2 Rongorongo 4:1-22
4 Ao e karaoa te baonikarea ae te buraati,+ ae 20 te mwanokunibai abwakina, 20 te mwanokunibai raababana, ao 10 te mwanokunibai rietana.
2 E karaoa nnen te ran ae buburakaei ae arana Taari+ ae te biti ae kaburoaki n atoaki. E mronron teina, ao bon 10 te mwanokunibai man tarana teuana nakon tarana are teuana, ao 5 te mwanokunibai rietana, ao bon 30 te mwanokunibai abwakin te kora ni baire ae e kona ni katobibiaki iai mronronna.+
3 Ao iai bwaai ni katamaroa aika mronron+ aika mena i aana ni katobibia ni kabutaa, tebwina n teuana te mwanokunibai, ni katobibia Taari. Bon uoua rinanin bwaai ni katamaroa aika mronron aika kaburoaki n atoaki n tii teuana ma ngaia.
4 Ao e toka i aoni kaao mwaane aika 12,+ a kaitaraa meang 3, a kaitaraa maeao 3, a kaitaraa maiaki 3, ao a kaitaraa mainiku 3. E toka Taari i aoia, ao bukia ni kabane a kaineta nuka.
5 Ao matentenna bon raababan te rauraunibai,* ao e karaoaki tarana ae kaanga taran te mwangko, kaanga te kiebu ae e a raure ueena. E kona n taua* 3,000 te bwai ni baire ae te bwate.*
6 Irarikin anne, e karaoi naba beetin aika tebwina ibukin te kaitiaki ao e kaaki nimaua n te angaatai ao nimaua n te angamaing.+ A teteboki iai baika kabonganaaki ibukin te karea ni kabuekaki.+ Ma Taari bon ibukia ibonga* bwa a na teboki baia ma waeia iai.+
7 Ao e karaoi kaintaura aika tengaun aika koora+ n aron taekaia+ ao e kaaki n te tembora, nimaai n te angaatai ao nimaai n te angamaing.+
8 E karaoi naba taibora aika tebwina ao e kaaki n te tembora, nimaua n te angaatai ao nimaua n te angamaing,+ ao e karaoi boora aika koora aika 100.
9 Ao e karaoa aia katawanang+ ibonga+ ao te katawanang are bubura+ ao mataroan te katawanang, ao e kanimwa te buraati n rabuni iai mataroaia.
10 Ao e kaaki Taari man te angaatai, ni kaitaraa maiakimainiku.+
11 E karaoi naba Iram nnen taiani mannang, tiaabora, ao taiani boora.+
Mangaia are e katiai mwakuri Iram ake e karaoi ibukin te Uea ae Toromon, ni kaineti ma ana auti te Atua ae koaua.+
12 E karaoi boua ake uaai+ ao tiabita* ake kaanga tein te boora ake a mena i aoni boua ake uaai mai eta, ao warawara ake uoua+ ake a unekenekei tiabita ake uoua ake kaanga tein te boora, ake a mena i aon taiani boua mai eta,
13 bamkuranete+ ake 400 ibukini warawara ake uoua, bon uarinan taiani bamkuranete* ibukin te warawara teuana ma teuana, bwa e na unekenekei tiabita ake uoua ake kaanga tein te boora, ake a mena i aoni boua akekei,+
14 kaa n uabwai aika kokokaki* ake tebwina ao beetin ake tebwina ake i aoni kaa n uabwai,+
15 Taari ao kaao mwaane ake 12 ake i aana,+
16 ao nnen taiani mannang, tiaabora, kainiwaiteke,+ ao bwaai ni mwakuri riki tabeua ake e karaoi Iramabiwa+ man te buraati ae karaneaneaaki, ibukin te Uea ae Toromon ibukin ana auti Iehova.
17 E kaburoi n atoi te uea n aonon te Ioretan n te bokaboka ae matenten i marenan Tukota+ ma Teretaa.
18 E karaoi bwaai ni mwakuri aikai ni kabane Toromon n te aro ae e a bon rangi ni bati, bwa e aki ataaki naba rawawatan te buraati.+
19 E karaoi Toromon bwain nako+ nanon ana auti te Atua ae koaua, ae te baonikarea ae te koora,+ taibora+ aika toka i aoia te bwerena ae kaotiotaki,+
20 kaintaura aika koora ni koaua ma tauraia,+ bwa a na ura i matan te Ruu ae Moan te Tabu ni kaineti ma taiani kaetieti,
21 ao taian uee, taura, ao taati ake a kabonganaaki ibukin tauani wikina, ake koora ni koaua aika taiani kabanea n raoiroi,
22 taati ibukini kamatean taura, boora, mwangko, ao baan ake nneni mwaakaron te ai, bon taiani koora ni koaua, ao mataroan te auti, mataroana ake i nanona nakon te Ruu ae Moan te Tabu,+ ao mataroan naba te Ruu ae Tabu,* bon taiani koora.+
Taiani Kabwarabwara Mai Nano
^ Ke, “Kanoana bon.”
^ Nora Nanon Taeka.
^ Nora Nanon Taeka.
^ Nora Nanon Taeka.
^ Ke, “kaa n ran.”
^ Ebera, “te tembora.” N taraana ao e kaineti aei nakon te Ruu ae Tabu.
