1 Tamuera 25:1-44
25 Imwina riki ao e a mate Tamuera,+ ao a a ikotaki tibun Iteraera ni kabane n tanginiweneia ao ni kaiia n ana auti i Rama.+ Ao e teirake Tawita ao e ruo nakon rereuani Baran.
2 Ao iai te mwaane temanna i Maon+ ae a mena ana nanai ni man i Karemera.*+ E rangi ni kaubwai teuaei, ao iai ana tiibu aika 3,000 ao ana kooti aika 1,000, ao e tabe ni korei buraeia ana tiibu i Karemera.
3 Aran teuaei Nabara,+ ao arani buuna Abikaira.+ E wanawana te buu te aine aei ao e baaraoi, ma te buu te mwaane ae tibuni Kareba+ aei, e iowawa ao e buakaka aroarona.+
4 Ao e ongo Tawita n te rereua ae e tabe Nabara ni korei buraeia ana tiibu.
5 Ao e kamwanangaia rorobuaka n ataei aika tengaun Tawita nakon teuaei, ao e tuangia rorobuaka n ataei aikai Tawita ni kangai: “Waerake nako Karemera, ao ngkana kam roko iroun Nabara, ao titirakinna arona n arau bwa e uara.
6 Ao kam na kangai, ‘E bia abwabwaki maium ao e bia nakoraoi arom,* ao a bia nakoraoi aroia kaaini batam ao a bia nakoraoi naba bwaai ni kabane aika am bwai.
7 I ongo ngkai bwa ko a tabe ni korei buraeia am tiibu. Ngke a mena am tia kawakintiibu i rarikira, ao ti aki kaikoakiia,+ ao akea aia bwai teuana ae bua n taai ni kabane ake a tiku iai i Karemera.
8 Titirakinia am rorobuaka n ataei, ao a na tuangko. Ke e reke akoaia au rorobuaka n ataei i matam, ibukina bwa ti roko n te tai ni kimwareirei.* Taiaoka ma angania am toro ao natim ae Tawita te bwai ae kona n reke iroum.’”+
9 Mangaia are a nako ana rorobuaka n ataei Tawita ao a tuanga Nabara baikai ni kabane n aran Tawita. Ngke a a tia,
10 ao Nabara e kaekaia ana toro Tawita ni kangai: “Antai Tawita, ao antai natin Iete? Ni boong aikai ao a a bati tooro aika birinako mairouia aia toka.+
11 Te koaua bwa N na anaa au kariki ma au ran ao irikoia au man aika I tiringia ibukia au tia koroburae, ao n angania mwaane aika aki ataaki bwa a roko mai ia?”
12 Mangaia are a oki ana rorobuaka n ataei Tawita ao a kaongoa taeka aikai ni kabane.
13 E aki tabwara Tawita ma e a taku naba nakoia ana rorobuaka: “Kam na bane ni kabaei ami kabaang!”+ Mangaia are a a bane ni kabaei aia kabaang ao e kabaea naba ana kabaang Tawita, ao a waerake rorobuaka aika tao 400 ma Tawita, ao a tiku rorobuaka aika 200 ma bwaai.
14 N te tai anne ao te toro temanna e kaongoa Abikaira are buun Nabara ni kangai: “Noria! E kamwanangaia taan uataeka man te rereua Tawita bwa a na kakabwaiaa ara toka, ma e tatakarua ngaia n un nakoia.+
15 A rangi n raoiroi mwaane akekei nakoira. A aki roko n te kaikoakira, ao akea ara bwai teuana ae bua n taai ni kabane ake ti kaai ni mena iai ma ngaiia n taian tawaana.+
16 Kaanga ai aron ara oo ni kamanomano ngaiia n te bong ao n te ngaina, n taai ni kabane ake a raonira iai ngke ti kawakina te nanai.
17 Iangoia ngkai bwa tera ae ko na karaoia, bwa e a tia ni motikaki rokon te kabuanibwai i aon ara toka ao i aoia kaaini batana ni kabane,+ ao bon te mwaane ngaia ae akea manenana*+ ae akea ae e kona n taetae nakoina.”
