “Ngkana kam taku bwa e raoiroi iroumi ao e kariaiakaki iroun Iehova ae Atuara, ao ti na kanakotaeka nakoia nikiraia tarira n aonon Iteraera ni kabane, ao nakoia naba ibonga* ma tibun Rewi n aia kaawa nako+ ma tawaana, bwa a na roko n raonira.
3 Ao ti na uota rikaaki ana Ati+ Atuara.” Bwa a aki tabeakinna n ana bong Tauro.+
4 E bane te botaki n aomata ni kariaia karaoan anne, bwa e taraa n raoiroi irouia aomata ni kabane.
5 Ngaia are e a ikotiia tibun Iteraera ni kabane Tawita mani karaangan* Aikubita ni karokoa Reboamata,*+ bwa a na uota ana Ati te Atua ae koaua mai Kiriataearim.+
6 A waerake Tawita ma tibun Iteraera ni kabane nako Bwaara,+ nako Kiriataearim, are i Iuta, bwa a na uota mai ikekei ana Ati te Atua ae koaua, are e tekateka n te kaintokanuea i etaia* kerubim,*+ are te Ati are a tataboa i matana aomata aran Iehova.
7 Ao a kaaki ana Ati te Atua ae koaua i aon te kaa ae boou+ ao a uotia man ana auti Abinataba, ao Uta ao Aiio ake a kaira te kaa.+
8 Ao a bukamaru Tawita ma tibun Iteraera ni kabane i matan te Atua ae koaua ma korakoraia ni kabane, ma taian anene, taian abi, ao bwaai ni katangitang riki ake tabeua aika iai karaiia, tamboriin,*+ timbara,*+ ao taiani buu.+
9 Ma ngke a roko n ana tabo ni kaaki kun ni uita Kiton, ao e a kaenakoa naba baina Uta ao n taua te Ati, bwa a kuri ni karangaa te kaa taiani kao.
10 Ngaia are e a urarake unin Iehova n ekaanako Uta, ao E kamatea teuaei ibukina bwa e kaenakoa baina nakon te Ati,+ ao e mate ikekei i matan te Atua.+
11 Ma e un* Tawita ibukina bwa e roko unin Iehova n ekaanako Uta, ao e aranaki te tabo arei bwa Beretiuta* ni karokoa te bong aei.
12 Mangaia are e a maaka te Atua ae koaua n te bong anne Tawita, ao e taku: “N na kangaa ni karokoa irou ana Ati te Atua ae koaua?”+
13 Ao Tawita e aki uota te Ati nakon ana tabo ni maeka n Ana Kaawa Tawita, ma e tua bwa e na uotaki nakon ana auti Obetaetom are te I-Kate.
14 Ao e mena ana Ati te Atua ae koaua i rarikia kaaini batan Obetaetom, ao e tiku n ana auti i nanon tenua namwakaina, ao e teimatoa Iehova ni kakabwaiaia kaaini batan Obetaetom ma ana bwai teuaei ni kabane.+
Taiani Kabwarabwara Mai Nano
^ Nora Nanon Taeka.
^ Ke, “mai Tioa.”
^ Ke, “te kawai n rin i Amata.”
^ Nora Nanon Taeka.
^ Ke tao, “i marenaia.”
^ Nora Nanon Taeka.
^ Te taetae n Ebera aei e kaineti nakon te bwai ni katangitang ae te biti, ae mronron ao a rebwetata ngkana a kaai n oreaki timbara aika uoua aikai.
^ Ke, “maraki nanon.”
^ Ae nanona, “Urubwai n Ekaanako Uta.”
