2 Rongorongo 19:1-11
19 Ao e okira ana auti* i Ierutarem n akea ana kangaanga*+ Ieotiabata are Uean Iuta.
2 Ao Ieu+ are natin Anani+ are te tia nori miitara, e otinako ni kawaria ao e taku nakon te Uea are Ieotiabata: “E riai bwa ko na buokiia aika buakaka,+ ao e riai bwa ko na tangiriia akana ribaa Iehova?+ E a ekikonako unin Iehova ibukin te baei.
3 Ma bon iai naba baika raoiroi aika noraki iroum,+ ibukina bwa ko kamwaawai kaai aika tabu* man te aba ao ko kaeta nanom* n ukoukora te Atua ae koaua.”+
4 E teimatoa Ieotiabata ni maeka i Ierutarem, ao e a manga otinako naba nako buakoia aomata ni moa mai Beerateba ni karokoa aonon Eberaim+ ae maungaunga, bwa e na kairiia ni kaokiia nakon Iehova ae Atuaia aia bakatibu.+
5 E rineiia naba taani motikitaeka ni kabutaa te aba ni kaawan Iuta aika nonoaki, te kaawa teuana ma teuana.+
6 Ao e taku nakoia taani motikitaeka: “Iangoa raoi te bwai ae kam karaoia, bwa kam aki motikitaeka ibukin te aomata, ma bon ibukin Iehova, ao e memena iroumi ngkana kam motikitaeka.+
7 E bia mena i aomi maakakin Iehova.+ Taratara raoi n te bwai ae kam karaoia, bwa e aki ribuaka,+ e aki inanonano,+ ao e aki butimwaea te bwai ni kamaraato+ Iehova ae Atuara.”
8 Ao Ieotiabata e rineiia naba tabeman tibun Rewi ma ibonga* i Ierutarem ao tabeman mataniwi i aoia aia koraki mairoun tamaia aika tibun Iteraera, bwa a na beku bwa taani motikitaeka ibukin Iehova, ao a na tabeakin aia tangitang kaain Ierutarem.+
9 Ao e tua nakoia ni kangai: “Aio te bwai ae kam riai ni karaoia ni maakakin Iehova, n te kakaonimaki, ao te nano ae tabwanin raoi:*
10 Ngkana a uota te tangitang tarimi aika maeka n aia kaawa, ae irekereke ma te katuturaraa,+ te titiraki ni kaineti ma te tua, te kaetieti, taiani babaire, ke taiani moti, ao kam riai n anga te kauring nakoia bwa a aonga n aki reke n te bure i matan Iehova, bwa e kaawa n roko unna n ekingkami nako ma tarimi. Aio te bwai ae kam riai ni karaoia bwa kam aonga n aki reke n te bure.
11 Ao aio Amaria ae te mataniwi n ibonga* ae e tararuaingkami ni bwaai nako aika irekereke ma Iehova.+ Ao Tebaria are natin Itimaera boni ngaia te tia kairiri i aoia tibun Iuta ni kaineti ma bwaai nako aika irekereke ma te uea. Ao a na riki tibun Rewi bwa mataniwi ibukimi. Kam na korakora ao waaki, ao ke e memena Iehova irouia akana kakaraoa ae raoiroi.”*+
Taiani Kabwarabwara Mai Nano
^ Ke, “baareti.”
^ Ke, “ma te raoi.”
^ Nora Nanon Taeka.
^ Ke, “e kamatoaaki nanom.”
^ Nora Nanon Taeka.
^ Ke, “te tangira ae tabwanin raoi.”
^ Nora Nanon Taeka, “Mataniwi n ibonga.”
^ Ke, “ma te bwai ane raoiroi.”
