1 Tamuera 3:1-21
-
Wetean Tamuera bwa e na riki ni burabeti (1-21)
3 Ao e a bebeku te teei ae Tamuera+ iroun Iehova i matan Eeri, ma e burenibwai rokon ana taeka Iehova ni boong akanne, ao e aki rangi n taabangaki te miitara.+
2 N te bong teuana ao e a wene Eeri n ana tabo are e taneiai iai, ao e a rikirake ni maabubu ana taratara, ao e a aki kona n noraaba.+
3 E tuai ni mate ana taura te Atua,+ ao e wene Tamuera n ana tembora*+ Iehova, ike e mena iai ana Ati te Atua.
4 Ao Iehova e wetea Tamuera. E kaeka ni kangai Tamuera: “Aio ngai.”
5 Ao e biri nakon Eeri ao e taku: “Aio ngai, bwa ko weteai.” Ma e taku teuarei: “I aki wewete. Ko na manga wene.” Mangaia are e nako ni wene.
6 E a manga wewete naba Iehova ni kangai: “Tamuera!” Mangaia are e teirake Tamuera ao e nakon Eeri ao e taku: “Aio ngai, bwa ko weteai.” Ma e taku teuarei: “I aki wewete natiu. Ko na manga wene.”
7 (N te tai aei ao Tamuera e tuai n ataa raoi Iehova, ao e tuai ni kaotaki ana taeka Iehova nakoina.)+
8 Mangaia are e a manga wewete naba Iehova n te katentai ni kangai: “Tamuera!” Mangaia are e teirake ao e nakon Eeri ao e taku: “Aio ngai, bwa ko weteai.”
E a ataia ngkanne Eeri bwa bon Iehova ae wewetea te teei.
9 Mangaia are e taku Eeri nakon Tamuera: “Naako weene, ao ngkana e weteiko, ao ko riai ni kangai, ‘Taetae Iehova bwa e kakauongo am toro.’” Ao e nako Tamuera ni wene n ana tabo.
10 E roko Iehova ao e tei ikekei, ao e wewete n aron taai ake tabeua ni kangai: “Tamuera, Tamuera!” Mangaia are e taku Tamuera: “Taetae bwa e kakauongo am toro.”
11 E taku Iehova nakon Tamuera: “Noria! N nang karaoa te bwai teuana i Iteraera ae a na kubanrou* iai aomata nako ake a ongo taekana.+
12 N te bong anne ao N na karaoi nakon Eeri bwaai ni kabane ake I taekin ibukia kaaini batana, mai moana ni karokoa tokina.+
13 Ko na tuangnga bwa N nang karokoa i aoia kaaini batana te motikitaeka ae teimatoa ibukin te bure are e bon ataia,+ bwa a karereantia te Atua natina mwaane,+ ma e aki boaiia.+
14 Anne bukina ae I taetae n tuea iai nakoia kaaini batan Eeri, bwa e na aki kona ni karekeaki kabwaraan aia bure kaaini batan Eeri n taian angakarea ke n taiani karea.”+
15 Ao e wene Tamuera ni karokoa ae ingabong, ao imwina e a kauki mataroan ana auti Iehova. Ao e maaku Tamuera n tuanga Eeri taekan te miitara.
16 Ma e wetea Tamuera ni kangai Eeri: “Tamuera ae natiu!” Mangaia are e taku: “Aio ngai.”
17 E titiraki ni kangai teuarei: “Tera te rongorongo are e taekinna nakoim?” Taiaoka tai karabaa nakoiu. Ke e karaoa anne te Atua nakoim, ao ni kamwaitia riki ngkana ko karabaa nakoiu te taeka teuana mai buakoni bwaai ni kabane ake e taekin nakoim.”
18 Ao Tamuera e tuanga teuaei bwaai ni kabane, ao e aki karabaa te bwai teuana nakoina. E taku Eeri: “Boni mairoun Iehova. Ke e karaoa te bwai ae raoiroi i matana.”
19 E teimatoa n ikawairake Tamuera, ao e memena Iehova iroun teuaei+ ao e aki kariaia bwa a na aki kakoroaki bukin* ana taeka ni kabane.
20 Ao a ataia tibun Iteraera ni kabane mai Tan nako Beerateba ae e a kamatoaaki Tamuera bwa ana burabeti Iehova.
21 Ao e teimatoa ni kaokaoti Iehova i Tiro, bwa e kaokaotia Iehova nakon Tamuera i Tiro, rinanon ana taeka Iehova.+
Taiani Kabwarabwara Mai Nano
^ Ae taekan te umwanrianna ae tabu.
^ Ebera, “tong taningaia.”
^ Ebera, “bwaka i aontano.”
