2 Tamuera 1:1-27
1 Imwini maten Tauro, ngke e a oki rikaaki Tawita mani kataenikaiaia* tibun Amareka, ao e tiku uabong Tawita i Tikeraka.+
2 N te katenua ni bong, ao e a roko te mwaane temanna man ana kaembwa Tauro ma kunnikaina ae raeuaaki ao e mena te tano i aon atuna. Ngke e kawara Tawita ao e katorobubua ni bobaraaki i aontano.
3 E titirakinna Tawita ni kangai: “Ko nako mai ia?” E kaeka teuarei ni kangai: “I birinako man aia kaembwa tibun Iteraera.”
4 E titirakinna Tawita ni kangai: “Tera ae riki? Taiaoka tuangai.” Ao e taku teuarei: “A birinako aomata man te buaka ao a bati aika bwaka ma ni mate. Ao e mate naba Tauro ma natina are Ionatan.”+
5 Ao Tawita e titirakina te rorobuaka n ataei are uota nakoina te rongorongo ni kangai: “Ko kangaa n ataia bwa e mate Tauro ma natina are Ionatan?”
6 E taku te rorobuaka n ataei arei: “I a tii karina naba ni mena i aon te Maunga ae Kireboa,+ ao ngaia e mena naba ikekei Tauro n raraa ana kainiwai, ao e a ooaki n taiani kaa ni buaka ma taan toka i aoia aoti.+
7 Ngke e rairaki ao e norai, ao e weteai, ao I taku, ‘Aio ngai!’
8 E titirakinai ni kangai, ‘Antai ngkoe?’ Ao I kaeka ni kangai, ‘Bon tibun Amareka ngai.’+
9 E taku ngkanne nakoiu, ‘Taiaoka ma teei i etau ao kamateai bwa I a korakai ni maraki, ma I bon teimatoa naba ni maiu.’
10 Mangaia are I tei i etana ao I kamatea,+ bwa I ataia ae e a aki kona ni maiu imwin ikoakina ae kakaiaki. Ao I anaa ana baunuea are i atuna ma te tauanibai are i anganibaina, ao I uotiimai nakoim au toka.”
11 Ngaia are e raeuai kunnikaina Tawita, ao a karaoa naba anne mwaane ni kabane ake raona.
12 Ao a tanginiwenei ma n tang ao a aki mamatam+ ni karokoa ae bong ibukin Tauro, ibukin natina are Ionatan, ibukia ana aomata Iehova, ao ibukia tibun Iteraera,+ ibukina ngke a bwaka n te kabaang.
13 Ao Tawita e titirakina te rorobuaka n ataei are uota nakoina te rongorongo ni kangai: “Kaain ia ngkoe?” E taku teuarei: “Boni ngai natin te aomata ae maeka n iruwa, ae tibun Amareka.”
14 E taku ngkanne Tawita nakoina: “Bukin tera bwa ko aki maaku n tabeka baim ni kamatea ana kabiraki Iehova?”+
15 Ngaia are e a wetea te rorobuaka n ataei temanna Tawita ao e taku: “Keerake ao kamatea teuanne.” Mangaia are e orea teuarei ni kamatea.+
16 E taku Tawita nakon teuarei: “E mena raraam i aon atum, ibukina bwa e a tia wim ni kaotioti n ekikonako ni kangai: ‘Boni ngai ae I kamatea ana kabiraki Iehova.’”+
17 E anenea te anene ae kananokawaki* aei Tawita ibukin Tauro ma natina are Ionatan,+
18 ao e taku bwa a riai tibun Iuta n reireinaki te anene ae kananokawaki ae arana “Te Kainikatebe,” ae koreaki taekana n ana boki Iatia:+
19 “A a wene ni mate aomata aika karineaki i aon ami tabo aika rietata,+ ngkami aika tibun Iteraera.
Akea bwa a a bwaka aomata aika korakora!
20 Tai tataekinna i Kate.+
Tai katanoataa ni kawain nako Atikeron,Bwa a kaawa ni kimwareirei aine aika natiia I-Biritia,Bwa a kaawa ni kakatonga aine aika natiia mwaane aika aki korotobibiaki.
21 Ngkami aika maungani Kireboa,+E bia aki manga roko i aomi te aoi ke te karau,Ao a na aki naba karikii uaa aika kona ni kareanaki nakon te Atua ami tawaana,+Ibukina bwa a kamwaraeaki ikanne aia otanga aomata aika korakora,
E a aikoa kabiraki n te bwaa ana otanga Tauro.
22 E aki rairakinako ana kainikatebe Ionatan+Ao e aki naba oki rikaaki ana kabaang Tauro n aki tokanikai+Man raraaia akana kamateaki, ao man irikoia aomata akana korakora.
23 Bon aomata aika tangiraki ma n nabeaki* Tauro ma Ionatan,+ i nanon aia tai ni maiu,Ao a aki maenako naba n te mate.+
A birimwaaka riki nakoia ikare,+A korakora riki nakoia raian.+
24 Ngkami aika aine aika natiia tibun Iteraera, tanginiwenei ibukin Tauro,Are e kunnikaingkami ni kunnikai aika katamaroaaki aika uraroo,Are e kaaki bwaai ni katamaroa aika koora i aon ami kunnikai.
25 Akea bwa a a bwaka n te buaka aomata aika korakora!
E wene ni mate Ionatan i aon ami tabo aika rietata!+
26 I rawawata ibukim, tariu ae Ionatan,Ko rangi n tangiraki irou.+
E tamaroa riki tangirakiu iroum nakon aia tangira aine.+
27 Akea bwa a a bwaka aomata aika korakoraAo a a maunanako bwaai ni buaka!”
Taiani Kabwarabwara Mai Nano
^ Ke, “kamateaia.”
^ Ke, “te anene n tanginiwenei.”
^ Ke, “kakukureia te aba.”
