1 Rongorongo 4:1-43
4 Natin Iuta boni Bereti,+ Etiron,+ Karemi, Uura,+ ao Tiobara.+
2 Ao e bungiaki Iaata are natin Reiaia are natin Tiobara, ao a bungiaki natin Iaata aika Aumai ao Rataa. Akanne utuia nako taian Torataite.+
3 Aikai ngkanne natin teuare taman* Etaam:+ Ietireera, Itima, ao Itebati, (ao arani mwaaneia bon Nei Aterereboni),
4 ao Benuera bon tamani Ketora ao Etia bon taman Utiaa. Ao aikai natin Uura,+ te karimoa bon Eberata are tamani Betereem.+
5 Iai uoman buun Atura+ are taman Tekoa+ bwa Eira ao Naara.
6 Ao Naara e bungia natin teuaei aika Autam, Ebee, Temeni, ao Aatitiari. Akanne bon natin Naara aika mwaane.
7 Ao natin Eira bon Tiere, Itia, ao Etan.
8 A bungiaki natini Kotu aika Anuba, Tobeba, ao utun nako Aarera are natin Arum.
9 E karineaki riki Iaabeti nakoia tarina, ao e aranna tinana bwa Iaabeti,* bwa e kangai: “I bungia i nanon te maraki.”
10 Ao Iaabeti e wetea Atuan Iteraera ni kangai: “Tera ngke ko kakabwaiaai ao ni kabuburaa au aono ao ni kariaia bwa e na memena baim irou ao ni kamanoai man te kabuanibwai, n te aro ae e na akea te rawawata nakoiu!” Mangaia are e karekea te Atua te bwai are e bubutii teuaei.
11 Ao Keruba are tarin Tuaa, e bungiaki natina ae Meira are taman Etiton.
12 Etiton bon tamaia Betaraba, Betea, ao Teinna are taman Iranaati. Naakai bon rorobuakan Riika.
13 Ao natini Kenati bon Oteniera+ ao Teraia, ao natin* Oteniera bon Aitata.
14 Ao Meonotai bon taman Obera. Ao Teraia bon taman Ioaba are tamani Kearatim,* e aranaki iai ibukina bwa bon taani karaobwai aika mwaatai.
15 Natini Kareba+ are natin Iebunne bon Iru, Eera, ao Naam. Ao natin* Eera boni Kenati.
16 Natin Iearerera bon Tibi, Tibwa, Tiria, ao Atarera.
17 Natin Etiira bon Ietere, Mereta, Ebe, ao Iaron. Ao e bikoukou buuna* ao e bungia Miriam, Tiammai, ao Itiba are taman Etitemoa.
18 (Ao buuna ae te I-Iutaia e bungia Iereta ae tamani Ketora, Eebere ae taman Toko, ao Iekutiera ae taman Tanoa.) Akanne bon natin Nei Bitia are natini Barao are e mare ma Mereta.
19 Natini buun Oria are mwaanen Naiam, boni ngaiia tamaia Keira are te I-Karem ao Etitemoa are te I-Maakata.
20 Ao natin Timone bon Amnon, Rinna, Benanan, ao Tiron. Ao natin Iti bon Toeta ao Bentoeta.
21 Natin Tiera+ are natin Iuta bon Era are taman Reka, ao Raata are tamani Maretiaa, ao aia utu nako naake a mwamwakuri ma kunnikai aika raraoi ake man ana utu Atibea.
22 Ao Iokim, ma rorobuakani Kotieba, Ioaati, ao Taraba, ake a a riki bwa buuia aineni Moaba, ao Iatubireem. Boni mangkoa* rongorongo aikai.
23 Bon taani karaomwangko ngaiia aika maeka i Netaim ao i Keteraa. A maeka ikekei ao a mwakuri ibukin te uea.
24 Natin Timeon+ bon Nemuera, Iamin, Iariba, Teera, ao Tiaura.+
25 Ao natin teuaei bon Tiarum, ao natin teuaei boni Mibetam, ao natin teuaei boni Mitima.
26 Ao natini Mitima bon Ammuera, ao natin teuaei bon Takura, ao natin teuaei bon Timei.
27 Ao iai natin Timei aika mwaane aika 16 ao natina aika aine aika 6, ma tii tabeman natiia tarina aika mwaane, ao akea i buakoia aia utu ae bati natina n aroni mwaitiia mwaane aika tibun Iuta.+
28 A maeka i Beerateba,+ i Morata,+ i Atatuara,+
29 i Birea, i Etem,+ i Tokata,
30 i Betuera,+ i Orema,+ i Tikeraka,+
31 i Betamarekabota, i Ataratutim,+ i Betabiri, ao i Tiaaraim. Akanne bon aia kaawa ni karokoa ana tai n tautaeka Tawita.
32 Aia tabo nako ni maeka bon Etaam, Ain, Rimmon, Token, ao Atian,+ aika kaawa aika nimaua,
33 n ikotaki ma aia tabo ni maeka ake a katobibi taiani kaawa aikai ni karokoa Baara. Aikai taabo ake a maeka iai ao a koreaki araia iai n te kateiriki.
34 Aikai araia mataniwi n taian utu: Metiobaba, Iamreka, Iotaa ae natin Amatia,
35 Ioera, Ieu ae natin Iotibia ae natin Teraia ae natin Atiera,
36 ao Erioenai, Iaakoba, Ietioaia, Ataaia, Arieru, Ietimiera, Benaia,
37 ao Titia are natin Tiibi, are natin Aron, are natin Ietaia, are natin Timiri, are natin Temaia.
38 Te koraki aika taekinaki araia aikai boni mataniwi n aia utu nako, ao e rikirake mwaitiia kaaini bataia aia bakatibu.
39 Ao a nakon te kawai n rin i Ketora, nako mainikun te mwarua, bwa a na kakaaei tawaana ibukia aia nanai ni man.
40 N tokina ao a a kunei tawaana aika maiureirei ma n raraoi, ao e mwawaawa ma n rau te aba arei ao e aki kakiriweaki. Te koraki ake a maeka ngkoa iai bon tibun Am.+
41 Te koraki ake a karinanaki araia a roko n ana bong Etekia+ are Uean Iuta ao a urui ni kabwakai aia umwanrianna tibun Am ao taiani Meunim ake a mena ikekei. A kamaunaia n aron ae kona ni kakoauaaki n te bong naba aei, ao a maeka n aia tabo, ibukina bwa iai tawaana ikekei ibukia aia nanai ni man.
42 Ao tabeman mai buakoia tibun Timeon, aika mwaane aika 500, a nako nakon te Maunga ae Teira+ ma Beratia, Nearia, Rebaia, ao Utiera, ake natin Iti ake a kairiia.
43 Ao a kamateia nikiraia tibun Amareka+ ake a rabanako, ao a maeka ikekei ni karokoa te bong aei.
Taiani Kabwarabwara Mai Nano
^ Aara tabeua n te mwakoro aei e kona ni kaineti nakon taabo tabeua ao tiaki aomata. N aekaki akanne ao “taman” tao e nanona “te tia katea.”
^ E bae n irekereke te ara ae Iaabeti ma te taeka n Ebera ae nanona “maraki.”
^ Ebera, “mwaane aika natin.”
^ Ae nanona, “Aia Mwarua Taani Karaobwai Aika Mwaatai.”
^ Ebera, “mwaane aika natin.”
^ Tao e kaineti nakoni Bitia n te kibu 18.
^ Ke, “Taeka aikai boni man taai ake ngkoa.”
