1 Rongorongo 27:1-34
-
Mataniwi aika beku iroun te uea (1-34)
27 Mwaitiia tibun Iteraera aika mataniwi nako i aoia aia koraki mairoun tamaia, mataniwi i aoia kaka teuana tenga ao i aoia kaka tebubua,+ ao aia mataniwi ake a beku iroun te uea+ ni baike a tararuaaki irouia kaain te taanga ni buaka akanne, ake a riirin ao n otiotinako n te namwakaina teuana ma teuana, ibukin namwakaina ni kabane n teuana te ririki, boni kaka 24,000 n teuana te taanga ni buaka.
2 Te mataniwi n te moan taanga ni buaka n te moan namwakaina bon Iatiobeam+ are natin Taberiera, ao 24,000 kaain ana taanga ni buaka.
3 Tabeman natini Bereti+ boni mataniwi i aoia mataniwi n te taanga ni buaka. Ao a beku naba n te moan namwakaina.
4 Te mataniwi n te taanga ni buaka n te kauoua n namwakaina bon Totai+ are tibun Aoa+ ma ana taanga ni buaka, ao Mikerota te tia kairiri, ao 24,000 kaain ana taanga ni buaka.
5 Te mataniwi i aoia te katenikoraki ake a mwiokoaki bwa a na beku n te katenua n namwakaina boni Benaia+ are natin Ieoiata+ are te mataniwi n ibonga,* ao 24,000 kaain ana taanga ni buaka.
6 Aei Benaia are te tia buaka ae korakora i buakoia naake teningaun, ao e mataniwi i aoia naake teningaun. Ao te mataniwi i aoia ana taanga ni buaka bon natina are Ammitabata.
7 Te kaaman ni mataniwi n te kaaua n namwakaina bon Ataera+ are tarin Ioaba,+ ao e mena i aana natina are Tebaria, ao 24,000 kaain ana taanga ni buaka.
8 Te kaniman ni mataniwi n te kanimaua n namwakaina bon Tiamuta are te Itiraite, ao 24,000 kaain ana taanga ni buaka.
9 Te kaonoman ni mataniwi n te kaonoua n namwakaina bon Ira+ are natin Iketi are te I-Tekoa,+ ao 24,000 kaain ana taanga ni buaka.
10 Te kaitiman ni mataniwi n te kaitiua n namwakaina bon Ereti+ are te Beronaite are tibun Eberaim, ao 24,000 kaain ana taanga ni buaka.
11 Te kawaniman ni mataniwi n te kawanua n namwakaina bon Tibekai+ are tibun Utiaa are tibun Teera,+ ao 24,000 kaain ana taanga ni buaka.
12 Te karuaman ni mataniwi n te karuaiwa n namwakaina bon Abietera+ are te I-Anatota+ are tibuni Beniamin, ao 24,000 kaain ana taanga ni buaka.
13 Te katengaun ni mataniwi n te katebwina n namwakaina boni Maarai+ are te I-Netoba are tibun Teera,+ ao 24,000 kaain ana taanga ni buaka.
14 Te ka-11 ni mataniwi n te ka-11 n namwakaina boni Benaia+ are te I-Biraton are mai buakoia tibun Eberaim, ao 24,000 kaain ana taanga ni buaka.
15 Te ka-12 ni mataniwi n te ka-12 n namwakaina bon Eretai are te I-Netoba are tibun Oteniera, ao 24,000 kaain ana taanga ni buaka.
16 Aikai taani kairiri n aia baronga nako tibun Iteraera: Mai buakoia tibun Reuben bon Erietera are natin Tikeri ae kairiri, mai buakoia tibun Timeon bon Tebatia are natini Maaka,
17 mai buakoia tibun Rewi bon Atiabaia are natini Kemuera, mai buakoia tibun Aaron bon Tatoka,
18 mai buakoia tibun Iuta bon Eriu,+ are temanna mai buakoia tarin Tawita, mai buakoia tibun Itakara bon Omri are natini Mikaere,
19 mai buakoia tibun Teburun bon Itimaia are natin Obaria, mai buakoia tibun Nabetari bon Ierimota are natin Aatiriera,
20 mai buakoia tibun Eberaim bon Ootea are natin Atatia, man te itera ni baronga are Manate bon Ioera are natini Betaia,
21 man te itera ni baronga are Manate ake i Kireata bon Ito are natin Tekaria, mai buakoia tibuni Beniamin bon Iaatiera are natin Abenera,+
22 ao mai buakoia tibun Tan bon Atareru are natin Ieroam. Akanne bon tooka man aia baronga nako tibun Iteraera.
23 E aki warekiia Tawita naake 20 aia ririki rikaaki, ibukina bwa e a tia ni berita Iehova bwa e na kabatiaia tibun Iteraera n ai aron itoini karawa.+
24 E moana te wareaomata Ioaba are natin Teruia, ma e aki kabanea. Ao e roko unin te Atua n ekiianako tibun Iteraera* ibukin te baei,+ ao e aki karinaki te mwaiti anne n rongorongon ana tai te Uea are Tawita.
25 Ao Atimaweta are natin Arieru e tararuai nnen ana bwai aika kakawaki te uea.+ E tararuai auti ni kaikobwai* Ionatan are natin Utia ake n te tawaana, ake ni kaawa aika bubura, ake ni kaawa aika uarereke, ao ake n taian taua.
26 E tararuaiia taani mwakuria te tawaana ake a ribanaa te tano Etiri are natini Keruba.
27 E tararuai taiani nne ni kureebe Timei are te I-Rama, ao Taberi are te I-Tiebam* e tararuaa te tabo are e kawakinaki iai te wain.
28 E tararuai taiani nne n oriwa ma aroka aika tukomorea+ ake n te Tiebira,*+ Baaraanan are te I-Ketere, ao Ioaati e tararuaa te tabo are kawakinaki iai te oera.
29 E tararuai kaao ake a amwamwarake i Tiaron, Titerai are te I-Tiaron,+ ao Tiabata are natin Aterai e tararuai kaao ake n taabo aika aoraoi.*
30 E tararuai kamero Obiri are tibun Itimaera, ao Ieteia are te I-Meronota e tararuai taian taongki.*
31 E tararuai tiibu Iatiti are te Akeraite. Akanne ni kabane mataniwi i aon ana bwai te Uea are Tawita.
32 Ao Ionatan+ are ai natin Tawita bon te tia anga te taeka n reirei, ae te mwaane ae ataibwai, ao te tia koroboki. Ao Ieiera are natin Akemoni e tararuaiia natin te uea mwaane.+
33 Aitobera+ bon te tia anga te taeka n reirei nakon te uea, ao Utiai+ are te Arekaite bon raoraon* te uea.
34 E mena Ieoiata are natini Benaia+ ma Abiata+ i aan Aitobera, ao Ioaba+ bon te mataniwi n ana taanga ni buaka te uea.
Taiani Kabwarabwara Mai Nano
^ Nora Nanon Taeka, “Mataniwi n ibonga.”
^ Ebera, “Ao te un e mena i aoia tibun Iteraera.”
^ Ke, “nneni baika kakawaki.”
^ Ke tao, “mai Tibemota.”
^ Ke, “te aba ae rinano.”
^ Ke, “taabo aika aoraoi aika mena n te mwarua.”
^ Ebera, “taongki aika aine.”
^ Ke, “raoraona ni kaan.”
