1 Tamuera 8:1-22
8 Ngke e a kara Tamuera ao e mwiokoiia natina mwaane bwa taani motikitaeka ibukia tibun Iteraera.
2 Aran natina ae ana karimoa bon Ioera, ao aran ana kauoman bon Abiia,+ bon taani motikitaeka i Beerateba.
3 Ma a aki nakonako natina ni kawaina nako. A kani karekei aia raka n te babakanikawai,+ a butimwaei bwaai ni kamaraato,+ ao a kabwaoua te kaetitaeka ae riai.+
4 Imwina riki ao a a bane n ikotaki aia unimwaane tibun Iteraera ao a kawara Tamuera i Rama.
5 A taku nakoina: “Noria! Ko a kara, ao a aki nakonako natim ni kawaim nako. Ko na rinea ngkai ara uea bwa e na momotiki taekara, n aroia natannaomata ni kabane.”+
6 Ma e aki kukurei* Tamuera ngke a kangai: “Karekea ara uea bwa e na momotiki taekara.” Ao e tataro Tamuera nakon Iehova,
7 ao e taku Iehova nakon Tamuera: “Ko na ongo ni bwaai nako ake a taekinna aomata nakoim, bwa tiaki ngkoe ae a rawa nakoim, ma boni ngai ae a rawa bwa N na uea i aoia.+
8 A a karaoa aron are a karaoia man te bong are I kairiia iai ni kaotinakoia mai Aikubita ni karokoa te bong aei. A teimatoa ni kitanai+ ao n toro irouia atua riki tabeman,+ ao anne naba te bwai ae a a karaoia nakoim.
9 Ko na ongo ngkai irouia. Ma ko bon riai n anga te kauring nakoia. Tuangia te bwai ae e kona te uea ae tautaekania n iai riaina ni kairoroiia iai.”
10 Ao Tamuera e tuangia aomata ake a bubutiia karekean te uea, ana taeka ni kabane Iehova.
11 E taku: “Aio te bwai ae iai riain te uea ae tautaeka i aomi ni kairoroia mairoumi:+ Ane e na anaiia natimi mwaane+ ao e na kamenaia n ana kaa ni buaka,+ ao e na karikiia bwa taan toka i aoia ana aoti,+ ao tabeman ane a na biribiri imwaia ana kaa ni buaka.
12 Ao ane e na rineiia ana mataniwi i aoia kaka teuana tenga,+ ao mataniwi i aoia kaka nimangaun,+ ao tabeman a na kamaraua ana tano,+ a na taia ana uaa,+ ao a na karaoi ana bwai ni buaka ma bwain ana kaa ni buaka.+
13 Ane e na anaiia natimi aine bwa taani motiboi,* taani kuuka, ao taan umum.+
14 E na anai ami tawaana aika taiani kabanea n raoiroi, ami nne ni kureebe, ao nnen ami oriwa,+ ao e na angania ana toro.
15 E na anaa katebwinani mwakoron ami uita* ma ami kureebe, ao e na angania ana mataniwi ma ana toro.
16 Ao e na anaiia ami toro aika mwaane ma ami toro aika aine, ami nanai aika taiani kabanea n raoiroi, ao ami taongki, ao e na kabonganai ibukin ana mwakuri.+
17 E na anaa katebwinani mwakoron ami nanai+ ao kam na riki bwa ana toro.
18 Ane e na roko te bong ae kam na tang n tatakarua iai ibukin ami uea are kam rineia,+ ma e na aki kaekaingkami Iehova n te bong anne.”
19 Ma a aki kan ongo aomata n te baere e tuangia Tamuera, ao a taku: “Tiaki ngaia anne, ti a tia ni motikia bwa e na reke te uea i aora.
20 Ao ti na riki bwa ai aroia natannaomata ni kabane, ao e na momotiki taekara ara uea ma ni kairira, ao e na buaka n ara buaka.”
21 Ngke e tia Tamuera n ongo aia taeka ni kabane aomata, ao e a manga taekin nakon Iehova.
22 Ao e taku Iehova nakon Tamuera: “Ko na ongo irouia, ao rinea aia uea ae e na tautaeka i aoia.”+ Ao e taku Tamuera nakoia mwaane aika tibun Iteraera: “Kam riai n oki nakon ami kaawa n tatabemaningkami nako.”
Taiani Kabwarabwara Mai Nano
^ Ebera, “e buakaka i matan.”
^ Ke, “taani karaoi boiarara.”
^ Ke, e kona n nanona “te baare.”
