1 Tamuera 21:1-15
21 Imwina riki ao e roko Tawita i Nobo+ iroun Aimereka are te ibonga.* Ao e a rurubenebene Aimereka ngke e kaitiboo ma Tawita, ao e taku nakoina: “E aera ngkai tii ngkoe ao akea raom?”+
2 Ao Tawita e kaekaa Aimereka are te ibonga ni kangai: “E tuangai te uea bwa N na karaoa te bwai teuana, ma e kangai, ‘Tai kariaia te aomata temanna bwa e na ataa taekan te mwakuri ae I kanakoko iai ao taekan taiani kaetieti aika I anganiko.’ I boraraoi ma au rorobuaka n ataei bwa ti na kaitiboo n te tabo teuana.
3 Ngaia ae ngkana iai nimaua te bwerena iroum ao anganai, ke te bwai ane tauraoi naba.”
4 Ma e kaeka te ibonga nakon Tawita ni kangai: “Akea te bwerena ae aki tabu, ma iai te bwerena ae tabu,+ ae tauraoi tii ngkana a kawakinia rorobuaka n ataei mairouia aine.”*+
5 E kaeka Tawita nakon te ibonga ni kangai: “A bon raroa aine mairoura n aron taai aika nako aikai ngke I nako ni buaka.+ Ngkana ngaia bwa a itiaki* rabwataia rorobuaka n ataei e ngae ngke e aki itiaki te mwakuri, ao ai batira riki riaia n itiaki n te bong aei!”
6 Mangaia are e a anganna te bwerena+ ae tabu te ibonga, ibukina bwa ai akea riki te bwerena ikekei ma ai tii te bwerena ae kaotiotaki, ae kanakoaki mai matan Iehova bwa e na oneaki mwina n te bwerena ae boou n te bong are e anaaki iai.
7 Ao e mena ikekei ana toro Tauro temanna n te bong anne, bwa e riai n tiku moa i matan Iehova. Arana bon Toeka+ ae tibun Etom,+ ae te mataniwi i aoia ana tia kawakintiibu Tauro.
8 E taku ngkanne Tawita nakon Aimereka: “Iai iroum ikai te kainiwai ke te kabaang? I aki uota au kabaang ke au bwai ni buaka, ibukina bwa e rangi ni kaumakaki ana mwakuri te uea.”
9 Ao e taku te ibonga: “Iai ikai ana kabaang Koria+ are te I-Biritia are ko kamatea n te Mwarua* ae Eera,+ ae niniraki n te kunnikai ane i akun te ebota.+ Ngkana ko kan anaia, ao anaia, bwa bon tii anne ae mena ikai.” E taku Tawita: “Akea aekakin te kabaang anne, kaamai.”
10 E teirake Tawita n te bong anne ao e reitaanako birinakona+ mairoun Tauro, ao n tokina e a roko iroun Akiti are Ueani Kate.+
11 A taku ana toro Akiti nakoina: “Tiaki Tawita aei are uean te aba? Tiaki ngaia are a aneneia ni kangai ngke a mwaie,‘E kamateia aiana aika nga ma nga Tauro,Ao Tawita tatabebwi tenga’?”+
12 E kaaki taeka aikai i nanona Tawita, ao e a rangi ni maaka+ Akiti are Ueani Kate.
13 Mangaia are e bakaaea te baba+ i mataia ao e karaoa te mwakuri ni mino ngke e mena i buakoia.* E katanetanei aoni mataroan te oo ao e bunibawarea buaina.
14 N tokina ao e a taku Akiti nakoia ana toro: “Kam ataia bwa e rangirang te aomata aei! Ao e aera ngkai kam kairia nakoiu?
15 Te koaua bwa a karako au aomata aika rangirang ngaia ae I a kainnanoa te aomata aei bwa e na karaoa aron te rangirang i matau? E riai n rin te aomata aei n au auti?”
Taiani Kabwarabwara Mai Nano
^ Nora Nanon Taeka.
^ Ke, “a a maan n aki wene n taanga.”
^ Ke, “tabu.”
^ Ke, “te Tabo ae Aoraoi ae Mena n te Mwarua.”
^ Ebera, “i nanoni baia.”
