1 Rongorongo 29:1-30
29 E a taku ngkai te Uea are Tawita nakon te botaki n aomata: “E uarereke ao e ronnano*+ natiu ae Toromon are e rineia te Atua,+ ao e rangi n abwabwaki te mwakuri, bwa bon tiaki te tembora ibukin te aomata, ma bon ibukin Iehova ae te Atua.+
2 Ao I a tia ni katauraoi ni korakorau ni kabane ibukin ana auti Atuau, ni katauraoa te koora ibukin te mwakuri n te koora, te tirewa ibukin te mwakuri n te tirewa, te buraati ibukin te mwakuri n te buraati, te biti ibukin te mwakuri n te biti,+ kaai+ ibukin te mwakuri n te kai, atibu aika oniki,* ao atibu ni katamaroa aika a na kanimwaki n te timanti, atibu ni katamaroa aika bati karaia, ao ai aeka n atibu nako aika rangi ni kakawaki, ao atibu aika taian arabwata n te mwaiti ae mwaitikurikuri.
3 Ao ibukina bwa I kimwareirei n ana auti Atuau,+ ao iai naba oin au bwai aika kakawaki+ aika koora ma tirewa aika I anga nakon ana auti Atuau, bwa raoni bwaai ni kabane ake I a tia ni katauraoi ibukin te auti ae tabu,
4 aika 3,000 te tarena* ni koora mai Obira+ ao 7,000 te tarena n tirewa ae kaitiakaki, ibukin rabunan nako oon taian auti,
5 te koora ibukin te mwakuri n te koora, ao te tirewa ibukin te mwakuri n te tirewa, ao ibukin te mwakuri ni kabane ae e na karaoaki irouia taani karaobwai aika mwaatai. Antai ngkanne ae e anga nanona bwa e na keerake n te bong aei ma te bwaintangira i nanoni baina ibukin Iehova?”+
6 Mangaia are a anga nanoia tooka ake mai buakoia aia koraki mairoun tamaia, tooka ake man aia baronga nako tibun Iteraera, mataniwi i aoia kaka teuana tenga ao kaka tebubua,+ ao mataniwi i aon ana mwakuri te uea.+
7 Ao a anga baikai nakon te beku ibukin ana auti te Atua ae koaua: 5,000 te tarena ni koora, 10,000 te tariki,* 10,000 te tarena n tirewa, 18,000 te tarena ni buraati, ao 100,000 te tarena ni biti.
8 Ane iai irouna atibu aika rangi ni kakawaki ao e anga nakoni nneni baika kakawaki are n ana auti Iehova, i aan ana tararua Ieiera+ are tibuni Kerition.+
9 A kimwareirei aomata n anga taiani karea ni kan anga aikai, bwa a anga taiani karea ni kan anga nakon Iehova ma te nano ae tabwanin raoi,+ ao e rangi ni kimwareirei naba Tawita are te uea.
10 Ao Tawita e karaoiroa Iehova i matan te botaki n aomata. E taku Tawita: “Ko bia karaoiroaki ngkoe ae Iehova ae Atuan Iteraera are tamara, n aki totoki.*
11 Am bwai ngkoe ae Iehova te kakannato,+ te korakora,+ te tamaroa, te mimitong, ao te karineaki,+ bwa bon am bwai bwaai nako ake i karawa ao i aon te aonnaba.+ Bon am bwai te tautaeka n uea ngkoe ae Iehova.+ Boni ngkoe Teuare ko karietatako i bon iroum bwa te mataniwi i aoia aomata ni kabane.
12 Boni mairoum te kaubwai ao te karineaki,+ ao ko tautaeka i aoni bwaai nako.+ A mena i nanoni baim te mwaaka+ ao te korakora,+ ao e kona baim ni kakannatoia aomata ni kabane+ ao n angania te korakora.+
13 Ao ngkai Atuara, ti katituaraoiko ao ti karaoiroa aram ae tamaroa.
14 “Bwa kaanga antai ngai ao antai au aomata aikai, ngkai ti na anga taiani karea ni kan anga n aron aei? Bwa boni mairoum bwaai nako, ao ti anganiko bwaai ake a bon reke mai baim.
15 Bwa bon taani maeka n iruwa ngaira i matam ao ianena, n aroia ara bakatibu ni kabane.+ Bwa ara bong i aon te aba kaanga ai aron te nuu,+ ae akea te kantaninga iai.