18 Mangaia are e waekoa Abikaira+ n anai kariki aika 200, kaatibu aika bubura aika uaai aika kanoaia te wain, tiibu aika niman aika a a tia n tiringaki, te uita* ae umunaki ae nimaua te bwai ni baire ae te tiea,* taiani kureebe aika bati aika buabuaaki aika mwau aika 100, ao taiani biiku aika bati aika buabuaaki aika mwau aika 200, ao e katokai ni kabane i aoia taongki.+
19 Ao e taku nakoia ana toro: “Naako rimoau bwa I a ririmwingkami.” Ma akea te bwai ae e taekinna nakoni buuna are Nabara.
20 Ngke e tabe ni mwananga neiei i aon ana taongki ma ni bwatete i rarikin te tabo ae raba n te maunga, ao e bwatete n te tai naba anne Tawita ma ana rorobuaka ni kaineta neiei, ao e a boo ma ngaiia neiei.
21 N te tai aei ao e a tia ni kangai Tawita: “Bon akea uaan are I tararuai bwaai nako ake ana bwai te aomata aei n te rereua. Bon akea ana bwai teuana ae bua,+ ma e kabooa mwina nakoiu n te buakaka bwa boon te raoiroi.+
22 Ke e karaoa aekakin aei te Atua ao ni kamwaitia riki nakoia aian Tawita,* ngkana I katuka ana rorobuaka* temanna ni kamaiua ni karokoa ae ingabong.”
23 E waekoa n ruo man te taongki Abikaira ngke e nora Tawita, ao e katorobubua i matan Tawita ao e bobaraaki nako aontano.
24 E bobaraaki ngkanne i rarikini waen teuaei ao e taku: “Au toka, kariaia bwa N na bukintaeka, ao kariaia bwa e na taetae am toro te aine nakoim, ao ongora n ana taeka am toro te aine.
25 Taiaoka au toka ma tai katabeko iroun te aomata ae akea manenana ae Nabara,+ bwa e bon toua raoi mwin arana. Arana bon Nabara* ao bon iai te nanobaba irouna. Ma ngai ae am toro te aine I aki noriia am rorobuaka n ataei ake ko kamwanangaia.
26 Ao ngkai au toka, ngkai bon iai Iehova ao ngkai ko maiu, ao bon Iehova ae tukiko+ mani karaoan te katuturaraa+ ao mani karaoan te irantanga ni karekekai* n oini baim. Ke a riki n ai aron Nabara, taani kairiribai nakoim ao te koraki ake a ukoukora kaikoakan au toka.
27 Ao kariaia te bwaintangira*+ ae e uotia am toro te aine nakon au toka bwa a na anganaki rorobuaka n ataei aika ririmwin au toka.+
28 Taiaoka kabwaraa ana bure am toro te aine, bwa e na boni kateimatoa batan au toka Iehova,+ ibukina bwa e nanako ni buaka au toka n ana buaka nako Iehova,+ ao e tuai man noraki te buakaka iroum ni kabane am bong.+
29 Ngkana e teirake te aomata temanna ao e kaeko bwa e kani kamateko, ao e na kamanoko Iehova ae Atuam n aron temanna ngkana e kamanoi bwaai aika kakawaki n niniri n te baeki. Ma e na karenakoi maiuia taani kairiribai nakoim n aron atibun te bana.*
30 Ao ngkana e a tia Iehova ni karaoi bwaai aika raraoi ni kabane ibukin au toka ake e a tia ni beritani, ao e mwiokoiko bwa te tia kairiri i Iteraera,+
31 ao ko na bon aki nanokawaki ke n uringaaba* i nanom ibukin te katuturaraa n akea bukina, ao ibukini kariaiakani bain au toka bwa e na irantangaia ni karekekai.*+ Ao ngkana e a anga te bwai ae raoiroi Iehova nakon au toka, ao uringa am toro te aine.”
