1 Tamuera 13:1-23
13 Bon ...* ana ririki Tauro ngke e riki bwa te uea,+ ao e tautaeka i aoia tibun Iteraera i nanon uoua te ririki.
2 E rineiia mwaane aika 3,000 Tauro mai buakoia tibun Iteraera. Mai buakoia te koraki aikai ao iai 2,000 aika raon Tauro i Mikemati ao n te aono ae maungaunga i Betaera, ao ake 1,000 a raona Ionatan+ i Kibea+ are aia kaawa tibuni Beniamin. E kanakoia nikiraia aomata n tatabemania nako, nakon aia umwanrianna.
3 Ao Ionatan e urua aia tabo aia tautia I-Biritia+ are mena i Keeba,+ ao a ongo taekan aei I-Biritia. Ao e tua Tauro katangan te buu+ ni kabutaa te aba ni kangai: “A na ongo taian Ebera!”
4 Ao a bane n ongo tibun Iteraera te rongorongo ae kangai: “E urua aia tabo aia tautia I-Biritia Tauro, ao a a ribaaki ngkai tibun Iteraera irouia I-Biritia.” Mangaia are a bane ni weteaki aomata bwa a na raona Tauro i Kirekara.+
5 A ikotaki naba I-Biritia bwa a na buakania tibun Iteraera, ma kaa ni buaka aika 30,000, taan toka i aoia aoti aika 6,000, ao te taanga ni buaka ae rangi ni bati n ai aron tanon aon te bike.+ Ao a waerake ao a kaembwa i Mikemati i mainikuni Betaawen.+
6 Ao a noria mwaane aika tibun Iteraera bwa a a reke n te kangaanga, ibukina bwa a karawawataaki. Mangaia are a a karabaia aomata n taian nangananga,+ n taiani bwangabwanga, n taiani bwaa, n taian nono,* ao n taiani mwarua.
7 Tabeman naba mai buakoia taian Ebera a rinanon te Ioretan nakon iterana nako abaia tibuni Kata ao Kireata.+ Ma e tiku Tauro i Kirekara, ao a a bane n rurubenebene aomata ake raona.
8 E teimatoa n tataninga i nanon itibong ni karokoa te tai are e motikaki* iroun Tamuera. Ma e aki roko Tamuera i Kirekara, ao a a maeinikun nako aomata mairouna.
9 N tokina ao e a taku Tauro: “Uotaamai te karea ni kabuekaki ao taiani karea n raoi nakoiu.” Ao e anga te karea ni kabuekaki.+
10 Ma ngke e tia naba ngkekei n anga te karea ni kabuekaki ao e a roko Tamuera. Mangaia are e otinako Tauro ni kawaria ao e kakabwaiaa.
11 Ao e taku Tamuera: “Tera ae ko karaoia?” E kaeka ni kangai Tauro: “I noria bwa a a kitanai aomata,+ ao ko aki roko n te tai are motikaki, ao a a bane n ikotaki I-Biritia i Mikemati.+
12 Ngaia are I kangai i bon irou, ‘A na ruo rikaaki ngkai I-Biritia n ekainako i Kirekara, ao I tuai n ukoukora ana akoi* Iehova.’ Ngaia are I a kairoroai i bon irou bwa N na anga te karea ni kabuekaki.”
13 Ao e taku Tamuera nakon Tauro: “Ko a tia ni karaoa te aro ae nanobaba. Ko a tia n aki ongeaba n te tua are e anganiko Iehova ae Atuam.+ Ngke arona bwa ko karaoa anne, ao e na kateimatoa am tautaeka n uea Iehova i aoia tibun Iteraera n aki toki.
14 Ma e nang aki teimatoa ngkai am tautaeka n uea.+ E na karekea te mwaane temanna Iehova ae kakukureia nanona.+ Ao e na mwiokoia Iehova bwa te tia kairiri i aoia ana aomata,+ ibukina bwa ko aki ongeaba n te baere e tua nakoim Iehova.”+
15 E teirake ngkanne Tamuera ao e touaanako kawaina ni waerake mai Kirekara nako Kibea are aia kaawa tibuni Beniamin, ao Tauro e warekiia aomata, ao iai mwaane aika tao 600 ake a tiku i rarikina.+
16 A maeka i Keeba+ are aia kaawa tibuni Beniamin Tauro ma natina are Ionatan ao aomata ake a tiku i rarikia. Ao a katei aia umwanrianna I-Biritia i Mikemati.+
17 Ao te koraki ake taani kuribwai a otinako man aia kaembwa I-Biritia, nakon tenikoraki. A kaineta te kawai nako Obera te korakina, nakon te aba ae Tuara,
18 ake te korakina a kaineta kawaini Betaoron,+ ao are te katenikoraki a kaineta te kawai are tiki nakon te tia, ike e kona n noraki mai iai te mwarua ae Teboim ni kaitaraa te rereua.
19 Ao akea temanna te tia mwakuria te biti n te aba ae Iteraera ni kabutaa, ibukina bwa a kangai I-Biritia: “Bwa a aonga n aki kona taian Ebera ni karaoa te kabaang ke te kainiwai.”
20 Ao a riai tibun Iteraera ni kabane n nanako nakoia I-Biritia bwa a na taimi iai aia bwai ni kamarautano, aia beke, aia tanai, ke aia biti n tai.
21 Ao boon te taitaim bon teuana te bim* ibukin te bwai ni kamarautano, ibukin taiani beke, ibukini bwaai ni mwakuri aika tennai wia, ibukin taian tanai, ao ibukini kanimwan te kai ibukini kairaia kaao.
22 Ao ni bongin te buaka, ao bon akea naba te kabaang teaina ke te kainiwai teaina i nanoni baia aomata ake raon Tauro ma Ionatan.+ Bon tii Tauro ma natina are Ionatan ae iai aia bwai ni buaka.
23 Ao e a rokoroko aia tabo aia tautia I-Biritia ni mwaruani Mikemati,+ ae te kawai n rinnako.
Taiani Kabwarabwara Mai Nano
^ E aki oti te ware n te koroboki ae te Taetae n Ebera.
^ Ke, “ruu aika raba.”
^ Ke, “baireaki.”
^ Ke, “kamaraua ubun.”
^ Te bwai n tau rawawata rimoa ae katautauaki bwa uoua katenimwakoron te tiekera.