16 Iehova ae Atuara, boni mai baim te kaubwai ni kabane ae ti a tia ni katauraoia ibukini katean te auti ibukim, ibukin aram ae tabu, ao bon am bwai ni kabane.
17 I ataia raoi Atuau bwa ko nenera te nano,+ ao ko kukurei n te aroaro ae eti.*+ I anganano ni kareani bwaai ni kabane aikai n raoiroin nanou,* ao I rangi ni kimwareirei n noriia am aomata aika mena ikai aika a anga taiani karea ni kan anga nakoim.
18 Iehova ae Atuan Aberaam, Itaaka, ao Iteraera, ake ara bakatibu, kateimatoai naano ma iango aika i nanoia am aomata aikai n aki toki, ao kairi nanoia nakoim.+
19 Ao angan natiu ae Toromon te nano ae tabwanin raoi,*+ bwa e aonga ni kakairi n am tua,+ am kauring, ao am kaetieti, ao ni karaoi baikai ni kabane, ao ni katea am tembora are I a tia ni karaoa te katauraoi ibukina.”+
20 Ao e taku Tawita nakon te botaki n aomata: “Karaoiroa ngkai Iehova ae Atuami.” Ao te botaki n aomata e karaoiroa Iehova ae Atuaia aia bakatibu, ao a katorobubua ni bobaraaki i aontano nakon Iehova ao nakon te uea.
21 Ao a teimatoa n anga taiani karea nakon Iehova ao a anga taiani karea ni kabuekaki+ nakon Iehova n te bong naba are imwina, aika 1,000 kaao mwaane aika ataei, 1,000 tiibu mwaane, 1,000 te tiibutetei aika mwaane, ao aia karea naba ae te moi.+ A anga taiani karea aika rangi ni bati ibukia tibun Iteraera ni kabane.+
22 A teimatoa n amwarake ao ni moi i matan Iehova n te bong anne ma te kimwareirei ae bati.+ Ao a a manga kaueaa Toromon are natin Tawita n te kauatai, ao a kabiria i matan Iehova bwa te tia kairiri,+ ao Tatoka naba bwa te ibonga.*+
23 Ao e a tekateka Toromon i aon ana kaintokanuea Iehova+ bwa te uea n onea mwin Tawita are tamana, ao e nakoraoi ana waaki, ao a bane tibun Iteraera n ongeaba irouna.
24 Ao tooka ni kabane,+ taani buaka aika korakora,+ ao natin naba te Uea are Tawita ni kabane ake mwaane,+ a aantaeka nakon Toromon are te uea.
25 Ao Iehova e kakannatoa Toromon n te aro ae rianako i mataia tibun Iteraera ni kabane, ao e anganna te karineaki n uea ae tuai man rereke irouia uean Iteraera mai mwaina.+
26 Mangaia are e tautaeka Tawita are natin Iete i aoia tibun Iteraera ni kabane,
27 ao abwakin ana tai* n tautaeka i aon Iteraera bon 40 te ririki. E tautaeka i Eberon i nanon 7 te ririki,+ ao e tautaeka i Ierutarem i nanon 33 te ririki.+
28 Ao e mate imwini maiuna ae abwabwaki,+ ao e rauaki ni maiuna ae abwabwaki,* kaubwaina, ao karineana. Ao e riki natina are Toromon bwa te uea n onea mwina.+
29 Ni kaineti ngkanne ma rongorongon te Uea are Tawita mai moana ni karokoa tokina, e koreaki i buakon ana taeka Tamuera are te tia matairiki, Natan+ are te burabeti, ao Kata+ are te tia nori miitara,
30 n ikotaki ma nakoana n uea ni kabane, ana mwakuri aika korakora, ao bwaai aika riki n ana tai, ao nakoia tibun Iteraera, ao nakon taian tautaeka n uea ni kabane ake i rarikina.
Taiani Kabwarabwara Mai Nano
^ Ke, “tuai n tauraoi.”
^ Nora Nanon Taeka, “Atibu aika rangi ni kakawaki.”
^ Ke, “mangkoangkoa ni karokoa n aki totoki.”
^ Ke, “raoiroi.”
^ Ke, “nanou ni koaua.”
^ Ke, “tabwanin raoi ana tangira.”
^ Nora Nanon Taeka.
^ Ebera, “ao ana bong.”
^ Ebera, “ni boong.”