32 Mangaia are e taku Tawita nakon Abikaira: “E na karaoiroaki Iehova ae Atuan Iteraera, are e kanakomaiko n te bong aei bwa ko na kawarai!
33 Ao ke e kakabwaiako te Atua ibukini wanawanam! Ko bia kakabwaiaaki ibukina bwa ko tukai n te bong aei man te katuturaraa,+ ao man te irantanga ni karekekai* n oini baiu.
34 Mangaia ae ngkai bon iai Iehova ae Atuan Iteraera are tautauai mani kaikoakam,+ bwa ngke arona bwa ko aki waekoa n roko ni kawarai,+ ao e na akea te mwaane* temanna ae ana aomata Nabara ae e na tiku nakon te moaningabong.+
35 Ao e butimwaei Tawita bwaai ake e uotii nakoina neiei ao e taku nakon neiei: “Waerake ma te rau nakon am auti. Noria, I ongo iroum ao N na butimwaea am bubutii.”
36 Imwina riki ao e a oki Abikaira nakon Nabara are karaoa te baka n amwarake n ai aron te uea n ana auti, ao e kukurei nanon Nabara ao e koro ni manging. E aki roko n te tuangnga neiei te bwai teuana ni karokoa ootan te ingabong.
37 N te moaningabong ngke e a toki mangingin Nabara, ao e a kaongoaki irouni buuna taekani baikai. Ao e a riki nanona bwa kaanga nanon te aomata ae mate, ao e a wene n aki kona ni kakammwakuri n aron te atibu.
38 Tao tengaun te bong imwina ao Iehova e a orea Nabara, ao e a mate.
39 Ngke e a ongo Tawita ae e a mate Nabara, ao e taku: “Karaoiroa Iehova, ae tei ibukiu n au tangitang+ ni kaineti ma kamaamaeau mairoun Nabara,+ ao ae e a tia n taua ana toro mani karaoan ae buakaka,+ bwa e a tia Iehova ni kaoka buakakan Nabara nako aon atuna!” Ao e kanakotaeka Tawita ni kabutiman nakon Abikaira bwa e na riki neiei bwa buuna.
40 Mangaia are a a roko iroun Abikaira ana toro Tawita i Karemera ao a taku nakoina: “E kanakoira Tawita nakoim bwa ti na anaiko bwa buuna.”
41 E aki tabwara neiei ma e a teirake naba ao e bobaraaki nako aontano ao e taku: “Aio am toro ae te toro ae e na teteboki waeia+ ana toro au toka.”
42 Ao e waekoa Abikaira+ n teirake ao e toka i aon ana taongki ao a rianna n ririmwina ana toro aika aine aika niman. E iriia ana tia uataeka Tawita ao e a riki bwa buuna.
43 E a kamani mare naba Tawita ma Ainoam+ are te I-Ietireera,+ ao a a kaai n riki aine aikai bwa buuna.+
44 Ma e a tia Tauro n anga natina are Nei Mikara+ are buun Tawita, nakoni Bareti+ ae natin Raiti, are mai Karim.
Taiani Kabwarabwara Mai Nano
^ Te kaawa teuana i Iuta, ae e kaokoro ma te Maunga ae Karemera.
^ Ke, “e bia mena iroum te rau.”
^ Ebera, “te bong ae raoiroi.”
^ Ke, “akea uaana.”
^ Ke, e kona n nanona “te baare.”
^ Ke tao, “nakon Tawita.”
^ Ebera, “te aomata ae mira te oo.” Te taeka n Ebera ni kabuakaka nakoia mwaane.
^ Ae nanona, “Nanobaba; Baba.”
^ Ke, “karekean te kakamaiu.”
^ Ebera, “te kakabwaia.”
^ Ke, “kaanga mani mwanokun te bana.”
^ Ebera, “tibanako ke bwaka.”
^ Ke, “karekea te kakamaiu.”
^ Ke, “karekean te kakamaiu.”
^ Ebera, “te aomata ae mira te oo.” Te taeka n Ebera ni kabuakaka nakoia mwaane.