2 Rongorongo 35:1-27
35 E karaoa te Toa ae te Riao+ Iotia nakon Iehova i Ierutarem, ao a tiringa te karea ibukin te Toa ae te Riao+ n te ka-14 ni bong n te moan namwakaina.+
2 E mwiokoiia ibonga* n tabeia ao e kaungaia bwa a na karaoa aia beku n ana auti Iehova.+
3 Ao e taku nakoia tibun Rewi, ake taan reireinia tibun Iteraera ni kabane,+ ake te koraki ake a itiaki* i matan Iehova: “Kaaki te Ati ae tabu n te auti are e kateia Toromon are natin Tawita are uean Iteraera,+ kam nang aki manga uouotia i aon angami.+ Kam na beku ngkai iroun Iehova ae Atuami ao ana aomata aika tibun Iteraera.
4 Ao katauraoingkami ni kaineti ma ami koraki mairouia tamami n ami koraki aika kakaokoro, ni kakairi n are e koreaki iroun Tawita+ are Uean Iteraera ao natina are Toromon.+
5 Rinnako n te tabo ae tabu, ao teei n ami koraki nako, n te aro are kam na kona ni beku ibukia aomata ao ni karaoa te mwakuri are reke irouia tibun Rewi ake n aia utu tamami.
6 Tiringa te karea ibukin te Toa ae te Riao+ ao katabuingkami* ao katauraoi ibukia tarimi bwa kam aonga ni kakororaoa ana taeka Iehova rinanoni Mote.”
7 Ao Iotia e anga taian nanai aika tiibutetei aika mwaane, ao kooti mwaane aika ataei, nakoia aomata, bwa taiani karea ibukin te Toa ae te Riao ibukia te koraki ake a bane ni mena ikekei, ao botaia bon 30,000, n ikotaki naba ma kaao aika 3,000. Aikai boni mai buakon ana bwai te uea.+
8 Ao ana aomata ake tooka a anga naba te angabwai bwa te karea ni kan anga ibukia aomata, ibonga, ao tibun Rewi. Ao Irekia,+ Tekaria, ma Ieiera, ake taani kairiri n ana auti te Atua ae koaua, a anga nakoia ibonga karea aika 2,600 ibukin te Toa ae te Riao ao kaao aika 300.
9 Ao Konania ma tarina aika Temaia ao Netanera, n ikotaki ma Atiabaia, Ieeiera, ao Iotabata, ake aia mataniwi tibun Rewi, a anga nakoia tibun Rewi karea aika 5,000 ibukin te Toa ae te Riao ao kaao aika 500.
10 Ao e a katauraoaki te mwakuri ao a a tei ibonga n aia tabo, ao tibun Rewi n aia koraki aika kakaokoro,+ n aron are e tua te uea.
11 A tiringi karea ibukin te Toa ae te Riao+ ao a katimtimwa te raraa ibonga are a karekea mairouia nakekei,+ ngke a tabe tibun Rewi ni kuoti kunia maan.+
12 Imwina ao a katauraoi taiani karea ni kabuekaki n te aro are a na tibwatibwai nakoia nikiraia aomata, ake a kakaokoroaki n aia koraki mairoun tamaia, bwa a aonga ni karean nakon Iehova n aron are e koreaki n ana boki Mote, ao a karaoa naba aekakin anne nakoia kaao.
13 A kamwaa* te karea ibukin te Toa ae te Riao i aon te ai ni kaineti ma te katei,+ ao a kamwai taiani karea aika tabu n taiani bwaata, bwaata aika mronron ni bubura, ao taiani baan, ao imwina a waekoa n uotii nakoia nikiraia aomata ni kabane.
14 Ao a karaoa te katauraoi i bon ibukia ao ibukia ibonga, ibukina bwa a karean taiani karea ni kabuekaki ao mwakorokoroni mwaete ibonga ake kanoan Aaron ni karokoa ae e a kaani bong, ngaia are a katauraoi tibun Rewi bon ibukia ao ibukia ibonga, ake kanoan Aaron.
