1 Tamuera 10:1-27
10 E anaa ngkanne nnen te bwaa Tamuera ao e kabwaroa i aon atun Tauro.+ E kaboria* ma ngaia ao e taku: “Tiaki e a tia Iehova ni kabiriko bwa te tia kairiri+ i aoia ana aomata?+
2 Ngkana ko kitanai n te bong aei ao ane ko na noriia mwaane aika uoman i rarikin ruanimaten Rakera+ n aononi Beniamin i Tieretia, ao ane a na kangai nakoim, ‘A a tia n reke taongki ake ko nako ni kakaaei, ma e a mwaninga ngkai taekaia taongki tamam+ ao e a raraoma iroumi. E taku: “Tera ae I riai ni karaoia ibukin natiu?”’
3 Kaneneinako mai ikanne ni karokoa ae ko roko n te aroka ae bubura i Tabora, ike ko na kaitiboo iai ma mwaane aika teniman aika waerake nakon te Atua ae koaua i Betaera.+ Temanna e uouotiia kooti aika ataei aika teniman, temanna e uouotii kariki aika tenua, ao are temanna e uouota te kaatibu ni wain ae bubura.
4 Ane a na titirakiniko arom bwa ko uara ao n anganiko uoua te kariki, ao ko riai ni butimwaei kariki akanne mairouia.
5 Imwin anne ao ko na roko n ana tabuki te Atua ae koaua ike e mena iai aia tabo aia tautia I-Biritia. Ngkana ko roko n te kaawa ao ane ko na boo ma te koraki ni burabeti aika ruo man te tabo ae rietata, ao e na katangaki i moaia te bwai ni katangitang ae iai karaina, te tamboriin,* te kaibwabwaa, ao te abi, n te tai are a taetae ni burabeti iai.
6 Ane e na kakorakorako taamnein Iehova,+ ao ko na taetae ni burabeti i buakoia, ao ni bitaki nakon te aomata ae kaokoro.+
7 Ngkana a riki kanikina aikai, ao karaoa ane e kona ni karaoia baim, ibukina bwa e memena iroum te Atua ae koaua.
8 Ao ruuo rikaaki n rimoau nako Kirekara,+ ao N na ruo rikaaki nakoim ikanne n anga taiani karea ni kabuekaki ma karea n raoi.* Ko riai n tataninga i nanon itibong ni karokoa ae I roko iroum. Ao N na tuangko te bwai ae ko riai ni karaoia.”
9 N te tai are e rairaki iai Tauro ni kitana Tamuera, ao e a bita naba nanon teuaei te Atua nakon nanon te aomata temanna, ao a bane ni koro bukini kanikina aikai n te bong anne.
10 Mangaia are a waerake mai ikekei nakon te tabuki ao a boo ma ngaia te koraki ni burabeti. Ao taamnein te Atua e a kakorakoraa naba ngkekei teuaei,+ ao e a taetae ni burabeti+ i buakoia.
11 Ngke a bane n noria te koraki ake a kinaa mai mwaina bwa e a taetae ni burabeti ma burabeti akekei, ao a taku i marenaia: “Tera ae riki nakon natini Kiti? E mena naba Tauro i buakoia burabeti?”
12 Ao e taku te mwaane ae kaain ikekei: “Ma antai tamaia nakekei?” Mangaia are e a riki bwa te taeka ae tataekinaki* ae kangai: “E mena naba Tauro i buakoia burabeti?”+
13 Ngke e a toki ana taetae ni burabeti ao e a roko n te tabo ae rietata.
14 Imwina riki ao e taku tarin taman Tauro nakoina ma ana toro arei: “Kam nakea?” Ao e taku: “Ti kakaaeia taongki,+ ma ti noria bwa akea ikekei, ngaia are ti a nakon Tamuera.”
15 E titiraki teuare ai taman Tauro ni kangai: “Taiaoka ma tuangai, tera ae e taekinna Tamuera nakoim?”
16 E kaekaa ai tamana arei Tauro ni kangai: “E tuangira ae a a tia n reke taongki.” Ma Tauro e aki tuangnga te baere e taekinna Tamuera ni kaineti ma te nakoa n uea.
17 Ao Tamuera e weteiia aomata ni botiia nakon Iehova i Mitiba,+
18 ao e taku nakoia tibun Iteraera: “E kangai ana taeka Iehova ae Atuan Iteraera, ‘Boni ngai are I kairiia tibun Iteraera ni kaotinakoia mai Aikubita ao ni kamaiuingkami mai nanoni baia I-Aikubita,+ ao mai nanoni baia tautaeka n uea ni kabane ake a karawawataingkami.
19 Ma n te bong aei ao kam a rawa nakon Atuami+ are te tia Kamaiuingkami man ami kangaanga ni kabane ao rawawatami, ao kam taku: “Tiaki ngaia anne, ko riai n rinea te uea i aora.” Teei ngkai i matan Iehova n ami baronga nako, ao n ami nga nako.’”*
20 Ao Tamuera e kakeerakeia aia baronga nako tibun Iteraera,+ ao e rineaki te baronga ae Beniamin.+
21 Imwina ao e kakeerakea te baronga ae Beniamin n aia utu nako, ao e rineaki aia utu tibuni Materi. N tokina ao e a rineaki Tauro are natini Kiti.+ Ma ngke a nako ni kakaaea, ao e aki reke.
22 Mangaia are a titirakina Iehova+ ni kangai: “E tuai n roko ikai teuanne?” E kaeka ni kangai Iehova: “Bon ane ikanne, e karabaa i buakoni bwaai.”
23 Mangaia are a biri ao a kairia mai ikekei. Ngke e tei i buakoia aomata, ao e abwabwaki riki mai angana ni waerake nakoia aomata ni kabane.+
24 E taku Tamuera nakoia aomata ni kabane: “Kam nora teuae e rineia Iehova,+ bwa bon akea aekakina i buakoia aomata ni kabane?” Ao a a bane n takarua ni kangai aomata: “E na abwabwaki maiun te uea!”
25 E taetae Tamuera nakoia aomata ni kaineti ma baike a bon riai n reke irouia ueea,+ ao e korei n te boki ao e kaaki i matan Iehova. Imwina ao e a kanakoia aomata ni kabane Tamuera, nakon aia auti nako.
26 E nako naba Tauro nakoni mwengana i Kibea, ao e raonaki irouia taani buaka ake e a tia Iehova n ringi nanoia.
27 Ma a taku mwaane tabeman aika akea uaaia: “E na kangaa ni kamaiuira teuaei?”+ Mangaia are a ribaia ao a aki uota te bwaintangira teuana nakoina.+ Ma akea te bwai ae e taekinna teuaei ni kaineti ma aei.*
Taiani Kabwarabwara Mai Nano
^ Te kaboria ma temanna, n aron ae te kaboria ma tabana, bon te katei ae bwabwainaki ibukin te kamauri.
^ Nora Nanon Taeka.
^ Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
^ Ke, “te taeka n rabakau.”
^ Ke, “utu.”
^ Ebera, “Ao kaanga ai aron te aomata ngaia ae baennewe.”