1 Rongorongo 28:1-21
28 Ao Tawita e a ikotiia ni kabane aia toka tibun Iteraera nako Ierutarem: tooka man taiani baronga, mataniwi i aoia te koraki+ ake a beku iroun te uea, mataniwi i aoia kaka teuana tenga ma mataniwi i aoia kaka tebubua,+ mataniwi i aon ana bwai nako ma ana nanai ni man te uea+ ma natina mwaane,+ n ikotaki naba ma mataniwi n ana auti te uea ao mwaane ni kabane aika korakora ma ni konabwai.+
2 Ao e teirake te Uea ae Tawita i aoni waena ao e taku:
“Ongora irou ngkami aika tariu ao au aomata. Bon iai nanou ni kani katea te auti bwa nnen ana ati ni berita Iehova ao nneni katokaani waen Atuara,+ ao I katauraoi ibukini kateana.+
3 Ma e tuangai te Atua ae koaua ni kangai, ‘Ko na aki katea te auti ibukin arau,+ bwa bon te mwaane ae te tia buaka ngkoe, ao ko katuturaraa.’+
4 Ma e rineai Iehova ae Atuan Iteraera mai buakoia kaaini batan tamau ni kabane bwa N na riki bwa uean Iteraera n aki toki.+ Bwa e rinea Iuta bwa te tia kairiri,+ ao e rinea batan tamau+ mai buakoia kaaini batan Iuta, ao boni ngai mai buakoia natin tamau aika mwaane, ae e anganai te kariaia bwa N na riki bwa uean Iteraera ni kabutaa.+
5 Ao mai buakoia natiu mwaane ni kabane, bwa e a tia Iehova n anganai natiu mwaane aika bati,+ ao e rinea natiu ae Toromon+ bwa e na tekateka i aoni kaintokanuean ana tautaeka Iehova i Iteraera.+
6 “E taku riki nakoiu, ‘Natim ae Toromon boni ngaia ae e na katea au auti ao au katawanang nako, bwa I a tia n rineia bwa natiu, ao N na riki bwa tamana.+
7 N na kateimatoa te nakoa n uea are irouna n aki toki+ ngkana e motikia bwa e na kakairi n au tua ma au moti,+ n aron ae e karaoia ngkai.’
8 Mangaia are I kangai i mataia tibun Iteraera ni kabane, ae ana botaki n aomata Iehova ao i matan Atuara: Kakairi raoi ao ukeri ana tua ni kabane Iehova ae Atuami, bwa kam aonga n abana te aba ae raoiroi+ ao ni manga angania natimi ake imwimi bwa te tibwanga ae teimatoa.
9 “Ao ngkoe Toromon ae natiu, ko na ataa Atuan tamam ao tooro irouna ma te nano ae tabwanin raoi*+ ao te nano ae kimwareirei,* bwa e tirotiroi naano ni kabane Iehova,+ ao e atai bwaai ni kabane aika n te iango.+ Ngkana ko ukoukoria, ao ane e na kariaia bwa ko na kunea,+ ma ngkana ko kitanna ao e na rawa nakoim n aki toki.+
10 Iangoia raoi, bwa e a tia Iehova n rineiko bwa ko na katea te auti bwa te tabo ae tabu. Ko na ninikoria ao waakina te mwakuri.”
11 Ao Tawita e a angan natina are Toromon taamnein+ aroni katean te kaman*+ ao autina nako, ruuna ni kaikobwai, ruuna ake i aon te taubuki, ruuna ake mai nanona, ao te tabo* ibukini karekeani kabwaraani buure.+
12 E anganna taamnein aroni kateani bwaai ni kabane ake a a tia ni kaotaki nakoina rinanon taamnein te Atua, ibukini katawanangin+ nako ana auti Iehova, ibukin taabo n amwarake ni kabane ake a otabwaninia, ibukini nneni baika kakawaki ake n ana auti te Atua ae koaua, ao ibukini nneni baika kakawaki ake a katabuaki.+
13 E anganna naba kaetieti ibukia te koraki n ibonga*+ ma tibun Rewi, ibukin taiani mwakuri ni kabane ibukin te beku n ana auti Iehova, ao ibukini bwaai ni mwakuri ni kabane ibukin te beku n ana auti Iehova.
14 E bairea naba rawawatan te koora, te koora ibukini bwaai ni mwakuri ni kabane aika kabonganaaki ni mwakuri aika kakaokoro, rawawatani bwaai ni mwakuri ni kabane aika karaoaki man te tirewa, ao bwaai ni mwakuri ni kabane aika kabonganaaki ibukini mwakuri aika kakaokoro.
15 Ao e bairei naba rawawatani kaintaura+ ake koora ma tauraia ake koora, rawawatani kaintaura aika kakaokoro nako ma tauraia, ao rawawatani kaintaura aika tirewa, ibukin te kaintaura teuana ma teuana ao tauraia nako, ni kaineti ma kabonganaaia,
16 ao rawawatan naba te koora ibukin taiboran te bwerena ae kauaataoaki,*+ ibukin te taibora teuana ma teuana, n ikotaki naba ma te tirewa ibukin taibora ake tirewa,
17 ao ibukin naba taiani kainiwaiteke, taiani boora, ao tiaeki aika koora ni koaua, ao rawawatan naba boora aika uarereke aika koora, ibukin te boora ae uarereke+ teuana ma teuana, ao rawawatan naba boora aika uarereke aika tirewa, ibukin te boora ae uarereke teuana ma teuana.
18 E anga naba rawawatan te koora ae kaitiakaki are ibukini baonikareani baika boiarara,+ ao ibukini bannan te kaa ni buaka,+ ae taekan taiani kerubim*+ aika koora ake a taakini baia ni kiba n rabuna aon ana ati ni berita Iehova.
19 E taku Tawita: “E mena bain Iehova i aou, ao e anganai te wanawana bwa N na korei raoi+ ni kababanei taamnein aron te kateitei.”+
20 Ao e taku Tawita nakon natina are Toromon: “Ko na ninikoria ao kakorakorako ao waakina te mwakuri. Tai maaku ke ni maakunrang, bwa e memena iroum Iehova ae te Atua ae Atuau.+ Ane e na aki kaaki taekam ke ni kitaniko,+ ma e na memena iroum ni karokoa tian te mwakuri ni kabane ibukin te beku n ana auti Iehova.
21 Ao aikai koraki n ibonga+ ma tibun Rewi+ ibukini beeku ni kabane n ana auti te Atua ae koaua. A mena iroum taani karaobwai ni kabane aika kukurei ni buokiko ni mwakuri ni kabane aika irekereke ma te beku,+ n ikotaki naba ma tooka+ ao aomata ni kabane aika a na kakororaoi am kaetieti ni kabane.”
Taiani Kabwarabwara Mai Nano
^ Ke, “tabwanin raoi tangirana.”
^ Ke, “kani karaoia.”
^ Ae taekan te tabo n rin ae mena i moan te tembora.
^ Ke, “te tabo ibukin te rabuna” ae taekan rabunan te ati. Nora Nanon Taeka, “Rabunan te ati ni berita.”
^ Nora Nanon Taeka.
^ Ae taekan te bwerena ae kaotiotaki.
^ Nora Nanon Taeka.
