1 Tamuera 23:1-29
23 Imwina riki ao e tuangaki ni kangai Tawita: “A a buaka I-Biritia n ekaanako Keira,+ ao a a kuribwai taabo ni kaaki kun ni uita.”
2 Ao Tawita e titirakina Iehova+ ni kangai: “I riai n nako ao n oreiia I-Biritia?” E taku Iehova nakon Tawita: “Naako oreiia I-Biritia ao kamaiua Keira.”
3 Ma a taku ana rorobuaka Tawita nakoina: “Noria! Ti a maaku naba ngkai ti mena i Iuta ikai,+ ao ai batira riki ngkanne maakura ngkana ti a nako Keira ni buakania aia taanga ni buaka I-Biritia!”+
4 Ao Tawita e a manga titirakina riki Iehova.+ E a kaekaa teuaei ngkai Iehova ni kangai: “Teirake ao ruuo rikaaki nako Keira, ibukina bwa N na anga I-Biritia nako nanoni baim.”+
5 Mangaia are e nako Tawita ma ana rorobuaka nako Keira ao e buakania I-Biritia, e kairiianako aia nanai ni man ao e kamateia n te kamamate ae korakora ao e kamaiuia kaaini Keira Tawita.+
6 Ngke e birinako Abiata+ are natin Aimereka nakon Tawita i Keira, ao iai irouna te ebota.
7 Ao e tuangaki ae kangai Tauro: “E a roko Tawita i Keira.” E taku ngkanne Tauro: “E a tia te Atua n anga teuaei nakoiu,*+ bwa e a kamwanea i bon irouna ngkai e a rin n te kaawa ae iai mataroan oona ao kain nako kamatoaana.”
8 Mangaia are e weteiia aomata ni kabane Tauro nakon te buaka, bwa a na ruo rikaaki nako Keira ao n otabwaninia Tawita ma ana rorobuaka.
9 Ngke e a ataia Tawita ae e baireia Tauro bwa e na ekianako, ao e taku nakon Abiata are te ibonga:* “Uotaamai te ebota.”+
10 E taku ngkanne Tawita: “Ngkoe ae Iehova ae Atuan Iteraera, e bon ongo am toro bwa e iangoia Tauro bwa e na nakomai nako Keira bwa e na kamauna te kaawa ibukiu.+
11 A na anga ngai mataniwini* Keira nako nanoni baina? E na ruo Tauro n aron ae e a tia n ongo am toro? Ngkoe ae Iehova ae Atuan Iteraera, taiaoka ma tuanga am toro.” Mangaia are e taku Iehova: “E na ruo.”
12 E titiraki Tawita ni kangai: “A na anga ngai mataniwini Keira ma au rorobuaka nako nanoni bain Tauro?” E kaeka Iehova ni kangai: “A na anga ngkoe.”
13 E aki tabwara Tawita ma e a teirake naba ma ana rorobuaka ae tao 600 mwaitiia,+ ao a kitana Keira ao a mwananga nakon taabo ake a kona n nako iai. Ngke e kaongoaki Tauro ae e a rabanako Tawita mai Keira, ao e aikoa nako n rimwina.
14 E tiku Tawita n te rereua, n taabo ake e kangaanga te roko iai, n te aono ae maungaunga n rereuan Tibi.+ E teimatoa n ukoukoria Tauro,+ ma e aki roko n te anga teuaei Iehova nako nanoni baina.
15 E ataia Tawita ae* e mwananga nako Tauro bwa e na kamatea ngke e mena Tawita n rereuan Tibi i Oreti.
16 Ao Ionatan are natin Tauro e nakon Tawita i Oreti, ao e buokia ni karekea korakorana* iroun Iehova.+
17 E taku nakoina: “Tai maaku bwa e na bon aki kuneko tamau are Tauro, ao ko na riki bwa te uea i aon Iteraera,+ ao ngai N na kauoman i aam, ao e bon ataa naba anne tamau are Tauro.”+
18 Ao a karaoa te berita+ i matan Iehova ngaiia ni kauoman, ao e tiku Tawita i Oreti ao e nako ni mwengana Ionatan.
19 Imwina riki ao a waerake nakon Tauro i Kibea+ rorobuakan Tibi ao a taku: “Tiaki e karabarabaa i rarikira+ Tawita n taabo ake e kangaanga te roko iai i Oreti,+ i aon te tabuki ae Akira+ ae mena i maiakin* Ietimon?*+
20 N te tai are ko kukurei iai n ruo n nakomai, ngkoe ae te uea, ao nakomai, ao ti na anga ngaia nako nanoni bain te uea.”+
21 Mangaia are e taku Tauro: “Ke e kakabwaiaingkami Iehova, bwa kam a tia ni kaotiota te atataiaomata nakoiu.
22 Taiaoka naako ao kataia ni kakaaea raoi te tabo are e mena iai, ao antai ae noria ikekei, bwa I a tia n tuangaki ae e rangi n nanowanawana.
23 Kam na ukeri raoi ana tabo ni karaba ni kabane, ao kam na oki nakoiu ma te bwai ni kakoaua. Ao N na nako ma ngkami, ao ngkana e boni mena n te aba anne, ao N na kakaaea i buakoia tibun Iuta ni kabane aika nga ma nga.”*
24 Mangaia are a a nako Tibi+ n rimoan Tauro, ngke a mena Tawita ma ana rorobuaka n rereuani Maon,+ n te Arabaa*+ nako maiakin Ietimon.
25 Ao e roko Tauro ma ana rorobuaka bwa a na kakaaea.+ Ngke e a tuangaki Tawita, ao e aki tabwara ma e a ruo naba nakon te bwaa+ ao n tiku n rereuani Maon. Ngke e ongo aei Tauro, ao e kaea Tawita nakon rereuani Maon.
26 Ngke e a roko Tauro n iteran te maunga are te iterana, ao a mena Tawita ma ana rorobuaka n iteran te maunga are te iterana. E ienikuri Tawita bwa e na birinako+ mairoun Tauro, ma a a rangi ni kaan Tauro ma ana rorobuaka bwa a na tauia Tawita ao ana rorobuaka.+
27 Ma e a roko naba te tia uataeka nakon Tauro, ao e kangai: “Kawaekoako n nakomai bwa a a ninia te aba I-Biritia!”
28 Ao Tauro e aikoa kaea Tawita+ ma e a nako ni kaaitaraia I-Biritia. Anne bukina ae e aranaki iai te tabo anne bwa Teraammarekota.*
29 Ao e waerake Tawita mai ikanne ao e tiku n taabo ake e kangaanga te roko iai i Enikeri.+
Taiani Kabwarabwara Mai Nano
^ Ebera, “kaboonakoa nako nanoni baiu.”
^ Nora Nanon Taeka.
^ Ke tao, “taani bwaibwai n te aba.”
^ Ke tao, “e maaku ibukina bwa.”
^ Ebera, “e kakorakoraa baina.”
^ Ebera, “n iterana are te angaatai.”
^ Ke tao, “te rereua.”
^ Ke, “taian utu.”
^ Ke, “te rereua ae aoraoi.”
^ Ae nanona, te Bwaa ni Maenako.
