2 I-Korinto 7:1-16
7 Mangaia ae ngkami aika kam tangiraki, kioina ngkai iai iroura berita aikai,+ ti na kaitiakira mani kamwaraan nako te rabwata ma te nano,*+ ma ni kororaoi n te itiaki ni maakakin te Atua.
2 Kamwaawawai nanomi+ ibukira. Akea ae ti a tia ni kairua nakoina, akea ae ti a tia ni kabuakakaa, akea ae ti a tia n aonikaia.+
3 I aki atonga aei bwa N na kabuakakaingkami. Bwa I a tia n taekinna mai mwaina bwa kam memena i nanora e ngae ngke ti maiu ke ti mate.
4 I aki maaku n taetae nakoimi. I rangi ni kamoamoa iroumi. E rangi ni korakora kabebeteau, ao e taonako kimwareireiu i buakon rawawatara ni kabane.+
5 Ni koauana, ngke ti roko i Maketonia+ ao ti aki rau, bwa ti teimatoa ni karawawataaki n aanga nako, bwa iai te bwainikirinaki mai tinaniku, ao te maaku i nanora.
6 Ma te Atua are kabebetei nanoia ake a rawawata,+ e kabebeteira ni menan Tito iroura,
7 ao tiaki tii ni menana ikai, ma ti kabebeteaki naba ni kabebeteana iroumi, bwa e a manga kaongoira korakoran nanomi ni kantaningaai, ao nanokawakimi ae bati ao ingaingami ibukiu. Ai ngaia ae I a kimwareirei riki iai.
8 Bwa e ngae ngke I kananokawakingkami n au reta,+ ma I aki uringaaba iai. E ngae ngke I uringaaba iai n te moantai, (ngke I noria bwa e kananokawakingkami te reta anne, ma tii i nanon tabeua te tai),
9 ma I a kimwareirei ngkai, tiaki ibukina bwa kam nanokawaki, ma ibukina bwa e kairingkami nanokawakimi nakon te rairannano. Bwa kam nanokawaki n te aro ae boraoi ma ana kantaninga te Atua, bwa kam aonga n aki rotakibuaka n te bwai teuana ibukira.
10 Bwa te nanokawaki ae boraoi ma ana kantaninga te Atua, e karekea te rairannano nakon te kamaiuaki n akea te uringaaba iai,+ ma te nanokawaki ae bwain aon te aba, e karekea te mate.
11 Taraia bwa baikara uaa aika nako man nanokawakimi aei ae boraoi ma nanon te Atua. Ai korakorara ungan nanomi iai, ma kaitiakan aromi, ma marakin nanomi ibukin te kairua, ma maakakin te Atua, ma korakoran nanomi ni kan rairi nanomi, ma ingaingami, ma kani kaetan te kairua!+ Kam kaotingkami n aaro nako bwa kam itiaki ni kaineti ma aei.
12 E ngae ngke I koroboki nakoimi, ma I karaoia tiaki ibukin ane e karaoa ae kairua+ ke ane e karaoaki ae kairua nakoina, ma I koroboki bwa kam aonga ni kaotiota ungan nanomi iroura, ao i matan te Atua.
13 Anne bukina ae ti kabebeteaki iai.
Ma irarikini kabebeteara, e a bati riki kimwareireira ni kimwareirein Tito, ibukini karauan nanona iroumi ni kabane.
14 Bwa ngke arona bwa I a tia ni kamoamoaingkami nakon teuaei, ao I aki kamaamaeaki ibukin te baere tao I taekinna. Ma ngkai a koaua bwaai ni kabane ake ti taekin nakoimi, ao ai arona naba bwa ara kamoamoa nakon Tito e kakoauaaki bwa e boni koaua.
15 Ao e a kabatiaaki riki ana tangira nakoimi ngkai e ururinga ongeabami ngkami ni kabane,+ ao aromi ni butimwaeia ma te karinerine ae korakora.
16 I kimwareirei ngkai I kona n aki nanokokoraki* iroumi ni bwaai ni kabane.
Taiani Kabwarabwara Mai Nano
^ Nora Nanon Taeka, “Taamnei.”
^ Ke tao, “e kona ni kakorakoraaki nanou.”
