1 Tamuera 17:1-58
17 Ao a ikotiia aia taanga* I-Biritia+ nakon te buaka. A ikotaki i Tokoa+ ae kaawan Iuta, ao a kaembwa i Ebetitammim+ i marenan Tokoa ma Ateka.+
2 A ikotaki Tauro ma mwaane aika tibun Iteraera ao a kaembwa n te Mwarua* ae Eera,+ ao a baireiia raoi ni baireaia taani buaka bwa a na ekiianako I-Biritia.
3 A mena I-Biritia n te maunga n te itera are teuana, ao tibun Iteraera a mena n te maunga n te itera are teuana, ao te mwarua i marenaia.
4 Ao e otinako te toa man aia kaembwa I-Biritia, ae arana Koria+ ae te I-Kate.+ Abwakina bon onoua te mwanokunibai ao te rakana.*
5 Iai te bwara ni buaka ae te buraati i aon atuna, ao e kunnikainna n te kunnikai ni buaka.* Ao rawawatan te kunnikai ni buaka ane te buraati anne+ bon 5,000 te tiekera.*
6 Iai nangoan rangana mai moa aika taiani buraati ao te koro ae te buraati+ ae teke mai akuna.
7 Ao kain ana kainiwai kaanga ai aron aia kai taan rarangaa te kunnikai,+ ao rawawatani win ana kainiwai ae te biti bon 600 te tiekera.* Ao e ririmoana te tia uouota otangana.
8 Ao e tei ma n tatakarua nakon aia taanga ni buaka tibun Iteraera+ ao e taku nakoia: “Bukin tera bwa kam otinako ni baireingkami ni baireaia taani buaka? Tiaki bon te I-Biritia ngai ao ngkami bon ana toro Tauro? Rinea ami aomata temanna ao ke e ruo nakoiu.
9 Ngkana e kona ni buakanai ao ni kamateai, ao ti na riki bwa ami toro. Ma ngkana I tokanikai i aona ao ni kamatea, ao kam na riki bwa ara toro ao kam na toro iroura.”
10 Ao e taku te I-Biritia arei: “I kakanikoia* aia taanga ni buaka tibun Iteraera+ n te bong aei. Kanakomaia nakoiu te mwaane temanna ao ti na boo ni buaka!”
11 Ngke a ongo ana taeka te I-Biritia arei Tauro ma tibun Iteraera ni kabane ao a rangi ni maakunrang.
12 Ao Tawita bon natin te I-Eberata+ mai Betereem+ i Iuta ae arana Iete.+ Iai natin teuaei mwaane aika waniman,+ ao e a boni kara teuaei n ana bong Tauro.
13 A ira Tauro nakon te buaka natin Iete ake ikawai ake teniman.+ Araia natina ake teniman ake a ira te buaka bon Eriaba+ are te karimoa, natina are te kauoman bon Abinataba,+ ao te kateniman bon Tiamma.+
14 Bon te bina Tawita,+ ao a ira Tauro naake ikawai ake teniman.
15 Ao e okioki Tawita mairoun Tauro bwa e na tararuaiia ana tiibu+ tamana i Betereem.
16 N te tai anne, ao e aki toki ni keerake te I-Biritia arei ni kakaewenakoia ni katoa ingabong ao ni katoa tairiki i nanon 40 te bong.
17 Ao e taku Iete nakon natina are Tawita: “Taiaoka anaa te eba* ni uita* ae umunaki aei ma kariki aika tebwina aikai, ao kawaekoako n uotii nakoia tarim n te kaembwa.
18 Ao uotii tiiti* aika tebwina aikai nakon te mataniwi i aoia tenga, ao ko riai naba n tuoi aroia tarim bwa a uara ao n uota rikaaki te bwai ni kakoaua teuana bwa a boni marurung.”
19 A mena i rarikin Tauro ma mwaane aika tibun Iteraera ni kabane n te Mwarua* ae Eera,+ bwa a na buakania I-Biritia.+
20 Mangaia are e utimwaaka Tawita n te ingabong ao e mwiokoa temanna ibukia tiibu. E katauraoia ao e nako n aron are e tua Iete nakoina. Ngke e a roko n te kaembwa ao e a otinako te taanga nakon te marae ni buaka ao n takaruaea te buaka.
21 A baireiia ni baireaia taani buaka tibun Iteraera ao I-Biritia, n te aro are te taanga ni buaka teuana e kaitaraa te taanga ni buaka are teuana.
22 E waekoa Tawita ni katikui uotana iroun te tia tararuai bwaai ao e biri nakon te marae ni buaka. Ngke e roko ao e a titiraki aroia tarina bwa a uara.+
23 Ngke e tabe n taetae ma ngaiia ao e a kaoti naba te toa are arana Koria,+ ae te I-Biritia mai Kate. E otinako mai buakoia aia taanga ni buaka I-Biritia, ao e taekin taeka n aron are mai mwaina,+ ao e ongo Tawita.