15 Ao taan anene ake tibun Ataba,+ a mena ni nneia ni kaineti ma ana tua Tawita,+ Ataba,+ Eman, ao Ierutun+ are ana tia nori miitara te uea. Ao taan teiakina mataroan te oo a mena ni mataroan te oo aika kakaokoro.+ A aki riai ni kitana aia beku, ibukina bwa tariia ake tibun Rewi a katauraoi ibukia.
16 Mangaia are a a bane n tia n te bong anne mwakuri ibukin Iehova, ake a kainnanoaki ibukini karaoan te Toa ae te Riao+ ma kareanakin taiani karea ni kabuekaki i aon ana baonikarea Iehova, ni kaineti ma are e tua te Uea are Iotia.+
17 A karaoa te Toa ae te Riao n te tai anne tibun Iteraera ake a mena ikekei ao te Toa ae te Bwerena ae Aki Karikaki i nanon itibong.+
18 E tuai mani kakaraoaki te Toa ae te Riao ae aron aei i Iteraera, man ana bong Tamuera are te burabeti, ao akea naba temanna uean Iteraera ae e a tia ni karaoa te Toa ae te Riao n aron ae e karaoia Iotia,+ ibonga, tibun Rewi, ao kaain Iuta ma kaain Iteraera ni kabane ake a mena ikekei, ao kaain Ierutarem.
19 E karaoaki te Toa ae te Riao aei n ana ka-18 n ririki n tautaeka Iotia.
20 Imwini baikai ni kabane ngke e a tia Iotia ni katauraoa te tembora,* ao e a roko Neko+ ae Uean Aikubita bwa e na buaka i Karekemiti n te Iuberetiti. Ao e a otinako Iotia ni kaitaraa teuaei.+
21 Ngaia are e kanakoia teuaei taan uataeka nakoina, ni kangai: “Tera irekerekem n aei ngkoe ae uean Iuta? I aki roko n ekikonako n te bong aei, ma N na buakana te natannaomata teuana, ao e taku te Atua bwa I riai ni kawaekoa. Ko na aki kaitaraa te Atua ae mena irou ibukini kabwaiam, bwa mwina e kamaunako.”
22 Ma e ngae n anne, e aki roko Iotia n te tannako mairoun teuaei, ma e bita teina+ ao e nako ni buakanna ao e aki kan ongo n ana taeka Neko, ake a nako mai win te Atua. Mangaia are e a roko bwa e na buaka n te Mwarua ae Mekito.+
23 Ao a katebea te Uea ae Iotia taani katebe, ao e taku te uea nakoia ana toro: “Kaotinakoai mai ikai, bwa I a ikoaki kakaiaki.”
24 Mangaia are a kaotinakoa ana toro man te kaa ni buaka ao a katokaa n ana kauoua ni kaa ni buaka ao a uotia nako Ierutarem. Mangaia are e a mate ao e kaiiaki n ruanimateia ana bakatibu,+ ao a tanginiweneia Iotia kaain Iuta ni kabane ao kaain Ierutarem.
25 Ao e anene n tanginiwenei Ieremia+ ibukin Iotia, ao a anenenei aia anene aika kananokawaki* ibukin Iotia ni karokoa te bong aei taan anene ni kabane aika mwaane ma aine,+ ao e karaoaki te moti bwa a na aneneneaki i Iteraera, ao a koreaki i buakon anene aika kananokawaki.
26 Ni kaineti ngkanne ma nikiran rongorongon Iotia ma ana mwakuri ake e kaota iai te tangira ae koaua,* n arona ni kawakini baike a koreaki n ana Tua Iehova,
27 ao te baere e karaoia, mai moana ni karokoa tokina, a koreaki n aia Boki Uean Iteraera ma Uean Iuta.+
Taiani Kabwarabwara Mai Nano
^ Nora Nanon Taeka.
^ Ke, “tabu.”
^ Ke, “kaokoroingkami ibukin te Atua.”
^ Ke tao, “umuna.”
^ Ebera, “auti.”
^ Ke, “anene n tanginiwenei.”
^ Ke, “te tangira ae kona n onimakinaki.”