1 Tamuera 27:1-12
-
A anga Tikeraka I-Biritia nakon Tawita (1-12)
27 Ma e taku Tawita i nanona: “N te bong teuana ao N na boni mate ni bain Tauro. Te bwai ae te kabanea n raoiroi ibukiu bwa N na rabanako+ nako abaia I-Biritia, ao e nang aki manga kakaaeai ngkanne Tauro n aonon Iteraera ni kabutaa,+ ao N na rabanako mai baina.”
2 Ngaia are e teirake Tawita ma mwaane ake raona ake 600,+ ao a mwananga nakon Akiti+ are natini Maoka, are ueani Kate.
3 E tiku Tawita i rarikin Akiti i Kate, ngaia ma ana rorobuaka ma kaaini bataia n tatabemania nako. Raon Tawita boni buuna ake uoman, are Ainoam+ are te I-Ietireera ma Abikaira+ are te I-Karemera are buun Nabara.
4 Ngke e a kaongoaki Tauro ae e birinako Tawita nako Kate, ao e a katoka ukoukorana.+
5 Ao e taku Tawita nakon Akiti: “Ngkana e reke akoau i matam, ao ke a anganai te tabo teuana ni kaawa aika uarereke, bwa I aonga ni maeka iai. E aera ngkai e na maeka am toro i rarikim n aia kaawa ueea?”
6 Ao Akiti e anganna Tikeraka+ n te bong anne. Anne bukina ae Tikeraka bon aia kaawa uean Iuta ni karokoa te bong aei.
7 Maanin te tai* are e maeka iai Tawita i abaia I-Biritia bon teuana te ririki ao aua namwakaina.+
8 E waewaerake Tawita ma ana rorobuaka ni kuribwaiia I-Keturi,+ taiani Kiritaite, ao tibun Amareka.+ Bwa a maeka naakai n te aba ae moa mai Teram ni karokoa Tiura+ ao nakon te aba ae Aikubita.
9 Ngkana e buakana te aba teuana Tawita, ao e aki kakamaiuia mwaane ke aine,+ ma e anaiia kaao, tiibu, taongki, kamero, ao taiani kunnikai, ao imwina e oki rikaaki nakon Akiti.
10 Ao e titiraki Akiti ni kangai: “Ia te tabo ae kam kuribwaia n te bong aei?” E kaeka Tawita ni kangai: “I maiakin* Iuta”+ ke “I maiakin abaia tibun Ierameera”+ ke “I maiakin abaia taiani Kenaite.”+
11 E aki kakamaiuia mwaane ke aine Tawita bwa a na kairaki nako Kate, bwa e kangai: “Bwa a aonga n aki tuangia taekara ao ni kangai, ‘Aio te bwai ae e karaoia Tawita.’” (Ao anne te bwai ae e kakaraoia n taai ni kabane ake e maeka iai i abaia I-Biritia.)
12 Ao Akiti e a kakoauaa Tawita, ao e taku i nanona: ‘E a bon ribaaki i buakoia ana aomata aika tibun Iteraera, mangaia ae e nang bon riki bwa au toro n taai nako.’