24 Ngke a bane n nora teuarei mwaane ake tibun Iteraera, ao a birinako mairouna ma te maakunrang.+
25 A taku mwaane ake tibun Iteraera: “Ko a tia n nora te mwaane ae otinako aei? E roko ni kakanikoia* tibun Iteraera.+ E na bon anga te kaubwai ae rangi ni bati te uea nakon te aomata are kamatea, ao e na anganna natina te aine,+ ao a na inaomata ana utu taman te aomata anne mani baike a kabaeaki iai iroun te uea i Iteraera.”
26 E a taku Tawita nakoia mwaane ake a teitei i rarikina: “Tera ae e na karaoaki nakon te aomata are kamatea te I-Biritia arei ma ni kanakoa kamaamaeaia tibun Iteraera? Bwa antai te I-Biritia ae aki korotobibiaki aei ngkai e na kakanikoia* ana taanga ni buaka te Atua ae maiu?”+
27 Ao a kangai nakoina aomata n aron are mai mwaina: “Ngaia anne te bwai ae e na karaoaki nakon te aomata are kamatea teuarei.”
28 Ngke e ongo Eriaba+ are tarina are te karimoa bwa e taetae nakoia mwaane ao e a un iroun Tawita ao e taku: “Bukin tera ngkai ko ruo n nakomai? Ao antai ane ko a katikuia irouna tiibu ake tii tabeman akekei n te rereua?+ I ataa raoi am kan rarabakau ao te bwai ae buakaka ane i nanom, bwa ko tii ruo n nakomai bwa ko na mataku n te buaka.”
29 Ao e taku Tawita: “Tera ae I a tia ni karaoia ngkai? Kai I bon tii titiraki!”
30 Ngaia are e tannako mairouna ni kaitaraa temanna riki ao n titiraki n aron are mai mwaina,+ ao aomata a kaekaa naba n aron are mai mwaina.+
31 Ao e ongo te aba taeka ake e taekin Tawita, ao e kaongoaki Tauro. Mangaia are e kanaanako bwa e na weteaki.
32 E taku Tawita nakon Tauro: “E na tai bwara nanon* te aomata temanna ibukin teuarei. E na nako am toro ao e na boo ni buaka ma te I-Biritia arei.”+
33 Ma e taku Tauro nakon Tawita: “Ko aki kona n nako ni buakana te I-Biritia arei, bwa bon te teinimwaane ngkoe+ ao ngaia bon te tautia* mangke e roro n rikirake.”
34 E taku ngkanne Tawita nakon Tauro: “E riki am toro bwa te tia kawakinia ana tiibu tamana, ao e roko te raian,+ ao te bea naba, ao a uotaanako te tiibu man te nanai.
35 Ao I otinako ni kaea ao I oreia ma ni kamaiua mai nanoni wina. Ngke e teirake bwa e na kaitaraai ao I taua buraena* ao I oreia ni kamatea.
36 E a tia ni kamatea te raian ao te bea am toro, ao te I-Biritia are aki korotobibiaki arei, e na riki n ai aron temanna i buakoia maan aikai, bwa e a tia ni kakanikoia* ana taanga ni buaka te Atua ae maiu.”+
37 E reitia ni kangai Tawita: “Bon Iehova ae kamaiuai mairoun te raian ao mairoun te bea, ao boni ngaia naba ae e na kamaiuai mai nanoni bain te I-Biritia arei.”+ Ngaia are e taku Tauro nakon Tawita: “Naako, ao ke e memena iroum Iehova.”
38 Ao e karina kunnikaina Tauro i aon Tawita. E kaaki te bwara ae te buraati i aon atuna, ao rimwi e karina te kunnikai ni buaka i aona.
39 Ao e kabaea ana kabaang Tawita i aon ana kunnikai ao e kataia ni mwananga ma e a aki kona, bwa e aki taneiai ni baikekei. E a taku Tawita nakon Tauro: “I a aki kona ni mwananga ma baikai, bwa I aki taneiai iai.” Mangaia are e buutii mai aona Tawita.
40 Ao e anaa okona ni baina ao e rinei atibu aika maranran aika nimaua mai kabin te karaanga,* ao e kaaki ni buuan ana baeki ni kawakintiibu ma ana bana+ i nanoni baina. Ao e a keerakea te I-Biritia arei.
41 E a tabe ni kaan riki te I-Biritia nakon Tawita, ao e rimoana te tia uouota otangana.
42 Ngke e taratara nako te I-Biritia arei ao e nora Tawita ao e ngare ni kakanikoa, bwa kioina ngke bon tii te teinimwaane ngaia ae ribaura ao ni botonimwaane.+
43 Mangaia are e taku te I-Biritia arei nakon Tawita: “Ngai te kamea+ ngkai ko a nakomai ni kaitaraai ma taiani kai?” Ao te I-Biritia arei e karereantia Tawita n araia atuana.
