1 Tamuera 28:1-25
-
E nakon te tia rorokoia taimonio i Entora Tauro (1-25)
28 Ni boong akanne ao a ikotiia aia taanga ni buaka I-Biritia bwa a na buakania tibun Iteraera.+ Ngaia are e a taku Akiti nakon Tawita: “Ko bon ataia ae ko na irai nakon te buaka, ngkoe ma am rorobuaka.”+
2 Ao e taku Tawita nakon Akiti: “Ko bon ataa te bwai ae e na karaoia am toro.” E taku Akiti nakon Tawita: “Anne bukina ae N na mwiokoiko iai bwa te tia kamanoai n taai nako.”*+
3 Ao e a tia ni mate Tamuera ao a a tia tibun Iteraera n tanginiweneia ao ni kaiia n ana kaawa i Rama.+ Ao e a tia Tauro ni kamwaawaia man te aba taan rorokoia taimonio ao taani kaiwani kanoan taai aika a na roko.+
4 A a ikotaki I-Biritia ao a nako ni katea aia kaembwa i Tunem.+ Mangaia are e a ikotiia tibun Iteraera ni kabane Tauro ao a katea aia kaembwa i Kireboa.+
5 Ngke e nora aia kaembwa I-Biritia Tauro ao e a maaku, ao e a rangi n tata buroona.+
6 E ngae ngke e a tia Tauro n titirakina Iehova,+ ma e aki roko Iehova n te kaekaa teuaei, tao n taiani mii ke n te Urim+ ke rinanoia burabeti.
7 N tokina ao e a taku Tauro nakoia ana toro: “Kakaaea ibukiu te aine ae te tia rorokoia taimonio,+ ao N na nako ni bubutii buokau irouna.” A kaeka ni kangai ana toro nakoina: “Noria! Iai te aine temanna ae te tia rorokoia taimonio ae mena i Entora.”+
8 Mangaia are e a bita teina Tauro ao e karini kunnikai riki tabeua, ao e a nakon te aine arei ngke e a bong ngaia ma ana rorobuaka aika uoman. E taku: “Ko na kaiwa taiaoka ni karaoa ana mwakuri te tia rorokoia taimonio,+ ao ko na kateirakea nakoiu te aomata ae I tuangko.”
9 Ma e taku neierei nakoina: “Ko riai n ataa te baere e karaoia Tauro, n arona ngke e kamwaawaia man te aba taan rorokoia taimonio ao taani kaiwani kanoan taai aika a na roko.+ E aera ngkanne ngkai ko kataia ni kamwaneai bwa N na kamateaki?”+
10 E aki tabwara Tauro ma e a taetae naba n tuea iroun Iehova nakon neierei ni kangai: “Ngkai bon iai Iehova, ao ko na bon aki reke n te bure n te baei!”
11 Ao e taku neierei: “Antai ae N na kateirakea nakoim?” E kaeka ni kangai teuaei: “Kateirakea nakoiu Tamuera.”
12 Ao neierei ngke e nora “Tamuera”*+ ao e kabanea takaruana, ao e taku nakon Tauro: “E aera ngkai ko mwamwanaai? Bon Tauro ngkoe!”
13 E taku te uea nakoina: “Tai maaku, ma tera ane ko noria?” E kaeka ni kangai neierei nakon Tauro: “I nora te aomata ae kaanga ai aron te atua temanna, ae e waerake man te tano.”
14 E waekoa n titirakina neierei ni kangai: “Aekakira taraana?” ao e kaeka neierei ni kangai: “Bon te unimwaane ae waerake, ao e bwainna n te kunnikai.”+ E a ataia ngkanne Tauro bwa bon “Tamuera,” ao e katorobubua ni bobaraaki i aontano.
15 Ao e taku “Tamuera” nakon Tauro: “E aera ngkai ko aki karauai ni kateirakeai?” E kaeka Tauro ni kangai: “I a reke n te kangaanga ae korakora. A a buakanai I-Biritia ao e a kitanai te Atua, ao e a aki manga kaekaai tao rinanoia burabeti ke n taiani mii.+ Anne bukina ae I a weteiko iai bwa ko na tuangai te bwai ae I riai ni karaoia.”+
16 Ao e taku “Tamuera”: “E aera bwa ko a titirakinai ngkai e a kitaniko Iehova n te tai aei,+ ao e a riki bwa te tia kakaaitarako?
17 E na boni karaoa Iehova te baere e a kaman taekinna rinanou: E na raeuaa te tautaeka n uea Iehova mai nanoni baim, ao e na angan raom temanna ae Tawita.+
18 Ibukina bwa ko aki ongo ni bwanaan Iehova ao ko aki kamaunaia tibun Amareka+ ake a rangi ni kaunna, anne bukina ae e karaoa iai te baei nakoim Iehova n te bong aei.
19 E na anga naba tibun Iteraera n ikotaki ma ngkoe Iehova nako nanoni baia I-Biritia,+ ao ane ko na raonai ningabong+ ngkoe ma natim mwaane.+ E na anga naba Iehova ana taanga ni buaka Iteraera nako nanoni baia I-Biritia.”+
20 E a bon einako naba ngkekei Tauro ni bwaka ni borababaua i aontano ao e a rangi ni maaku n ana taeka “Tamuera.” Ai bon akea naba nikirani korakorana irouna, ibukina bwa e aki amwarake ni kabongnga ao ni kangainaa.
21 Ngke e roko neierei iroun Tauro ao e noria bwa e korakora aki rauna, ao e a taku nakoina: “E a tia am toro n ongeaba n te bae ko taekinna, ao I karuanikaia maiuu+ ao I karaoa te baere ko tuangai.
22 Taiaoka ngkai ma ongora n te bwai ae e na taekinna am toro. Kariaia bwa N na kaaki i matam te mwakoro ni bwerena, ao ko na amwarake bwa e aonga n reke korakoram teutana n reitaanako kawaim.”
23 Ma e rawa ao e taku: “N na aki amwarake.” Ma a teimatoa ni kaumakia ana toro ao neierei naba. N tokina ao e a ongo irouia, ao e teirake mai aontano ao e a tekateka i aon te nne ni wene.
24 Iai ana kao te teei neierei ae kamarikaaki ae mena n te auti, ngaia are e waekoa n tiringnga* ao e anaa te burawa ao e kaboboa, ao e umunna bwa te bwerena ae aki karikaki.
25 E angan Tauro ma ana toro, ao a amwarake. Imwin anne ao a teirake ao a nako ngke e a bong.+
Taiani Kabwarabwara Mai Nano
^ Ebera, “te tia kawakina atuu ni boong ni kabane.”
^ Ke, “te bwai ae kaanga taraan Tamuera.”
^ Ke, “kareanna.”