44 E taku te I-Biritia arei nakon Tawita: “Tii keemai nakoiu, ao N na bon anga irikom nakoia mannikiba ake i annang ma manin te tawaana.”
45 Ao Tawita e kaekaa te I-Biritia arei ni kangai: “Ko nakoiu ni kaitaraai ma te kabaang ao te kainiwai ao te koro,+ ma ngai I nakoim ni kaaitarako n aran Iehova ae Atuaia taanga ni buaka,*+ ae Atuaia aia taanga ni buaka tibun Iteraera are ko a tia ni kakanikoa.*+
46 N te bong naba aei ao e na anga ngkoe Iehova nako nanoni baiu,+ ao N na kamateko ao ni kabakua roroam. N na anga rabwataia kaain aia kaembwa I-Biritia n te bong aei nakoia mannikiba ake i annang ao manin te aonnaba aika tiritiri, ao a na ataia aomata n te aonnaba ni kabutaa bwa bon iai te Atua i Iteraera.+
47 Ao a na bane n ataia aomata aika ikotaki ikai* bwa tiaki n te kabaang ke n te kainiwai ae e kakamaiu iai Iehova,+ bwa bon ana bwai Iehova te boo ni buaka,+ ao e na anga ngkami ni kabane nako nanoni baira.”+
48 Ao te I-Biritia arei e kekeerakea Tawita ni kaania, ma e kawaekoaa ni biri Tawita nakon te marae ni buaka ni kaania te I-Biritia arei.
49 E kaenakoa baina Tawita nako nanon ana baeki ao e anaa te atibu teuana mai iai ao e bana iai. E banaa ramwan te I-Biritia arei ao e ribunako te atibu i ramwana, ao e bwaka ni bobaraaki i aontano.+
50 Mangaia are e tokanikai Tawita i aon te I-Biritia arei n te bana ma te atibu. E orea te I-Biritia arei ni kamatea e ngae ngke bon akea te kabaang i nanoni bain Tawita.+
51 E teimatoa ni biri Tawita ao n tei i aona. E taua ngkanne ana kabaang te I-Biritia+ arei ao e buutia mani kauna, ao e boni kamatea raoi ngke e kabakua roroana iai. Ngke a noria I-Biritia bwa e a mate aia boto arei ao a a birinako.+
52 Ao a teirake mwaane aika tibun Iteraera ao aika tibun Iuta ma n tatakarua ao ni kakioia I-Biritia man te mwarua+ ni karokoa mataroan oon Ekiron,+ ao a wenebabaa i rarikin te kawai rabwataia I-Biritia ake a tiringaki, mai Tiaaraim+ ni karokoa Kate ao Ekiron.
53 Imwin okia rikaaki tibun Iteraera mani kaeaia I-Biritia ae korakora ao a kuribwaia aia kaembwa I-Biritia.
54 Ao Tawita e anaa atun te I-Biritia arei ao e uotia nako Ierutarem, ma e katuka ana bwai ni buaka te I-Biritia arei i nanon ana umwanrianna.+
55 E taku Tauro nakon Abenera+ are te mataniwi n te taanga ni buaka n te tai are e nora iai Tawita n otinako bwa e na kaania te I-Biritia arei: “Antai natina te teinimwaane aei+ Abenera?” E kaeka Abenera ni kangai: “Ngkai ko maiu te uea, ao I bon aki ataia!”
56 E taku te uea: “Ukeria bwa antai natina te rorobuaka n ataei aei.”
57 Ngaia are ngke e oki naba ngkekei Tawita mani kamatean te I-Biritia arei, ao e a kairia naba Abenera nako matan Tauro ma atun te I-Biritia+ arei i nanoni baina.
58 Ao e taku Tauro nakoina: “Te teinimwaane, antai natina ngkoe?” ao e kaeka Tawita ni kangai: “Bon natin am toro are Iete+ are te I-Betereem.”+
Taiani Kabwarabwara Mai Nano
^ Ebera, “kaembwa.”
^ Ke, “te Tabo ae Aoraoi ae Mena n te Mwarua.”
^ Te kunnikai ni buaka aio e karaoaki man te kunnikai ke te ninira ae kunin te man ae a kanimwaki i aona mwakorokoro ni biti aika tomatomaaki (ae ai aron inan te ika).
^ Ke, “kakaewenakoia.”
^ Ke, e kona n nanona “te baare.”
^ Te tiiti bon te amwarake ae matoatoa ae karaoaki man te miriki.
^ Ke, “te Tabo ae Aoraoi ae Mena n te Mwarua.”
^ Ke, “kakaewenakoia.”
^ Ke, “kakaewenakoia.”
^ Ke, “tai bua ninikorian.”
^ Ke, “te tia buaka.”
^ Ke, “mwangaina.” Ebera, “buaina.”
^ Ke, “kakaewenakoia.”
^ Ke, “te mwarua.”
^ Ke, “kakaewenakoa.”
^ Ke, “Tabaota.” Nora Nanon Taeka.
^ Ebera, “te ekaretia aei.”
